Դաս 139. Վարդապետություն և Ուխտեր 129–132

Վարդապետություն և Ուխտեր 130

Ուսուցանեք Փրկչի ավետարանը

Ավետարանը հնարավոր է արդյունավետորեն ուսուցանել մեծ ժողովների կամ փոքր, մտերիմ հավաքների ժամանակ: Փրկիչը, ինչպես և Մարգարե Ջոզեֆ Սմիթը, երկու մեթոդներն էլ օգտագործել է Իր ծառայության ընթացքում: Վարդապետություն և Ուխտեր 130 բաժնի տեքստը պարունակում է Մարգարեի որոշ ուսմունքներ՝ ուղղված Ռեյմուսում (Իլլինոյս) ապրող Սրբերի փոքր հավաքին: Այս դասը նախատեսված է օգնելու ուսանողներին պատրաստվել ուսուցանելու Հիսուս Քրիստոսի վարդապետության տարրերը:

Հնարավոր ուսումնական վարժություններ

Հետևյալ ուսումնական վարժությունները նախատեսված են օգնելու ուսանողներին ուսուցանել դասի տարբեր հատվածները: Եթե նախընտրում եք չհանձնարարել ուսանողներին պատրաստվել ուսուցանելու, ծանոթացեք «Օժանդակ ուսումնական վարժություններ» բաժնի նյութերին՝ գտնելու ուսուցանելու վերաբերյալ գաղափարներ, որոնք դուք կարող եք օգտագործել։

Հիսուս Քրիստոս` Վարդապետ Ուսուցիչը

Դասը սկսեք ցուցադրելով Հիսուս Քրիստոսի պատկերը, որտեղ Նա ուսուցանում է մարդկանց և առաջարկեք ուսանողներին պատկերացնել, թե ինչ կզգային, եթե լինեին այնտեղ: Կարող եք տալ հետևյալ հարցերը.

• Ի՞նչ կմտածեիք կամ կզգայիք, եթե ներկա լինեիք այնտեղ, երբ Հիսուսն ուսուցանում էր:

• Ըստ ձեզ, ինչո՞ւ է Փրկիչն այդքան արդյունավետորեն ուսուցանել:

Բացատրեք, որ մենք՝ որպես Փրկչի Եկեղեցու անդամներ, բազմաթիվ հնարավորություններ ունենք ուսուցանելու Նրա ավետարանը: Կարող եք նաև ցուցադրել Առաջին Նախագահության հետևյալ ուղերձն ուսուցման վերաբերյալ.

Սիրելի եղբայրներ և քույրեր,

Ինչ փառահեղ հնարավորություն ունեք ուսուցանելու Հիսուս Քրիստոսի ավետարանը: Անկախ նրանից՝ դուք ուսուցանելու հատուկ կոչում ունեք, թե ոչ, դուք ուսուցիչ եք: Որպես Վարդապետ Ուսուցչի՝ Հիսուս Քրիստոսի աշակերտ, դուք հնարավորություն ունեք կիսվելու Նրա լույսով, ուր էլ որ լինեք՝ տանը, եկեղեցում, ձեր ընկերների շրջապատում և ուրիշներին սպասավորելիս: Ավետարանի ուսուցումը սուրբ վստահություն է: Դա Տիրոջ աշխատանքի կարևոր մասն է, և այն հնարավորինս արդյունավետ է, երբ մենք դա անում ենք Նրա ձևով: (Ուսուցանեք Փրկչի ձևով. բոլոր նրանց համար, ովքեր ուսուցանում են տանը և եկեղեցում [2022], 1)

• Ի՞նչ հնարավորություններ ունեն դեռահասները՝ ուսուցանելու և վկայելու Հիսուս Քրիստոսի և Նրա ավետարանի մասին:

Բացատրեք ուսանողներին, որ իրենք հնարավորություն կունենան համառոտ դաս պատրաստել Վարդապետություն և Ուխտեր 130 բաժնի որոշ ուսմունքներից և ուսուցանել իրենց դասն ուրիշներին: Եթե դուք ծրագրում եք մի քանի ուսանողի հանձնարարել ուսուցանել ամբողջ դասարանին, ապա նրանց վստահեցրեք, որ չեք խնդրի որևէ մեկին անել դա առանց իր ցանկության:

Նախքան ուսանողները կսկսեն պատրաստել դասերը, կարող եք կիսվել հետևյալ պատմական տեղեկությամբ:

1843 թ. ապրիլի 2-ին Մարգարե Ջոզեֆ Սմիթը հանդիպեց Սրբերին Ռեյմուսում (Իլինոյս), որը գտնվում է Նավուից մոտ 20 մղոն հեռավորության վրա: Ջոզեֆն ուսուցանեց ավետարանի մի քանի ճշմարտություն, այդ թվում՝ մանրամասներ Աստվածագլխի մասին, այս կյանքում գիտելիք ձեռք բերելու կարևորության մասին և, թե ինչպես մենք կարող ենք ստանալ Աստծո օրհնությունները: Մարգարեի ուսմունքները գրանցված են Վարդապետություն և Ուխտերի 130 բաժնում։

Պատրաստվեք ուսուցանել

Որպեսզի օգնեք ուսանողներին պատրաստվել ուսուցմանը, բաժանեք «Ուսուցանեք ճշմարտություններ Վարդապետություն և Ուխտեր 130 բաժնից» վերնագրով աշխատաթերթը: Դասարանի անդամներին առաջարկեք ուղղորդում ստանալու համար հետևել դասի նախապատրաստման քայլերին: Քանի որ Վարդապետություն և Ուխտեր 130.22–23 հատվածները վարդապետության սերտման հատվածներ են, գուցե անհրաժեշտ լինի խնդրել մի քանի ուսանողի աշխատել այդ թեմայի շուրջ, որպեսզի ապահովեն այդ հատվածների ուսուցումը դասի ընթացքում:

Երբ ուսանողները պատրաստվում են, շրջեք սենյակում և անհրաժեշտության դեպքում օգնեք։ Կարող եք մի քանի խորհուրդ տալ, թե նրանք ինչ կարող են օգտագործել, որպեսզի օգնեն ուրիշներին ակտիվորեն մասնակցել ուսուցմանը: Դրանք կարող են ներառել քննարկման հարցեր, պատկերավոր նյութեր, առարկաներ, անձնական փորձի փոխանակում կամ գրավոր վարժություններ:

Ուսուցանեք ճշմարտությունները Վարդապետություն և Ուխտեր 130 բաժնից

Դասի նախապատրաստություն․

Քայլ 1․ Ընտրեք ստորև ներկայացված ուսումնասիրության թեմաներից մեկը և ուսումնասիրեք տրամադրված նյութերը: Կարդալու ընթացքում ուշադրություն դարձրեք Սուրբ Հոգուց ստացված մտքերին, գաղափարներին և տպավորություններին: Կարող եք նաև գտնել այլ նյութեր՝ ձեր ընտրած թեմայի վերաբերյալ ձեր ընկալումը խորացնելու համար:

Քայլ 2․ Ստեղծեք հինգից յոթ րոպեանոց դասի պլան՝ ձեր ընտրած թեմայի համար: Կարող եք օգտագործել հետևյալ հարցերից մի քանիսը, որոնք կօգնեն ձեզ պատրաստել դասի պլանը.

• Այս ճշմարտություններն ինչպե՞ս կարող են կամ պետք է ազդեն Երկնային Հոր և Հիսուս Քրիստոսի հետ մեր հարաբերությունների վրա:

• Ինչպե՞ս կարող եմ օգտագործել սուրբ գրությունները և մարգարեների խոսքերը, որպեսզի օգնեմ ուրիշներին ավելի լավ հասկանալ այս թեման:

• Ի՞նչ կարող եմ անել, որպեսզի օգնեմ ուրիշներին ներգրավվել և ակտիվորեն մասնակցել դասին:

• Ո՞ր փորձառություններով կարող եմ կիսվել կամ ինչի՞ մասին կարող եմ վկայել:

• Ի՞նչ կարող եմ անել, որպեսզի օգնեմ ուրիշներին կիրառել այս թեման իրենց կյանքում:

Թեմաներ և նյութեր՝ ուսումնասիրության համար.

Տարբերակ 1. Գիտելիքն ու բանականությունը բարձրանում են մեզ հետ հարության ժամանակ:

Նյութեր՝ ուսումնասիրության համար․

Վարդապետություն և Ուխտեր 130․18–19, տես նաև Վարդապետություն և Ուխտեր 88․118, 93․36

Տասներկու Առաքյալների Քվորումից երեց Նիլ Ա. Մաքսվելը (1926–2004) ուսուցանել է.

Եթե մի պահ խորհենք, թե ինչ կբարձրանա մեզ հետ հարության ժամանակ, պարզ է դառնում, որ մեր բանականությունը կբարձրանա մեզ հետ, նկատի ունեմ, ոչ միայն պարզապես մեր բանականության գործակիցը (IQ), այլ նաև ճշմարտությունն ընդունելու և կիրառելու ունակությունը։ Մեր տաղանդները, հատկանիշներն ու հմտությունները կբարձրանան մեզ հետ, իհարկե, նաև սովորելու մեր ունակությունը, ինքնակարգապահության աստիճանը և աշխատելու մեր կարողությունը: (Նիլ Ա. Մաքսվել, Եվ դրանով մենք նրանց կստուգենք [1982], 12)

Տարբերակ 2. Մենք օրհնություններ ենք ստանում Աստծուց՝ հնազանդվելով Նրա օրենքներին:

Նյութեր՝ ուսումնասիրության համար․

Վարդապետություն և Ուխտեր 130․20–21, տես նաև Հովհաննես 7․17, Վարդապետություն և Ուխտեր 82․10

Նախագահ Ռասսել Մ. Նելսոնն ուսուցանել է․

Եթե դուք իսկապես ցանկանում եք որոշակի օրհնություն ստանալ, ապա ավելի լավ է պարզեք, թե որ օրենքներն են կարգավորում այդ օրհնության ստացումը, ապա աշխատեք հնազանդվել այդ օրենքներին: (Ռասել Մ. Նելսոն, «The Mission and Ministry of the Savior: A Discussion with Elder Russell M. Nelson,» Ensign, հունիս 2005, 19)

Տարբերակ 3. Երկնային Հայրը և Հիսուս Քրիստոսն ունեն մսից և ոսկորից մարմին: Սուրբ Հոգին հոգեղեն անձնավորություն է։

Նյութեր՝ ուսումնասիրության համար․

Վարդապետություն և Ուխտեր 130.22–23, տես նաև Մատթեոս 3.13–17, Գործք 7.55–56

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Մենք հավատում ենք, որ այս երեք աստվածային անձինք, որոնք կազմում են մեկ Աստվածագլուխ, մեկ են մարդկային ընտանիքի փրկության նպատակներով, գործելակերպով, վկայությամբ և պարտավորություններով: Մենք հավատում ենք, որ Նրանք լցված են ողորմության և սիրո, արդարության և շնորհի, համբերության, ներողամտության և փրկագնման նույն աստվածային զգացումով: Կարծում եմ, ճիշտ կլինի ասել՝ մենք հավատում ենք, որ Նրանք մեկ են՝ ամեն մի էական և հավերժական հատկանիշով, բացի հավատալուց, որ Նրանք երեք անձնավորություններ են՝ միավորված մեկ էության մեջ։ … Մենք հայտարարում ենք, որ սուրբ գրություններից ակնհայտ է դառնում, որ Հայրը, Որդին և Սուրբ Հոգին առանձին անձնավորություններ են, երեք աստվածային էակներ: (Ջեֆրի Ռ. Հոլլանդ, «The Only True God and Jesus Christ Whom He Hath Sent,» Լիահոնա, նոյ. 2007, 40–41)

Ուսուցանելու փորձառություն

Ուսանողներին փոխանցեք, որ իրենց ներդրումը գնահատվում է. Երբ ուսանողները կիսվում են իրենց պատրաստած դասերով, օգնեք նրանց իմանալ, որ իրենց ներդրումը դասին արժևորվում և գնահատվում է: Սրա վերաբերյալ լրացուցիչ ուսուցում ստանալու համար տես «Զգացնել տվեք, որ արժևորում եք ուսանողներին՝ մինչև նրանք կարտահայտվեն կամ երբ կբարձրացնեն ձեռքը» դասընթացը Ուսուցիչների կատարելագործման հմտություններ․ Սիրեք նրանց, ում ուսուցանում եք ուսուցողական նյութում։

Երբ ժամանակ տրամադրեք ուսանողներին՝ պատրաստելու դասի պլանը, մի քանի ուսանողի առաջարկեք ուսուցանել իրենց դասերը դասարանին: Կարող եք նաև ուսանողներին բաժանել փոքր խմբերի, որպեսզի միմյանց ուսուցանելու հնարավորություն ունենան: Ուսանողների կողմից դասի անցկացման ժամանակ խրախուսեք դասարանի մնացած անդամներին հարգանք դրսևորել և լիովին ներգրավվել ուսումնական գործընթացում: Եթե որևէ ուսանողի հարմար չէ ուսուցանել սեմինարիայում կամ եթե ժամանակը թույլ չի տալիս, որպեսզի բոլորն ուսուցանելու հնարավորություն ստանան, խրախուսեք նրանց փորձել ուսուցանել տանը, եկեղեցական միջավայրում կամ ընկերոջը: Այս դասն ավարտելու համար կարող եք տալ հետևյալ հարցերը.

• Ի՞նչ սովորեցիք Երկնային Հոր և Հիսուս Քրիստոսի մասին, որը կօգնի ձեզ ձեր ներկայիս իրավիճակներում:

• Ի՞նչ սովորեցիք այսօր Փրկչի ավետարանն ուսուցանելու մասին:

• Հիսուս Քրիստոսի ավետարանն ուսուցանելու հնարավորություններից օգտվելն ինչպե՞ս կօգնի ձեզ հիմա և ապագայում:

Վարդապետություն և Ուխտերի 130․22–23 հատվածները սուրբ գրությունների սերտման հատվածներ են։ Առաջարկեք ուսանողներին նշել վարդապետության սերտման հատվածները տարբերակիչ եղանակով, որպեսզի կարողանան հեշտությամբ գտնել դրանք:

Մտապահեք

Կարող եք օգնել ուսանողներին մտապահել Վարդապետություն և Ուխտեր 130.22–23 հատվածների սուրբ գրության հղումը և հիմնական արտահայտությունը և կրկնել դրանք հետագա դասերի ժամանակ: Այս հատվածի սուրբ գրության հիմնական արտահայտությունն է՝ «Հայրն ունի մսից ու ոսկորից մարմին …, Որդին՝ նույնպես. բայց Սուրբ Հոգին … Հոգեղեն անձնավորություն է»։ Մտապահելու համար նախատեսված վարժությունների վերաբերյալ գաղափարները ներկայացված են հավելվածի նյութերում՝ «Վարդապետության սերտման կրկնության վարժություններ» բաժնում:

Լրացուցիչ նյութեր

Որտեղի՞ց կարող եմ ավելին իմանալ Վարդապետություն և Ուխտեր 130.1–17 հատվածների ուսմունքների մասին:

Ի հավելումն այս դասի ժամանակ դիտարկված թեմաների, Մարգարե Ջոզեֆ Սմիթն ուսուցանել է Վարդապետություն և Ուխտեր 130 բաժնում գրանցված լրացուցիչ թեմաների մասին։ Դրանցից մի քանիսը ներառում են ուրիշների հետ մեր փոխհարաբերության հավերժական բնույթը, Աստծո ամենագիտությունն ու նախագիտությունը, երկրի ճակատագիրը և Հիսուս Քրիստոսի Երկրորդ Գալուստը: Այս թեմաների վերաբերյալ լրացուցիչ տեղեկությունների համար տես ինստիտուտի Վարդապետություն և Ուխտեր․ Ուսանողի ձեռնարկը (2018), 751–58։

Վարդապետություն և Ուխտեր 130․18–19: Ինչո՞ւ պետք է շարունակեմ կրթել իմ միտքն ու հոգին:

Նախագահ Ռասսել Մ. Նելսոնն ուսուցանել է․

Կրթություն ստանալը ձեր ցանկությունն է: Ոչ ոք չի կարող անել դա ձեր փոխարեն: Որտեղ էլ լինեք, զարգացրեք սովորելու խոր ցանկությունը: Որպես Վերջին Օրերի Սրբեր, մեզ համար կրթություն ստանալը պարզապես արտոնություն չէ, դա կրոնական պատասխանատվություն է: Աստծո փառքը բանականություն է (տես Վարդապետություն և Ուխտեր 93․36)։ Հիրավի, մեր կրթությունը հավերժության համար է: … Կրթությունը՝ մարդկանց օգնելու ցանկության և նրանց օգնելու կարողության միջև տարբերությունն է։ (Ռասել Մ. Նելսոն, «Will You Choose to Increase in Learning?,» New Era, սեպտ. 2014, 2–3)

Վարդապետություն և Ուխտեր 130․20–21 Ո՞րն է Աստծո օրենքներին հնազանդվելու բարձրագույն օրհնությունը:

Առաջին Նախագահությունից նախագահ Դալլին Հ. Օուքսը բացատրել է.

Ջոզեֆ Սմիթն ուսուցանել է, որ Աստված «օրենքներ սահմանե[ց], որով այն հոգիները, որոնց Նա կուղարկեր աշխարհ, կկարողանային արտոնություն ունենալ իր նման զարգանալու»։ [Եկեղեցու նախագահների ուսմունքները. Ջոզեֆ Սմիթ (2007), 210:] Աստծո սերն այնքան կատարյալ է, որ Նա սիրով է պահանջում մեզնից հնազանդվել Իր պատվիրաններին, քանի որ Նա գիտի, որ միայն Իր օրենքներին հնազանդվելու միջոցով մենք կարող ենք դառնալ կատարյալ՝ ինչպիսին Նա է։ (Դալլին Հ. Օուքս, «Սեր և օրենք», Լիահոնա, նոյեմբեր 2009, 27)

Վարդապետություն և Ուխտեր 130․22–23 Որտեղի՞ց կարող եմ ավելին իմանալ Աստվածության մասին:

Դիտեք «What Is the Godhead?» (7:03) տեսանյութը՝ Աստվածագլխի յուրաքանչյուր անդամի և մեր կյանքն օրհնելու նրանց միասնական ջանքերի մասին ավելին իմանալու համար։

Օժանդակ ուսումնական վարժություններ

Վարդապետություն և Ուխտեր 130․18–19: Գիտելիք և բանականություն

Ուսանողներին առաջարկեք պատկերացնել, որ իրենք հեռանում են տնից մի քանի շաբաթով: Նրանց թույլ է տրվում վերցնել միայն այն, ինչ կտեղավորվի մեկ ճամպրուկի կամ պայուսակի մեջ։ Հարցրեք նրանց, թե ինչ են վերցնելու իրենց հետ:

Այնուհետև խնդրեք ուսանողներին պատկերացնել, որ իրենց նշանակման վայրը հոգիների աշխարհն է, որտեղ մենք կմտնենք, երբ մահանանք։ Առաջարկեք նրանց կիսվել, թե, ըստ նախկինում իրենց մտածածի, որ իրերը կկարողանան վերցնել իրենց հետ, երբ մահանան:

Ուսանողներին առաջարկեք կարդալ Վարդապետություն և Ուխտեր 130.18–19 հատվածները՝ փնտրելով, թե ինչ կարող ենք վերցնել մեզ հետ այս կյանքից, երբ մահանանք: Երբ ուսանողները զեկուցեն, թե ինչ են գտել, օգնեք նրանց բացահայտել հետևյալ ճշմարտությունը. գիտելիքն ու բանականությունը, որը մենք ձեռք ենք բերում այս կյանքում, կբարձրանան մեզ հետ Հարության ժամանակ։

Քննարկեք հետևյալ հարցերը.

• Ինչպե՞ս կարող է այս ճշմարտության մասին գիտելիքն ազդել ձեր որոշումների և առաջնահերթությունների վրա:

• Ի՞նչ սովորեցիք այս հատվածներից այն մասին, թե ինչպես կարող եք ավելացնել գիտելիքներն ու բանականությունը:

Վարդապետություն և Ուխտեր 130․20–21։ Ստացեք օրհնություններ Աստծուց

Ուսանողներին առաջարկեք պատկերացնել, որ ցանկանում են բարելավել իրենց ձեռագիրը: Խնդրեք նրանց կիսվել այն բաներով, որոնք կարող են անել՝ այս նպատակն իրականացնելու համար:

Այնուհետև առաջարկեք նրանց պատկերացնել, որ իրենք որոշել են բարելավել իրենց ձեռագիրը՝ վազելով երեք մղոն, շաբաթը հինգ օր, մեկ ամիս շարունակ:

• Ինչպիսի՞ն կլինի արդյունքը։ Ինչո՞ւ։

Այնուհետև ուսանողները կարող են կարդալ Վարդապետություն և Ուխտեր 130.20–21 հատվածները՝ փնտրելով մի ճշմարտություն, որը կարող է առնչվել այն հոգևոր օրհնություններին, որոնք մենք ցանկանում ենք ստանալ: (Կարող եք բացատրել, որ «հիմնված» բառը նշանակում է «հիմնվելով ինչ-որ բանի վրա», և որ «անդարձորեն հրամանագրված» օրենքը մշտական է և անփոփոխ։)

• Ըստ Վարդապետություն և Ուխտեր 130.20–21 հատվածների, ինչպե՞ս ենք մենք օրհնություն ստանում Աստծուց։

Անհրաժեշտության դեպքում օգնեք ուսանողներին բացահայտել հետևյալ ճշմարտությունը. եթե մենք ցանկանում ենք օրհնություն ստանալ Աստծուց, ապա պետք է հնազանդվենք այն օրենքին, որի վրա այն հիմնված է։

Ուսանողների համար օգտակար կլինի սուրբ գրություններում գտնել օրինակներ, որոնք ցույց են տալիս այն օրհնությունները, որոնք մենք կարող ենք ստանալ՝ հետևելով Աստծո որոշ օրենքներին: Օրինակ՝ կարող եք առաջարկել, որ նրանք ուսումնասիրեն Հովհաննես 7.17, 2 Նեփի 32.3, Վարդապետություն և Ուխտեր 10.5, 88․124 հատվածները։

Ուսանողներին հանձնարարեք գրի առնել այն օրհնությունները, որոնք նրանք ցանկանում են ստանալ։ Այնուհետև, առաջարկեք նրանց գրել, թե որ օրենքին կամ օրենքներին պետք է հնազանդվեն՝ այդ օրհնությունները ստանալու համար: Նշեք, որ որոշ օրենքներ և օրհնություններ շատ որոշակի են, մինչդեռ մյուսներն ավելի ընդհանուր են։ Հիշեցրեք ուսանողներին, որ որոշ խոստացված օրհնություններ կգան հաջորդ կյանքում։ Կարող եք նաև կիսվել Տասներկու Առաքյալների Քվորումից երեց Դ. Թոդ Քրիստոֆերսոնի հետևյալ խոսքերով.

Մենք չպետք է մտածենք Աստծո ծրագրի մասին՝ որպես տիեզերական առք ու վաճառքի մեքենայի, որտեղ մենք (1) ընտրում ենք ցանկալի օրհնությունը, (2) տեղադրում ենք բարի գործերի պահանջվող գումարը և (3) պատվերն անհապաղ առաքվում է:

Աստված իսկապես կպատվի մեզանից յուրաքանչյուրին տված Իր ուխտերն ու խոստումները: … Բայց հնազանդվելու վրա հիմնված ոչ ամեն օրհնություն է, որ [Վարդապետություն և Ուխտեր 130.20–21] ձևավորվում է, նախագծվում և ժամկետավորվում՝ ըստ մեր ակնկալիքների: Մենք պետք է անենք հնարավոր ամեն բան, բայց պետք է Նրան թողնենք օրհնությունների կառավարումը: (Դ. Թոդ Քրիստոֆերսոն, «Մեր հարաբերությունը Աստծո հետ», Լիահոնա, մայիս 2022, 78)

Վարդապետություն և Ուխտեր 130․22–23 Աստվածության բնույթը

Ուսանողներին առաջարկեք պատկերացնել հետևյալ իրավիճակը.

Ձեր ընկերոջ հետ զրուցելիս շոշափվում է Աստծուն հավատալու թեման: Ձեր ընկերոջն ուսուցանել են, որ Աստված մարդ չէ, այլ ավելի շատ ներկայություն կամ զորություն է, որը կա և գոյություն ունի ամենուր՝ միաժամանակ:

Խնդրեք ուսանողներին ուսումնասիրել Վարդապետություն և Ուխտեր 130.22–23 հատվածները՝ փնտրելով Աստվածագլխի մասին ճշմարտություններ, որոնք Տերը հայտնել է Մարգարե Ջոզեֆ Սմիթին և որոնք կարող են օգնել սցենարում նկարագրված մտահոգությունների ժամանակ:

Կարող եք նաև առաջարկել նրանց որոնել «Աստված, Աստվածագլուխ» գրառումները Սուրբ գրքերի ուղեցույցում կամ «Աստվածագլուխ» գրառումը Թեմաների ուղեցույցում՝ գտնելու լրացուցիչ սուրբ գրություններ, որոնցով կարող են կիսվել իրենց ընկերոջ հետ:

Երբ ուսանողներն ավարտեն, քննարկեք, թե ինչ են իրենք սովորել՝ տալով հետևյալ հարցերը.

• Սուրբ գրություններից գտած ո՞ր ճշմարտություններով կարող եք կիսվել։ (Ուսանողները կարող են նշել հետևյալ ճշմարտությունները. Աստվածության մեջ կան երեք առանձին անձնավորություններ: Հայրն ու Որդին ունեն շոշափելի մարմիններ մսից և ոսկորից: Սուրբ Հոգին հոգեղեն անձնավորություն է։)

• Ինչպե՞ս կարող է այս ճշմարտությունների ընկալումն ու դրանց հավատալն ազդել ձեր կյանքի կամ Աստծո հետ ձեր հարաբերությունների վրա: