“Fanazaran-tena amin’ny fifehezana fotopampianarana 2: Fahatakarana sy fahazoana fahalalana ara-panahy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fanazaran-tena amin’ny fifehezana fotopampianarana 2,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 30: Fotopampianarana sy Fanekempihavanana 18
Fanazaran-tena amin’ny fifehezana fotopampianarana 2
Fahatakarana sy fahazoana fahalalana ara-panahy
Ny fifehezana fotopampianarana dia ahafahana manampy ireo mpianatra hanorina ny fototry ny fiainan’izy ireo eo amin’i Jesoa Kristy sy ny filazantsarany. Ity lesona ity dia hanome fahafahana ireo mpianatra hanao fanazaran-tena amin’ny fifehezana ireo andinin-tsoratra masina fifehezana fotopampianarana sy ny fotopampianarana ampianarin’izany ary koa ny fianarana sy fampiharana ireo fitsipika masina mba hahazoana fahalalana ara-panahy.
Sahanasa fianarana azo atao
Famerenana ny fifehezana fotopampianarana: Takaro
Ity sahanasa manaraka ity dia manome fahafahana ny mpianatra mba hampitombo ny fahatakarany andinin-tsoratra masina fifehezana fotopampianarana iray na maromaro. Ity sahanasa ity dia tokony haharitra 10–15 minitra fotsiny mba hahafahana manana fotoana ampy hanaovana fampiharana ny fanazaran-tena amin’ny fifehezana fotopampianarana any aoriandriana ao amin’ny lesona.
Hevero ny handefa hira iray na hira iray ao amin’ny fihirana ary hanasa ny mpianatra hanangana ny tanany raha toa ka afaka mamantatra izany izy ireo. Asao avy eo ireo izay mahafantatra ny sasany amin’ireo teny mba hanangana ny tanany. Farany, asao ireo mpianatra izay mahatakatra ny hevitra fonosin’ilay hira mba hanangana ny tanany ary hizara ny momba izany.
-
Inona no tsy mampitovy ny hoe mamantatra, mahafantatra, ary mahatakatra?
-
Amin’ny fomba ahoana isika no hoe mamantatra na mahafantatra zavatra iray nefa tsy mahatakatra izany?
-
Amin’ny fomba ahoana no itrangan’izany amin’ny fifehezana fotopampianarana?
Asao ny mpianatra hijery ireo andinin-tsoratra masina fifehezana fotopampianarana sy ireo andian-teny manan-danja ao amin’ny Tahirin-kevitra fototra ho an’ny Fifehezana fotopampianarana (2023). Angataho izy ireo hisafidy iray izay tiany ho takany kokoa. Ity sahanasa manaraka ity dia afaka manampy ny mpianatra hampitombo ny fahatakarany.
Alaivo sary an-tsaina hoe misy olona tena mila ny hafatra voarakitra ao amin’ilay andinin-tsoratra masina nosafidinao. Na izany aza, 30 segondra fotsiny no anananao hanazavana aminy ny dikan’ilay andinin-tsoratra masina. Makà minitra vitsivitsy aorian’izay mba hahatakarana bebe kokoa ny votoatin’ilay andinin-tsoratra masina.
Hevero ny hampiasa ny sasany amin’ireto paikady manaraka ireto:
-
Vakio miadana ilay andinin-tsoratra masina.
-
Jereo izay teny na andian-teny tsy azonao.
-
Vakio ny lohatenin’ny fizarana mba hahafantarana ny sahan-kevitr’ilay andinin-tsoratra masina.
-
Jereo ny fanovozan-kevitra eny amin’ny farany ambanin’ny pejy.
-
Ampiasao ireo loharanom-pahalalana ao amin’ny Médiathèque de l’Évangile.
Rehefa avy nomena fotoana ampy ny mpianatra dia zarao ho vondrona na tsiroaroa. Avy eo ireo mpianatra dia afaka mizara ny famintinan’izy ireo ny andinina-tsoratra masina fifehezana fotopampianarana izay nosafidiny mandritra ny 30 segondra.
Mianatra sy mampihatra ireo fitsipiky ny fahazoana fahalalana ara-panahy
Raha ilaina dia asao ny mpianatra hamerina hijery vetivety ireo fitsipika momba ny fahazoana fahalalana ara-panahy (jereo ny andiam-pehezan-teny faha-5 ka hatrany amin’ny faha-12 ao amin’ny Tahirin-kevitra fototra ho an’ny Fifehezana fotopampianarana [2023]). Ireo sahanasa famerenana naroso dia tafiditra ao amin’ny tovana eo ambanin’ny “Sahanasa famerenana ny fifehezana fotopampianarana.”
Rehefa avy nandinika ireo fitsipika ireo mpianatra dia hevero ny hanolotra ity rafi-tantara manaraka ity. Azonao atao ny mangataka ireo mpianatra hieritreritra antsipirian-javatra manokana kokoa mba hahatonga ilay rafi-tantara hifanaraka kokoa amin’ny fiainan’izy ireo. Ohatra, azon’izy ireo atao ny mamaritra hoe inona no fanapahan-kevitra tian’i Josie horaisina (toy ny hoe tokony hampitsahatra ny finamanana ve izy, ahoana ny fomba hiatrehany ny olana ara-potopampianarana iray, na sao dia tokony hanao asa fitoriana izy).
Misy fanapahan-kevitra lehibe iray tokony horaisin’i Josie. Takany fa mety hisy fiantraikany lehibe eo amin’ny fiainany io fanapahan-kevitra io ary te hikatsaka ny fitarihan’ Andriamanitra amin’ny alalan’ny fanambarana izy. Nivavaka mba hahazo fitarihana i Josie saingy nahatsapa ho tsy nahazo valiny izy. Manontany tena izy raha mitady fanambarana amin’ny fomba araka ny tokony ho izy.
-
Ahoana no ahafahan’i Josie mampiasa ireo fitsipiky ny fahazoana fahalalana ara-panahy mba hanampiana azy hahatakatra ny fomba handraisana fanambarana?
Raha toa ka matoky ny fahatakarany ireo fitsipika telo ireo ny mpianatra dia avelao izy ireo hamaritra hoe inona no fitsipika tokony hampiharin’izy ireo voalohany raha toa ka i Josie izy ireo. Raha tsy azon’izy ireo antoka hoe aiza no hanombohana dia azonao ampiasaina ireo sosokevitra etsy ambany. Ataovy izay azonao atao mba hanampiana ireo mpianatra hitrandraka ny fitsipika tsirairay ao anatin’ity fifanakalozan-kevitra ity.
Mamakafaka ireo foto-kevitra sy ireo fanontaniana amin’ny fomba fijery mibanjina ny mandrakizay
Vakio ny andiam-pehezan-teny 8 eo ambanin’ny “Mahazo fahalalana ara-panahy” ao amin’ny Tahirin-kevitra fototra ho an’ny Fifehezana fotopampianarana (2023), ka mitadiava torohevitra mikasika ny fomba hanasana ny Ray any An-danitra mba hitarika anao rehefa tsy maintsy mandray fanapahan-kevitra sarotra ianao.
-
Ahoana no ahafahan’i Josie mandinika ny safidiny ao anatin’ny sahan-kevitry ny drafitry ny famonjena?
-
Nahoana no afaka manampy amin’ny fahazoana fanambarana ny fijerena ilay safidy amin’ny fomba fijery mibanjina ny mandrakizay?
Manao asa amim-pinoana
Hevero ny hanasa ny mpianatra hiaraka tsiroaroa na ao anaty vondrona kely mba hamaky sy hifanakalo hevitra mikasika ireto manaraka ireto.
Vakio ny andiam-pehezan-teny 5 sy 7 eo ambanin’ny “Mahazo fahalalana ara-panahy” ao amin’ny Tahirin-kevitra fototra ho an’ny Fifehezana fotopampianarana (2023), mba hitadiavana fahamarinana izay afaka manampy an’i Josie hikatsaka sy handray fanambarana avy amin’ny Ray any An-danitra.
-
Nahoana i Josie no mety hahatsapa fa tsy nahazo fanambarana izy? (Asio marika izay mety hilain’i Josie ho takatra ao amin’ny andiam-pehezan-teny 7.)
-
Inona avy ireo fomba sasantsasany ahafahan’i Josie manao zavatra amim-pinoana mba handraisana fanambarana?
Mikatsaka fahatakarana bebe kokoa amin’ny alalan’ireo loharanom-pahalalana nofidin’ Andriamanitra
-
Inona avy ireo loharanom-pahalalana nofidin’ Andriamanitra azon’i Josie halalinina mba hahatakarana bebe kokoa ny fomba fikatsahana, na fandraisana, na famantarana fanambarana?
Raha ilaina, dia jereo ny hoe “Fanambarana” ao amin’ny Torolalana ho an’ny Soratra Masina.
Mety ho hitan’ireo mpianatra fa manampy ihany koa ireto soratra masina manaraka ireto: Joseph Smith—Tantara 1:11–14, 29; Fotopampianarana sy Fanekempihavanana 6:14–16, 22–24; 8:1–3; 9:8–9; 11:12–13. Aorian’ny fandalinana dia afaka mamaky ireo teny nindramina hitany ireo mpianatra ary manazava ny antony ilàna izany araka ny eritreritr’izy ireo.
Raha ilaina dia manaova tsanganana telo eny amin’ny solaitrabe ary tanisao eny an-tampon’ny tsanganana tsirairay ny iray amin’ireto andian-teny ireto: Mikatsaka fanambarana, Mandray fanambarana, sy Mamantatra fanambarana. Rehefa mizara ny zavatra hitany ny mpianatra dia asao izy ireo hanoratra ny heviny eo ambanin’ny iray na maromaro amin’ireo lohateny ireo. Raha toa ka ahitana hevi-baovao vitsivitsy kokoa ny tsanganana iray dia anontanio ny mpianatra ny zavatra nianarany izay mety hanampy amin’io ampahana fanambarana io.
-
Inona koa no nianaranao na tsapanao momba ny fahazoana fanambarana izay azonao zaraina amin’i Josie?
Omeo fahafahana hametraka fanontaniana na hizara ireo zavatra niainany ny mpianatra. Rehefa mizara izy ireo dia tohizo ny fanamafisana ireo fitsipiky ny fahazoana fahalalana ara-panahy. Azonao atao izany amin’ny alalan’ny fanasongadinana ny fomba nampiharan’izy ireo ireo fitsipika tao amin’ny zavatra niainany na amin’ny alalan’ny fanasana azy ireo hanao fanazaran-tena amin’ny fampiasana ireo fitsipika rehefa mikaroka ny valin’ireo fanontaniany izy ireo. Tsarovy fa tsy mila mahafantatra ny valin’ny fanontaniana tsirairay hapetrany ianao. Ny Filoha M. Russell Ballard ao amin’ny Kôlejin’ny Apôstôly Roambinifolo dia nilaza tamin’ny mpampianatra indray mandeha hoe: “Tsy maninona mihitsy ny milaza hoe, -Tsy fantatro.- Na izany aza, rehefa voalaza izany, dia manana andraikitra ianao hitady ny valiny tsara indrindra amin’ireo fanontaniana voahevitra tsara napetraky ny mpianatrao” (“The Opportunities and Responsibilities of CES Teachers in the 21st Century” [address to Church Educational System religious educators, Feb. 26, 2016], broadcasts.ChurchofJesusChrist.org).