Lesona 79: Fotopampianarana sy Fanekempihavanana 64–66

Fotopampianarana sy Fanekempihavanana 65

“Omaninareo ny lalan’ny Tompo … mba hahatongavan’ny fanjakan’ny lanitra”

Ny andraikitra manan-danja iray an’ Ny Fiangonan’i Jesoa Kristy ho an’ny Olomasin’ny Andro Farany sy ireo mpikambana ao aminy dia ny manampy amin’ny fanomanana izao tontolo izao amin’ny fiverenan’ny Mpamonjy. Ao amin’ny Fotopampianarana sy Fanekempihavanana 65, ny Tompo dia nanambara io andraikitra manan-danja io tamin’ny Mpaminany Joseph Smith sy ny Olomasina. Ity lesona ity dia afaka manampy ireo mpianatra hahatakatra ny anjara asan’ny Fiangonana amin’ny fanomanana izao tontolo izao amin’ny Fiavian’i Jesoa Kristy Fanindroany.

Sahanasa fianarana azo atao

Fiomanana amina asa atao

Fomba iray hanombohana ity lesona ity ny manampy ireo mpianatra hieritreritra ireo toe-javatra tsy maintsy ilana fiomanana. Mety hanampy ireto fanontaniana manaraka ireto.

• Inona no asa ankafizinao izay mitaky fiomanana betsaka?

• Raha toa ianao ka manampy olona hiomana amin’io asa io, inona no tianao ho fantatr’izy ireo? Inona no fanampiana na loharano azonao omena azy ireo?

Omeo fahafahana hizara ny valinteniny amin’ny mpianatra hafa ny mpianatra.

Ampio ny mpianatra hieritreritra ny zavatra ampiomanan’ny Fiangonan’i Jesoa Kristy ho an’ny Olomasin’ny Andro Farany antsika.

Tahaka ilay asa ataonao izay mitaky fiomanana goavana, dia misy koa ireo zavatra hitranga amin’ny hoavy izay ilantsika fiomanana. Nanorina ny Fiangonany ny Tompo mba hanampiana antsika hiomana.

• Inona no zavatra omanin’ny Fiangonany ho antsika?

Hazavao amin’ny mpianatra fa ny Fiangonany dia manomana antsika amin’ny zavatra maro, ary amporisiho izy ireo hizara zavatra maro araka izay azony eritreretina. Angataho izy ireo hitady ny iray amin’ireo ao amin’ny Fotopampianarana sy Fanekempihavanana 65.

“Omaninareo ny lalan’ny Tompo”

Tamin’ny 12 septambra 1831, dia nifindra 48 km mahery tany atsimo atsinanan’i Kirtland, Ohio, i Joseph Smith sy ny fianakaviany, hipetraka any amin’ny tranon’i John sy Alice Johnson any Hiram, Ohio. Nisy fotoam-pivavahana natao tao amin’ny tranon-dry Johnson ny Alahady 30 ôktôbra 1831. Tamin’io andro io ihany dia nandray ny fanambarana izay voarakitra ao amin’ny Fotopampianarana sy Fanekempihavanana 65 ny Mpaminany.

Afaka mampihatra ilay fahaiza-manao ao amin’ny fandalinana soratra masina izay miompana amin’ny fitadiavana ireo teny sy andian-teny miverimberina ireo mpianatra rehefa mamaky ireto andininy manaraka ireto. Azonao atao ny mamporisika azy ireo hanasongadina ny ohatra tsirairay ahitana ny hoe “miomana” ao amin’ireo andininy ireo. Azon’izy ireo atao koa ny manisy marika ilay teny hoe “mivonòna” ao amin’ny andininy 3.

Vakio ny Fotopampianarana sy Fanekempihavanana 65:1–3 ary tadiavo ny fanasan’ny Mpamonjy.

• Inona no hitanao?

Vakio ny Fotopampianarana sy Fanekempihavanana 65:2 mba hitadiavana ny zavatra nomen’ny Mpamonjy antsika mba hanampiana antsika hiomana amin’ny Fiaviany Fanindroany.

• Inona ireo teny na andian-teny mbola hanananao fanontaniana ny mahakasika azy?

  Mba hanampiana ny mpianatra hamakafaka sy hahatakatra ireo andian-teny ao amin’ny andininy 2–3, dia anontanio azy ireo ny hevitr’ireo andian-teny ireo. Azonao atao ny mizara na mampiseho ireto votoatiny manaraka ireto raha ilaina:

  1. “Ny fanalahidin’ny fanjakana,” na “fanalahidin’ny fisoronana,” dia “ny zon’ny fiadidiana, na ny fahefana nomen’ Andriamanitra ny olona hitarihana sy hifehezana ary hitantanana ny fisoronan’ Andriamanitra eto an-tany” (Torolalana ho an’ny Soratra Masina, “Fanalahidin’ny Fisoronana,” scriptures.ChurchofJesusChrist.org). Jereo koa ny Matio 16:18–19.

  2. “Ny vato izay nendahina hiala tamin’ny tendrombohitra, nefa tsy nendahan-tanana” dia “ny fiangonan’ny Tompo izay [mitombo] hatraiza hatraiza mandra-pamenoany ny tany manontolo, ka -tsy ho rava mandrakizay … [fa] hitoetra mandrakizay [kosa]- [Daniela 2:44]” (Ronald A. Rasband, “Fahatanterahan’ny faminaniana,” Liahona, mey 2020, 75). Jereo koa ny Daniela 2:31–35, 44–45.

  3. Ny hoe “Mivonòna ho an’ny Mpampakatra” dia manondro ny “fanehoana an’ohatra an’i Jesoa Kristy ao amin’ny soratra masina amin’ny maha-mpampakatra Azy. Ny Fiangonana no fanehoana an’ohatra ny vadiny” (Torolalana ho an’ny Soratra Masina, “Mpampakatra,” scriptures.ChurchofJesusChrist.org). Jereo ihany koa ny Apokalypsy 19:7–9.

  Mba hahitana hevitra fanampiny mikasika ny fomba hanampiana ireo mpianatra hikaroka ny firoboroboan’ny Fiangonana dia jereo ny fizarana “Sahanasa fianarana fanampiny” ato amin’ity lesona ity.

• Ahoana no hamintinanao ny zavatra azontsika ianarana avy amin’ireo andininy ireo ho fanambarana ny fahamarinana?

Ny mpianatra dia mety hizara zavatra tahaka ny hoe Namerina ny Fiangonany tamin’ny laoniny i Jesoa Kristy mba hanampiana antsika hanomana ny tenantsika sy ny hafa amin’ny Fiaviany Fanindroany. Hevero ny hanasa azy ireo hanoratra io fahamarinana io eo akaikin’ny andininy 1–3.

Nanambara izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Ny Fiangonan’i Jesoa Kristy ho an’ny Olomasin’ny Andro Farany no hany manana ny fahefana sy voairaka hanatanteraka ireo fanomanana ilaina ho amin’ny Fiavian’ny Tompo Fanindroany. Azo antoka fa naverina tamin’ny laoniny noho izany tanjona izany ny Fiangonana. … Ny Fiangonan’i Jesoa Kristy dia irahina hanomana—ary manomana—an’izao tontolo izao ho amin’izany andro izany. (D. Todd Christofferson, “Miomana ho amin’ny fiverenan’ny Tompo,” Liahona, mey 2019, 82, 84)

• Inona no eritreritrao na tsapanao momba io teny nambara io?

• Nahoana no ny Fiangonana irery ihany no afaka manomana izao tontolo izao ho amin’ny fiverenan’ny Mpamonjy?

• Inona no fiomanana tsapanao fa ilaina ho amin’io andro io?

Azonao atao ny mitanisa eny amin’ny solaitrabe ny fomba anampian’ny Fiangonana ny olona mba hiomana ho amin’ny Fiaviana Fanindroany. Raha toa ka sahirana mitady hevitra ireo mpianatra dia azonao atao ny mizara amin’izy ireo ireo andraikitra efatra nofidin’ny Fiangonana. Anisan’izany ny fanampiana amin’ny asan’ Andriamanitra amin’ny alalan’ny (1) fiainana ny filazantsaran’i Jesoa Kristy, (2) fikarakarana ireo sahirana, (3) fanasana ny rehetra handray ny filazantsara, ary (4) fampiraisana ny fianakaviana ho mandrakizay (jereo ny Boky torolalan’ny Fiangonana maneran-tany: Manompo ao amin’ Ny Fiangonan’i Jesoa Kristy ho an’ny Olomasin’ny Andro Farany, 1.2, ChurchofJesusChrist.org). Azonao atao ny mitanisa ireo eny amin’ny solaitrabe ary angataho ireo mpianatra mba hizara fomba manokana kokoa izay tafiditra ao anatin’ireo lohateny tsirairay ireo izay manampy amin’ny fanomanana ny olona ho amin’ny Fiavian’ny Tompo Fanindroany.

“Antsoy ny Tompo mba handrosoan’ny fanjakany”

Vakio ny Fotopampianarana sy Fanekempihavanana 65:4–6 mba hitadiavana ny zavatra nampianarin’ny Mpamonjy fa azontsika tsirairay atao mba hanampiana an’izao tontolo izao ho amin’ny Fiaviany Fanindroany.

• Inona no hitanao?

• Inona ny sasany amin’ireo “asa mahatalanjona” nataon’ny Mpamonjy izay tanterahina amin’ny alalan’ny Fiangonany? (Jereo ny Boky torolalan’ny Fiangonana maneran-tany: Manompo ao amin’ Ny Fiangonan’i Jesoa Kristy ho an’ny Olomasin’ny Andro Farany, 1.2, 1.3, ChurchofJesusChrist.org.)

• Amin’ny fomba ahoana no hanampian’ireo asa ireo antsika sy ny hafa hiomana ho amin’ny Fiavian’ny Mpamonjy Fanindroany?

Azonao atao ny manome fahafahana ny mpianatra ao an-dakilasy sy any ivelan’ny kilasy mba “[hampahafantatra] ireo asany mahatalanjona” (Fotopampianarana sy Fanekempihavanana 65:4). Afaka mifanakalo hevitra momba ny fomba hizarana izany amin’ny fianakaviany sy ny namany na ny hafa izy ireo.

Ny Filoha Russell M. Nelson dia nampianatra fa ny zavatra iray azontsika atao dia ny “[miantso ny Tompo] mba handrosoan’ny fanjakany eto an-tany” (Fotopampianarana sy Fanekempihavanana 65:5).

Ny fanasako … ho anareo dia ny hivavaka isan’andro mba hahazoan’ny zanak’ Andriamanitra rehetra ireo fitahian’ny filazantsaran’i Jesoa Kristy. Izaho sy ianao dia velona mba hahita, ary mbola hahita hatrany, ny fanangonana an’i Isiraely amin-kery lehibe. Ary ianareo dia afaka ny ho anisan’ilay hery ao ambadik’izany fanangonana izany! (Russell M. Nelson sy Wendy W. Nelson, “Fanantenana ho an’i Isiraely” [fampaherezam-panahy maneran-tany ho an’ny zatovo, 3 jona 2018], ChurchofJesusChrist.org)

Asaivo misaintsaina ny fanasan’ny Filoha Nelson ny mpianatra. Rehefa avy nanana fahafahana hisaintsaina izy ireo, dia asao hizara ny zavatra niainany tamin’ny fanarahana ny fanasany.

Azonao atao ny mamarana amin’ny fijoroana ho vavolombelona fa ny Fiangonana, na ny “fanjakan’ Andriamanitra,” dia manomana ny lalana hahatongavan’ny “fanjakan’ny lanitra” rehefa hiverina ny Mpamonjy (jereo ny Fotopampianarana sy Fanekempihavanana 65:6).

Loharanom-pitaovana fanampiny

Ahoana no ahafahako manampy amin’ny fanomanana an’izao tontolo izao ho amin’ny Fiavian’ny Mpamonjy Fanindroany?

Ny Fiadidiana Voalohany dia nampianatra hoe:

Fantatray fa velona Andriamanitra. Mivavaka izahay mba hijanonanareo tsy ho voahozongozona eo amin’ny lalan’ny fanekempihavanana izay mitondra miverina mankany amin’ny Rainareo any An-danitra. Rehefa manao izany ianareo dia ho lasa fitaomana ho amin’ny tsara, hizara ny filazantsara amim-pifaliana ary hanomana izao tontolo izao amin’ny Fiavian’ny Mpamonjy Fanindroany. (Ho zatovo mahery!: Torolalana amin’ny fanaovana safidy [2022], 2)

Inona no nampianarin’i Joseph Smith mikasika ny filazantsara izay mameno ny tany manontolo?

Nitantara ny zavatra nampianarin’i Joseph Smith nandritra ny fivorian’ny mpihazona ny fisoronana tany Kirtland, Ohio, tamin’ny Aprily 1834 i Wilford Woodruff:

Nanao antso avo tamin’ny olona rehetra izay nihazona ny Fisoronana ny Mpaminany mba hivondrona tao anatin’ilay trano fianarana vita tamin’ny vatan-kazo izay nisy teo. Trano kely izy io, angamba teo amin’ny 4 metatra mahery kely teo ny lafiny. Kanefa dia nisy ny fisoronan’ny Fiangonan’i Jesoa Kristy ho an’ny Olomasin’ny Andro Farany tao amin’ny tanàna kelin’i Kirtland. … Rehefa tafangona izahay dia nanao antso avo tamin’ireo Loholon’i Isiraely miaraka aminy ny Mpaminany mba hijoro ho vavolombelona mikasika ity asa ity. … Rehefa nahavita izy ireo dia nilaza ny Mpaminany hoe “Ry Rahalahy, tena nanome hery ahy sy nianarako zavatra betsaka ny fijoroanareo ho vavolombelona teto androany hariva, fa tiako ny hilaza aminareo eo anatrehan’ny Tompo fa tsy mahafantatra mihoatra noho ny tsy fahafantaran’ny zazakely eo ampofoan-dreniny ny hoaviny ianareo raha ny mikasika ny hiafaran’ity Fiangonana sy fanjakana ity. Tsy takatrareo izany.” Somary gaga ihany aho. Nilaza izy fa, “Olona vitsy kely ao amin’ny fisoronana fotsiny no tazanareo eto anio hariva, kanefa ity Fiangonana ity dia hanenika an’i Amerika Avaratra sy Atsimo—hameno an’izao tontolo izao izy ity.” (Teachings of Presidents of the Church: Joseph Smith [2007], 137)

Fotopampianarana sy Fanekempihavanana 65:6. Inona no maha samy hafa ny “fanjakan’ Andriamanitra” sy ny “fanjakan’ny lanitra”?

Ny fanjakan’ Andriamanitra eto an-tany dia Ny Fiangonan’i Jesoa Kristy ho an’ny Olomasin’ny Andro Farany (F&F 65). Ny tanjon’ny Fiangonana dia ny hanomana ny mpikambana ao aminy hiaina mandrakizay ao amin’ny fanjakana selestialy na ny fanjakan’ny lanitra. (Torolalana ho an’ny Soratra Masina, “Fanjakan’ Andriamanitra na Fanjakan’ny lanitra,” scriptures.ChurchofJesusChrist.org)

Sahanasa fianarana fanampiny

Fitomboan’ny Fiangonan’i Jesoa Kristy

Azonao atao ny manampy ny mpianatra hikaroka ny fitomboan’ny Fiangonana nandritra ny taona maro mba hanampiana azy ireo hahita ny fahatanterahan’ny faminanian’i Daniela (jereo ny Daniela 2:44–45). Azonao atao ny manondro ny tatitra momba ny antontan’isa ao amin’ny edisiônan’ny Liahona volana mey.

newsroom.ChurchofJesusChrist.org

Fomba iray hahitana ny fiitaran’ny Fiangonana ny fijerena ny fitomboan’ny fanorenana tempoly. Hevero ny hampitaha ny isan’ny tempoly tamin’ny taona nahaterahan’ny mpianatrao zokiny indrindra amin’ny isan’ny tempoly ankehitriny. Azonao atao koa ny mampiasa ny:

• Ny isan’ny tempoly izay nambara sy eo an-dalam-pitsanganana (ChurchofJesusChrist.org/temples/list).

Ny fanangonana an’i Isiraely

Hevero ny hijery ny “Vavolombelon’ Andriamanitra” manomboka eo amin’ny mari-potoana 3:30 hatramin’ny 5:14. Azon’ireo mpianatra atao ny mikaroka ny fomba ahafahan’ny fampitahana piozila nataon’ny Loholona Neil L. Andersen manampy antsika hahatakatra ny fomba hanomanan’ny fanangonana an’i Isiraely an’izao tontolo izao amin’ny Fiaviana Fanindroany. Azon’izy ireo atao ny mizara ny fomba ahafahan’izy ireo manampy “amin’ny fametrahana ireo singa hafa manan-danja” amin’ilay piozila.

Azonao atao ihany koa ny mijery manomboka eo amin’ny mari-potoana 13:24 hatramin’ny 15:33, ka hitady ny fanasana manokana nataon’ny Loholona Andersen ho an’ny zatovo. Azon’ny mpianatra atao ny mizara ny fomba nahitan’izy ireo ny fampiasana ny teknôlôjia mba hanangonana an’i Isiraely, ary avy eo misaintsaina na mifanakalo hevitra momba ny fomba ahafahan’izy ireo mampiasa ny teknolojia hanampiana amin’ny fanangonana an’i Isiraely.

Fotopampianarana sy Fanekempihavanana 66. Fantatr’ Andriamanitra ny momba anao sy ny zavatra ilainao

Azonao atao ny misafidy ny hampianatra ny Fotopampianarana sy Fanekempihavanana 66 ao anatin’ity lesona ity. Mba hanaovana izany, dia soraty eny amin’ny solaitrabe ireto fanontaniana manaraka ireto ary asao ny mpianatra mba hizara ny fomba hamalian’izy ireo izany:

• Nahoana no fitahiana ny mahafantatra ny sitrapon’ Andriamanitra mikasika antsika?

• Ahoana no hamantarako ny sitrapon’ Andriamanitra ho ahy?

Mba hanampiana ireo mpianatra hahatakatra ny sahan-kevitra ara-tantara ao amin’io fizarana io, dia hazavao fa fotoana fohy taorian’ny nanaovana batisa azy dia nihaona tamin’ny Mpaminany Joseph Smith i William E. McLellin ary nangataka azy hanontany ny Tompo ho azy. Afaka mamaky ny sasin-tenin’ilay fizarana ireo mpianatra mba hitady ny zavatra nataon’i William talohan’ny fangatahany tamin’i Joseph.

Azon’ny mpianatra atao ny mandalina ny Fotopampianarana sy Fanekempihavanana 66:4–10, mba hitady ny zavatra tian’ny Tompo hataon’i William. Asaivo mizara ny zavatra hitany ireo mpianatra. Azonao atao avy eo ny miresaka momba ireo fitahiana azontsika raisina rehefa manaraka ny sitrapon’ny Tompo ho antsika isika. Amporisiho ny mpianatra hikatsaka ny sitrapon’ny Tompo ho an’ny fiainany amin’ny alalan’ny vavaka isan’andro.