“Lesona 144: Fotopampianarana sy Fanekempihavanana 133:41–56: -Iza ity midina avy amin’ Andriamanitra … ity?,-” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 133:41–56,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 144: Fotopampianarana sy Fanekempihavanana 133–134
Fotopampianarana sy Fanekempihavanana 133:41–56
“Iza ity midina avy amin’Andriamanitra … ity?”
Rehefa miverina i Jesoa Kristy dia ho vonona handray Azy ny mahatoky (jereo ny Fotopampianarana sy Fanekempihavanana 133:56). Ny fampianaran’ny Mpamonjy ao amin’ny Fotopampianarana sy Fanekempihavanana 133 dia afaka manampy antsika hianatra kokoa momba Azy sy hiomana amin’ny Fiaviany Fanindroany. Ity lesona ity dia afaka manampy ireo mpianatra hahatakatra kokoa ireo toetra tsara sy toetoetran’i Jesoa Kristy.
Sahanasa fianarana azo atao
Ny Fiavian’ny Mpamonjy Fanindroany
Hevero ny hampiseho sary maneho ny Fiavian’i Jesoa Kristy Fanindroany. Azon’ny mpianatra atao koa ny mamaritra, na raha azo atao, ny mampiseho ireo sary tiany indrindra mikasika ny Fiaviany Fanindroany.
Saintsaino ity teny manaraka nambaran’ny Loholona Neil L. Andersen ao amin’ny Kôlejin’ny Apôstôly Roambinifolo ity sady alaovy sary an-tsaina ihany hoe hanao ahoana izany Fiavian’ny Mpamonjy Fanindroany izany.
Mitombo ny finoantsika rehefa miandrandra ilay andro be voninahitra hiverenan’ny Mpamonjy eto an-tany isika. Mampientanentana ny fanahiko ny mieritreritra ny fiverenany. Tena hampitolagaga mihitsy izany! Ny velarana sy ny fahalehibiazana, ary ny hakantony, dia hihoatra noho izay rehetra fahitan’ny maso mety maty na niainana. (Neil L. Andersen, “Ho Tonga anie ny Fanjakanao,” Liahona, mey 2015, 122)
-
Inona ireo teny na andian-teny nanan-danja taminao? Inona no teny fanampiny mety hampiasainao hamaritana ny Fiaviana Fanindroany?
Hazavao amin’ny mpianatra fa taorian’ny nanasan’i Jesoa Kristy antsika hiomana amin’ny Fiaviany Fanindroany (jereo ny Fotopampianarana sy Fanekempihavanana 133:10), dia nanambara misimisy kokoa momba ireo toetoetrany sy ny toetra tsara ananany Izy. Nizara ireo zavatra izay hiseho amin’ny fotoana hahatongavany Izy sy mandritra ireo trangan-javatra izay hialoha izany.
Azonao atao avy eo ny mampiseho tsirairay ireto fanontaniana manaraka ireto ary asao ny mpianatra hieritreritra mangina ny valinteniny.
-
Rehefa mieritreritra ny Fiavian’ny Mpamonjy Fanindroany aho, moa ve aho mazàna mifantoka kokoa amin’ireo zavatra hitranga sa amin’ny hoe iza no hiverina eto an-tany?
-
Inona no mety hiova raha mifantoka kokoa amin’i Jesoa Kristy aho mihoatra ireo zavatra hitranga manodidina ny fiverenany?
Asao ny mpianatra hikatsaka fitarihana avy amin’ny Fanahy Masina mba hianatra bebe kokoa momba an’i Jesoa Kristy sy ny Fiaviany Fanindroany mandritra ny fandalinany androany.
Mba hanampiana ireo mpianatra hianatra kokoa momba ny zavatra hitranga amin’ny Fiaviana Fanindroany sy momba ny hoe iza no hiverina dia asao izy ireo handika ity tabilao manaraka ity ao amin’ny diary fandalinany. Afaka miara-miasa tsiroaroa ireo mpianatra, ary mameno tsanganana samy hafa ny mpiara-miasa tsirairay. Rehefa avy nomena fotoana ampy ireo mpiara-miasa dia afaka mifampizara ny zavatra hitany izy ireo ary mameno ilay tsanganana hafa.
Vakio ny Fotopampianarana sy Fanekempihavanana 133:42–53, ary raketo ao amin’ny tsanganana mifanaraka amin’izany ny zavatra hitanao.
|
Ny zavatra hitranga amin’ny Fiaviana Fanindroany |
Ny zavatra ianarako momba an’i Jesoa Kristy |
|---|---|
Raha toa ka manana fanontaniana mikasika ilay andian-teny hoe “zavatra mahatahotra;” ao amin’ny andininy 43 ny mpianatra dia hazavao fa ny hoe mahatahotra dia mety hidika hoe henjana. Raha toa ka manana fanontaniana mikasika ny fitafian’ny Mpamonjy ao amin’ny andininy 46–48 ny mpianatra, dia zarao ny zavatra nampianarin’ny Filoha Russell M. Nelson hoe: Amin’ny Fiaviana Fanindroany, i Jesoa dia hanao “akanjo mena midorehitra mba hanehoana ny rany izay mikoriana avy amin’ny mason-koditra rehetra” (“Ny hoavin’ny Fiangonana: Manomana izao tontolo izao amin’ny Fiavian’ny Mpamonjy fanindroany,” Ensign, apr. 2020, 10).
Ireo toetra tsara ananan’ny Mpamonjy
Rehefa avy mizara amin’ny mpiara-miasa aminy ny zavatra nampidiriny tao amin’ny tabilaony ny mpianatra dia soraty ny hoe “I Jesoa Kristy …” eny amin’ny solaitrabe. Apetraho ity fanontaniana manaraka ity ary asao ny mpianatra mba ho eny amin’ny solaitrabe ka hamita ilay andian-teny amin’ny valintenin’izy ireo.
Mifantoha amin’i Jesoa Kristy rehefa mampianatra ny soratra masina ianao: Raha te hianatra kokoa momba ny fifantohana amin’i Jesoa Kristy dia jereo ny fiofanana mitondra ny lohateny hoe “Ampianaro ny momba ireo anarana fiantsoana an’i Jesoa Kristy sy ireo anjara asany ary ireo toetra nananany,” hita ao amin’ny Fahaiza-manao ho fampivoarana ny mpampianatra: Mifantoha amin’i Jesoa Kristy. Hevero ny hampihatra ilay fahaiza-manao “famoronana fanontaniana mampikaroka iray izay manampy ny mpianatra hamantatra ny anjara asan’i Jesoa Kristy, ny anarana fiantsoana Azy, ny fanehoana Azy an’ohatra, ny toetra nananany, na ny toetoetrany.”
-
Inona no nianaranao momba an’i Jesoa Kristy izay manan-danja indrindra aminao? Nahoana izany no manan-danja aminao?
Mety hahita fahamarinana maromaro toy izao manaraka izao ireo mpianatra:
-
I Jesoa Kristy …
-
… dia marina sy mahery (jereo ny andininy 44–45, 50–51).
-
… dia mamaly soa ireo izay miandry Azy (jereo ny andininy 45).
-
… dia mahery ka mahavonjy (jereo ny andininy 47).
-
… dia maneho halemem-panahy sy hatsaram-po (jereo ny andininy 52).
-
… dia mahafantatra ny fijaliantsika (jereo ny andininy 53).
-
… dia mitondra ny enta-mavesatsika sy mitondra antsika ary manavotra antsika satria tiany isika (jereo ny andininy 53).
Azonao atao ny manasa ireo mpianatra hanisy marika ireo andian-teny ao amin’ny soratra masiny izay mampianatra ireo fahamarinana ireo.
-
-
Inona no tombontsoa azonao eo amin’ny fiainanao noho ny fahatakarana ireo toetran’i Jesoa Kristy sy ny toetoetrany?
-
Manova ny fahatsapanao momba ny Fiaviany Fanindroany amin’ny fomba ahoana ireo famariparitana an’i Kristy ireo?
Mampitombo ny fahatakarantsika ny toetpetran’ny Mpamonjy
Ity sahanasa atao manaraka ity dia afaka manampy ny mpianatra hahatakatra kokoa ny momba ny Mpamonjy. Asehoy ireto dingana telo manaraka ireto mba hanampiana ny mpianatra hahatakatra ilay sahanasa.
Alohan’ny hanombohan’ny mpianatra ilay sahanasa dia azonao atao ny manome azy ireo ohatra tahaka ilay iray voalaza etsy ambany amin’ireo dingana telo.
-
Misafidiana toetra na toetoetra nananan’i Jesoa Kristy ao amin’ny Fotopampianarana sy Fanekempihavanana 133 izay tianao hianarana kokoa. Soraty eo an-tampon’ny taratasy iray tsy misy na inona na inona izany.
-
Soraty eo amin’ny taratasinao ny rafi-tantara iray mamaritra olona iray izay afaka mandray tombontsoa avy amin’ny fahatakarana io toetoetran’i Jesoa Kristy io.
-
Asio soratra masina na teny nambarana mpitarika iray ao amin’ny Fiangonana izay mampitombo ny fahatakaranao ilay toetoetra ao amin’ny taratasinao. (Mba hahazoana fanampiana dia azonao atao ny mijery ilay toetra tsara ananana ao amin’ny Torolalana ho an’ny Soratra Masina na mikaroka izany ao amin’ny application Médiathèque de l’Évangile.)
Volavolao miaraka amin’ny mpianatra ny dingana tsirairay amin’io sahanasa io amin’ny alalan’ny fampiasana hevitra tahaka ireto manaraka ireto:
-
Dingana 1: Soraty eny amin’ny solaitrabe ireo teny hoe marina sy mahery na asio faribolana izany raha toa ka nosoratana nandritra ny sahanasa natao teo aloha.
-
Dingana 2: Asehoy ity rafi-tantara manaraka ity. Angataho ny mpianatra hizara ny antony mety hahatsapan’ny zatovo sasany ny tenany ho toa an’i Andry. Manome fanantenana ho an’ny olona iray izay manana fahatsapana toy izany amin’ny fomba ahoana ny fahafantarana fa marina sy mahery i Jesoa.
Miezaka ny hanao izay tsara indrindra azony atao i Andry mba hanao ny tsara, saingy sarotra izany noho ny faharatsiana be dia be eto amin’izao tontolo izao. Tsapany ho toa mitady handresy ny ratsy. Leo ny fanenjehana sy ny fakam-panahy manodidina azy izy.
Dingana 3: Soraty eny amin’ny solaitrabe ny 1 Nefia 22:15–17. Asao ny mpianatra hamaky izany ary hitady ny zavatra nampianarin’i Nefia momba ny hery sy ny fahamarinan’i Jesoa Kristy. Rehefa avy nizara ny zavatra hitany ny mpianatra dia angataho izy ireo hifanakalo hevitra momba ity fanontaniana manaraka ity:
-
Inona no nampianarin’i Nefia momba an’i Jesoa Kristy izay afaka manampy olona iray mahatsapa ny tenany ho toa an’i Andry?
Asao ny mpianatra hifidy toetoetra hafa ananan’i Jesoa Kristy ao amin’ny Fotopampianarana sy Fanekempihavanana 133 ary hamita ny dingana 1–3 amin’ilay sahanasa ao anaty vondrona kely maromaro (na samirery raha izay no tian’izy ireo).
Rehefa avy nomena fotoana ampy hamitana ireo dingana telo voalohany, dia omeo torolalana ireo vondrona mba hifanakalo ny taratasiny amin’ny vondrona iray hafa. Dia asehoy avy eo ny dingana 4–6 etsy ambany.
-
Vakio ny toetoetran’i Kristy, ilay rafi-tantara, ary izay soratra masina na teny nambara ao amin’ilay taratasy.
-
Rehefa vita ny fifanakalozan-kevitra miaraka amin’ny vondrona misy anao dia soraty eo amin’ilay taratasy ny antony mety hanampian’ny fahatakarana io toetoetran’i Jesoa Kristy io ilay olona ao anatin’ilay rafi-tantara.
-
Tadiavo ary ampidiro ao ny soratra masina na teny nambara fanampiny nataon’ny mpitarika iray ao amin’ny Fiangonana izay tsapanao fa hanampy io olona io.
-
Asao ireo vondrona hamerina ireo taratasy any amin’ireo vondrona niavian’izany voalohany ary hamaky ny zavatra fanampiny napidirina tao amin’ny taratasin’izy ireo. Asao ny mpikambana iray ao amin’ny vondrona tsirairay mba hizara amin’ny mpianatra ny hevi-baovao momba an’i Jesoa Kristy izay azon’izy ireo avy amin’ity sahanasa ity.
Ireo toetran’ny Mpamonjy eo amin’ny fiainanao
Hevero ny mizara toetoetra iray mampiavaka an’i Jesoa Kristy izay manan-danja aminao.
Asao ireo mpianatra hisaintsaina ombam-bavaka ireo toetoetra izay nohalalininy androany ary hamaly ireto fanontaniana manaraka ireto ao amin’ny diary fandalinany.
-
Ahoana no ahafahan’ny fahatakarana ny toetoetran’i Kristy izay nianaranao androany mba hampatanjaka anao eo amin’ny fiainanao amin’izao fotoana izao?
-
Inona no azonao atao mba hianarana kokoa ireo toetoetra ireo?
Ho famaranana dia afaka mizara ny zavatra nosoratany miaraka amin’ireo fahatsapana hafa ananany momba an’i Jesoa Kristy ny mpianatra vitsivitsy izay vonona.