Lesona 12: Fotopampianarana sy Fanekempihavanana 2; Joseph Smith—Tantara 1:27–65

Fotopampianarana sy Fanekempihavanana 2 Joseph Smith—Tantara 1:27–65

Hitodika amin’ireo razambentsika ny fontsika

Rehefa niseho tamin’i Joseph Smith ny anjely Môrônia, izay mpaminany ao amin’ny Bokin’i Môrmôna, dia nitanisa faminaniana maro ao amin’ny soratra masina izy. Ny anankiray dia ny fanambaran’i Malakia fa hiverina i Elia mpaminany ary “ny fon’ny zanaka dia hitodika amin-drainy” (Joseph Smith—Tantara 1:38–39). Afaka manampy ny mpianatra handray anjara amin’ny faminanian’ny Tompo momba ny fampitodihana ny fon’izy ireo amin’ny razamben’izy ireo ity lesona ity.

Ireo sahanasa fianarana azo atao

Ny fianakaviako

Hevero ny hanasa ny mpianatra hanao ity sahanasa manaraka ity mba hanampiana ny mpianatra hieritreritra momba ny razamben’izy ireo sy ny antony hanaovantsika tantaram-pianakaviana.

Fanamarihana: Miaina toe-javatra sarotra ny sasany amin’ny mpianatra ao amin’ny fianakaviana. Aoka ianao haneho fiahiana ireo izay mety manana olana, toy ny hoe ny hifandraisan’izy ireo mandrakizay amin’ny fianakavian’izy ireo na ny tsy fahafantarana ny fianakaviana niavian’izy ireo.

Mety hanampy ny hizarana ny Loharanom-pitaovana fanampiny hoe: “Ahoana no ahafahan’ny asa atao any amin’ny tempoly sy ny tantaram-pianakaviana manampy amin’ny fanasitranana ny fifandraisan’ny fianakaviana?”

Manorata olona betsaka araka izay tadidinao ao amin’ny tetiaranao. Jereo hoe taranaka firy no azonao ampidirina.

• Ahoana no nitondran’ireo olona ireo fiovana teo amin’ny fiainanao?

• Inona no zavatra niainana manan-danja azonao zaraina momba ny iray amin’ireo olona ao amin’ny fianakaviana ireo?

Ampio hahatakatra ny mpianatra fa ny sasany amin’ny mpianatra ny fandraisana anjara amin’ny tantaram-pianakaviana sy ny asa atao any amin’ny tempoly fomba iray ahafahan’izy ireo manatanteraka ny drafitry ny Ray any An-danitra hampiray ny zanany mandrakizay. Mba hanampiana ny mpianatra hanombana ny zavatra tsapan’izy ireo momba ny fandraisana anjara amin’ny tantaram-pianakaviana, dia hevero ny hampiasa ireto fanehoan-kevitra manaraka ireto.

Iza amin’ireto teny nambara manaraka ireto no ahitana taratra indrindra ny fahatsapanao momba ny tantaram-pianakaviana?

• Tia manao tantaram-pianakaviana aho ary mahita antony mazava anaovana izany.

• Fantatro fa zava-dehibe ny tantaram-pianakaviana saingy tsy dia mandany fotoana be anaovana izany aho.

• Fantatro fa zava-dehibe ny tantaram-pianakaviana, saingy olona hafa ao amin’ny fianakaviana no avelako hanao izany.

• Tsy tena mahita antony mazava anaovana tantaram-pianakaviana aho.

Amporisiho ny mpianatra hanombana ny fiovan’ny fahatsapana ananan’izy ireo momba ny tantaram-pianakaviana sy ny asa atao any amin’ny tempoly rehefa mandalina ny Fotopampianarana sy Fanekempihavanana 2.

Mampianara amin’ny alalan’ny Fanahy: Mba hahazoana fanofanana misimisy kokoa amin’ny famoronana fanombanan-tena ho an’ny mpianatra, dia jereo ilay fanofanana mitondra ny lohateny hoe: “Mamoròna sehatra sy fahafahana ho an’ireo mpianatra mba ho ampianarina amin’ny alalan’ny Fanahy Masina izy ireo,” izay hita ao amin’ilay fampiofanana Fahaiza-manao ho fampivoarana ny mpampianatra: Mampianara amin’ny alalan’ny Fanahy.

Ny fiverenan’i Elia mpaminany

Mba hanomezana ny sahan-kevitry ny Fotopampianarana sy Fanekempihavanana 2, dia azonao atao ny mampiseho sarin’ny anjely Môrônia niseho tamin’i Joseph sy manasa ny mpianatra hitantara ny zavatra tadidin’izy ireo momba ny fitsidihany. Zavatra azo atao hanoloana izany: azonao atao ny mizara ireto andiam-pehezan-teny manaraka ireto amin’ny alalan’ny teninao manokana na manasa mpianatra iray hamaky azy ireo mafy.

Nitanisa faminaniana fahiny maro izay voarakitra ao amin’ny Baiboly i Môrônia rehefa niseho tamin’i Joseph Smith fony izy 17 taona izy. Nanambara kokoa momba ny asa hataon’i Joseph ary nahitana tranga izay hiseho aloha sy aorian’ny Fiavian’ny Mpamonjy Fanindroany ireny faminaniana ireny.

Faminaniana iray ao amin’ny Testamenta Taloha nolazain’i Môrônia ny Malakia 4:5–6. Ny tenin’i Môrônia dia voarakitra ao amin’ny Joseph Smith—Tantara 1:38–39 sy ny Fotopampianarana sy Fanekempihavanana 2, izay manambara fa i Elia mpaminany dia hiverina etỳ an-tany alohan’ny Fiavian’ny Mpamonjy Fanindroany.

Mety hahaliana ny mpianatra ny hahalala fa ny fiverenan’i Elia dia voalaza ao amin’ny soratra masina tsirairay (jereo ny Malakia 3:23–24; 3 Nefia 25:5–6; Fotopampianarana sy Fanekempihavanana 2; Joseph Smith—Tantara 1:38–39). Asao ny mpianantra hamaritra ny teny sy andian-teny rehetra izay mety tsy ho azon’izy ireo rehefa mamaky ireto andininy manaraka izy ireo.

Vakio ny Fotopampianarana sy Fanekempihavanana 2, ary tadiavo ny antony maha-zava-dehibe ny fiverenan’i Elia amin’ireo zanaky ny Ray any An-danitra (jereo ihany koa ny Fotopampianarana sy Fanekempihavanana 128:17–19).

• Inona no fanontaniana anananao momba ireo andininy ireo?

  Afaka manampy, ireto manaraka ireto, amin’ny famaliana ny fanontanian’ny mpianatra momba ny Fotopampianarana sy Fanekempihavanana 2:

  • “Ny Fisoronana, amin’ny tanan’i Elia” (andininy 1) dia entina ilazana ilay hery famehezana naverin’i Elia tamin’ny laoniny tao amin’ny Tempolin’i Kirtland tamin’ny 3 aprily 1836 (jereo ihany koa ny Fotopampianarana sy Fanekempihavanana 110:13–16).

  • “Ny andron’ny Tompo, andro lehibe sady mahatahotra” (andininy 1) dia entina ilazana ny Fiavian’ny Mpamonjy Fanindroany.

  • “Ny fampanantenana natao tamin’ny ray” (andininy 2) dia azo ilazana ny Fanekempihavanan’i Abrahama sy ny fampanantenana natao tamin’i Abrahama, i Isaka, ary i Jakoba (jereo ihany koa ny Fotopampianarana sy Fanekempihavanana 27:9–10).

  • Amin’ny alalan’ny asa atao any amin’ny tempoly sy ny tantaram-pianakaviana no fomba iray itodihan’ny fon’ny zanaka amin’ny rain’izy ireo.

  • Tsy ho tanteraka ny tanjon’ny tany raha tsy misy ny famehezana ny fianakaviana; ny tany dia “hofongorana tanteraka” (andininy 3; jereo ihany koa ny Fotopampianarana sy Fanekempihavanana 128:17–19).

• Inona no mety ho fiantraikan’ny fiverenan’i Elia amin’ireo fianakaviana?

• Inona avy no fahamarinana hitanao ao amin’ny Fotopampianarana sy Fanekempihavanana 2?

Azon’ny mpianatra soratana eny amin’ny solaitrabe ny fahamarinana hitan’izy ireo. Ankoatra ny zavatra hafa dia mety ho tafiditra ao anatin’ireo fahamarinana ireo ny hoe: Andriamanitra dia nampanantena ny handefa an’i Elia hamerina amin’ny laoniny ny hery famehezan’ny fisoronana etỳ an-tany alohan’ny Fiaviana Fanindroany (jereo ny andininy 1). Azo atodika amin’ireo razambentsika ny fontsika ary afaka manatanteraka ôrdônansy ho azy ireo ao amin’ny tempoly isika (jereo ny andininy 2). Raha tsy misy ilay hery hampiraisana ny fianakaviana mandrakizay, dia tsy ho tanteraka ny tanjona hisian’ny tany (jereo ny andininy 3).

Hitodika amin’ireo raintsika ny fontsika

Ilay andian-teny hoe “hitodika amin’ny rain[tsika] ny fon[tsika] … ” (Fotopampianarana sy Fanekempihavanana 2:2) dia azo ilazana manokana an’i Abrahama sy i Isaka ary i Jakoba, ireo “rain’ny” Mpianakavin’i Isiraely. Ampiasaina matetika mba hilazana ny razambentsika rehetra io andian-teny io ankehitriny —ireo reny, ireo ray, ary ireo fianakaviantsika manontolo mandritra ny taranaka rehetra mifandimby.

• Inona avy no zavatra niainanao mifandray amin’ny tempoly sy ny tantaram-pianakaviana izay nanampy anao hampitodika ny fonao tamin’ireo fianakavianao?

• Ahoana no ahafahan’ny fampitodihana ny fontsika amin’ireo fianakaviantsika manampy amin’ny fampitodihana ny fontsika amin’ny Mpamonjy?

Hevero ny hanasa ny mpianatra hilaza fomba ahafahan’izy ireo mandray anjara na efa nandraisan’izy ireo anjara tamin’ny asa atao any amin’ny tempoly sy ny tantaram-pianakaviana mba hanampiana azy ireo hieritreritra fomba ahafahan’izy ireo mampitodika ny fon’izy ireo. Azonao atao ny manao lisitra eny amin’ny solaitrabe ny sosokevitr’izy ireo mba anampiana ireto hevitra manaraka ireto raha ilaina. Omeo fotoana mandritra ny fotoam-pianarana ny mpianatra mba hanombohan’izy ireo miasa amin’ny sahanasa nosafidin’izy ireo.

Safidio am-bavaka ny sahanasa iray izay hanampy anao hanatanteraka ny faminanian’ny Tompo momba ny fampitodihana ny fonao amin’ny olona ao amin’ny fianakavianao. Isan’ny hevitra azo aroso ireto:

• Manomàna fanontaniana azonao apetraka amina zokiolona iray ao amin’ny fianakaviana momba ny fahatanorany na ny zavatra nianarany nandritra ny fiainany. Miraketa resadresaka atao amin’ny olona ao amin’ny fianakavianao avy eo.

• Manorata na mizarà tantara manan-danja avy amin’ny tantaram-pianakavianao. Ohatra, mety ho azonao raketina ny fomba nidiran’ny olona voalohany ao amin’ny fianakavianao ho mpikambana ao amin’ny Fiangonana.

• Ampiasao ny FamilySearch.org na ny application Arbre familial mba:

  • Hijerena ny hazon-tetiaranao sy hahafantarana ny fifandraisanao amin’ireo razambenao.

  • Hampidirana sarim-pianakaviana, ahitana ny anaran’ny isam-batan’olona isaky ny sary.

  • Hiraketana tantara na fahatsiarovana tiana indrindra momba ny olona ao amin’ny fianakaviana.

  • Hamantarana ny olona efa maty ao amin’ny fianakaviana izay afaka mandray ny ôrdônansin’ny tempoly. (Safidio ny hoe Tempoly, avy eo ny Ôrdônansy efa vonona.)

• Manomàna fotoana hanatrehan’ny fianakavianao, na vondrona namana, na vondron-jatovo ny tempoly. Miaraha miasa mitady anaran’olona efa maty ao amin’ny fianakaviana izay mila mandray ôrdônansin’ny tempoly. Asao hanompo ny Tompo amin’ny alalan’ny fanampiana amin’ny fanatanterahana ireo ôrdônansy masina ny olona ao amin’ny fianakaviana.

Amporisiho hamita ny sahanasa nosafidin’izy ireo ny mpianatra. Mety ho tian’izy ireo ny hampandray anjara ny olona ao amin’ny fianakavian’izy ireo na naman’izy ireo akaiky amin’izany dingana izany. Azonao atao ny manomana fotoana hanaovan’ny mpianatra tatitra momba ny fandrosoan’izy ireo na hizaran’izy ireo ny zavatra niainan’izy ireo amin’ny iray kilasy.

Loharanom-pitaovana fanampiny

Fotopampianarana sy Fanekempihavanana 2:3. Inona no dikan’izany hoe “hofongorana tanteraka ny tany manontolo”?

Ny andian-teny hoe hofongorana tanteraka dia midika hoe “horavana tanteraka na tsy hisy ilana azy intsony” (“Line Upon Line: Joseph Smith—History 1:39,” New Era, Oct. 2014, 11).

Nampianatra toy izao ny Filoha Joseph Fielding Smith (1876–1972):

Raha tsy tonga i Elia, dia voatarika hino isika fa ny asa rehetra tany amin’ny fotoana lasa dia tsy dia misy ilana azy, satria nilaza ny Tompo fa ny tany manontolo, amina toe-javatra toy izany, dia hofongorana manontolo. … Hanjaka amin’izany andro hiavian’ny Tompo izany ny fifanjevoana sy korontana raha tsy eto an-tany io hery famehezana io, ary mazava ho azy fa tsy afaka ny hisy izany, satria ny zavatra rehetra dia fehezin’ny lalàna tonga lafatry ny fanjakan’ Andriamanitra.

Nahoana no hofongorana ny tany? Tsotra, satria raha tsy misy masombỳ mamehy matanjaka eo amin’ny ray sy ny zanaka—izay asa ho an’ny maty—dia holavina avokoa isika rehetra; tsy hahomby ny asan’ Andriamanitra iray manontolo ary hofongorana tanteraka. Mazava ho azy fa tsy hisy ny toe-javatra toy izany. (Joseph Fielding Smith, Teachings of Presidents of the Church [2013], 219)

Fotopampianarana sy Fanekempihavanana 2:2. Iza avy “ny ray”, ary inona no fampanantenana nataon’ny Tompo tamin’izy ireo?

Nanazava ny Filoha Russell M. Nelson hoe:

Mamaky ny fampanantenan’i Malakia isika any amin’ny lahatsoratra mamarana ny Testamenta Taloha, fa i Elia dia “hampody ny fon’ny ray ho amin’ny zanaka, ary ny fon’ny zanaka ho amin’ny rainy” (Malakia 3:24). Tao Isiraely fahagola, ahitana ireo ray, dia i Abrahama sy Isaka ary Jakoba ny firesahana momba ireo ray toy izany. [Jereo nyFotopampianarana sy Fanekempihavanana 27:9–10.] (Russell M. Nelson, “Ny fanekempihavanana maharitra mandrakizay,” Liahona, ôkt. 2022, 6–7)

Razambentsika i Abrahama sy i Isaka ary i Jakoba. Isan’ny Isiraely isika. Manana ny zo isika handray ny filazantsara, sy ireo fitahiana avy amin’ny fisoronana, ary ny fiainana mandrakizay. … Mahazo ireo fitahiana nampanantenaina ireo ireo taranaka ara-bakitenin’i Abrahama sy ireo izay nangonina ka natsangana ho ao amin’ny fianakaviambeny, izay mifototra amin’ny fanekena ny Tompo sy ny fankatoavana ireo didiny. (Russell M. Nelson, “Children of the Covenant,” Ensign, May 1995, 33)

Nahoana aho no tokony handray anjara amin’ny asa fanaovana tantaram-pianakaviana?

Nanoro hevitra toy izao ny Loholona David A. Bednar ao amin’ny Kôlejin’ny Apôstôly Roambinifolo:

Tsy kisendrasendra ny fahatongavan’ny FamilySearch sy ireo fitaovana hafa amin’izao fotoana izao izay fotoana maha havanana an’ireo tanora eo amin’ny lafin’ny teknôlôjia ara-pahalalam-baovao sy ara-pifandraisana amin’ny endriny maro. Voaofana handefa hafatra amin’ireo finday sy amin’ireo solosaina ny rantsantananareo mba hanafainganana sy hampandrosoana ny asan’ny Tompo—fa tsy hoe hifandraisana amin’ny fomba haingana fotsiny amin’ireo namanareo. Isan’ny fiomanana Ireo fahaiza-manao hita soritra eo anivon’ireo tanora maro amin’izao fotoana izao, mba hitondra anjara biriky ao anatin’ilay asa famonjena. …

Hitodika amin’ireo ray ny fonareo raha toa ka manaiky amim-pinoana izany fanasana izany ianareo. Hitoetra ao am-ponareo ny fampanantenana natao tamin’i Abrahama, sy i Isaka ary i Jakoba. Hampifandray anareo amin’ireo rainareo ireo ilay tsodranon’ny patriarika voarainareo izay ahitana fanambarana momba ny rohim-pirazanana, ary ho lasa manan-danja bebe kokoa aminareo. Hitombo ny fitiavanareo sy ny fankasitrahanareo ireo razambenareo. Ho lalim-paka sy haharitra ny fijoroanareo ho vavolombelona momba ny Mpamonjy sy ny fiovam-ponareo hanaraka Azy. Ary mampanantena anareo aho fa ho voaro amin’ny fisarihana mahery vaika ataon’ny fahavalo ianareo. Ho voaro ianareo ao anatin’ny fahatanoranareo sy mandritra ny fiainanareo rehefa mandray anjara ao anatin’izany asa masina izany ary mitia izany. (David A. Bednar, “Hitodika ny fon’ny zanaka,” Liahona, nôv. 2011, 26–27)

Ahoana no ahafahan’ny asa atao any amin’ny tempoly sy ny tantaram-pianakaviana manampy amin’ny fanasitranana fifandraisam-pianakaviana?

Nijoro ho vavolombelona momba ny herin’i Jesoa Kristy hanasitrana ny fifandraisantsika tapaka ny Loholona Dale G. Renlund ao amin’ny Kôlejin’ny Apôstôly Roambinifolo (jereo ny “Tantaram-pianakaviana sy asa atao any amin’ny tempoly: Famehezana sy fanasitranana,” Liahona, mey 2018, 46–49).

Ao amin’ilay horonan-tsary “ From the Head to the Heart ” (2:56), ny rahalahy Stephen W. Owen, Filohan’ny Zatovolahy Maneran-tany teo aloha, mizara ny fomba ahafahan’ny Mpamonjy manova ny fontsika rehefa mandray anjara amin’ny tantaram-pianakaviana sy ny asa atao any amin’ny tempoly isika.

Sahanasa fianarana fanampiny

Horonan-tsary: “Family is made of …”

Azonao atao ny mampiseho ny RootsTech 2019 Kickoff video (2:44) mba hanampiana ireo mpianatra hahatsapa ny maha-zava-dehibe ny fifandraisan’ny fianakaviana. Mampiseho sary sy teny maneho ny fifandraisan’ny fianakaviana ity horonan-tsary ity. (Azonao atao ny manazava fa fihaonamben’ny Fiangonana isan-taona momba ny tantaram-pianakaviana izay mankalaza ny fifandraisan’ny fianakaviana ny RootsTech dia.) Asao ny mpianatra hieritreritra ny fomba nitahian’ny fifandraisan’ny fianakaviana azy ireo sy nynisedran’izany azy ireo.

• Nahoana no zava-dehibe ny manaiky ny lanjan’ny fifandraisan’ny fianakaviantsika na dia amin’ny fotoana mety hahasarotra izany aza?

• Inona avy no fomba sasantsasany ahafahantsika manamafy orina ny fankasitrahantsika sy fitiavantsika ny olona ao amin’ny fianakaviana?

Mampiasa ny application Arbre familial

Hevero ny hanasa mpianatra iray hampiseho ny fomba fampiasana ny application Arbre familial. Azonao atao ny manazava fa afaka ny ho voantso hanompo amin’ny maha-mpanorohevitra amin’ny tantaram-pianakaviana azy ireo ny zatovo, ao amin’ny fiangonana falehan’izy ireo mivavaka eo amin’ny toerana misy azy ireo.

Azon’ny mpianatra atao ny mandray anjara amina sahanasa iray na maromaro izay hita ao amin’ny application Arbre familial hahafantaran’izy ireo misimisy kokoa momba ny fianakavian’izy ireo na hanombohana mirakitra an-tsoratra ny tantaran’izy ireo manokana. Fidio ao amin’ilay application ny hoe Activités d’histoire familiale (tsindrio ny bokotra Afficher tout na sintony ilay bara eo amin’ny sisiny). Mankanesa ao amin’ny Activités au foyer, ary amporisiho hifantina sahanasa iray avy eo amin’ny hoe À propos de moi ny mpianatra, na ny fizarana hoe Ma famille . Mety ho azonao atao ihany koa ny mankeo amin’ny hoe Enregistrer l’histoire de ma vie eo amin’ny pejin’ny Activités d’histoire familiale mba hijerena ireo fanontaniana azon’izy ireo ampiasaina hiraketana ny tantaran’izy ireo manokana na ny an’ny havana hafa. Omeo fotoana hianarana ny sahanasa nosafidin’izy ireo ny mpianatra.

Mba hampiasana izany miaraka amin’ny iray kilasy, dia azonao atao ny misafidy ny Quiz familial ao amin’ny fizarana hoe Ma famille . Zarao ho vondrona “fianakaviana” kely kokoa ny mpianatra, ary asao hiaraka hamaly sy hifanakalo hevitra momba ireo fanontaniana ireo ny vondrona.

Mampitodika ny fontsika

Asao ny mpianatra hieritreritra ny fomba ahafahana manamafy orina azy ireo amin’ny alalan’ny famantarana misimisy kokoa momba ny isam-batan’olona ao amin’ny tantaram-pianakavian’izy ireo. Hevero ny hampiseho ny horonan-tsary “ Discover Your Family History: Discover Your Story ” (2:42), izay mampiseho sarina fianakaviana iray mifandray amin’ny taranaka maro.