Lesson 67: Doktrina at mga Tipan 49–50

I-assess ang Iyong Pagkatuto 4

Doktrina at mga Tipan 41–50

Ang pagbibigay sa mga estudyante ng oras para ma-assess ang espirituwal na pag-unlad ay makatutulong sa kanila na mas mapalapit sa Tagapagligtas at magsikap na maging higit na katulad Niya. Maaari din nilang makita ang progresong nagawa nila at kung saan sila maaaring magpakahusay pa. Ang lesson na ito ay makatutulong sa mga estudyante na maalala at masuri kung paano nakatulong sa espirituwal na pag-unlad nila ang kanilang mga karanasan sa pag-aaral ng Doktrina at mga Tipan.

Mga Posibleng Aktibidad sa Pag-aaral

Suriin ang inyong mga espirituwal na palatandaan

Ang sumusunod ay makapaghahanda sa mga estudyante na ikumpara ang mga pisikal na palatandaan sa katibayan na matatagpuan nila sa kanilang espirituwal na pag-unlad. Maaari nilang gawin ang aktibidad na ito nang mag-isa o bilang isang klase sa pamamagitan ng pagdrowing ng mapa sa pisara.

Pumili ng lokal na destinasyon at magdrowing ng mapa mula sa iyong kasalukuyang lokasyon papunta sa destinasyong iyon. Isama ang mga palatandaan na tutulong sa isang tao na malaman na nasa tamang ruta sila.

• Aling mga palatandaan ang isinama mo? Bakit?

• Anong papel ang ginagampanan ng mga palatandaan sa pagtulong sa iyo na makapunta sa destinasyon?

  Kung nagdrowing ka ng mapa sa pisara, maaari mong palitan ang orihinal na destinasyon ng pariralang “Pagiging katulad ni Jesucristo.” Habang sumasagot ang mga estudyante sa susunod na tanong, maaari mong palitan ng mga sagot ng mga estudyante ang ilan sa mga palatandaan.

  Mag-isip ng isang paraan para matulungan ang mga estudyante na maituon ang kanilang isipan sa sarili nilang buhay. Maaari mong sabihin ang tulad ng sumusunod gamit ang sarili mong mga salita.

• Kung ang ating patutunguhan ay maging higit na katulad ni Jesucristo, ano ang ilan sa mga espirituwal na palatandaan na makatutulong sa iyo para malaman mo na nasa tamang landas ka?

Nangangailangan ng pagninilay at patnubay ng Espiritu Santo para makita natin nang malinaw ang ating pag-unlad. Maglaan ng oras na matukoy ang ilan sa mga pag-unlad na nagawa mo sa pamamagitan ng paghahanap ng mga espirituwal na palatandaan sa iyong buhay. Sa madaling salita, maghanap ng katibayan na nagiging mas katulad ka ni Jesucristo habang pinag-aaralan mo ang Doktrina at mga Tipan nitong mga nakaraang linggo.

Maaari mong bigyan ng oras ang mga estudyante na magbulay-bulay at magnilay nang mag-isa. Matapos ang sapat na oras, sabihin sa kanila na ibahagi ang natuklasan nila.

Bilang alternatibo, maaari mong gamitin ang sumusunod na mga aktibidad para matulungan ang mga estudyante na pagnilayan ang kanilang espirituwal na pag-unlad nitong mga nakaraang linggo. Ang mga aktibidad sa assessment sa lesson na ito ay pag-follow up sa mga nakaraang lesson sa seminary. Kung ang mga lesson na ito ay iniangkop o hindi itinuro, ang mga aktibidad sa assessment ay kailangan ding iangkop upang ipakita ang mga naging karanasan ng iyong mga estudyante.

Sa bawat aktibidad, maaari mong bigyang-diin sa mga estudyante na ang pag-assess sa kanilang pagkatuto sa mga paraang ito ay maaaring tulad ng pagpansin sa mga palatandaan sa isang paglalakbay na nagpapatibay na papunta sila sa tamang direksyon. Maging sensitibo sa mga estudyante na maaaring nakadarama na hindi sila umuunlad o hindi pa nakakakita ng positibong pagbabago sa kanilang buhay, at mag-isip ng mga paraan para mahikayat sila sa kanilang mga pagsisikap.

Makadama ng dagdag na hangaring magkaroon ng buhay na inilaan

Ang aktibidad na ito ay makatutulong sa mga estudyante na pagnilayan ang hangarin nilang magkaroon ng buhay na inilaan tulad ng ginawa ng Tagapagligtas. Ginagamit ng aktibidad na ito ang natutuhan ng mga estudyante tungkol sa pagkakaroon ng buhay na inilaan sa Doktrina at mga Tipan 42:29–42. Ang ilan sa mga sumusunod na tanong ay makatutulong sa mga estudyante na marebyu ang kanilang naunawaan sa batas ng paglalaan.

• Ano ang naaalala mo tungkol sa batas ng paglalaan?

• Aling mga talata mula sa Doktrina at mga Tipan 42 ang makatutulong sa atin na mas maunawaan ang batas na ito?

• Ano ang ilang halimbawa ng magagawa ng mga kabataan para maipamuhay ang batas ng paglalaan sa kasalukuyang panahon?

  Kabilang sa ilan sa mga talatang maaaring banggitin ng mga estudyante ang talata 29–38. Kung hindi babanggitin ng mga estudyante ang alinman sa mga ito, maaaring mainam na ipabasa sa kanila ang mga talata at ipabahagi ang matutuklasan nila. Sa oras ng lesson tungkol sa batas ng paglalaan, maaaring isinulat ng mga estudyante ang “Kanyang mga kamay” o ibinakat nila ang isa sa kanilang mga kamay sa kanilang journal. Maaaring sinuri nila ang hangarin nilang maging tulad ng mga kamay ng Panginoon sa kanilang pakikipag-ugnayan sa iba. Kung ginawa ito ng mga estudyante, maaari mo silang anyayahang hanapin ang entry na ito sa kanilang study journal at tingnan kung paano sila tumugon. Ang mga sumusunod na tanong ay makatutulong sa mga estudyante na masuri kung paano maaaring nagbago ang kanilang nadarama tungkol sa batas ng paglalaan. Maaaring sumagot ang mga estudyante sa kanilang journal.

• Ano ang nadarama mo tungkol sa paglalaan ng iyong oras, mga talento, at iba pang mga bagay na ipinagkaloob sa iyo ng Panginoon para itayo ang Kanyang kaharian, kabilang na ang pagtulong sa mga nangangailangan?

• Paano maikukumpara ang nadarama mo nang pag-aralan mo ang batas ng paglalaan ilang linggo na ang nakararaan? Ano sa palagay mo ang nakaapekto sa nadarama mo?

Matapos ang sapat na oras na makapagnilay ang mga estudyante, maaari mo silang purihin para sa tapat na pagsusuri ng kanilang nadarama. Maaari mong sabihin sa mga estudyante na ibahagi ang natutuhan o natuklasan nila mula sa aktibidad na ito. Maaari mong tulungan ang mga estudyante na pag-isipan kung paano makakaapekto sa kanila ang pagkakaroon ng buhay na inilaan 1, 5, o 10 taon mula ngayon. Maaari ka ring magbahagi ng mga paraan na napagpala ka sa iyong pagsisikap na magkaroon ng buhay na inilaan at kung paano ito nakatulong sa iyo na maging higit na katulad ni Cristo.

Hikayatin ang mga estudyante na maghangad ng paghahayag kung paano sila magiging mas handang gawin ang lahat sa abot ng kanilang makakaya para tulungan ang mga nangangailangan at itayo ang kaharian ng Diyos sa lupa sa panahong ito.

Pagsunod sa mga kautusan ng Diyos

Upang matulungan ang mga estudyante na masuri ang kanilang mga pagsisikap kamakailan na sundin ang mga kautusan ng Diyos, sabihin sa kanila na rebyuhin ang Doktrina at mga Tipan, at maghanap ng mga kautusang natutuhan nila kamakailan. Maaari mo silang hikayatin na ilista sa pisara ang ilan sa mga kautusang inihayag sa Doktrina at mga Tipan 42:18–52.

• Paano maikukumpara ang ating pagsunod sa mga kautusan sa mga espirituwal na palatandaan sa ating paglalakbay upang maging higit na katulad ni Jesucristo?

Kung ang mga estudyante ay nagtakda ng mithiin sa nakaraang lesson para mas masunod ang mga kautusan, ang sumusunod na journal prompt ay makatutulong sa kanila na pagnilayan ang kanilang mithiin.

Pag-isipan ang isang kautusan na nadama mo kamakailan na ipinahiwatig sa iyo ng Espiritu Santo na pagtuunan mo ng pansin.

• Paano mo ilalarawan ang iyong mga pagsisikap na sundin ang kautusang ito?

• Paano ka pinagpala ng Panginoon sa mga pagsisikap mo?

• May paraan ba na sa palagay mo ay mas mapagbubuti mo? Ano ang gagawin mo?

• May iba pa bang kautusan na ipinahiwatig sa iyo ng Espiritu Santo na pagtuunan mo ng pansin? Ano ang gagawin mo?

Ipaliwanag ang mga tungkulin ng Espiritu Santo

Ang pagsasanay na ito ay makatutulong sa mga estudyante na maipaliwanag ang natutuhan nila tungkol sa Espiritu Santo sa kanilang pag-aaral ng Doktrina at mga Tipan. Maaari mong isulat sa pisara ang “Mga Tungkulin ng Espiritu Santo.” Sabihin sa mga estudyante na ilista ang iba’t ibang tungkulin ng Espiritu Santo, kasama ang suportang banal na kasulatan kung maaari. Talakayin kung bakit mahahalagang tungkulin ang mga ito na isasagawa ng Espiritu Santo.

Nasa ibaba ang ilan sa mga tungkulin ng Espiritu Santo. Maaaring basahin ng mga estudyante ang mga kaugnay na talata at pagkatapos ay mag-isip ng isang sitwasyon kung saan makatutulong sa isang tao na maunawaan niya ang isang partikular na tungkulin ng Espiritu Santo. Pagkatapos ay sabihin sa mga estudyante na gamitin ang mga banal na kasulatan para ipaliwanag ang tungkulin ng Espiritu Santo upang matulungan ang tao sa sitwasyon.

• Pinadadali ang pangangaral at pagtanggap ng ebanghelyo (Doktrina at mga Tipan 42:5–6, 13–14; 50:13–14, 17–22)

• Nagpatotoo tungkol sa Ama sa Langit at kay Jesucristo (Doktrina at mga Tipan 42:17)

• Ginagabayan at tinutulungan tayong maghanda para sa Ikalawang Pagparito ni Jesucristo (Doktrina at mga Tipan 45:56–57)

• Nagbibigay ng mga espirituwal na kaloob (Doktrina at mga Tipan 46:11)

• Pinadadalisay tayo mula sa kasalanan (Doktrina at mga Tipan 50:29)

Mga Karagdagang Aktibidad sa Pag-aaral

Pag-assess at pagtupad ng mga tipan

Ginagamit ng aktibidad na ito ang natutuhan ng mga estudyante tungkol sa paggawa at pagtupad ng mga tipan sa Doktrina at mga Tipan 40, 42, 45, at 49. Maaari mong ibigay ang sumusunod na pahayag ni Elder Dieter F. Uchtdorf o ipanood ang video na “Si Jesucristo ang Lakas ng mga Kabataan” mula sa time code na 00:35 hanggang 2:36. Maaaring pag-isipan ng mga estudyante ang mga sumusunod na tanong habang pinag-aaralan nila ang pahayag na ito ni Elder Uchtdorf.

• Ano ang pinagsikapan mong gawin para mapatibay ang iyong ugnayan sa Ama sa Langit at kay Jesucristo?

• Sa iyong palagay, paano nakatulong sa iyo ang pagsisikap mo na tuparin ang iyong mga tipan para mas mapalapit ka sa Ama sa Langit at kay Jesucristo?

Mahal kong mga kaibigang kabataan, kung naririto mismo ang Panginoon ngayon, ano kaya ang sasabihin Niya sa inyo?

Naniniwala ako na magsisimula Siya sa pagpapahayag ng Kanyang matinding pagmamahal sa inyo. Maaaring bumigkas lamang Siya ng mga salita, ngunit tatagos din ito nang husto—mula lamang sa Kanyang presensya—kaya hindi iyon maipagkakamali, manunuot ito nang malalim sa inyong puso, pupuspos sa inyong buong kaluluwa! …

Maaaring sabihin ni Jesus na ang inyong mga tipan sa Kanya—na ginawa ninyo nang kayo ay binyagan at pinaninibago tuwing tumatanggap kayo ng sakramento—ay nagbibigay sa inyo ng espesyal na kaugnayan sa Kanya. Ang uri ng kaugnayang inilalarawan sa mga banal na kasulatan bilang pamatok na magkaugnay upang, sa tulong Niya, makakaya ninyong dalhin ang anumang pasanin. (Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 9–10)

Sabihin sa mga estudyante na pag-isipan kung ano ang nadarama nila tungkol sa mga tipang ginawa nila. Maaari mong ibigay ang ilan o ang lahat ng sumusunod na pahayag at sabihin sa mga estudyante na i-assess ang kanilang ugnayan sa Ama sa Langit at kay Jesucristo. Sabihin sa mga estudyante na isulat sa kanilang journal ang nadarama nila bilang mga tama/maling pahayag o sa scale na mula 1 hanggang 10.

• Naghahanap ako ng mga pagkakataong manalangin sa aking Ama sa Langit.

• Handa akong taglayin sa aking sarili ang pangalan ni Jesucristo.

• Pinagsisikapan ko palagi na alalahanin ang Tagapagligtas.

• Masigasig kong pinagsisikapan na sundin ang mga kautusan ng Diyos.

• Nadarama ko ang nakapapanatag at gumagabay na impluwensya ng Espiritu sa buhay ko.

• Kapag nagkakasala ako, hindi ako sumusuko. Nagsisisi ako at patuloy na nagsisikap.

Sa pagtatapos ng aktibidad na ito, maaari mong purihin ang mga estudyante sa tapat na pagsusuri ng kanilang damdamin. Maaari mong anyayahan ang mga estudyante na ibahagi ang mga pahayag na pinakamahalaga para sa kanila. Maaari mong tulungan ang mga estudyante na maunawaan ang espesyal na ugnayan kay Jesucristo na natatanggap natin kapag gumagawa at tumutupad tayo ng mga tipan.