“Сургаал ба Гэрээ 25, 2-р хэсэг: ‘Илүү сайн зүйлүүдийг эрэлхийл,’” Сургаал ба Гэрээний семинарын багшийн гарын авлага, (2025)
“Сургаал ба Гэрээ 25, 2-р хэсэг,” Сургаал ба Гэрээний семинарын багшийн гарын авлага
40-р хичээл: Сургаал ба Гэрээ 23–26
Сургаал ба Гэрээ 25, 2-р хэсэг
Бид илүү сайн дэлхийн зүйлсийг эрэлхийлэх ёстой.
Бурханы нэг хүнд хандан хэлсэн үгс бусад хүнд ч хамааралтай байдаг. Сургаал ба Гэрээ 25-д цэдэглэгдсэн Их Эзэний Эмма Смитэд хандан хэлсэн үгсийн хувьд ч энэ нь үнэн юм (16-р шүлгийг үзнэ үү). Их Эзэн түүнийг “зөв шударга ёсны титмийг” хүлээн авахад туслах зүйлсийг эрэлхийлэхэд урьсан (15-р шүлэг). Энэ хичээл нь суралцагчдад дэлхийн зүйлсийг хойш тавьж, Их Эзэний адислалуудыг эрэлхийлэхэд тусална.
Боломжит суралцах үйл ажиллагаа
Илүү сайн зүйл
Амьдрал дахь хамгийн чухал зүйлсийг эрэмбэлэхэд нь суралцагчдадаа хэрхэн туслах боломжтойгоо бод. Үүний тулд ангид сав эсвэл хайрцаг авчирч болно. Суралцагчдын хүсэл сонирхлыг харуулах боломжтой хөл бөмбөгийн бөмбөг, сургуулийн тэмдэглэлийн дэвтэр, бяцхан хөгжмийн зэмсэг, судрууд гэх мэт зүйлсийг мөн авчраарай. Саванд багтах хэмжээтэй олон эд зүйл авчирсан байхад анхаар. Тухайн сав нь тэдний амьдралыг илтгэж байгаа гэдгийг суралцагчдад тайлбарла. Суралцагчдыг амьдралдаа багтаахыг хүсэж байгаа зүйлээ сонгоход урь. Сав дүүрсний дараа суралцагчдаас саванд байхгүй зүйлээр солихыг хүссэн зүйл байгаа эсэхийг асуу. Энэхүү үйл ажиллагааны дараа суралцагчдаас амьдралынхаа эн тэргүүний зүйлсийн талаар эргэцүүлэн бодохыг хүсэж болно. Дараах үйл ажиллагаа нь үүнийг гүйцэтгэх нэг арга юм.
Өөрийн амьдралд хамгийн чухал гэж мэдэрсэн эн тэргүүнд авч үзэх зүйлсийг тэмдэглэлдээ бич. Энэ хичээлийг судалж байхдаа, Их Эзэн таныг эн тэргүүнд авч үзэх зүйлсдээ ямар нэгэн өөрчлөлт гаргаасай хэмээн хүсэж буй эсэхийг залбирч байгаад бодож үз.
Сургаал ба Гэрээ 25 дээр Их Эзэн Эммад хандан ярьж, эн тэргүүнд тавих зүйлсийнх нь талаар зөвлөгөө өгсөн байдаг.
Сургаал ба Гэрээ 25:10-ыг уншаад, Их Эзэн Эмма Смитийг юу хийхэд урьсныг олж мэд.
-
“Илүү сайн зүйлүүдийг эрэлхийл” гэдэг нь ямар утгатай гэж та бодож байна вэ?
-
Бид энэ шүлгээс ямар үнэнийг мэдэж авч болох вэ?
Бурханы зүйлүүд
Их Эзэн биднийг дэлхийн зүйлүүдийг хойш тавьж, Бурханы зүйлүүдийг эрэлхийлэхэд урьсан хэмээх үнэнийг олж мэдэхэд суралцагчдад тусал. Сургаал ба Гэрээ 25:10 дээрх үгсийг тэмдэглэх талаар бодож үзэхийг суралцагчдаас хүс.
Суралцагчдад Их Эзэний зөвлөгөөг ойлгоход нь туслахын тулд дараах судруудаас ижил үг хэллэгүүдийг хайж олоход урьж болно. Суралцагчдаас нэг үг хэллэгийг сонгож, энэ нь тэдэнд юуг ойлгоход тусалсан талаар тайлбарлахыг хүс. Эдгээр шүлгийг хэрхэн холбогдох эшлэл болгож эсвэл холбоос үүсгэхийг суралцагчдад үзүүлэх талаар бодож үз.
Сургаал ба Гэрээ 25:10-ыг Матай 6:19–21 болон 2 Нифай 9:51-тэй харьцуул.
-
Судар дээр эдгээр шүлгийн ямар үг, хэллэг танд Их Эзэний урилгыг ойлгоход тусалж байна вэ?
Суралцагчдад (Сургаал ба Гэрээ 25:10) дээрх “дэлхийн зүйлүүд” гэдэгт тооцогдох тодорхой зүйлсийн талаар бодоход тусламж хэрэгтэй байж болно. Бурханы зүйлүүдийг хийхэд саад болж болох дэлхийн зүйлүүдийг самбарт жагсаан бичихэд суралцагчдыг урих талаар бодож үз. Та суралцагчдыг эдгээр зүйлийг хойш тавихдаа хэр сайн байгаагаа тунгаан бодоход урьж болно. Зарим зүйлд бага цаг зарцуулах хэрэгтэй байдаг ч бусад зүйлд огт цаг зарцуулахгүй, анхаарлаа хандуулахгүй байх ёстой гэдгийг ойлгоход суралцагчдад тусал.
-
Аврагч дэлхийн зүйлүүдээс илүүтэй Бурханы зүйлүүд дээр төвлөрдөг гэдгийг харуулсан Түүний амьдралын ямар жишээ байдаг вэ?
Хэрэв суралцагчдад тухайн жишээнүүдийг бодож олоход тусламж хэрэгтэй бол та тэднийг Лук 2:42–49; Иохан 2:13–16; Иохан 6:38 зэрэг эшлэлүүдийг хайж олоход урьж болно.
-
Дэлхийн зүйлсийг хойш тавихыг хичээж буй өсвөр насны хүүхдэд Их Эзэн хэрхэн тусалж чадах вэ?
Арван хоёр төлөөлөгчийн чуулгын ахлагч Ричард Г.Скотт [1928–2015] өсвөр насны хүүхдэд тохиолдсон дараах жишээг хуваалцжээ.
Оросын Ростов-на-Дону номлолын өсвөр үеийнхнийг тус бүр 2000 нэрийг индексжүүлж, гэр бүлийнхээ дор хаяж нэг нэрийг ариун сүмийн ёслолуудыг гүйцэтгэхээр бэлэн болгоход урьжээ. Энэ ажлыг гүйцэтгэсэн хүмүүсийг Украйны Киев шинэ ариун сүм рүү явах урт удаан аялалд урьсан байна. Нэг залуу туршлагаа ийн хуваалцжээ. “Би компьютерын тоглоом тоглож хамаг цагаа үрдэг байлаа. Ариун сүмд ёслол гүйцэтгүүлэх хүмүүсийн нэрийг индексжүүлж эхэлснээс хойш надад компьютер дээр тоглох зав гардаггүй болсон. Би эхлээд, ‘Өө яаж үүнийг хийх юм бэ! Ёстой барахгүй юм байна!’ гэж бодсон. Харин төсөл дуусахад би компьютер тоглох сонирхолгүй болсон байлаа. Гэр бүлийн түүхийн ажил бол дэлхий дээр бидний хийх ёстой ажил. Энэ ажил тэнгэрт үргэлжлэх болно.” (Ричард Г.Скотт, “Нас барагсдын авралаас ирдэг баяр баясгалан,” 2012 оны 10-р сарын Ерөнхий чуулган, 114)
-
Энэ залуу хүүгийн жишээнээс юу нь танд онцгой санагдсан бэ?
Суралцагчдад дэлхийн зүйлүүдийг хойш тавьж байсан хувийн туршлагаа эргэцүүлэн бодоход нь туслахын тулд тэмдэглэлдээ дараах асуултад хариулах цаг гаргаж өгөхийг бод.
-
Та амьдралдаа Бурханы зүйлүүдийг эрэлхийлэхийг сонгосон үедээ хэрхэн адислагдаж байсан бэ?
Илүү сайн зүйлүүдийг эрэлхийлэхэд туслах
Сургаал ба Гэрээ 25-ын сүүлийн зургаан шүлэг Эммагийн амьдралын янз бүрийн асуудалд өгсөн зөвлөгөөг багтаадаг. Сургаал ба Гэрээ 25:11–16-г уншаад, Их Эзэний өгсөн зөвлөгөө хэрхэн бидэнд илүү сайн зүйлүүдийг эрэлхийлэхэд тусалж болохыг олж мэд.
-
Та “дэлхийн зүйлүүдийг хойш тавьж мөн илүү сайн зүйлүүдийг эрэлхийлэх”-д туслах ямар зүйлийг олж мэдсэн бэ? (10-р шүлэг).
Бурханы зүйлүүдийг хэрхэн илүү сайнаар эн тэргүүнд тавих тухай хувийн илчлэлт эрэлхийлж, хүлээн авахад нь суралцагчдад туслахын тулд тэднийг дараах сэдвүүдээс нэгийг эсвэл түүнээс илүү олныг судлахад урих талаар бодож үз. Үүнд дуу хөгжим, гэрээнүүд, номхон дөлгөөн байдал ба Их Эзэний зарлигууд орно. Суралцагчдад ангиараа болон жижиг бүлгээр эсвэл бие даан судлах сонголтыг өг. Хэрэв тэд ангиараа хамт судлахыг сонговол хүн бүрийг судлах сэдвээ сонгоход урь. Хэрэв суралцагчид бүлгээрээ хамт ажиллахыг хүсвэл суралцагч бүр өөр өөр хэсгийг судалж, сурч мэдсэн зүйлээ бүлэг дотроо хуваалцаж болно. Эсвэл цөөн суралцагчийг хичээл орохоос өмнө бэлтгэж, тухайн хичээлийг заахад урьж болно. Хамгийн хэрэгтэй эх сурвалжуудаар хангаарай.
Дуу хөгжим
Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 19.2 (“Гэр орон дахь дуу хөгжим”), 19.3 (“Сүмийн цуглаанууд дээрх дуу хөгжим”)
Өсвөр үеийнхний бат бөх байдлын төлөө: Сонголт хийхэд туслах хөтөч (2022) гарын авлагын “Бурханы гэрэлд алх,” 18-р хуудас (“Өргөн дэмждэг, сүнслэг өдөөлт өгдөг, Сүнсийг урьдаг зүйлсийг эрэлхийл” хэсгийг үзнэ үү)
Суралцагчдыг нэг дуулал сонгож, тухайн дуулал Их Эзэний тухай юу зааж байгааг мөн Түүний бидэнд зориулан хадгалж буй тэрхүү адислалуудыг олж мэдэхэд урих талаар бодож үз. Та тусалж болох дууны бусад эх сурвалжийг мөн Media Library дээрх өсвөр үеийнхэнд зориулсан дуу хөгжмийг суралцагчдад үзүүлж болно.
Гэрээ
Өсвөр үеийнхний бат бөх байдлын төлөө: Сонголт хийхэд туслах хөтөч (2022) гарын авлагын “Бурханы гэрэлд алх, 17-р хуудас (“Мөнхийн үнэнүүд” хэсгийг үзнэ үү)
Gospel Topics, “Гэрээ,” topics.ChurchofJesusChrist.org
Гэрээгээ сахих нь ямар утга учиртайг ойлгож, гэрээгээ сахиснаар хэрхэн адислагдаж болох талаар харуулсан дараах видеог суралцагчдад үзүүлэхийг бод.
Номхон дөлгөөн байдал
Судруудын удирдамж, “Хүлцэнгүй байх, хүлцэнгүй байдал,” scriptures.ChurchofJesusChrist.org
Үлиссэс Соарэс, “Хүлцэнгүй даруу мөн зүрх сэтгэлдээ номхон байгтун,” 2013 оны 10-р сарын Ерөнхий чуулган (1–6-р догол мөрийг үзнэ үү)
(Дэвид А.Бэднар, “Зүрх сэтгэлдээ номхон дөлгөөн,” 2018 оны 4-р сарын Ерөнхий чуулган, 39 (“Эзэн номхон дөлгөөн байдлын үлгэр жишээ мөн” хэсгийг үзнэ үү)
Зарлигууд
Судруудын удирдамж, “Бурханы зарлигууд,” scriptures.ChurchofJesusChrist.org
Өсвөр үеийнхний бат бөх байдлын төлөө: Сонголт хийхэд туслах хөтөч (2022), “Бурханаа хайрла, хөршөө хайрла,” 10
Суралцагчдыг сурч мэдсэн зүйлээ болон энэ нь Бурханы зүйлсийг эрэлхийлэхэд тэдэнд хэрхэн тусалж болох талаар хуваалцахад урамшуул. Та суралцагчдыг ижил сэдэв судалсан эсвэл ямар нэгэн өөр сэдэв судалсан суралцагчидтай хуваалцахад урьж болно. Суралцагчдыг хүлээн авсан сүнслэг өдөөлтүүдийн дагуу үйлдэхэд урь.
Хэрэв суралцагчдад сурсан зүйлийнхээ дагуу хэрхэн үйлдэхэд туслах арга замуудыг бодоход тусламж хэрэгтэй бол та Өсвөр үеийнхний бат бөх байдлын төлөө: Сонголт хийхэд туслах хөтөч (2022) гарын авлагын сэдэв бүр дээрх урилга руу чиглүүлэн зааж болно. Бурханы зүйлийг эрэлхийлэхийн тулд юу хийх талаар бичиж, байнга харах боломжтой газраа байрлуулахад суралцагчдыг урь. Мөн Их Эзэний тусламжийг болон гэр бүлийн гишүүд, найз нөхдийнхөө тусламжийг эрэлхийлэхэд тэднийг урамшуул.