Դաս 123. Վարդապետություն և Ուխտեր 109–110

Վարդապետություն և Ուխտեր 110, Մաս 1

Փրկիչը կհայտնվի Իր Սրբերին տաճարում

1836 թ. ապրիլի 3-ին Տեր Հիսուս Քրիստոսը հայտնվեց Ջոզեֆ Սմիթին և Օլիվեր Քաուդերիին Կիրթլենդի Տաճարում՝ կատարելով Իր խոստումը, որ «[Ինքը] կհայտնվի [Իր] ժողովրդին … այս տանը» (Վարդապետություն և Ուխտեր 110․7)։ Այս խոստումը կարող է վերաբերել մեզ այսօր։ Այս դասը կօգնի ուսանողներին հասկանալ, թե ինչպես է մեր արժանավորությունը պատրաստում մեզ, որպեսզի մենք ավելի մոտենանք Տիրոջը Իր տաճարում:

Հնարավոր ուսումնական վարժություններ

Եթե կարողանայիք լինել Փրկչի հետ

Դասը սկսելու համար առաջարկեք ուսանողներին պատկերացնել, որ իրենք հնարավորություն ունեն անձամբ տեսնելու Փրկիչ Հիսուս Քրիստոսին:

Որպես այլընտրանք, դուք կարող եք ցուցադրել հնագույն Ամերիկայի ժողովրդի շրջանում Փրկչի ծառայության նկարը կամ ցուցադրել «Հիսուս Քրիստոսը հայտնվում է հնագույն Ամերիկա մայրցամաքում» տեսանյութը, 11:52-14:05: Առաջարկեք ուսանողներին պատկերացնել, որ իրենք այնտեղ են: Տեսանյութից հետո կարող եք տալ հետևյալ հարցերը.

• Ի՞նչ օրհնություններ կարող եք ստանալ Փրկչի հետ լինելուց:

• Ինչպե՞ս կարող են այս օրհնությունները ազդել ձեր կյանքի վրա:

Այսօրվա ուսումնասիրության ժամանակ փնտրեք եղանակներ, որոնցով կարող եք հոգևորապես ավելի մոտենալ Տիրոջը և վայելել այն օրհնությունները, որոնք Նա ցանկանում է տալ ձեզ:

Փրկիչը հայտնվում է Կիրթլենդի տաճարում

Որպեսզի նախապատրաստեք ուսանողներին ուսումնասիրել Փրկչի հայտնվելը Կիրթլենդի տաճարում, որը նկարագրված է Վարդապետություն և Ուխտեր 110 բաժնում, կարող եք նրանց հիշեցնել այն օրհնությունները, որոնք Տերը խոստացել է Սրբերին, եթե նրանք տաճար կառուցեն (տես Վարդապետություն և Ուխտեր 97.15–16)։ Ուսանողները կարող են նաև վերանայել որոշ օրհնություններ, որոնց համար Ջոզեֆ Սմիթը աղոթել է տաճարի նվիրագործման ժամանակ (տես Վարդապետություն և Ուխտեր 109.12):

Կարող եք բարձրաձայն կարդալ կամ ամփոփ շարադրել հետևյալ պարբերությունը՝ Վարդապետություն և Ուխտեր 110 բաժնի պատմական համատեքստը ներկայացնելու համար։ Առաջարկեք ուսանողներին պատկերացնել այդ իրադարձությունները, նաև, թե ինչ զգացումներ կունենային, եթե լինեին այնտեղ:

1836 թ. ապրիլի 3-ին՝ Զատիկի կիրակի օրվա կեսօրին հաղորդության ժողով տեղի ունեցավ նոր նվիրագործված Կիրթլենդի Տաճարում: Հաղորդությունը ժողովին բաժանելուց հետո Ջոզեֆ Սմիթը և Օլիվեր Քաուդերին անցան խորանը ծածկող վարագույրի մյուս կողմը՝ լուռ աղոթելու: Այնտեղ նրանք տեսան աստվածային այցելությունների շարք, որոնք նկարագրված են Վարդապետություն և Ուխտեր 110 բաժնում։ (Տես Սրբեր. Հիսուս Քրիստոսի Եկեղեցու պատմությունը վերջին օրերում, հատոր 1, Ճշմարտության դրոշը, 1815–1846 [2018], 239–40:)

Նշում․ Հաջորդ դասը («Վարդապետություն և Ուխտեր 110, Մաս 2») ներառում է այն երկնային այցելությունները, որոնք հաջորդեցին տաճարում Փրկչի հայտնվելուն:

Վարդապետություն և Ուխտեր 110․1–4 հատվածները կարդալիս խորհեք, թե ինչ կարող էիք մտածել կամ զգալ, եթե այդ տեսիլքի ժամանակ Ջոզեֆի և Օլիվերի հետ լինեիք:

• Ի՞նչը տպավորեց ձեզ հատված 4-ում Փրկչի հայտնության եղանակի մեջ:

• Ի՞նչ է նշանակում ձեզ համար այն, որ Փրկիչը մեր Բարեխոսն է Հոր առաջ (տես Վարդապետություն և Ուխտեր 45.3–5):

Փրկիչը խոստանում է հայտնվել մեզ տաճարում

Կարդացեք Վարդապետություն և Ուխտեր 110․5–10 հատվածները՝ փնտրելով, թե ինչու Փրկիչն ասաց, որ Իր բոլոր Սրբերը պետք է ուրախանան:

Կենտրոնացեք դարձի բերող սկզբունքների վրա. Այս վարժությունը կօգնի ուսանողներին բացահայտել դարձի բերող սկզբունքը: Լրացուցիչ ուսուցման համար, թե ինչպես կենտրոնանալ դարձի բերող սկզբունքների վրա, տես «Կենտրոնացեք ճշմարտությունների վրա, որոնք հանգեցնում են դարձի և կերտում հավատք առ Հիսուս Քրիստոս» դասընթացը՝ Ուսուցչի կատարելագործման հմտություններ․ Ուսուցանեք վարդապետությունը ուսուցողական նյութում։ Կարող եք կիրառել «Տվեք հարցեր, որոնք կօգնեն ուսանողներին բացահայտել և ձևակերպել դարձի բերող սկզբունքները» հմտությունը։

• Այս հատվածներում ո՞ր բառերը կամ արտահայտություններն էին առավել կարևոր և հետաքրքիր ձեզ համար։

• Ինչպե՞ս կարող են հատվածներ 5-ը և 8-ը օգնել մեզ պատրաստվել ավելի մոտենալ Տիրոջը տաճարում:

  Այն ճշմարտությունների հիման վրա, որոնք ուսանողները կարող են բացահայտել այս հատվածներից, օգնեք նրանց հասկանալ, որ եթե մենք պահենք պատվիրանները և ձգտենք մաքուր լինել Տիրոջ առջև, Նա կհայտնվի մեզ Իր տաճարում։

• Ֆիզիկապես երևալուց բացի, ուրիշ ի՞նչ եղանակներով Փրկիչը կարող է հայտնվել տաճարում։ (Որոշ օրինակներ նկարագրված են հատվածներ 8–9-ում:)

Այլ եղանակների շարքում, որոնցով Փրկիչը կարող է հայտնվել մեզ, կարող են ներառվել՝ մեզ հետ Իր ձայնով խոսելը (հատված 8) և մեզ օրհնությունների և օժտման կամ հոգևոր զորության պարգևի շնորհումը ի վերուստ (հատված 9)։ Տաճարում մենք կարող ենք ստանալ այն օրհնությունները, որոնց մասին ուսանողները մտածում էին դասի սկզբում: Այս օրհնությունները կարող են ներառել Փրկչին ավելի լավ ճանաչելը և Նրա կողմից առաջնորդություն, խաղաղություն և բժշկում ստանալը:

Պահեք Տիրոջ պատվիրանները և մաքուր եղեք

Որպեսզի օգնեք ուսանողներին ավելին հասկանալ պատվիրանները պահելու և մաքուր լինելու մասին, կարող եք նրանց հանձնարարել վերանայել տաճարային երաշխավորագրի հարցերը՝ փնտրելով, թե ինչ է Տերն ակնկալում մեզանից, որպեսզի մենք կարողանանք մտնել Իր տուն (տես Երիտասարդներին զորացնելու համար. Ընտրություններ կատարելու ուղեցույց ([2022], 36–37)։ Ուսանողները գուցե արդեն արել են դա՝ «Վարդապետություն և Ուխտեր 97» բաժինն ուսումնասիրելիս։

Կարող եք գրատախտակին նկարել կամ առաջարկել որևէ ուսանողի նկարել հետևյալ գծապատկերը: Ուսանողները կարող են արտանկարել այն իրենց օրագրերում։ Նրանք կարող են նկարած ճանապարհի վրա գրել թե ինչ իմացան տաճարային երաշխավորագրի հարցերը վերանայելիս:

• Ձեր կարծիքով, ինչո՞ւ է Տերը ցանկանում, որ մենք ձգտենք պահել պատվիրանները՝ տաճարում իրեն ավելի մոտենալու համար։

• Ի՞նչ է նշանակում ձեզ համար լինել մաքուր կամ արժանավոր Տիրոջ առաջ։

Երիտասարդ տղամարդկանց գերագույն նախագահությունից եղբայր Բրեդլի Ռ. Վիլկոքսն ուսուցանել է.

Աստծո ուղերձը հուշում է, որ արժանավորությունը չի ենթադրում անթերիություն։ Արժանավորությունը ազնվորեն ջանք գործադրելն է։ Մենք պետք է ազնիվ լինենք Աստծո, քահանայության ղեկավարների և մեզ սիրողների առաջ, պետք է ձգտենք պահել Աստծո պատվիրանները և երբեք չհանձնվենք միայն այն պատճառով, որ սայթաքում ենք։ …

… Հիշեք, որ փոփոխությունը հնարավոր է, ապաշխարությունը գործընթաց է, իսկ արժանավորությունը չի ենթադրում անթերիություն: Ամենակարևորը, հիշեք, որ Աստված և Քրիստոսը պատրաստ են օգնել մեզ այստեղ ու այս պահին: …

Երեց Դիտեր Ֆ․ Ուխդորֆը ասել է․ «Աստված չի փնտրում անթերի մարդկանց։ Նա փնտրում է մարդկանց, որոնք իրենց «սիրտն ու պատրաստակամ միտքը» կմատուցեն [Վարդապետություն և Ուխտեր 64.34], և որոնց Նա կդարձնի «կատարյալ Քրիստոսում» [Մորոնի 10.32–33]»։ (Բրեդլի Ռ. Վիլկոքս, «Արժանավորությունը չի ենթադրում անթերիություն», Լիահոնա, նոյեմբեր, 2021, 62, 67)

• Ինչպե՞ս կարող է այս ուղերձն օգնել մի մարդու, որը մտածում է, թե արդյոք ինքն արժանի է լինել տաճարում և Փրկչի ներկայության մեջ:

Ցուցադրեք ձեր հասկացողությունը

Որպեսզի օգնեք ուսանողներին ցուցադրել իրենց հասկացողությունը, կարող եք ներկայացնել հետևյալ սցենարները.

Պատկերացրեք, որ ձեր ընկերը մտածում է, թե արդյո՞ք արժե ձգտել արժանավոր լինել տաճարային երկրպագությանը: Մեկ այլ ընկեր մտածում է, թե արդյո՞ք հնարավոր է, որ ինքը երբևէ բավականաչափ արժանավոր լինի տաճարում լինելու համար: Ընտրեք այս իրավիճակներից մեկը և պատասխանեք հետևյալ հարցերին.

• Այսօրվա սովորածի հիման վրա ինչպե՞ս կարձագանքեիք ձեր ընկերոջ մտահոգություններին:

• Ի՞նչ կուզեիք, որ ձեր ընկերը հասկանա Երկնային Հոր, Հիսուս Քրիստոսի և տաճարի մասին:

Ուսանողներին առաջարկեք կիսվել իրենց մտքերով: Կարող եք կիսվել ձեր մտքերով Փրկչի այն խոստման վերաբերյալ, որ Ինքը կհայտնվի մեզ Իր տաճարներում, եթե մենք ձգտենք պահել պատվիրանները և լինել մաքուր։

Լրացուցիչ նյութեր

Ինչո՞ւ ենք մենք տաճարներ կառուցում ամբողջ աշխարհում:

Նախագահ Ռասսել Մ. Նելսոնը բացատրել է․

Տաճարը գտնվում է մեր հավատքի և հոգևոր կայունության ամրացման կենտրոնում, քանի որ Փրկիչը և Նրա վարդապետությունը տաճարի հենց սիրտն են: Այն ամենը, ինչ ուսուցանվում է տաճարում՝ ուսուցման և Հոգու միջոցով, մեծացնում է մեր հասկացողությունը Հիսուս Քրիստոսի մասին: Նրա կարևոր արարողությունները մեզ կապում են Իր հետ՝ քահանայության սուրբ ուխտերի միջոցով։ Այնուհետև, երբ մենք պահում ենք մեր ուխտերը, Նա մեզ օժտում է Իր բժշկող, ամրապնդող զորությամբ: Օ, իսկ գալիք օրերին որքան ենք ունենալու Նրա զորության կարիքը: …

… Երբ Տիրոջ ուսուցման տուն բերեք ձեր տաճարային երաշխավորագիրը, փշրված սիրտն ու որոնող միտքը, Նա կսովորեցնի ձեզ: (Ռասսել Մ․ Նելսոն, «Տաճարը և ձեր հոգևոր հիմքը», Լիահոնա, նոյեմբեր 2021, 93–95)

Ի՞նչ կարող եմ անել, որպեսզի ինձ ավելի արժանավոր զգամ Տիրոջ տուն մտնելու համար:

Երեխաների միության նախկին գերագույն նախագահ քույր Ջոյ Դ․ Ջոնսը հիշեցրել է մեզ․

Թույլ տվեք ինձ ընդգծել արժեք և արժանավորություն երկու կարևոր բառերը տարբերակելու անհրաժեշտությունը: Դրանք նույնը չեն: Հոգևոր արժեքը նշանակում է արժևորել մեզ այն ձևով, ինչպես Երկնային Հայրն է արժևորում մեզ, և ոչ թե աշխարհը: Մեր արժեքը որոշվել է նախքան մեր այս աշխարհ գալը: «Աստծո սերն անսահման է և այն կտևի հավերժ»:

Մյուս կողմից, արժանավորությունը ձեռք է բերվում հնազանդության միջոցով: Եթե մեղանչում ենք, մենք պակաս արժանավոր ենք դառնում, բայց երբեք արժեզուրկ չենք: Մենք շարունակում ենք ապաշխարել և ձգտել նմանվել Հիսուսին մեր անձեռնմխելի արժեքով: Ինչպես Նախագահ Բրիգամ Յանգն է ուսուցանել. «Ամենափոքր, ամենացածր հոգին այժմ երկրի վրա … արժե աշխարհներ»։ Ինչ էլ որ լինի, մենք միշտ արժեք ունենք Երկնային Հոր աչքում: (Ջոյ Դ․ Ջոնս, «Անչափելի արժեք», Լիահոնա, նոյեմբեր 2017, 14)

Ի՞նչ կարող եմ անել, որ ավելի շատ տեսնեմ Հիսուս Քրիստոսին իմ կյանքում։

Երեխաների միության գերագույն նախագահությունից քույր Թրեյսի Յ․ Բրաունինգը բացատրել է.

Որպես Աստծո ուխտի զավակներ, մենք եզակիորեն օրհնված ենք աստվածայնորեն նշանակված գործիքների հարուստ պաշարով՝ բարելավելու մեր հոգևոր տեսլականը։ Հիսուս Քրիստոսի խոսքերն ու ուսմունքները, ինչպես գրված են սուրբ գրություններում և Նրա ընտրյալ մարգարեների ուղերձներում, և Նրա Հոգին, որը ստացել ենք ամենօրյա աղոթքի, կանոնավոր տաճար հաճախելու և հաղորդության շաբաթական արարողության միջոցով, կարող են օգնել վերականգնելու խաղաղությունը և տրամադրել խորաթափանցության անհրաժեշտ պարգևը, որը սփռում է Քրիստոսի լույսը և Նրա հասկացողությունը՝ մեր կյանքի անկյուններում և աշխարհում, որը կարող է ամպամած լինել։ Փրկիչը կարող է լինել նաև մեր կողմնացույցը և մեր օդաչուն, երբ մենք շրջում ենք կյանքի թե հանգիստ, թե անհանգիստ ջրերի միջով։ Նա կարող է մատնանշել ճիշտ ճանապարհը, որը մեզ տանում է դեպի մեր հավերժական նպատակակետը։ Այսպիսով, ի՞նչ է Նա ցանկանում, որ մենք տեսնենք և ո՞ւր է ուզում, որ մենք գնանք։ (Թրեյսի Յ․ Բրաունինգ, «Հիսուս Քրիստոսի օրհնություններն ավելի շատ նկատենք մեր կյանքում», Լիահոնա, նոյեմբեր 2022, 13–14)

Որտե՞ղ կարող եմ ավելին իմանալ Փրկչի՝ Իր տաճարներ այցելությունների մասին:

• Լիզա Օլսեն Թեյթ և Բրենթ Ռոջերս «Մեր Աստծո տունը», Հայտնություններ համատեքստում (2016), 165

• 3 Նեփի 11․8–10 (Փրկիչը հայտնվում է նեփիացիներին Լիառատ երկրի տաճարում)

• Եսայիա 6․1–9 (Տերը հայտնվում է Եսայիային)

• Եթեր 3․1–16; Մովսես 1․1–4 (Տերը հայտնվում է լեռներում, որոնք հաճախ ծառայում էին որպես տաճարներ)

• Լերոյ Կ. Սնոու «Փրկչի այցելությունը», Ensign, սեպտեմբեր 2015, 80 (Փրկիչը հայտնվում է Լորենզո Սնոուին Սոլթ Լեյքի տաճարում)

Օժանդակ ուսումնական վարժություններ

«Սրբություն Տիրոջը․ Տիրոջ տունը»

Ուսանողների համար օգտակար կլինի ավելի լավ հասկանալ, թե ինչու է անհրաժեշտ նախապատրաստվել Տիրոջ տուն մտնելու համար:

Խնդրեք նրանց պատկերացնել, որ նրանք ընկերոջը տուն են հրավիրել ճաշի:

• Ընտանեկան ի՞նչ կանոններ կցանկանայիք, որ ձեր ընկերը հասկանար, որպեսզի հարգանք ցուցաբերի ձեր ընտանիքի և ձեր տան նկատմամբ։

Այնուհետև ցուցադրեք մոտակա տաճարի նկարը՝ «Սրբություն Տիրոջը․ Տիրոջ տունը» բառերով:

• Ի՞նչ է մեզ ասում այս գրությունը աշխարհի յուրաքանչյուր տաճարի մասին:

• Ի՞նչ կարող ենք անել, որպեսզի ցուցադրենք մեր հարգանքը Տիրոջ տան հանդեպ։

Քննարկումից հետո կարող եք կիսվել, որ կարևոր բաներից մեկը, որ մենք անում ենք Տիրոջ տունը հարգելու կամ մեծարելու համար, այն է, որ պետք է համոզվենք, որ յուրաքանչյուր մարդ, որը մտնում է տաճար, պատշաճ պատրաստված է:

Նախագահ Ռասսել Մ. Նելսոնը բացատրել է․

Քանի որ տաճարը սուրբ է, Տերը խնդրում է, որ այն պաշտպանվի սրբապղծությունից: Տաճար կարող է մտնել ամեն ոք, ով կամենում է լավ պատրաստվել այդ արտոնության համար: Պատրաստվածության գաղափարը գերիշխում է այլ գործունեության ոլորտներում ևս: Ես հիշում եմ, երբ փոքր տղա էի, ասացի իմ ծնողներին, որ ցանկանում եմ համալսարան գնալ: Նրանք ասացին, որ կարող եմ, եթե միայն ջանասիրաբար սովորեմ դպրոցում և համապատասխանեմ համալսարան ընդունվելու բոլոր պահանջներին: Նմանապես, մենք պետք է արժանանանք տաճար ընդունվելուն: Մենք պատրաստվում ենք ֆիզիկապես, մտավոր և հոգևոր առումներով: Երաշխավորագրի համար դիմող յուրաքանչյուր անձի արժանավորությունը անհատապես է որոշվում: …

… Պահանջները պարզ են: Համառոտ ասած՝ անձը պետք է պահի Նրա պատվիրանները, ում տուն է մտնում: Նա է սահմանել չափանիշները: Մենք տաճար ենք մտնում որպես Նրա հյուրեր: (Ռասսել Մ. Նելսոն, «Պատրաստվեք տաճարի օրհնություններին», Լիահոնա, հոկտեմբեր 2010, 42–43)