Lesson 29: Doktrina at mga Tipan 18

Doktrina at mga Tipan 18:21–47

“Sa Pamamagitan ng Inyong mga Kamay Ako ay Gagawa ng Kagila-gilalas na Gawain”

Noong Hunyo 1829, ibinigay ng Tagapagligtas kina Oliver Cowdery at David Whitmer ang responsibilidad na maghanap ng mga taong magtataglay ng Kanyang pangalan nang may “buong layunin ng puso” (Doktrina at mga Tipan 18:27). Ang mga kalalakihang ito ay tatawagin kalaunan bilang mga unang miyembro ng Korum ng Labindalawang Apostol sa dispensasyong ito. Ang lesson na ito ay makatutulong sa mga estudyante na maunawaan kung paano tayo tinutulungan at pinagpapala ng Panginoon sa pamamagitan ng pagtawag sa Kanyang mga Apostol.

Mga Posibleng Aktibidad sa Pag-aaral

Ang Labindalawang Apostol

Ang sumusunod na aktibidad ay makatutulong na maihanda ang mga estudyante na pag-isipan ang tulong na ibinibigay sa kanila ng Panginoon sa pamamagitan ng mga apostol at propeta sa makabagong panahon.

Isulat sa pisara ang sumusunod na propesyon: doktor, mekaniko, karpintero, ironworker, titser. Maaari mo ring sabihin sa mga estudyante na magbanggit ng ibang propesyon kung saan ang mga tao ay may natatanging kwalipikasyon na tumulong sa atin.

Isipin ang isang sitwasyon kung saan nagpapasalamat ka sa isa sa mga taong ito.

• Anong tulong ang kwalipikadong ibigay sa atin ng mga taong ito?

• Paano sila naging kwalipikado?

Maaari kang magpakita ng kasalukuyang larawan ng Unang Panguluhan at Korum ng Labindalawang Apostol. Maaari mong anyayahan ang mga estudyante na maikling ibahagi ang anumang impormasyong alam nila tungkol sa mga kalalakihang ito, kabilang na ang kanilang mga pangalan, mga detalye tungkol sa pamilya, o mga karanasan sa trabaho. Tiyakin na nauunawaan ng mga estudyante na ang mga Apostol ay tinawag ni Jesucristo upang magpatotoo tungkol sa Kanya sa buong mundo (tingnan sa Gabay sa mga Banal na Kasulatan, “Apostol,” scriptures.ChurchofJesusChrist.org).

Mahal tayo ng Tagapagligtas at tumatawag Siya ng mga Apostol para tulungan tayo sa mga natatanging paraan.

• Anong tulong ang kwalipikadong ibigay sa atin ng mga Apostol ng Tagapagligtas?

• Sa iyong palagay, anong mga kwalipikasyon ang ginagamit ng Panginoon sa pagpili ng Kanyang mga Apostol?

Ipaliwanag na ngayon ay marami pang malalaman ang mga estudyante tungkol sa mga apostol at propeta na tinatawag ng Tagapagligtas para mamuno sa atin. Maaari mong anyayahan ang mga estudyante na pag-isipan kung paano nakaapekto sa kanilang buhay ang pagkakaroon ng mga apostol at propeta sa mundo ngayon. Hikayatin silang maghanap ng mga turo na makatutulong sa kanila na mas maunawaan kung paano mapagpapala ang kanilang buhay sa pamamagitan ng mga propeta at apostol sa mga huling araw.

Pagtataglay sa ating sarili ng pangalan ni Cristo

Sa Doktrina at mga Tipan 18, iniutos ng Panginoon kina David Whitmer at Oliver Cowdery na maghanap ng mga kalalakihang tatawagin balang-araw para maglingkod sa Korum ng Labindalawang Apostol (tingnan sa Doktrina at mga Tipan 18:37–38).

Basahin ang Doktrina at mga Tipan 18:21–25, at hanapin ang payo ng Tagapagligtas kina David at Oliver.

• Sa iyong palagay, bakit nais ng Panginoon na maunawaan nina David at Oliver ang nabasa mo sa mga talatang ito?

Sabihin sa mga estudyante na ibahagi kung ano sa palagay nila ang ibig sabihin ng taglayin sa kanilang sarili ang pangalan ni Cristo. Maaaring makatulong na ipaliwanag na sa pamamagitan ng binyag at sakramento ay ipinapakita natin na handa tayong taglayin sa ating sarili ang pangalan ng Tagapagligtas. Maaari ding makatulong ang mga sumusunod na pahayag:

Ipinaliwanag ni Elder Paul B. Pieper ng Pitumpu ang ibig sabihin ng taglayin sa ating sarili ang pangalan ni Jesucristo:

Sa pagtataglay natin ng pangalan ni Cristo sa ating sarili, nangangako tayong tatanggapin ang Kanyang mga aral, Kanyang mga katangian, at sa huli ang Kanyang pagmamahal sa kaibuturan ng ating pagkatao upang maging bahagi ito ng pagkatao natin. (Paul B. Pieper, “Lahat ng Tao ay Kailangang Taglayin sa Kanilang Sarili ang Pangalang Ibinigay ng Ama,” Liahona, Nob. 2018, 44)

Mga kwalipikasyon at responsibilidad ng mga Apostol

Tinagubilinan din ng Panginoon sina David at Oliver tungkol sa mga kinakailangang kwalipikasyon para sa mga tatawaging Apostol.

Basahin ang Doktrina at mga Tipan 18:26–27, at alamin ang kwalipikasyon sa mga talatang ito. Pansinin na ang salitang mga disipulo sa talata 27 ay tumutukoy sa mga tatawaging Apostol.

• Anong kwalipikasyon ang ninanais ng Tagapagligtas na magkaroon ang Kanyang mga Apostol?

• Sa iyong palagay, bakit nais ng Tagapagligtas na magkaroon ng ganitong kwalipikasyon ang mga naglilingkod bilang Kanyang mga Apostol?

• Paano makatutulong sa iyo ang kaalamang ito tungkol sa mga Apostol ng Tagapagligtas?

Ipaliwanag na naglahad ang Tagapagligtas ng mga karagdagang responsibilidad ng mga apostol sa Doktrina at mga Tipan 18 at sa iba pang bahagi ng Doktrina at mga Tipan. Maaari mong iguhit ang sumusunod na chart sa pisara at sabihin sa mga estudyante na kopyahin ito sa kanilang study journal. Maaari mong idagdag ang natutuhan na ng mga estudyante mula sa talata 26–27. Pagkatapos ay maaaring basahin ng mga estudyante ang mga ibinigay na talata nang mag-isa o sa maliliit na grupo at maaari nilang punan ang chart sa kanilang study journal. Pagkatapos ay maaaring idagdag ng bawat grupo ang isa o dalawa sa kanilang mga sagot sa listahan sa pisara.

Gamitin ang Doktrina at mga Tipan 18:26–36 at 107:23 para punan ang sumusunod na chart:

Anong mga katangian ang nais ng Panginoon sa Labindalawang Apostol?	Ano ang nais ng Panginoon na gawin ng mga Apostol para makatulong sa pagdadala ng mga tao sa Kanya?

Sabihin sa ilang estudyante na bilugan sa pisara ang isang bagay tungkol sa mga Apostol na sa palagay nila ay mahalaga o makabuluhan. Sabihin sa kanila na ibahagi kung bakit mahalaga ito. Maaari mo ring talakayin ang mga sumusunod na tanong:

• Ano ang natutuhan mo mula sa mga talatang ito tungkol sa kung paano makatutulong sa iyo at sa iba ang Panginoon sa pamamagitan ng Kanyang mga Apostol?

• Paano mo ibubuod ang natutuhan mo tungkol sa mga Apostol mula sa mga talatang ito?

  Tulungan ang mga estudyante na ibuod sa pisara ang sumusunod na katotohanan: tinutulungan tayo ng mga Apostol ng Tagapagligtas na lumapit sa Kanya at matutuhan ang Kanyang mga salita.

• Paano mo nakikita ang mga Apostol ng Tagapagligtas na tinutulungan ka at ang iba na lumapit sa Kanya ngayon?

Mga halimbawa at turo mula sa mga Apostol ng makabagong panahon

Bigyan ng oras ang mga estudyante na makakita ng mga halimbawa ng mga Apostol sa makabagong panahong ito na nakatutugon sa mga kwalipikasyon at tumutupad sa mga responsibilidad na inilahad ng Panginoon sa Doktrina at mga Tipan 18. Ang sumusunod na aktibidad ay makatutulong dito.

Maglaan ng oras para pag-aralan ang mga turo ng isa o mahigit pang mga Apostol sa kasalukuyan. Maaari mong pag-aralan ang mga mensahe sa katatapos na mga pangkalahatang kumperensya, mga artikulo sa magasin ng Simbahan, o mga post sa social media. Sa iyong pag-aaral, alamin kung paano ginagampanan ng mga Apostol ang kanilang responsibilidad na tulungan tayong lumapit kay Cristo. Maaaring maghanap ka rin ng mensahe mula sa isang Apostol na tumatalakay sa isang partikular na pangangailangan o tanong na mayroon ka.

Matapos ang sapat na oras na makapag-aral ang mga estudyante, hayaan silang ibahagi sa klase o sa maliliit na grupo ang natutuhan nila.

Karagdagang Resources

Sino ang napiling mapabilang sa Korum ng Labindalawang Apostol?

Ang Korum ng Labindalawang Apostol ay binuo noong Pebrero 1835, halos anim na taon matapos matanggap ang paghahayag na nakatala sa Doktrina at mga Tipan 18. Ang Tatlong Saksi ng Aklat ni Mormon, sina Oliver Cowdery, David Whitmer, at Martin Harris, “sa pagsangguni kay Joseph Smith,” ang pumili sa mga kalalakihang ito (tingnan sa Mga Paksa sa Kasaysayan ng Simbahan, “Korum ng Labindalawa,” ChurchofJesusChrist.org/study/history/topics). Sila ay sina Lyman Johnson, Brigham Young, Heber C. Kimball, Orson Hyde, David W. Patten, Luke Johnson, William E. McLellin, John F. Boynton, Orson Pratt, William Smith, Thomas B. Marsh, at Parley P. Pratt.

Saan ko matututuhan ang iba pa tungkol sa mga Apostol ng Ang Simbahan ni Jesucristo ng mga Banal sa mga Huling Araw?

Hindi nagtagal matapos sang-ayunan ang isang bagong miyembro ng Unang Panguluhan o Korum ng Labindalawang Apostol, isang talambuhay ang inilalathala sa mga magasin ng Simbahan. Kamakailan lamang, ang mga artikulong ito ay isinulat ng mga kapwa miyembro ng Korum ng Labindalawang Apostol. Ang mga artikulong ito ay naglalaman ng mas maraming detalye at kuwento kaysa sa mga talambuhay na matatagpuan sa prophets.ChurchofJesusChrist.org. Kung may mga bagong Apostol na tinawag mula nang ilathala ang manwal na ito, maaari kang makakita ng artikulo tungkol sa kanila sa magasing Liahona ilang buwan matapos silang sang-ayunan sa pangkalahatang kumperensya.

“Pangulong Russell M. Nelson: Ginabayan, Inihanda, Tapat” (ChurchofJesusChrist.org)

“Pangulong Dallin H. Oaks: Pagsunod sa mga Paraan ng Panginoon” (ChurchofJesusChrist.org)

“Pangulong Henry B. Eyring: Kahanga-hanga ang Talino, Mapagpakumbabang tulad ng Bata” (ChurchofJesusChrist.org)

“Natatanging Saksi: Pagkilala kay Elder M. Russell Ballard” (ChurchofJesusChrist.org)

ChurchofJesusChrist.org

“Elder Dieter F. Uchtdorf: Tungo sa Bagong Karanasan” (ChurchofJesusChrist.org)

“Elder David A. Bednar: Pagsulong sa Lakas ng Panginoon” (ChurchofJesusChrist.org)

“Elder Quentin L. Cook: May Pagkukusang Puso at Isipan” (ChurchofJesusChrist.org)

“Elder D. Todd Christofferson: Handang Maglingkod sa Panginoon” (ChurchofJesusChrist.org)

“Elder Neil L. Andersen: Lalaking may Pananampalataya” (ChurchofJesusChrist.org)

“Elder Ronald A. Rasband: Mahusay na Lider, Debotong Ama” (ChurchofJesusChrist.org)

“Elder Gary E. Stevenson: Isang Maunawaing Puso” (ChurchofJesusChrist.org)

“Elder Dale G. Renlund: Isang Masunuring Tagapaglingkod” (ChurchofJesusChrist.org)

“Elder Gerrit W. Gong: Mahalin ang Panginoon at Magtiwala sa Kanya” (ChurchofJesusChrist.org)

“Elder Ulisses Soares: Isang Taong Walang Pandaraya” (ChurchofJesusChrist.org)

Ang sumusunod na webpage ay naglalaman ng maiikling video ng talambuhay tungkol sa Unang Panguluhan at Korum ng Labindalawang Apostol.

Meet the Apostles (ChurchofJesusChrist.org)

Ano ang mga hangarin ng mga Apostol?

Itinuro ni Elder Neil L. Andersen ng Korum ng Labindalawang Apostol:

Ang tingin ng ilan sa Unang Panguluhan at sa Korum ng Labindalawang Apostol ay may mga makamundong motibo, tulad ng mga lider sa pulitika, negosyo, at kultura.

Gayunman, ibang-iba ang pagbibigay sa amin ng aming mga responsibilidad. Hindi kami inihahalal o pinipili mula sa mga aplikante. Walang anumang partikular na propesyonal na paghahanda, tinawag at inorden kami upang patotohanan ang pangalan ni Jesucristo sa buong mundo hanggang sa aming huling hininga. Sinisikap naming basbasan ang maysakit, nalulumbay, naliligalig, at maralita at patatagin ang kaharian ng Diyos. Hangad naming malaman ang kalooban ng Panginoon at ipahayag ito, lalo na sa mga naghahangad ng buhay na walang hanggan. (Neil L. Andersen, “Pagsunod kay Jesus: Pagiging Isang Tagapamayapa,” Liahona, Mayo 2022, 19)

Paano naglilingkod ang Panginoon sa mga tao sa pamamagitan ng Kanyang mga Apostol?

Ibinahagi ni Elder David A. Bednar ng Korum ng Labindalawang Apostol ang sumusunod na karanasan:

Ang mga Apostol ay mga lingkod ng Panginoon. Naglalakbay sila para bumisita sa mga miyembro ng Simbahan sa iba’t ibang panig ng mundo.

Noong unang pagkakataon kong maglakbay bilang Apostol, nakilala ko ang isang lalaking nahihirapang sundin ang Word of Wisdom. Sabi ko sa kanya, “Isinugo ako ng Panginoon dito para bigyan ka ng isang simpleng mensahe: ‘Magagawa mo ito. Ipinapangako ko na matatamo mo ang Kanyang tulong sa pagharap mo sa hamong ito.’”

Isusugo ba ng Panginoon ang isa sa Labindalawang Apostol sa kabilang panig ng mundo para tulungan lang ang isang tao? Ang sagot ay oo. Lagi Niyang ginagawa iyan. (“Ano ang Ginagawa ng mga Apostol?,” Liahona, Abr. 2016, 12)

Mga Karagdagang Aktibidad sa Pag-aaral

Doktrina at mga Tipan 18:27. Buong layunin ng puso

Matapos tukuyin ang mga alituntunin sa lesson, maaari mong ipabasa sa mga estudyante ang salaysay tungkol sa pagtawag ni Jesucristo sa Kanyang mga Apostol sa Mateo 4:18–22, na inaalam kung paano nagpakita ang mga lalaking ito ng “buong layunin ng puso.” Maaari kang magtanong ng tulad ng “Ano kaya ang nagawang iba ng mga lalaking ito kung kumikilos sila nang may bahagyang layunin ng puso?” o “Ano ang ilang paraan na katulad ng mga mangingisdang ito ang mga propeta at apostol ngayon?” Maaari mong ipaalala sa mga estudyante na isinuko ng mga Apostol ang kanilang mga propesyon at iba pang mga priyoridad para maglingkod kay Jesucristo nang full-time sa buong buhay nila. Ito ay isang paraan para makapaglingkod sila nang may buong layunin ng puso. Maaari kang magbahagi ng halimbawa mula sa buhay ng isang Apostol sa makabagong panahon.

Pangulong Russell M. Nelson

Maaari mong panoorin ang “Pangulong Nelson: Propeta ng Diyos” (6:26). Sabihin sa mga estudyante na maghanap ng katibayan na ninanais ni Pangulong Russell M. Nelson na taglayin sa kanyang sarili ang pangalan ni Jesucristo nang may buong layunin ng puso.

Naririnig ko ang tinig ng Panginoon sa pamamagitan ng pag-aaral ng mga banal na kasulatan

Kung sa palagay mo ay makatutulong na pagtuunan ang pag-aaral ng mga estudyante ng mga banal na kasulatan, bigyan ng oras ang mga estudyante na basahin ang Doktrina at mga Tipan 18:34–36 at suriin ang sarili nilang pag-aaral. Sabihin sa kanila na tukuyin ang isang paraan na maririnig natin ang tinig ng Panginoon. Maaaring kailangan mong ipaliwanag na ang “mga salitang ito” ay tumutukoy sa mga banal na kasulatan. Pag-isipang magtanong ng tulad ng “Kailan ninyo narinig ang tinig ng Panginoon nang pag-aralan ninyo ang mga banal na kasulatan?” o “Ano ang makatutulong sa atin na marinig nang mas malinaw ang Kanyang tinig habang nag-aaral tayo?”