Դաս 153. Վարդապետություն և Ուխտեր 137–138

Վարդապետություն և Ուխտեր 138, Մաս 2

«Պատրաստվել են՝ առաջ գալու Տիրոջը հարմար ժամանակ»

Հոգիների աշխարհի մասին իր տեսիլքի ընթացքում նախագահ Ջոզեֆ Ֆ. Սմիթը տեսավ Երկնային Հոր ազնիվ և մեծ հոգիներից շատերին: Նա տեսավ հին մարգարեներին, որոնք հավատարմորեն կատարել են Տիրոջ աշխատանքը: Նա տեսավ նաև այլ հոգիների, որոնց Տերը պահպանել էր՝ վերջին օրերում ծնվելու համար, որպեսզի տաճարներ կառուցեն և մահացածների համար արարողություններ կատարեն։ Այդ արարողությունները հնարավոր են դառնում տաճարային և ընտանեկան պատմության աշխատանքի միջոցով: Այս դասը կօգնի ուսանողներին մղում ունենալ՝ մասնակցելու տաճարային և ընտանեկան պատմության աշխատանքին:

Հնարավոր ուսումնական վարժություններ

Իմ կարևոր աշխատանքը

Հետևյալ հուշումները կարող են օգնել ուսանողներին մտածել այն կարևոր աշխատանքի մասին, որ Երկնային Հայրն ունի իրենց համար: Մտածելու և գրելու համար ժամանակ տալուց հետո պատրաստակամ ուսանողներին խնդրեք կիսվել իրենց պատասխաններով:

• Ամենակարևոր բաներից մի քանիսը, որոնք ես արել եմ իմ կյանքում, հետևյալ են …

• Ամենակարևոր բաներից մի քանիսը, որոնք ես կարող եմ անել իմ կյանքում, հետևյալն են …

• Երկնային Հայրն ինձ երկիր ուղարկեց այս պահին, որպեսզի …

Առաջարկեք ուսանողներին անձնական հայտնություն խնդրել՝ իմանալու այն կարևոր բաները, որ Երկնային Հայրը և Հիսուս Քրիստոսը ցանկանում են, որ իրենք կատարեն: Ուսանողները կարող են նաև ուսումնասիրել իրենց հայրապետական օրհնությունները տանը՝ այդ մասին ավելին իմանալու համար:

Ընտրյալ հոգիները պահպանվել են՝ ժամանակների լրության մեջ առաջ գալու համար

Առաջարկեք ուսանողներին կիսվել, թե ինչ են հիշում Երկնային Հոր ծրագրի մասին նախագահ Ջոզեֆ Ֆ. Սմիթի՝ հոգիների աշխարհի մասին տեսիլքից (տես Վարդապետություն և Ուխտեր 138.11–60):

Օգնեք ուսանողներին հասկանալ, որ Վարդապետություն և Ուխտեր 138.38–49, 53 հատվածներում նախագահ Ջոզեֆ Ֆ. Սմիթը տեսավ բազմաթիվ ազնիվ և մեծ անձանց: Կարող եք առաջարկել ուսանողներին նշել այն մարդկանցից մի քանիսին, որոնց նախագահ Սմիթը տեսավ իր տեսիլքում:

Կարդացեք Վարդապետություն և Ուխտեր 138.53–56 հատվածները՝ փնտրելով այն աշխատանքը, որ Երկնային Հայրը պատրաստել է, որպեսզի ազնիվ հոգիները կատարեն վերջին օրերում։

• Այդ հատվածներից ո՞ր արտահայտություններն են առնչվում ձեզ հետ:

• Ի՞նչ եք սովորում այն աշխատանքի մասին, որ Երկնային Հայրն ունի ձեզ համար։

• Ինչպե՞ս կարող եք ամփոփել այս հատվածները ճշմարտության մեկ հայտարարությամբ:

  Երբ ուսանողներն ամփոփ ներկայացնեն այս հատվածները, օգնեք նրանց բացահայտել հետևյալ ճշմարտությունը. Երկնային Հայրը ընտրյալ հոգիներին պահել է, որպեսզի աշխատեն Տիրոջ այգում՝ Իր զավակների փրկության համար:

• Ի՞նչ եղանակներով կարող ենք աշխատել Տիրոջ այգում, որպեսզի օգնենք փրկել Նրա զավակներին:

Եթե ուսանողները չխոսեն դրա մասին, կարող եք նրանց ուշադրությունը հրավիրել հատված 54-ի վրա: Օգնեք նրանց հասկանալ, որ մենք կարող ենք աշխատել Տիրոջ այգում` մասնակցելով մահացածների համար նախատեսված տաճարային արարողություններին: Կարող եք հիշեցնել ուսանողներին, որ վարագույրի մյուս կողմում գտնվող մարդկանց համար տաճարային արարողություններ կատարելը մի եղանակ է, որով մենք օգնում ենք հավաքել Իսրայելը:

Հետևյալ խոսքերը կարող են օգնել ուսանողներին հասկանալ, որ Վարդապետություն և Ուխտեր 138.53–56 հատվածները վերաբերում են իրենց: Որպեսզի վարժվեն հղումներ ստեղծել Gospel Library հավելվածում, ուսանողները կարող են կապել սուրբ գրությունների հատվածները հետևյալ խոսքերի հետ:

Նախագահ Ռասսել Մ. Նելսոնը վկայել է․

Բոլոր մարդկանցից, ովքեր երբևէ ապրել են Երկիր մոլորակի վրա, մենք ենք այն մարդիկ, ովքեր մասնակցում են այս վերջին՝ մեծ հավաքման իրադարձությանը: Որքան ոգևորիչ է սա:

Մեր Երկնային Հայրն այս վերջին փուլի համար պահպանել է Իր ազնվագույն հոգիներին, հավանաբար կարող եմ ասել՝ Իր լավագույն թիմին: Այդ ազնիվ հոգիները, այդ լավագույն խաղացողները, այդ հերոսները դուք եք (Ռասսել Մ. Նելսոն և Վենդի Վ. Նելսոն, «Իսրայելի հույսը» [երիտասարդների համաշխարհային հոգևոր հավաք, 3 հունիսի, 2018 թ.], ChurchofJesusChrist.org)

Հետևյալ հարցերը կօգնեն ուսանողներին գնահատել իրենց ներկայիս վերաբերմունքը ընտանեկան պատմության և տաճարային աշխատանքին մասնակցելու վերաբերյալ: Մտածելու համար նրանց բավարար ժամանակ տրամադրելուց հետո պատրաստակամ ուսանողներին խնդրեք կիսվել իրենց մտքերով և զգացմունքներով:

• Ի՞նչ եք զգում՝ իմանալով որ Տերը պատրաստել է ձեզ, որպեսզի օգնեք հավաքել Իսրայելը ընտանեկան պատմության և տաճարային աշխատանքի միջոցով:

• Որո՞նք են ձեր շարժառիթները ընտանեկան պատմության և տաճարային աշխատանքին մասնակցելու համար: Ինչո՞ւ եք այդպես կարծում։

«Վարդապետություն և Ուխտեր 127–128, Մաս 2» դասը ուսանողներին խրախուսում է մասնակցել տաճարային և ընտանեկան պատմության աշխատանքին: Կարող եք առաջարկել ուսանողներին կիսվել, թե ինչ են իրենք արել և ինչպես է Տերն օրհնել իրենց:

Պահպանվել են, որպեսզի օգնեն հավաքել Իսրայելը տաճարային և ընտանեկան պատմության աշխատանքի միջոցով

Ստորև ներկայացված է մի եղանակ՝ օգնելու ուսանողներին պատասխանատվություն ստանձնել իրենց ուսման համար:

Առաջարկեք նրանց ստեղծել մի ուղերձ, որով կարող են կիսվել՝ մղելու մարդկանց մասնակցել տաճարային և ընտանեկան պատմության աշխատանքին: Դա կարող է լինել թռուցիկ, սոցիալական ցանցի գրառում, տեսաուղերձ կամ այլ տեսակի հրավեր: Հնարավորություն տվեք ուսանողներին ընտրել իրենց կողմից ստեղծվող ուղերձի տեսակը:

«Պահպանվել են, որպեսզի օգնեն հավաքել Իսրայելը տաճարային և ընտանեկան պատմության աշխատանքի միջոցով» աշխատաթերթի նյութը կարող է ուսանողներին գաղափարներ տալ, թե ինչ ներառեն իրենց ուղերձում: Առաջարկեք ուսանողներին ուսումնասիրել այդ նյութը՝ իրենց ուղերձը ստեղծելուց առաջ: Ուսանողները կարող են ուսումնասիրել անհատապես կամ փոքր խմբերով:

Պահպանվել են, որպեսզի օգնեն հավաքել Իսրայելը տաճարային և ընտանեկան պատմության աշխատանքի միջոցով

1. Կարդացեք Վարդապետություն և Ուխտեր 138.57–59 հատվածները՝ փնտրելով, թե ինչպես են փրկագնվում նրանք, ովքեր գտնվում են հոգիների աշխարհում:

2. Կարդացեք Առաջին Նախագահությունից նախագահ Հենրի Բ. Այրինգի ստորև բերված խոսքերը։ Տեսեք, թե Փրկիչն ինչպես է վերաբերվում նրանց, ովքեր մասնակցում են տաճարային և ընտանեկան պատմության աշխատանքին:

Մտածեք Փրկչի հետ ձեր հանդիպման մասին։ Դուք կունենաք այդ հանդիպումը: Նա վճարեց ձեր և Երկնային Հոր բոլոր հոգևոր զավակների մեղքերի գինը։ Նա Եհովան է։ Նա ուղարկեց Եղիային: Կատարյալ սիրուց մղված՝ Նա շնորհեց կնքելու և օրհնելու քահանայության զորությունները։ Եվ Նա վստահեց ձեզ՝ հնարավորություն տալով լսել ավետարանը ձեր կյանքի ընթացքում, հնարավորություն տալով ստանձնել պարտավորություն՝ առաջարկել այն ձեր նախնիներին, որոնք չեն ունեցել ձեր ունեցած անգին հնարավորությունը: Մտածեք այն երախտագիտության մասին, որ Նա ունի այն մարդկանց հանդեպ, որոնք վճարում են աշխատանքով և հավատքով՝ գտնելու իրենց նախնիների անունները, և այնքան են սիրում իրենց նախնիներին և Իրեն, որ նրանց առաջարկում են հավերժական կյանք ընտանիքներում՝ Աստծո բոլոր պարգևներից մեծագույնը: Նա նրանց անսահման զոհաբերություն առաջարկեց։ Նա սիրում և գնահատում է նրանց, ովքեր վճարում են այն գինը, որ կարող են՝ հնարավորություն տալու իրենց նախնիներին ընտրել հավերժական կյանքի Իր պարգևը: (Հենրի Բ. Այրինգ, «Hearts Bound Together», Լիահոնա, մայիս 2005, 78–79)

3. Ձեր կարծիքով, ընտանեկան պատմության և տաճարային աշխատանքին մասնակցելն ինչպե՞ս կարող է օգնել ձեզ հետևել Հիսուս Քրիստոսի օրինակին:

4. Ինչպիսի՞ անձնական փորձառությամբ, ո՞ր սուրբ գրությունով կամ Եկեղեցու ղեկավարի ո՞ր խոսքերով կարող եք կիսվել:

Եթե ուսանողների համար օգտակար կլինի դիտել նախագահ Այրինգի խոսքերի վերաբերյալ տեսանյութ, կարող եք ցուցադրել «Hearts Bound Together» տեսանյութի 10:21-11:29 հատվածը, որը հասանելի է ChurchofJesusChrist.org կայքում:

Եթե կարծում եք, որ ձեր ուսանողների համար մոտիվացնող կլինեն ընտանեկան պատմության և տաճարային աշխատանքին մասնակցելու համար խոստացված օրհնությունները, կարող եք ցուցադրել նրանց այս տեսանյութերից մեկը կամ երկուսն էլ. «The Promised Blessings of Temple and Family History Work» (3:26), «The Promised Blessings of Temple and Family History Work 2» (4:04)։

Կարող եք նաև քննարկել, թե ինչպես է Տերը մեծացնում տաճարների և տեխնոլոգիաների մեր հասանելիությունը՝ ընտանեկան պատմության աշխատանքին օգնելու համար: «Լրացուցիչ նյութեր» բաժնում տեղադրված են նյութեր, որոնք ուսուցանում են այդ մասին:

• «Hearts Bound Together»

• «The Promised Blessings of Temple and Family History Work»

• «The Promised Blessings of Temple and Family History Work 2»

Մղում ունենալ՝ մասնակցելու տաճարային և ընտանեկան պատմության աշխատանքին

Ուսանողներին ժամանակ տվեք՝ ստեղծելու և կիսվելու մի ուղերձով, որը կօգնի մղել մարդկանց՝ մասնակցելու տաճարային և ընտանեկան պատմության աշխատանքին: Ուսանողներին խրախուսեք կիսվել իրենց ուղերձով տանը։

Հետևյալ հարցերը կօգնեն ուսանողներին մտածել տաճարային և ընտանեկան պատմության աշխատանքին մասնակցելու իրենց մոտիվացիայի մասին: Իրենց օրագրերում այս հարցերին պատասխանելը մի եղանակ է ուսանողների համար՝ հրավիրելու Սուրբ Հոգուն ուսուցանել իրենց։ Պատրաստակամ ուսանողներին առաջարկեք իրենց պատասխաններով կիսվել դասարանի հետ:

• Այն, ինչ սովորել կամ զգացել եք Վարդապետություն և Ուխտեր 138 բաժնի ուսումնասիրության ժամանակ, ինչպե՞ս է ազդել տաճարային և ընտանեկան պատմության աշխատանքին մասնակցելու ձեր մոտիվացիայի վրա:

• Տաճարային և ընտանեկան պատմության աշխատանքին մասնակցելն ինչո՞ւ է հանդիսանում ձեր երբևէ կատարած ամենակարևոր աշխատանքներից մեկը:

Լրացուցիչ նյութեր

Ի՞նչ է Տերը տվել, որպեսզի օգնի մեզ կատարել ընտանեկան պատմության և տաճարային աշխատանքը:

Տասներկու Առաքյալների Քվորումից երեց Քվենթին Լ Քուքն ուսուցանել է.

Տաճարների աճող թիվը առաջատար տեխնոլոգիաների հետ մեկտեղ օգնում են մեզ իրականացնել մեր նախնիների համար ընտանեկան պատմության մեր սրբազան պատասխանատվությունը` դարձնելով սա ողջ պատմության մեջ ամենաօրհնյալ ժամանակահատվածը: Ես հրճվում եմ մեր երիտասարդների զարմանալի հավատարմությամբ, երբ նրանք ինդեքսավորում ու գտնում են իրենց նախնիներին և այնուհետև տաճարում կատարում են մկրտության ու հաստատման աշխատանքը: Դուք բառացիորեն մարգարեցված փրկիչներն եք Սիոն Լեռան վրա: (Քվենթին Լ․ Քուք. «Ինքներդ ձեզ տաճարում տեսեք», Լիահոնա, մայիս 2016, 98)

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Աշխարհի պատմության մեջ, ի տարբերություն մյուս սերունդների, Տերը ձեր սերնդի համար ավելի հասանելի է դարձրել Իր սուրբ տաճարները:

Երբևէ կանգնե՞լ եք տաճարում, ճերմակ հագած, մկրտություններ կատարելուն պատրաստ: Ինչպե՞ս եք ձեզ զգացել: Տաճարում առկա է սրբության զգացումը: Փրկչի խաղաղությունը ճնշում է աշխարհի պտտահողմերը:

Տաճարում ձեր զգացողությունն օրինակ է հանդիսանում, թե ինչպես կցանկանայիք ձեզ զգալ կյանքում:

Գտեք ձեր մահացած պապիկներին, տատիկներին և բարեկամներին: Նրանց անունները ձեզ հետ տարեք տաճար: (Նիլ Լ. Անդերսեն, «Հոգևոր պտտահողմեր», Լիահոնա, մայիս 2014, 20–21)

Ինչպե՞ս են մեր նախնիները վերաբերվում տաճարային և ընտանեկան պատմության աշխատանքին:

Նախագահ Բրիգամ Յանգն (1801–1877) ուսուցանել է.

Ի՞նչ եք կարծում, ի՞նչ կասեին մահացած նախահայրերը, եթե կարողանային խոսել: Արդյոք չէի՞ն ասի․ «հազար ու մի տարի այստեղ ենք մնացել, այստեղ՝ այս բանտում, սպասելով այս տնտեսության գալուն»: … Ի՞նչ կշշնջային նրանք մեր ականջներին։ Ինչո՞ւ եթե նրանք զորություն ունենային, երկնքի որոտները մեր ականջներում կլինեին, եթե մենք կարողանայինք հասկանալ մեր կատարած աշխատանքի կարևորությունը: Երկնքի բոլոր հրեշտակները նայում են այս փոքրիկ բուռ մարդկանց և խթանում նրանց մարդկային ընտանիքի փրկության համար: (Teachings of Presidents of the Church: Brigham Young [1997], 309)

Օժանդակ ուսումնական վարժություններ

«Leadership Session at RootsTech 2017: Elder M. Russell Ballard» տեսանյութի 0:00-5:58 հատվածում նախագահ Բալլարդը կիսվում է իր նախնիների փորձառությամբ, որը ցույց է տալիս, թե Տերն ինչպես կարող է օգնել տաճարային և ընտանեկան պատմության աշխատանք կատարողներին:

Տեսանյութեր

Իր «Hearts Bound Together» ուղերձում նախագահ Հենրի Բ. Այրինգը խոսել է նախագահ Սմիթի տեսիլքի և միսիոներների մասին, որոնք քարոզում են ավետարանը մեր նախնիներին: Եթե դասի ընթացքում ցուցադրեք տեսանյութի մի մասը, կարող եք ներառել 7:11–11:29 հատվածը:

Վարդապետություն և Ուխտեր 138․53–56: Օգտագործեք խաչաձև հղումները՝ հիմնական արտահայտությունները հասկանալու համար

Այս գաղափարը կօգնի ուսանողներին սովորել օգտագործել ծանոթագրությունները և խաչաձև հղումները՝ սուրբ գրությունները հասկանալու համար։ Գրատախտակին կարող եք գրել հետևյալ արտահայտությունները Վարդապետություն և Ուխտեր 138.53–56 հատվածներից՝ համապատասխան խաչաձև հղումներով: Առաջարկեք ուսանողներին կիսվել, թե խաչաձև հղման մեջ ուսուցանված վարդապետությունն ինչպես է իմաստ հաղորդում սուրբ գրության արտահայտությանը: Ուսանողները կարող են ավելացնել այս հատվածները որպես խաչաձև հղումներ կամ հղումներ իրենց սուրբ գրություններում: Կարող եք նաև առաջարկել ուսանողներին տեսնել՝ արդյոք այս հատվածներից որևէ մեկը ներառված է ծանոթագրություններում: Նրանք կարող են նաև փնտրել ծանոթագրություններում նշված այլ հատվածներ։

• «Ժամանակների լրությունը» (Վարդապետություն և Ուխտեր 138․53)—Եփեսացիներին 1․10; Վարդապետություն և Ուխտեր 128․18

• «Վերջին օրերի մեծ աշխատանքի հիմքը դնելով» (Վարդապետություն և Ուխտեր 138․53)—Վարդապետություն և Ուխտեր 64․33

• «Ազնիվ ու մեծ անձանց թվում, որոնք ի սկզբանե ընտրվել էին» (Վարդապետություն և Ուխտեր 138․55)—Աբրահամ 3․22–23

• «Պատրաստվել են՝ առաջ գալու Տիրոջը հարմար ժամանակ» (Վարդապետություն և Ուխտեր 138.56)—Գործք Առաքելոց 17.26

Վարդապետություն և Ուխտեր 138․56: «Պատրաստվել են՝ առաջ գալու Տիրոջը հարմար ժամանակ»

Կարող եք օգնել ուսանողներին կենտրոնանալ Փրկչի վրա՝ բացահայտելով այն եղանակները, որոնցով Նա «պատրաստել է [իրենց]՝ առաջ գալու Տիրոջը հարմար ժամանակ» (Վարդապետություն և Ուխտեր 138.56)։ Կարող եք քննարկել, թե ինչպես են իրենք ուսուցանվել և պատրաստվել՝ «նախքան իրենց ծնվելը»: Կարող եք նաև առաջարկել ուսանողներին թվարկել, թե ինչ է տվել Տերը, որպեսզի օգնի մեզ կատարել մեր նախնիներին գտնելու մեր աստվածային առաքելությունը և նրանց համար կատարել տաճարային արարողություններ։ Կարող եք օգտագործել երեց Քվենտին Լ. Քուքի և երեց Նիլ Լ. Անդերսենի խոսքերը «Լրացուցիչ նյութեր» բաժնից՝ օգնելու ուսանողներին թվարկել։ Քննարկեք, թե տաճարային և ընտանեկան պատմության աշխատանքին մասնակցելն ինչպես կարող է ազդել իրենց հարաբերությունների վրա Երկնային Հոր և Հիսուս Քրիստոսի հետ: