Lesson 47: Doktrina at mga Tipan 30–36

Doktrina at mga Tipan 30–36, Bahagi 1

“Ipahayag ng Aking Ebanghelyo”

Ilang buwan lang matapos opisyal na maitatag ang Simbahan, iniutos ng Tagapagligtas sa ilang bagong miyembro na magmisyon. Sa kabila ng kanilang pagtanggap at limitadong pag-unawa tungkol sa ipinanumbalik na ebanghelyo, tinawag ng Panginoon ang mga taong ito upang ipahayag ang Kanyang ebanghelyo sa “tunog ng isang pakakak” (Doktrina at mga Tipan 30:9). Ang lesson na ito ay makatutulong sa mga estudyante na maunawaan ang ilan sa mga dahilan ng Tagapagligtas sa pag-uutos sa atin na ipangaral ang Kanyang ebanghelyo.

Mga Posibleng Aktibidad sa Pag-aaral

Ito ang una sa dalawang lesson na tatalakay sa Doktrina at mga Tipan 30–36. Ang bahagi 1 ay magtutuon sa mga dahilan kung bakit nais ng Panginoon na ibahagi natin ang Kanyang ebanghelyo, at ang bahagi 2 ay magtutuon sa tulong na ibinibigay Niya sa atin at kung paano tayo mangangaral sa iba. Kung limitado ang oras ng klase at isang lesson lang sa Doktrina at mga Tipan 30–36 ang maituturo, isipin kung paano maaaring epektibong pagsamahin ang dalawang lesson.

Ang tungkulin natin na ipangaral ng ebanghelyo

Maaari mong simulan ang klase sa pagpapakita ng isang mission call kamakailan at pagbabasa nito nang malakas. Sabihin sa mga estudyante na ibahagi kung ano ang kinasasabikan nila at marahil ang mga inaalala nila kapag iniisip nilang magmisyon.

Ibinahagi ni Pangulong Russell M. Nelson ang sumusunod na payo na nauugnay sa paglilingkod bilang full-time missionary:

Ngayon, muli kong pinagtitibay nang husto na hinihiling ng Panginoon sa bawat karapat-dapat at may kakayahang binatilyo na maghanda para sa at maglingkod sa misyon. Para sa mga lalaking Banal sa mga Huling araw, ang paglilingkod sa misyon ay isang responsibilidad ng priesthood. …

Para sa inyo na bata pa at may kakayahang mga sister, ang misyon ay isa ring maganda, ngunit opsyonal, na oportunidad. Mahal namin ang mga sister missionary at buong-puso namin silang tinatanggap. Ang iniaambag ninyo sa gawaing ito ay kahanga-hanga! Ipagdasal na malaman kung nais ng Panginoon na magmisyon kayo, at sasagot ang Espiritu Santo sa inyong puso’t isipan.

Mahal na mga kaibigang kabataan, bawat isa sa inyo ay mahalaga sa Panginoon. Inireserba na Niya kayo sa panahong ito para tumulong na tipunin ang Israel. Ang desisyon ninyong magmisyon, proselyting man ito o service mission, ay magpapala sa inyo at sa maraming iba pa. …

Lahat ng missionary ay nagtuturo at nagpapatotoo tungkol sa Tagapagligtas. Kailangan ngayon ang liwanag ni Jesucristo nang higit kailanman dahil sa espirituwal na kadiliman sa mundo. Lahat ay nararapat na magkaroon ng pagkakataong malaman ang tungkol sa ipinanumbaik na ebanghelyo ni Jesucristo. Bawat tao ay nararapat na malaman kung saan siya makasusumpong ng pag-asa at kapayapaan na “hindi maabot ng pag-iisip” [Filipos 4:7]. (Russell M. Nelson, “Pangangaral ng Ebanghelyo ng Kapayapaan,” Liahona, Mayo 2022, 6–7)

• Ano ang naiisip o nadarama mo tungkol sa pahayag ni Pangulong Nelson?

• Anong katibayan ang nakikita mo na kailangan ang liwanag ni Jesucristo nang higit kailanman sa mundo?

Ipaliwanag na ang pangangaral ng ebanghelyo ng Tagapagligtas ay hindi lamang tungkulin ng mga full-time missionary kundi responsibilidad din ng lahat ng miyembro ng Simbahan. Sabihin sa mga estudyante na ang lesson ngayon ay magtutuon sa mga turo ng Panginoon tungkol sa mga dahilan kung bakit dapat nating ibahagi ang Kanyang ebanghelyo. Maaari mong ibahagi ang mga sumusunod na paanyaya para tulungan ang mga estudyante na maghandang pag-aralan ang lesson na ito.

Pag-isipang mabuti ang nalalaman mo na tungkol sa kung bakit inaasahan ng Panginoon na ipangangaral ng Kanyang mga tagasunod ang ebanghelyo, full-time missionary man o sa mga araw-araw na pakikipag-ugnayan. Maaari mong isulat ang mga dahilang ito sa iyong study journal. Sa pag-aaral mo ngayon, hanapin ang mga turo na tumutulong sa iyo na mas maunawaan kung bakit labis na nagnanais ang Panginoon na ibahagi ng Kanyang mga tagasunod ang Kanyang ebanghelyo.

“Mangaral mula sa araw na ito”

Bago magklase, i-display ang mga sumusunod na pangalan sa pisara o sa mga pader sa buong silid: Peter Whitmer Jr., John Whitmer, Thomas B. Marsh, Parley P. Pratt, Ziba Peterson, Ezra Thayer, Northrop Sweet, Orson Pratt, Sidney Rigdon, at Edward Partridge. Itanong sa mga estudyante kung may nakikilala sila sa alinman sa mga pangalan. Ipaliwanag na lahat ng kalalakihang ito ay tinawag ng Panginoon na magmisyon at ipangaral ang ebanghelyo matapos maitatag ang Simbahan. Ipaliwanag na ang ilan sa kanila ay nabinyagan nang wala pang isang buwan bago sila tinawag.

Ang sumusunod na aktibidad sa pag-aaral ay makatutulong sa mga estudyante na maunawaan ang ilan sa mga dahilan kung bakit iniuutos sa atin ng Tagapagligtas na ipangaral ang Kanyang ebanghelyo. Maaaring igrupu-grupo ang mga estudyante at bigyan ang bawat estudyante ng kalakip na handout. Maaaring italaga sa bawat grupo ang isa sa mga scripture passage para pag-aralan.

Ang Payo ng Panginoon sa mga Misyonero sa Doktrina at mga Tipan 30–36

Pag-aralan ang payo ng Tagapagligtas sa mga taong nakalista sa ibaba, at talakayin ang mga sumusunod na tanong.

Doktrina at mga Tipan 31:1–5 (Thomas B. Marsh)

• Ano ang ilang katotohanan mula sa mga talatang ito na makatutulong sa iyo na maunawaan kung bakit iniuutos sa atin ng Tagapagligtas na ibahagi ang Kanyang ebanghelyo?

• Sa iyong palagay, bakit tinukoy ni Jesucristo ang Kanyang ebanghelyo bilang “mabubuting balita ng dakilang kagalakan”? (talata 3). Paano nagbibigay sa iyo ng kagalakan ang ebanghelyo ng Tagapagligtas?

Doktrina at mga Tipan 33:1–7, 10–12 (Ezra Thayer at Northrop Sweet)

• Ano ang ilang katotohanan mula sa mga talatang ito na makatutulong sa iyo na maunawaan kung bakit iniuutos sa atin ng Tagapagligtas na ibahagi ang Kanyang ebanghelyo?

• Bakit kaya nais ng Panginoon na ipahayag ang Kanyang ebanghelyo nang may malakas na tinig tulad ng “tunog ng pakakak”? (talata 2).

Doktrina at mga Tipan 34:1–7 (Orson Pratt)

• Ano ang ilang katotohanan mula sa mga talatang ito na makatutulong sa iyo na maunawaan kung bakit iniuutos sa atin ng Tagapagligtas na ibahagi ang Kanyang ebanghelyo?

• Sa iyong palagay, bakit tayo “lalong … pinagpala” (talata 5) dahil tinawag tayong ipangaral ang ebanghelyo ng Tagapagligtas kaysa paniwalaan lamang natin ito?

Doktrina at mga Tipan 35:1–3, 6–8, 12–13 (Sidney Rigdon)

• Ano ang ilang katotohanan mula sa mga talatang ito na makatutulong sa iyo na maunawaan kung bakit iniuutos sa atin ng Tagapagligtas na ibahagi ang Kanyang ebanghelyo?

• Sa iyong palagay, bakit tumatawag ang Panginoon ng “mangmang” at mga taong kulang sa karanasan upang ipahayag ang Kanyang ebanghelyo sa “mga bansa” ng mundo? (talata 13).

© 2023 by Intellectual Reserve, Inc. All rights reserved.

Matapos pag-aralan at talakayin ng mga estudyante ang mga talatang ito, sabihin sa kanila na ibahagi ang natutuhan nila. Ang isang paraan para magawa ito ay isulat ang pariralang Mga dahilan kung bakit nais ng Tagapagligtas na ibahagi natin ang Kanyang ebanghelyo sa gitna ng pisara. Pagkatapos ay maaaring pumunta sa pisara ang maraming estudyante at isulat ang mga ideyang natutuhan nila mula sa kanilang pag-aaral. Hikayatin ang mga estudyante na mag-isip ng maraming dahilan hangga’t kaya nila. Narito ang ilang halimbawa ng mga sagot na maaari nilang ibahagi:

• Ang Kanyang ebanghelyo ay makatutulong sa mga tao na makaranas ng kagalakan (tingnan sa Doktrina at mga Tipan 31:3).

• Hindi natin matatamo ang buhay na walang hanggan nang hindi nananampalataya sa Kanya, nagsisisi, at tumatanggap ng mga ordenansa ng Kanyang ebanghelyo (tingnan sa Doktrina at mga Tipan 33:10–12).

• Nais Niyang maging handa ang mundo para sa Kanyang Ikalawang Pagparito (tingnan sa Doktrina at mga Tipan 33:10; 34:6–7).

• Mahal Niya tayo at ibinigay ang Kanyang buhay para sa atin (tingnan sa Doktrina at mga Tipan 34:3; 35:2).

Matapos ibahagi ng mga estudyante ang mga katotohanang natutuhan nila, maaari kang magtanong ng ilang bagay tulad ng mga sumusunod:

• Paano tayo mahihikayat ng pag-alam sa mga katotohanang ito na ibahagi ang ebanghelyo ng Tagapagligtas sa iba, bilang mga full-time missionary man o sa ating pang-araw-araw na pakikipag-ugnayan?

• Ano ang ilan sa pinakamahahalagang dahilan para ibahagi mo ang ebanghelyo ng Tagapagligtas?

Patotohanan ang mga katotohanang tinalakay ninyo ngayon. Hikayatin ang mga estudyante na kumilos ayon sa mga pahiwatig na natanggap nila. Maaari mo silang anyayahan na mapanalanging pag-isipan kung paano tutugon sa payo ni Pangulong Nelson tungkol sa paglilingkod bilang full-time missionary.

Karagdagang Resources

Doktrina at mga Tipan 35:13. Ano ang ibig sabihin ng Diyos sa “himayin ang mga bansa sa pamamagitan ng kapangyarihan ng aking Espiritu”?

Ang salitang himayin ay tumutukoy sa paggiik ng mga butil. Ang paggiik ay ang proseso na naghihiwalay ng butil mula sa tangkay at ipa nito. Itinatabi ang butil, at itinatapon ang tangkay at ipa. Samakatwid, ang “himayin ang mga bansa” ay tumutukoy sa gawain ng pangangaral ng ebanghelyo upang ang mga anak ng Diyos ay matipon at maihiwalay sa mundo.

Bakit dapat kong ibahagi ang ebanghelyo?

Ipinahayag ni Pangulong Russell M. Nelson:

Ang ating tungkulin bilang pinagtipanang Israel ay tiyakin na napagtatanto ng bawat miyembro ng Simbahan ang kagalakan at mga pribilehiyong kaugnay ng pakikipagtipan sa Diyos. Ito ay isang panawagan na hikayatin ang bawat lalaki at babaeng tumutupad sa tipan, kabilang ang mga bata, na ibahagi ang ebanghelyo sa mga taong naaabot ng kanilang impluwensya. Isa rin itong panawagan na suportahan at hikayatin ang ating mga missionary, na isinugo nang may mga tagubilin na magbinyag at tumulong na tipunin ang Israel, upang magkakasama tayong maging tao ng Diyos at Siya ang maging Diyos natin (tingnan sa Doktrina at mga Tipan 42:9). (Russell M. Nelson, “Ang Walang Hanggang Tipan,” Liahona, Okt. 2022, 10)

Itinuro ni Pangulong Dallin H. Oaks ng Unang Panguluhan:

Gusto kong tukuyin ang mga pagsisikap ng missionary bilang pagbabahagi ng ebanghelyo. Pinagtitibay ng salitang pagbabahagi na mayroon tayong isang bagay na napakahalaga at nais nating ibigay ito sa iba para sa kanilang kapakinabangan at pagpapala. …

Mahal ng Panginoon ang lahat ng Kanyang anak. Nais Niya na matamo ng lahat ang kabuuan ng Kanyang katotohanan at ang kasaganaan ng Kanyang mga pagpapala. (Dallin H. Oaks, “Sharing the Gospel,” Ensign, Nob. 2001, 8–9)

Paano mapagpapala ng full-time mission ang buhay ko?

Itinuro ni Elder Denelson Silva ng Pitumpu:

Sa lahat na nagpapasiyang maglingkod sa Kanya, ipinapangako ko sa inyo na ang 24 o 18 buwan ng paglilingkod ay lilipas sa misyon na tulad ng paglipas nito kung nanatili kayo sa bahay, ngunit ang mga oportunidad na naghihintay sa misyon sa karapat-dapat na mga kabataang lalaki at babae ng Simbahang ito ay walang katulad. Ang pribilehiyong katawanin ang Tagapagligtas na si Jesucristo at ang Kanyang Simbahan ay hindi maaaring balewalain. Ang pakikibahagi sa di-mabilang na panalangin, pagkakaroon at pagbabahagi ninyo ng patotoo nang ilang beses sa isang araw, pag-aaral ng mga banal na kasulatan nang maraming oras, at pagkausap sa mga taong hindi sana ninyo makikilala kailanman kung nanatili kayo sa bahay, ay mga karanasang mahirap ilarawan. Ang ganito ring antas ng karanasan ay nakalaan para sa mga kabataang tinawag ng Panginoon na maglingkod sa mga service mission. Lubos namin kayong tinatanggap at kailangan. Huwag sana ninyong maliitin ang kahalagahan ng isang service mission, sapagkat ang mga service mission ay naglalaan din ng mga karanasang mahirap ilarawan. (Denelson Silva, “Tapang na Ipahayag ang Katotohanan,” Liahona, Nob. 2022, 71)

Mga Karagdagang Aktibidad sa Pag-aaral

Doktrina at mga Tipan 30:1–4. Pagtutuon sa mga bagay ng Diyos nang higit kaysa “mga bagay ng mundo”

Maaari mong anyayahan ang mga estudyante na isipin ang mga makamundong bagay na nakagagambala sa atin sa pagtutuon sa mga espirituwal na bagay. Maaaring interesado ang mga estudyante na malaman na pinagsabihan ng Panginoon si David Whitmer sa pagbibigay ng priyoridad sa mga makamundong bagay kaysa sa Kanya at sa paglilingkod kung saan siya tinawag. Sabihin sa mga estudyante na basahin ang Doktrina at mga Tipan 30:1–4, at alamin ang payo ng Panginoon kay David. Maaari mong itanong ang ilang bagay tulad ng mga sumusunod:

• Tulad ni David Whitmer, paano natin mas itinutuon kung minsan ang ating isipan sa mga bagay ng mundo sa halip na sa mga bagay ng Diyos?

• Kapag natutukso tayong kalimutan ang Panginoon at magtuon sa mga makamundong bagay, paano tayo mas “[tatalima] sa Espiritu” at aasa sa Tagapagligtas na palakasin tayo?

Doktrina at mga Tipan 31:10–13. “Isang manggagamot sa simbahan”

Maaaring matuto ang mga estudyante mula sa payo na ibinigay ng Tagapagligtas kay Thomas B. Marsh sa Doktrina at mga Tipan 31:10–13. Hikayatin ang mga estudyante na markahan ang salitang manggagamot sa talata 10, at sabihin sa kanila na ipaliwanag ang pangunahing tungkulin ng isang manggagamot. Sabihin sa kanila na i-cross-reference ang talata 10 sa Mateo 9:12, kung saan tinukoy ng Tagapagligtas ang Kanyang sarili bilang isang manggagamot. Maaari kang magtanong ng tulad ng mga sumusunod:

• Bakit angkop na titulo ang “Dakilang Manggagamot” para sa Panginoong Jesucristo?

• Paano Siya naging manggagamot sa iyo o sa isang taong mahal mo?

• Ano ang ilang paraan na maaari kang maging “manggagamot” sa mga miyembro ng inyong ward o branch tulad ng ipinayo na gawin ni Thomas B. Marsh?