“Fotopampianarana sy Fanekempihavanana 18:21–47: -Amin’ny tananareo no hanaovako asa mahatalanjona,-” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 18:21–47,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 29: Fotopampianarana sy Fanekempihavanana 18
Fotopampianarana sy Fanekempihavanana 18:21–47
“Amin’ny tananareo no hanaovako asa mahatalanjona”
Tamin’ny jona 1829, dia nankinin’ny Mpamonjy tamin’i Oliver Cowdery sy i David Whitmer ny andraikitra hikaroka ireo lehilahy izay hitondra ny anarany eo amin’izy ireo amin’ny “fo feno finiavana” (Fotopampianarana sy Fanekempihavanana 18:27). Ireo lehilahy ireo no nantsoina taty aoriana mba ho mpikambana voalohany ao amin’ny Kôlejin’ny Apôstôly Roambinifolo ao amin’ity fotoampitantanana ity. Ity lesona ity dia afaka manampy ny mpianatra hahatakatra ny fomba anampian’ny Tompo sy itahiany antsika amin’ny alalan’ny antson’ny Apôstôliny.
Sahanasa fianarana azo atao
Ireo Apôstôly Roambinifolo
Ity sahanasa manaraka ity dia afaka manampy ireo mpianatra hieritreritra momba ny fanampiana omen’ny Tompo azy ireo amin’ny alalan’ny apôstôly sy mpaminany amin’izao andro izao.
Soraty eny amin’ny solaitrabe ireto asa manaraka ireto: mpitsabo, mpahay mekanika, mpandrafitra, mpanefy, mpampianatra. Azonao atao ihany koa ny mangataka ireo mpianatra mba hanonona asa hafa izay voafehin’ny olona manokana mba hanampiana antsika.
Eritrereto ny toe-javatra iray izay naha-feno fankasitrahana anao tamin’ny iray tamin’ireo olona ireo.
-
Inona no fanampiana azon’ireo olona manana fahaizana manokana ireo omena antsika?
-
Ahoana no nahatonga azy ireo ho lasa nahafehy izany asa izany?
Hevero ny hampiseho ny sarin’ Ny Fiadidiana Voalohany sy Ny Kôlejin’ny Apôstôly Roambinifolo. Azonao atao ny manasa ireo mpianatra hizara fohifohy izay fampahalalana rehetra fantany momba ireo lehilahy ireo, anisan’izany ny anarany, ny mombamomba ny fianakaviany, na ny traikefany arak’asa. Ataovy izay hahatakaran’ny mpianatra fa nantsoin’i Jesoa Kristy ny Apôstôly mba hijoro ho vavolombelona momba Azy manerana an’izao tontolo izao (jereo ny Torolalana ho an’ny Soratra Masina, “Apôstôly,” scriptures.ChurchofJesusChrist.org).
Tia antsika ny Mpamonjy ary miantso Apôstôly Izy mba hanampy antsika amin’ny fomba miavaka.
-
Inona ny fanampiana izay ireo Apôstôlin’ny Mpamonjy ihany no mahafeno ny fepetra hanome izany antsika?
-
Inona, araka ny eritreritrao, no fepetra ampiasain’ny Tompo mba hisafidianana ireo Apôstôliny?
Hazavao fa androany ny mpianatra dia hianatra bebe kokoa momba ireo apôstôly sy mpaminany izay antsoin’ny Mpamonjy mba hitarika antsika. Hevero ny hanasa ny mpianatra hisaintsaina ny fiantraikan’ny fisian’ny apôstôly sy mpaminany eto an-tany ankehitriny eo amin’ny fiainan’izy ireo. Amporisiho izy ireo hitady fampianarana izay afaka manampy azy ireo hahatakatra kokoa ny fomba ahafahan’ny fiainan’izy ireo ho voatahy amin’ny alalan’ireo mpaminany sy ireo apôstôlin’ny andro farany.
Mitondra ny anaran’i Kristy eo amintsika
Ao amin’ny Fotopampianarana sy Fanekempihavanana 18, dia nandidy an’i David Whitmer sy i Oliver Cowdery ny Tompo mba hitady lehilahy izay ho voantso hanompo ao amin’ny Kôlejin’ny Apôstôly Roambinifolo indray andro any (jereo ny Fotopampianarana sy Fanekempihavanana 18:37–38).
Vakio ny Fotopampianarana sy Fanekempihavanana 18:21–25 hitadiavana ireo torohevitra nomen’ny Mpamonjy an’i David sy i Oliver.
-
Nahoana, araka ny eritreritrao, no tian’ny Tompo ho takatr’i David sy i Olivier ny zavatra novakinao tao amin’ireo andininy ireo?
Asao ny mpianatra hizara ny dikan’ny hoe mitondra ny anaran’i Kristy eo amin’ny tenany araka ny eritreritr’izy ireo. Mety hanampy ny manamafy fa amin’ny alalan’ny batisa sy ny fanasan’ny Tompo dia maneho isika fa vonona ny hitondra ny anaran’ny Mpamonjy eo amintsika. Mety hanampy ihany koa ity teny nambara manaraka ity:
Ny Loholona Paul B. Pieper ao amin’ny Fitopololahy dia nanazava ny dikan’ny hoe mitondra ny anaran’i Jesoa Kristy eo amintsika:
Amin’ny alalan’ny fitondrana ny anaran’i Kristy eo amintsika isika dia manolo-tena ny handray ireo fampianarany, ny toetrany, ary indrindra ny fitiavany lalina ao anatintsika ka lasa ampahany mandrafitra ny maha-isika antsika izy ireo. (Paul B. Pieper, “Tsy maintsy mitondra eo aminy ny anarana nomen’ny Ray azy ny rehetra,” Liahona, nôv. 2018, 44)
Ireo fepetra takina sy ny andraikitry ny Apôstôly
Nanome toromarika an’i David sy i Oliver ihany koa ny Tompo mikasika ireo fepetra ilaina ho an’ireo izay hantsoina ho Apôstôly.
Vakio ny Fotopampianarana sy Fanekempihavanana 18:26–27 hitadiavana ao amin’ireo andininy ireo ny fepetra takina. Marihina fa ny teny hoe mpianatra ao amin’ny andininy 27 dia ilazana ireo izay hantsoina ho Apôstôly.
-
Inona no fepetra takin’ny Mpamonjy amin’ireo Apôstôliny?
-
Nahoana, araka ny eritreritrao, no tian’ny Mpamonjy hahafeno izany fepetra izany ireo izay Apôstôliny?
-
Amin’ny fomba ahoana no ahafahan’izany fahalalana momba ireo Apôstôlin’ny Mpamonjy izany manampy anao?
Hazavao fa ny Mpamonjy dia namaritra ireo andraikitra fanampiny amin’ny maha-apôstôly ao amin’ny Fotopampianarana sy Fanekempihavanana 18 sy any amin’ny toerana hafa ao amin’ny Fotopampianarana sy Fanekempihavanana. Hevero ny hanao ity tabilao manaraka ity eny amin’ny solaitrabe sy hanasa ny mpianatra handika izany ao amin’ny diary fandalinan’izy ireo. Azonao ampidirina ao izay zavatra efa nianaran’ny mpianatra tao amin’ny andininy 26–27. Afaka mamaky manokana na ao anaty vondrona kely ireo andinin-tsoratra masina nomena ny mpianatra avy eo ary mameno ilay tabilao ao amin’ny diary fandalinany. Avy eo dia azon’ny vondrona tsirairay ampidirina ao amin’ny lisitra eny amin’ny solaitrabe ny iray na roa amin’ny valintenin’izy ireo.
Ampiasao ny Fotopampianarana sy Fanekempihavanana 18:26–36 sy ny 107:23 mba hamenoana ity tabilao manaraka ity:
|
Inona avy ireo toetra tian’ny Tompo ho hita ao amin’ireo Apôstôly Roambinifolo? |
Inona no tian’ny Tompo hataon’ireo Apôstôly mba hanampiana ny hafa hanatona Azy? |
Asao ny mpianatra vitsivitsy ho eny amin’ny solaitrabe mba hanisy faribolana ny zavatra momba ny Apôstôly izay eritreretin’izy ireo fa manan-danja. Asaivo mizara ny anton’izany izy ireo. Azonao atao koa ny mifanakalo hevitra momba ireto fanontaniana manaraka ireto:
-
Inona no nianaranao avy amin’ireo andininy ireo mikasika ny fomba ahafahan’ny Tompo manampy anao sy ny hafa amin’ny alalan’ireo Apôstôliny?
-
Ahoana no hamintinanao ny zavatra nianaranao momba ny Apôstôly avy amin’ireo andininy ireo?
Ampio ny mpianatra hamintina ity fahamarinana manaraka ity eny amin’ny solaitrabe: manampy antsika hanatona Azy sy hianatra ny teniny ireo Apôstôlin’ny Mpamonjy.
-
Ahoana ny nahitanao ireo Apôstôlin’ny Mpamonjy manampy anao sy ny hafa hanatona Azy ankehitriny?
Ohatra sy fampianarana avy amin’ireo Apôstôly maoderina
Omeo fotoana ny mpianatra mba hijery ohatrana Apôstôly maoderina izay mahafeno ireo fepetra takina sy manatanteraka ireo andraikitra nofaritan’ny Tompo ao amin’ny Fotopampianarana sy Fanekempihavanana 18. Afaka manampy amin’izany ity sahanasa manaraka ity.
Makà fotoana handalinana ny fampianaran’ny Apôstôly iray na maromaro amin’izao fotoana izao. Azonao atao ny mandalina ireo lahateny tamin’ny fihaonamben’ny Fiangonana maneran-tany vao haingana, na ireo lahatsoratra ao amin’ny gazetibokin’ny Fiangonana, na ireo lahatsoratra apetraka ao amin’ny tambajotran-tserasera. Rehefa mandalina ianao dia tadiavo ireo fomba hanatanterahan’ireo Apôstôly ny anjara asany amin’ny fanampiana antsika hanatona an’i Kristy. Azonao atao mihitsy aza ny mikaroka hafatra avy amin’ny Apôstôly iray izay mamaly filana iray manokana na fanontaniana anananao.
Rehefa avy nomena fotoana ampy handalinana ny mpianatra dia avelao izy ireo hizara ny zavatra nianarany amin’ny iray kilasy na ao anaty vondrona kely.