“Doktrina at mga Tipan 18:11–16: ‘Anong Laki ng Inyong Kagalakan,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 18:11–16,” Manwal ng Titser ng Seminary para sa Doktrina at mga Tipan
Lesson 28: Doktrina at mga Tipan 18
Doktrina at mga Tipan 18:11–16
“Anong Laki ng Inyong Kagalakan”
Sa patuloy na paghahayag ng Panginoon ng Kanyang kalooban hinggil sa Kanyang Simbahan, nangusap Siya kina Joseph Smith, Oliver Cowdery, at David Whitmer tungkol sa kagalakang nagmumula sa pagbabahagi ng Kanyang ebanghelyo. Ang lesson na ito ay makatutulong na mapag-ibayo ang hangarin ng mga estudyante na ibahagi ang ebanghelyo ng Tagapagligtas sa iba.
Mga Posibleng Aktibidad sa Pag-aaral
Ano ang nagdudulot ng kagalakan?
Maaari mong anyayahan ang mga estudyante na mag-partner-partner nang isa hanggang dalawang minuto at ilista ang lahat ng maiisip nila na nagdudulot sa kanila ng kagalakan. Bilang alternatibo, ilagay ang mga estudyante sa maliliit na grupo at bigyan ang bawat grupo ng iba’t ibang kulay ng whiteboard marker. Sa loob ng isa hanggang dalawang minuto, maaaring maghalinhinan ang lahat sa bawat grupo sa pagsulat ng isang bagay sa pisara na nagdudulot sa kanila ng kagalakan.
Sabihin sa ilang estudyante na magbahagi ng isang bagay na isinulat nila at kung bakit ito nagdudulot sa kanila ng kagalakan.
Nais ng Ama sa Langit at ni Jesucristo na makadama tayo ng kagalakan (tingnan sa 2 Nephi 2:25). Sa Doktrina at mga Tipan 18, ipinahayag ng Tagapagligtas kung ano ang naghahatid sa Kanya ng kagalakan at ipinaliwanag Niya kung paano rin natin mararanasan ang gayong uri ng kagalakan.
Maaari mong anyayahan ang mga estudyante na isipin kung gaano katinding kagalakan ang nadarama nila ngayon sa kanilang buhay at kung bakit gusto nilang makadama ng higit na kagalakan. Hikayatin silang maghanap ng mga turo sa pag-aaral nila ngayon tungkol sa kung paano sila makadarama ng mas malaking kagalakan sa kanilang buhay.
Ang kagalakan ni Jesucristo
Sabihin sa mga estudyante na pag-isipan kung ano ang maaaring sabihin ng Tagapagligtas kung itatanong nila sa Kanya kung ano ang nagdudulot sa Kanya ng kagalakan.
Basahin ang Doktrina at mga Tipan 18:11–13 at alamin kung ano ang nagdudulot ng malaking kagalakan sa Tagapagligtas.
Sabihin sa mga estudyante na pag-isipan ang susunod na dalawang tanong bago sumagot. Bago hilingin sa kanila na magbahagi, maaari mo silang anyayahang isulat ang kanilang mga sagot sa kanilang study journal. Maaari ding makatulong sa mga estudyante na basahin ang Lucas 15:1–10 bago mo sila tanungin.
-
Sa iyong palagay, bakit labis na nagagalak ang Panginoon kapag tayo ay nagsisisi?
-
Paano makakaimpluwensya ang kaalamang ito tungkol sa Tagapagligtas sa iyong mga kilos at hangarin?
Ang Doktrina at mga Tipan 18:15–16 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Basahin ang Doktrina at mga Tipan 18:14–16 at markahan ang mga parirala na nagpapakita ng nais ng Tagapagligtas para sa atin.
-
Ano ang ipinauunawa sa iyo ng mga talatang ito tungkol sa Tagapagligtas at sa Kanyang mga hangarin para sa atin?
Kung kinakailangan, ipaliwanag na ang isang katotohanan na matututuhan natin mula sa mga talatang ito ay nais ni Jesucristo na madama natin ang kagalakang nagmumula sa pagdadala ng iba sa Kanya. Maaari mong isulat sa pisara ang katotohanang ito.
Nagsalita si Elder Marcus B. Nash ng Pitumpu tungkol sa kagalakang maaaring magmula sa pagbabahagi ng ebanghelyo:
Kapag natutuhan ng isang tao ang maluwalhating layunin ng buhay, naunawaan na nagpapatawad at sumasaklolo si Cristo sa lahat ng sumusunod sa Kanya, at pagkatapos ay piniling sundin si Cristo at nagpabinyag, bumubuti ang kalagayan ng buhay—kahit hindi nagbabago ang mga pangkalahatang sitwasyon sa buhay.
Isang masayahing sister na nakilala ko sa Onitsha, Nigeria, ang nagsabi sa akin na simula nang malaman niya ang ebanghelyo at nagpabinyag (at ngayon babanggitin ko ang mga katagang sinabi niya), “lahat ay mabuti para sa akin. Masaya ako. Ako ay nasa langit na.” Ang pagbabahagi ng ebanghelyo ay nagdudulot ng kagalakan at pag-asa sa mga kaluluwa ng nagbibigay at tumatanggap. Tunay ngang, “anong laki ng inyong kagalakan” kapag ibinabahagi ninyo ang ebanghelyo! Ang pagbabahagi ng ebanghelyo ay nagdaragdag sa taglay na kagalakan at pag-asa. (Marcus B. Nash, “Itaas Ninyo ang Inyong Ilawan,” Liahona, Nob. 2021, 71)
-
Sa iyong palagay, bakit ang paggabay sa ibang tao patungo kay Jesucristo ay nagdudulot ng labis na kagalakan sa isang tao?
-
Ano ang mga naranasan (o nalaman) mo kung saan nakita mo ang kagalakan ng pagbabahagi ng ebanghelyo sa iba?
Para matulungan ang mga estudyante sa nakaraang tanong, maaari mo silang anyayahang maghanap ng mga halimbawa sa mga banal na kasulatan. Maaari nilang basahin ang mga salita ni Ammon (sa Alma 26:1–16) at ni Alma (sa Alma 29:9–17). Maaari mo ring ipakita ang “Inviting All to Come unto Christ: Sharing the Gospel” (4:30), na matatagpuan sa ChurchofJesusChrist.org.
Pagdaig sa mga balakid
Ipaliwanag na bagama’t makatutulong ang mga pangakong ito mula sa Panginoon para mahikayat tayong ibahagi ang Kanyang ebanghelyo, kung minsan ay may mga balakid o alalahanin na maaaring humadlang sa atin na magbahagi. Sabihin sa mga estudyante na magbanggit ng ilang balakid at ilista sa pisara ang kanilang mga sagot. Pagkatapos ay sabihin sa mga estudyante na kumpletuhin ang sumusunod na aktibidad, nang iniisip na kunwari ay may kakilala sila (o nang iniisip ang isang taong kilala nila) na nahaharap sa isa sa mga balakid na iyon.
Isulat kung ano ang maaari mong ibahagi sa taong may mga alalahanin tungkol sa pagbabahagi ng ebanghelyo ng Tagapagligtas. Pag-isipang isama ang mga sumusunod:
-
Ang nalalaman mo tungkol sa Tagapagligtas na makadaragdag sa hangarin mong dalhin ang iba sa Kanya (at isang talata sa banal na kasulatan na nagpapatotoo sa nalalaman mo, kung maaari)
-
Kung paano nagdulot sa iyo ng kagalakan ang paglapit sa Tagapagligtas at kung bakit gusto mong matanggap ng iba ang mga pagpapala ring iyon
-
Ang mga karanasan mo o ng ibang kakilala mo sa pagdadala ng mga kaluluwa kay Cristo at kung paano nagdulot ng kagalakan ang mga karanasang iyon
Matapos ang sapat na oras na makaisip ng sagot ang mga estudyante at maisulat nila ang mga ito, bigyan sila ng pagkakataong ibahagi ang isinulat nila. Ang isang paraan para magawa ito ay anyayahan ang isa o dalawang estudyante na gumanap bilang isang taong may mga alalahanin tungkol sa pagbabahagi ng ebanghelyo. Maaaring magbahagi ang iba pang mga estudyante ng isang bagay na naisip nila na makatutulong.
Pagkatapos ng talakayang ito, ibigay sa mga estudyante ang sumusunod na paanyaya:
Maglaan ng oras para pagnilayan ang natutuhan at nadama mo sa lesson na ito. Isulat ang nadarama mo tungkol sa pagbabahagi ng ebanghelyo at pagsisikap na ilapit ang iba kay Jesucristo. Maaari mong isama ang anumang natutuhan mo, lalo na ang tungkol sa Tagapagligtas, na gusto mong matandaan.
Maaari mo itong tapusin sa pamamagitan ng pag-anyaya sa isa o dalawang estudyante na ibahagi ang natutuhan nila o ang nais nilang matandaan. Patotohanan ang mga katotohanang tinalakay ninyo ngayon.
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan para sa Doktrina at mga Tipan 18:15–16 ay “Anong laki ng inyong kagalakan kung makapagdadala kayo ng maraming kaluluwa sa akin!” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”