Lesson 24—Doktrina at mga Tipan 12–17; Joseph Smith—Kasaysayan 1:66–75

Joseph Smith—Kasaysayan 1:68–75; Doktrina at mga Tipan 13

Ang Pagpapanumbalik ng Priesthood

Habang ginagawa ang pagsasalin ng Aklat ni Mormon, nalaman nina Joseph Smith at Oliver Cowdery na pinagkalooban ni Jesucristo ang mga Nephita ng awtoridad na magbinyag. Habang mapanalangin nilang hinangad na marami pang malaman, sina Joseph at Oliver ay dinalaw ni Juan Bautista at kalaunan ay nina Pedro, Santiago, at Juan, na isinugo upang ipanumbalik ang awtoridad ng priesthood sa lupa. Ang lesson na ito ay makatutulong sa mga estudyante na madama ang kahalagahan ng pagpapanumbalik ng awtoridad ng priesthood ng Tagapagligtas.

Mga Posibleng Aktibidad sa Pag-aaral

Ipinagkakaloob ng Tagapagligtas ang Kanyang awtoridad

Tulungan ang mga estudyante na pag-isipan kung bakit mahalaga sa kanila ang pagpapanumbalik ng priesthood. Maaari mo itong gawin sa pamamagitan ng pagpapakita ng mga larawang ito at pagtatanong ng tulad ng mga sumusunod:

• Ano ang nalalaman ninyo tungkol sa mga pangyayaring ipinapakita sa mga larawang ito?

• Paano kaya maiiba ang inyong buhay kung walang awtoridad ng priesthood ng Tagapagligtas?

Maaari mong ibahagi ang sumusunod na pahayag upang matulungan ang mga estudyante na makita kung paano mapagpapala ng pagpapanumbalik ng priesthood ang lahat ng anak ng Diyos. Ang pahayag na ito ay maaari ding makatulong sa mga kabataang babae na maunawaan na ang pagpapanumbalik ng priesthood ay nauugnay sa kanila.

Sa isang mensaheng ibinigay sa kababaihan ng Simbahan, itinuro ni Pangulong Russell M. Nelson ang kahalagahan ng pagpapanumbalik ng priesthood sa ating buhay:

Inaasam ko na mauunawaan ninyo na ang panunumbalik ng priesthood ay mahalaga hindi lamang sa kalalakihan kundi sa inyo ring kababaihan. Dahil naipanumbalik na ang Melchizedek Priesthood, ang kababaihan at kalalakihan na tumutupad ng tipan ay maaaring mapagkalooban ng “lahat ng pagpapalang espirituwal ng simbahan” o, masasabi nating, ng lahat ng mga espirituwal na kayamanan na inilalaan ng Panginoon sa Kanyang mga anak.

Bawat babae at bawat lalaki na nakikipagtipan sa Diyos at tumutupad sa mga tipang iyon, at karapat-dapat na nakikibahagi sa mga ordenansa ng priesthood, ay matatanggap mismo ang kapangyarihan ng Diyos. (Russell M. Nelson, “Mga Espirituwal na Kayamanan,”Liahona, Nob. 2019, 77)

Pagpapanumbalik ng priesthood

Habang isinasalin nina Joseph Smith at Oliver Cowdery ang Aklat ni Mormon, nalaman nila ang tungkol sa pagkakaloob ni Jesucristo ng awtoridad sa mga Nephita na magsagawa ng mga pagbibinyag (tingnan sa 3 Nephi 11:18–27). Sa pagnanais na malaman pa ang tungkol sa awtoridad na ito, sina Joseph at Oliver ay nagtungo sa kakahuyan malapit sa Ilog ng Susquehanna at nanalangin.

Maaaring gumawa ang mga estudyante ng quiz na may tatlong tanong na may mga sagot na matatagpuan sa Joseph Smith—Kasaysayan 1:68–72. Halimbawa, maaaring ang isang tanong ay “Sino ang nagbinyag kay Joseph Smith?” Pagkatapos ay maaari silang makipagpalitan ng mga quiz sa isa pang estudyante at i-assess kung gaano nila nauunawaan ang mga detalye ng pagpapanumbalik ng priesthood.

Basahin ang Joseph Smith—Kasaysayan 1:68–72, at alamin kung ano ang naranasan nina Joseph at Oliver nang manalangin sila.

• Paano ninyo ibubuod ang mga talatang nabasa ninyo?

Ang mga salitang sinabi ni Juan Bautista sa Joseph Smith—Kasaysayan 1:69 ay matatagpuan din sa Doktrina at mga Tipan 13:1.

Basahin ang Doktrina at mga Tipan 13:1 at tukuyin ang mga susi ng Aaronic Priesthood.

Ang Doktrina at mga Tipan 13:1 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

• Anong mga pagpapala ang ibinibigay ng Tagapagligtas sa pamamagitan ng mga susi ng Aaronic Priesthood?

Pagkatapos ng pagdalaw ni Juan Bautista, isinugo ng Tagapagligtas sina Pedro, Santiago, at Juan upang ipanumbalik ang Melchizedek Priesthood sa lupa (tingnan sa Doktrina at mga Tipan 27:12; 128:20). Noong 1836, tumanggap si Joseph Smith ng mga karagdagang susi ng priesthood (tingnan sa Doktrina at mga Tipan 110:11–16). Bawat pangyayari ay humantong sa karagdagang pagtanggap ng kapangyarihan ng Diyos sa pamamagitan ng mga ordenansa ng priesthood.

Maaari mong isulat sa pisara ang sumusunod na katotohanan: Ipinanumbalik ni Jesucristo ang Kanyang awtoridad ng priesthood upang matanggap natin ang mga ordenansa ng Kanyang ebanghelyo. Habang sinasagot ng mga estudyante ang sumusunod na tanong, maaari kang gumawa sa pisara ng listahan ng mga ordenansa ng priesthood.

• Anong mga ordenansa ang natanggap natin sa pamamagitan ng priesthood ng Panginoon?

Kung kailangan ng mga estudyante ng tulong sa pagsagot sa naunang tanong, matutulungan mo silang tukuyin ang mga sumusunod na ordenansa: binyag, sacrament, kumpirmasyon, mga ordenasyon sa priesthood, endowment sa templo, pagbubuklod sa templo, pagbabasbas sa maysakit, mga basbas ng kapanatagan at pagpapayo, mga patriarchal blessing, pagtatalaga sa isang tungkulin, at iba pa.

Pakikibahagi sa mga ordenansa ng priesthood

Basahin ang Joseph Smith—Kasaysayan 1:73–74, at alamin kung paano nakaapekto kina Joseph at Oliver ang pakikibahagi nila sa mga ordenansa ng binyag at ordenasyon sa priesthood.

Maaari mo ring ipabasa sa mga estudyante ang ilang bahagi ng ikaapat at ikalimang talata ng salaysay ni Oliver sa katapusan ng Joseph Smith—Kasaysayan.

• Anong katibayan ang nakikita ninyo na ang mga ordenansang ito ay nagbigay kina Joseph at Oliver ng higit na kakayahang matamo ang kapangyarihan ng Diyos?

• Paano nakatulong sa inyo ang pakikibahagi sa mga ordenansa ng priesthood para mas matamo ninyo ang kapangyarihan ng Diyos?

Maaari mong sabihin sa mga estudyante na kunwari ay inutusan silang sumulat ng isang journal entry na naglalarawan ng isang personal na karanasan sa ordenansa ng priesthood, na katulad ng inilarawan sa Joseph Smith—Kasaysayan 1:73. Ituon ang pansin ng mga estudyante sa listahan ng mga ordenansa sa pisara. Bigyan sila ng oras na mag-isip, magsulat, at magbahagi ng kanilang mga karanasan. Maaari mo ring ibahagi kung paano naging pagpapala sa buhay mo ang pagpapanumbalik ng priesthood.

Isaulo

Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan ay “Ang Aaronic Priesthood ang ‘may hawak ng mga susi ng paglilingkod ng mga anghel, at ng ebanghelyo ng pagsisisi, at ng pagbibinyag.’” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Saan ko malalaman ang iba pa tungkol sa pagpapanumbalik ng priesthood?

• Mga Paksa sa Kasaysayan ng Simbahan, “Panunumbalik ng Aaronic Priesthood”; “Panunumbalik ng Melchizedek Priesthood,” ChurchofJesusChrist.org/study/history/topics

• Mga Paksa at Mga Tanong, “Pagpapanumbalik ng Priesthood,” topics.ChurchofJesusChrist.org

• Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 [2018], 74–77

• “The Restoration of the Priesthood Authority and Organization” (video), ChurchofJesusChrist.org

Doktrina at mga Tipan 13:1. Ano ang kahulugan ng bawat isa sa mga susi ng Aaronic Priesthood?

Itinuro ni Pangulong Dallin H. Oaks ng Unang Panguluhan:

Ano ang ibig sabihin ng ang Aaronic Priesthood ang may hawak ng “susi ng paglilingkod ng mga anghel” at ng “ebanghelyo ng pagsisisi at ng pagbibinyag, [at] kapatawaran ng mga kasalanan”? Ang ibig sabihin nito ay matatagpuan sa ordenansa ng binyag at ng sacrament. Ang binyag ay para sa kapatawaran ng mga kasalanan, at ang sacrament ay pagpapanibago ng mga tipan at mga pagpapala ng binyag. Dapat pagsisisi muna bago isagawa ang dalawang ito. Kapag tinutupad natin ang mga tipang ginawa sa ordenansang ito, pinangakuan tayo na palaging mapapasaatin ang Kanyang Espiritu upang makasama natin. Ang paglilingkod ng mga anghel ay isa sa mga manipestasyon ng Espiritu na iyon. (Dallin H. Oaks, “The Aaronic Priesthood and the Sacrament,” Ensign, Nob. 1998, 37–38)

Joseph Smith—Kasaysayan 1:70, 72. Kailan ipinanumbalik ang Melchizedek Priesthood?

Imposibleng matukoy ang mismong petsa kung kailan nangyari ang banal na pagpapakitang ito mula sa mga source na mayroon tayo. Ang tanging tala na mula mismo kay Joseph na nagbibigay ng mga detalye tungkol sa mga pangyayari sa pangitain ay isang liham noong 1842 (ngayon ay kinikilala at tinanggap bilang Doktrina at mga Tipan 128) kung saan kanyang pinatotohanan na narinig niya “ang tinig nina Pedro, Santiago, at Juan sa ilang sa pagitan ng Harmony, Susquehanna County, at Colesville, Broome County; sa ilog ng Susquehanna, ipinahahayag ang kanilang sarili na mga nagtataglay ng mga susi ng kaharian.” Ang mga mambabasa ngayon ay nagkaroon ng iba’t ibang konklusyon mula sa mga iba’t ibang salaysay ukol sa mismong petsa ng pagpapakita nina Pedro, Santiago, at Juan. Ang kanilang pagtantiya ay sumasaklaw mula sa ilang linggo matapos ang pagpapakita ni Juan Bautista noong Mayo 15, 1829, hanggang sa makalipas ang maraming buwan. (Mga Paksa sa Kasaysayan ng Simbahan “Restoration of the Melchizedek Priesthood,” ChurchofJesusChrist.org/study/history/topics)

Mga Karagdagang Aktibidad sa Pag-aaral

Pagsasalarawan sa pagpapanumbalik ng priesthood

Upang matulungan ang mga estudyante na maisalarawan sa isipan ang mga pangyayari sa pagpapanumbalik ng priesthood, maaari mong ipanood ang “Mga Taon ng Masayang Pagsasama” (25:01; panoorin mula sa time code na 17:48 hanggang 21:02) o “Priesthood Restoration Site” (18:56; panoorin mula sa time code na 13:40 hanggang 18:56).

Mga ordenansa ng priesthood

Kapag inilista ng mga estudyante ang mga ordenansang matatanggap sa pamamagitan ng priesthood na ipinagkaloob ng Panginoon, maaari mong ipakita ang mga larawan ng mga ordenansa ng priesthood at sabihin sa mga estudyante na tukuyin kung alin ang matatanggap sa pamamagitan ng Aaronic Priesthood at kung alin ang matatanggap sa pamamagitan ng Melchizedek Priesthood.

Paghahangad ng kaligtasan

Humingi si Joseph Smith ng kapatawaran sa mga kasalanan sa maraming nakatalang pangyayari. Ihambing ang pagpapakita ni Juan Bautista (Joseph Smith—Kasaysayan 1:68–74) sa Unang Pangitain (Joseph Smith—Kasaysayan 1:10–20 at iba pang mga salaysay tungkol sa Unang Pangitain) at sa mga pagdalaw ng anghel na si Moroni (Joseph Smith—Kasaysayan 1:27–30). Bago ang bawat pagpapakita mula sa langit, ano ang mga itinanong ni Joseph? Paano nauugnay ang mga tanong na ito sa isa’t isa? Ano ang matututuhan natin sa halimbawa ni Joseph na tutulong sa sarili nating mga pagsisikap na lumapit sa Tagapagligtas?

Doktrina at mga Tipan 12. Joseph Knight Sr.

Ang sumusunod ay makatutulong sa mga estudyante na pag-aralan ang Doktrina at mga Tipan 12 at mapahalagahan ang mga naiambag ni Joseph Knight Sr.

Maaaring basahin ng mga estudyante ang section heading ng Doktrina at mga Tipan 12 at talata 6–9, at hanapin ang tagubiling ibinigay ng Panginoon kay Joseph Knight Sr. Ipaliwanag na ang materyal na tulong ni Joseph Knight kina Joseph Smith at Oliver Cowdery ay nagbigay-daan para maisalin ang Aklat ni Mormon sa mahimalang maikling panahon. Pag-isipang talakayin kung paano rin natin magagampanan ang isang maliit na tungkulin sa mga himala ng Pagpapanumbalik (tingnan sa Alma 37:6).

Maaari mo ring ibahagi ang papuring ito na isinulat ni Joseph Smith noong 1842 tungkol sa kanyang kaibigan na si Joseph Knight Sr.:

“Habang naiisip ko ang mga kabutihan at mabubuting katangian at pagkatao ng iilang matatapat na itinatala ko ngayon sa Aklat ng Kautusan ng Panginoon, mga taong nasa tabi ko sa bawat oras ng pagdurusa, sa nakalipas na labinlimang taong ito, katulad, halimbawa, ng matanda na at mahal kong kapatid na si Joseph Knights [Knight] Senr, na kabilang sa mga unang tao na tumulong sa mga pangangailangan ko, habang sinisimulan ko ang pagpapalaganap ng gawain ng Panginoon, at pagtatayo ng pundasyon ng [Ang] Simbahan ni Jesucristo ng mga Banal sa mga Huling Araw: sa loob ng labinlimang taon siya ay naging tapat at tunay, at makatarungan at uliran, at banal at mabait, nanatiling tapat at sumasampalataya. Masdan siya ay isang mabuting tao” (sa The Joseph Smith Papers, Documents, Volume 10: May–August 1842, ed. Elizabeth A. Kuehn and others [2020], 179).