“Pagsasanay sa Doctrinal Mastery 2: Pag-unawa at Pagtatamo ng Espirituwal na Kaalaman,” Manwal ng Titser ng Seminary para sa Doktrina at mga Tipan (2025)
“Pagsasanay sa Doctrinal Mastery 2,” Manwal ng Titser ng Seminary para sa Doktrina at mga Tipan
Lesson 30: Doktrina at mga Tipan 18
Pagsasanay sa Doctrinal Mastery 2
Pag-unawa at Pagtatamo ng Espirituwal na Kaalaman
Ang doctrinal mastery ay makatutulong sa mga estudyante na maitayo ang pundasyon ng kanilang buhay kay Jesucristo at sa Kanyang ebanghelyo. Ang lesson na ito ay magbibigay sa mga estudyante ng mga pagkakataong maging mahusay sa mga doctrinal mastery passage at sa doktrinang itinuturo ng mga ito gayundin sa pag-aaral at pagsasabuhay ng mga banal na alituntunin para sa pagtatamo ng espirituwal na kaalaman.
Mga Posibleng Aktibidad sa Pag-aaral
Pagrerebyu ng doctrinal mastery: Unawain
Ang sumusunod na aktibidad ay nagbibigay sa mga estudyante ng pagkakataong mapalalim ang kanilang pag-unawa sa isa o mahigit pang mga doctrinal mastery passage. Ang aktibidad na ito ay dapat lang tumagal nang 10–15 minuto para makapaglaan ng sapat na oras para sa pagsasabuhay ng doctrinal mastery kalaunan sa lesson.
Maaari kang magpatugtog ng isang awitin o himno at anyayahan ang mga estudyante na itaas ang kanilang mga kamay kung makikilala nila ito. Pagkatapos ay anyayahan ang mga nakakaalam ng ilan sa mga salita na itaas ang kanilang mga kamay. Sa huli, sabihin sa mga estudyante na nakauunawa kung tungkol saan ang awitin na itaas ang kanilang mga kamay at ibahagi kung tungkol saan ito.
-
Ano ang pagkakaiba ng pagkilala, pag-alam, at pag-unawa?
-
Sa paanong paraan natin makikilala o malalaman ang isang bagay nang hindi ito nauunawaan?
-
Paano ito maiaangkop sa doctrinal mastery?
Maaari mong sabihin sa mga estudyante na tingnan ang mga doctrinal mastery passage at mahahalagang parirala ng banal na kasulatan sa Doctrinal Mastery Core Document (2023). Sabihin sa kanila na pumili ng isa na gusto nilang mas maunawaan. Ang sumusunod na aktibidad ay makatutulong sa mga estudyante na mapalalim ang kanilang pag-unawa.
Isipin kunwari na may isang tao na talagang nangangailangan ng mensaheng nakapaloob sa passage na pinili mo. Gayunman, mayroon ka lamang 30 segundo para ipaliwanag sa kanya ang kahulugan ng passage. Gamitin ang susunod na ilang minuto para mas maunawaan ang nilalaman ng passage.
Maaari mong gamitin ang ilan sa mga sumusunod na estratehiya:
-
Basahin ang talata nang dahan-dahan.
-
Hanapin ang kahulugan ng mga salita o parirala na hindi mo nauunawaan.
-
Basahin ang section heading para malaman ang konteksto o pangyayari sa likod ng passage.
-
Tingnan ang mga footnote.
-
Gamitin ang resources sa Gospel Library.
Matapos ang sapat na oras, hatiin ang mga estudyante sa mga grupo o pagpartner-partnerin. Pagkatapos ay maaaring ibahagi ng mga estudyante ang kanilang 30 segundong buod ng doctrinal mastery passage na pinili nila.
Pag-aralan at ipamuhay ang mga alituntunin ng pagtatamo ng espirituwal na kaalaman
Kung kinakailangan, sabihin sa mga estudyante na rebyuhin sandali ang mga alituntunin ng pagtatamo ng espirituwal na kaalaman (tingnan sa talata 5–12 ng Doctrinal Mastery Core Document [2023]). Ang mga iminumungkahing aktibidad sa pagrerebyu ay kasama sa appendix sa ilalim ng “Mga Aktibidad sa Pagrerebyu ng Doctrinal Mastery.”
Matapos marebyu ng mga estudyante ang mga alituntunin, maaari mong ilahad ang sumusunod na sitwasyon. Maaari mong sabihin sa mga estudyante na mag-isip ng mas partikular na mga detalye upang makatulong na gawing mas may kaugnayan ang sitwasyon sa kanilang buhay. Halimbawa, maaari nilang matukoy kung anong desisyon ang sinusubukang gawin ni Josie (tulad ng kung dapat ba niyang wakasan ang isang pagkakaibigan, kung paano tutugunan ang isang alalahanin sa doktrina, o kung dapat ba siyang magmisyon).
May mahalagang desisyon na kailangang gawin si Josie. Nauunawaan niya na ang desisyong ito ay maaaring magkaroon ng mabigat na epekto sa kanyang buhay at nais niyang hingin ang patnubay ng Diyos sa pamamagitan ng paghahayag. Nanalangin si Josie para magabayan ngunit sa pakiwari niya ay hindi pa siya nakatatanggap ng sagot. Iniisip niya kung tama ba ang paraang ginagawa niya sa paghahangad ng paghahayag.
-
Paano magagamit ni Josie ang mga alituntunin ng pagtatamo ng espirituwal na kaalaman para tulungan siyang maunawaan kung paano tumanggap ng paghahayag?
Kung kumpiyansa ang mga estudyante na nauunawaan nila ang tatlong alituntunin, hayaan silang magpasiya kung aling alituntunin ang una nilang gagamitin kung sila si Josie. Kung hindi sila sigurado kung saan magsisimula, maaari mong gamitin ang mga mungkahi sa ibaba. Gawin ang lahat ng makakaya mo para matulungan ang mga estudyante na masaliksik ang bawat alituntunin bilang bahagi ng talakayang ito.
Suriin ang mga konsepto at tanong nang may walang-hanggang pananaw
Basahin ang talata 8 sa ilalim ng “Pagtatamo ng Espirituwal na Kaalaman” sa Doctrinal Mastery Core Document (2023), at maghanap ng mga ideya tungkol sa paghiling sa patnubay ng Ama sa Langit kapag gumagawa ng mahirap na desisyon.
-
Paano maisasaalang-alang ni Josie ang kanyang pasiya sa konteksto ng plano ng kaligtasan?
-
Paano makatutulong na tingnan ang pasiya nang may walang-hanggang pananaw para makapag-anyaya ng paghahayag?
Kumilos nang may pananampalataya
Maaari mong sabihin sa mga estudyante na basahin at talakayin ang sumusunod nang magkaka-partner o sa maliliit na grupo.
Basahin ang talata 5 at 7 sa ilalim ng “Pagtatamo ng Espirituwal na Kaalaman” sa Doctrinal Mastery Core Document (2023), at alamin ang mga katotohanan na makatutulong kay Josie na maghangad at makatanggap ng paghahayag mula sa Ama sa Langit.
-
Bakit kaya nadarama ni Josie na hindi siya nakatatanggap ng paghahayag? (Pansinin kung ano ang maaaring makatulong sa talata 7 para makaunawa si Josie.)
-
Ano ang ilang paraan na makakakilos si Josie nang may pananampalataya upang makatanggap ng paghahayag?
Hangaring mas makaunawa sa pamamagitan ng sources na itinalaga ng Diyos
-
Ano ang ilang sources na ibinigay ng Diyos na maaaring pag-aralan ni Josie upang mas maunawaan kung paano maghangad, tumanggap, o makahiwatig ng paghahayag?
Kung kinakailangan, patingnan sa mga estudyante ang “Paghahayag” sa Gabay sa mga Banal na Kasulatan o Mga Paksa ng Ebanghelyo.
Maaari ding makatulong sa mga estudyante ang mga sumusunod na banal na kasulatan: Joseph Smith—Kasaysayan 1:11–14, 29; Doktrina at mga Tipan 6:14–16, 22–24; 8:1–3; 9:8–9; 11:12–13. Matapos mag-aral, maaaring basahin ng mga estudyante ang mga sipi na nahanap nila at ibahagi kung bakit sa palagay nila ay makatutulong ang mga ito.
Kung kapaki-pakinabang, gumawa ng tatlong column sa pisara at ilista ang isa sa mga pariralang ito sa itaas ng bawat column: Maghangad ng Paghahayag, Tumanggap ng Paghahayag, at Mahiwatigan ang Paghahayag. Habang ibinabahagi ng mga estudyante ang nalaman nila, sabihin sa kanila na isulat ang kanilang mga ideya sa ilalim ng isa o mahigit pa sa mga heading na ito. Kung ang isang column ay may mas kaunting ideya, itanong sa mga estudyante kung ano ang natutuhan nila na maaaring makatulong sa bahaging iyon ng paghahayag.
-
Ano pa ang natutuhan o nadama mo tungkol sa pagtanggap ng paghahayag na maibabahagi mo kay Josie?
Bigyan ang mga estudyante ng mga pagkakataong magtanong o magbahagi ng mga karanasan nila. Sa pagbabahagi nila, patuloy na bigyang-diin ang mga alituntunin ng pagtatamo ng espirituwal na kaalaman. Magagawa mo ito sa pamamagitan ng pagbibigay-diin sa mga paraan na ipinamuhay nila ang mga alituntunin sa kanilang mga karanasan o sa pag-anyaya sa kanila na sanaying gamitin ang mga alituntunin habang naghahanap sila ng mga sagot sa mga tanong. Tandaan na hindi kailangang alam mo ang sagot sa lahat ng itatanong nila. Minsang sinabi ni Pangulong M. Russell Ballard ng Korum ng Labindalawang Apostol sa mga titser: “Okey lang na sabihing, ‘hindi ko alam.’ Gayunman, kapag nasabi na ito, responsibilidad ninyong humanap ng mga pinakaposibleng sagot sa tanong ng inyong mga estudyante” (“Ang mga Oportunidad at Responsibilidad ng mga CES Teacher sa Ika-21 Siglo” [mensahe sa mga Church Educational System religious educator, Peb. 26, 2016], broadcasts.ChurchofJesusChrist.org).