Lesona 154—Ireo Fanekem-pinoana sy ny Fanambarana Ôfisialy 1 sy 2

Ireo Fanekem-pinoana

Mianatra fahamarinana fototra ao amin’ny filazantsaran’ny Mpamonjy

Tamin’ny 1 martsa 1842, dia namaly ny fangatahan’i John Wentworth izay mpamoaka gazety ny Mpaminany Joseph Smith mba hanome fampahalalana momba ny tantaran’ny Fiangonana sy ireo zavatra inoan’ny Fiangonana. Tao anatin’ny valinteniny dia nanambara fitsipika fototra miisa 13 ao amin’ny filazantsara i Joseph izay fantatra ankehitriny amin’ny hoe Fanekem-pinoana. Ity lesona ity dia afaka manampy ireo mpianatra hampitombo ny fahatakarany ny fotopampianaran’ny Mpamonjy amin’ny alalan’ny fandalinana ireo fahamarinana voarakitra ao amin’ireo Fanekem-pinoana.

Ireo sahanasa fianarana azo atao

Manazava ireo zavatra inoantsika

Atomboy amin’izao rafi-tantara manaraka izao ny fotoam-pianarana.

Alaivo sary an-tsaina hoe manana namana iray izay te hahafantatra bebe kokoa momba ny zavatra inoan’ny mpikamban’ Ny Fiangonan’i Jesoa Kristy ho an’ny Olomasin’ny Andro Farany ianao. Tena liana ilay namanao, saingy minitra vitsy monja no ananany hihainoana anao alohan’ny handehanana any am-pianarana.

• Inona no zavatra tianao ho takatry ny namanao momba an’i Jesoa Kristy sy ny filazantsarany?

  Azonao omena telo minitra ny mpianatra hanoratana ny valinteniny ao amin’ny diary fandalinany. Raha tsy izany dia afaka mifanakalo hevitra momba ny zavatra hozarainy miaraka amin’ny mpiara-mianatra iray miara-miasa aminy izy ireo na milalao an-tsehatra ilay rafi-tantara miaraka amin’ny mpiara-mianatra iray miara-miasa aminy.

• Inona avy ireo loharano azonao zaraina amin’ilay namanao mba hanampiana azy hahafantatra misimisy kokoa momba ny Mpamonjy sy ny filazantsarany?

Raha ilaina dia hamafiso fa loharanom-pitaovana iray manampy ireo Fanekem-pinoana. Ataovy izay hahitan’ny mpianatra ireo Fanekem-pinoana ao amin’ny soratra masiny. Azonao atao ny manome azy ireo fotoana kely hanombanana ny fahalalan’izy ireo an’ireo Fanekem-pinoana. Ohatra, azonao atao ny manontany ny mpianatra raha toa ka efa nanao tsianjery ny iray amin’izany izy ireo na nampiasa ny sasany amin’izany rehefa nampianatra lesona, na nanoratra lahateny iray, na nizara ny filazantsaran’ny Mpamonjy tamin’ny hafa.

Ireo Fanekem-pinoana

ChurchofJesusChrist.org Azonao atao koa ny mamintina ireto fampahalalana manaraka ireto:

Tamin’ny 1842 dia namaly ny taratasy iray azony avy tamin’i John Wentworth, izay nipetraka tany Chicago, Illinois, i Joseph Smith. I Wentworth dia mpamoaka gazety iray nantsoina hoe Chicago Democrat ary naniry ny hahafantatra misimisy kokoa momba ny zavatra inoan’ireo Olomasina nipetraka tany Nauvoo, Illinois sy ny tantaran’izy ireo izy. Tao amin’ny ampahany tamin’ilay taratasy dia nizara ny antsipiriany mikasika ny fananganana ny Fiangonan’ny Mpamonjy sy ny tanjonyi Joseph. Ny Mpaminany dia namarana ilay taratasy tamin’ny fanambarana fohy miisa 13 izay mirakitra ireo fahamarinana fototra sy fotopampianaran’ny Fiangonana. Ireo fanambarana ireo dia nomena anarana hoe Ireo Fanekem-pinoana taty aoriana ary navoaka tamin’ny 1851 tao amin’ny edisiôna voalohan’ny Voahangy Lafo Vidy.

Ny Loholona L. Tom Perry (1922–2015) tao amin’ny Kôlejin’ny Apôstôly Roambinifolo dia nizara izao manaraka izao mikasika ny fomba ahafahan’ny fianarana ny Fanekem-pinoana manampy antsika.

Mamporisika anareo aho hampiasa ny sainareo mahiratra mba handalina sy hianatra ireo Fanekem-pinoana sy ireo fotopampianarana ampianariny. Anisan’ny fanambarana manan-danja indrindra izy ireo ary azo antoka fa fanambarana tsara fintina indrindra mikasika ny fotopampianarana ato amin’ny Fiangonana. Raha mampiasa azy ireo ianareo ho toy ny torolalana hitantanana ny fandalinanareo ny filazantsaran’i Jesoa Kristy dia ho hitanareo fa ho vonona ianareo hanambara amin’izao tontolo izao ny fijoroana ho vavolombelona anananareo momba ny fahamarinana naverina amin’ny laoniny. Ho vitanareo ny hanambara amin’ny fomba tsotra sy mivantana ary lalina ireo zavatra fototra inoanareo mafy amin’ny maha-mpikamban’ Ny Fiangonan’i Jesoa Kristy ho an’ny Olomasin’ny Andro Farany anareo. (L. Tom Perry, “Ireo fotopampianarana sy fitsipika ao anatin’ireo fanekem-pinoana,” Liahona, nôv. 2013, 48)

• Inona no nianaranao avy amin’io teny nambara io momba ny maha-zava-dehibe ny fandalinana sy ny fahafantarana ireo Fanekem-pinoana?

Mijoroa ho vavolombelona momba izay fitahiana rehetra tsikaritrao noho ny fandalinana ireo Fanekem-pinoana sy ny fampiasana izany mba hitoriana ny filazantsaran’ny Mpamonjy.

Mianatra ny filazantsaran’i Jesoa Kristy miaraka amin’ireo Fanekem-pinoana

Ity hevitra manaraka ity dia fomba iray hanampiana ireo mpianatra hanana traikefa manan-danja momba ny Fanekem-pinoana. Zarao ilay taratasy zaraina mitondra ny lohateny hoe “Sahanasa fandalinana ireo Fanekem-pinoana.” Asao ireo mpianatra mba hamita ilay asa atao ao amin’ilay taratasy zaraina. Amporisiho izy ireo hifantoka amin’ny bitsika ara-panahy na hevi-baovao azony avy amin’ny Fanahy Masina rehefa mandalina. Azonao atao ny maka antoka fa ny mpianatra sasany dia mifantoka amin’ireo fanekem-pinoana efatra voalohany izay mampianatra fahamarinana fototra manan-danja momba ny Ray any An-danitra sy an’i Jesoa Kristy ary ny fotopampianaran’Izy Ireo.

Mivonòna hanampy ireo mpianatra, kanefa asao izy ireo mba hampiasa ireo fahaiza-manao amin’ny fandalinana izay nianarany tany an-trano sy tany am-piangonana ary nandritra ny seminera mba hamitana ireo sahanasa. Raha mahavita haingana ilay asa atao ny mpianatra dia asao izy ireo hisafidy fanekem-pinoana iray hafa ary hamerina ilay dingana.

Sahanasa fandalinana ireo Fanekem-pinoana

Dingana 1: Misafidiana iray amin’ireo Fanekem-pinoana tianao hohalalinina anio ary valio ireto fanontaniana manaraka ireto:

• Inona avy ireo fahamarinana mandrakizay ianaranao avy amin’io fanekem-pinoana io?

• Ahoana no ahafahan’ny fampianarana avy amin’io fanekem-pinoana io hisy fiantraikany amin’ny fifandraisanao amin’ny Ray any An-danitra sy an’i Jesoa Kristy?

Dingana 2: Misafidiana roa farafahakeliny amin’ireto safidy manaraka ireto mba hanampiana anao hianatra bebe kokoa momba ny fanekem-pinoana nofidinao:

1. Ataovy tsianjery. Mieritrereta hevitra iray hanampiana anao hitadidy ilay fanekem-pinoana nofidinao ary makà fotoana hanaovana tsianjery izany.

2. Mitadiava loharanom-pitaovana mifandray amin’izany. Mitadiava soratra masina na fanambarana avy amin’ireo mpitarika ao amin’ny Fiangonana izay mifandray amin’ilay fanekem-pinoana nofidinao. Azonao atao ny mampiasa fitaovana toy ny fanovozan-kevitra eny amin’ny farany ambanin’ny pejy ao amin’ny soratra masina, ny Torolalana ho an’ny Soratra Masina, na ny fitaovana fikarohana ao amin’ny application Mediathèque de l’Évangile mba hanampiana anao.

3. Mamoròna fzavatra jeren’ny maso. Mampiasà zavakanto mba hanampiana anao hampita na haneho ireo fampianarana avy amin’ilay fanekem-pinoana nofidinao. Ohatra tafiditra ao anatin’izany ny sary natao tanana, na sary avy amin’ny fanambatambarana zavatra samihafa, na amboaran-teny miendrika rahona, na mème. (Noho ny maha-masina an’ Andriamanitra dia sorohy ny fanaovana sary Ny Andriamanitra.)

4. Mamoròna rafi-tantara. Mieritrereta toe-javatra atrehinao na atrehin’ireo zatovo hafa, na fanontaniana momba ny filazantsara izay mety ho voavalin’ilay fanekem-pinoana nosafidinao. Soraty ilay rafi-tantara na ireo fanontaniana ary hazavao ny fomba na ny antony hanampian’ireo fahamarinana ampianarina ao amin’ny fanekem-pinoana amin’izany.

5. Mijoroa ho vavolombelona. Soraty ny fijoroana ho vavolombelona anananao momba ireo fahamarinana nampianarina ao amin’ilay fanekem-pinoana nosafidinao. Farito ny fomba nitahian’ireo fampianarana ireo ny fiainanao sy nitondran’izany anao ho akaiky kokoa an’ Andriamanitra.

Zarao ny zavatra nianaranao

Mieritrereta fomba hanampiana ny mpianatra hizara sy haneho ny zavatra nianarany. Azonao atao ny manoratra ny isa 1–13 amin’ny taratasy kely miisa 13 ary mametraka izany ao anaty satroka. Mifidiana iray amin’izany an-kisendrasendra ary anontanio raha misy mpianatra izay nandalina io fanekem-pinoana io ka vonona ny hizara. Ho an’ny kilasy lehibe kokoa dia zarao tsiroaroa ny mpianatra na zarao ho vondrona kely ary asao izy ireo mba hifampizara.

Aorian’ny fizarana dia afaka mampiseho ny taratasiny manerana ny efitrano izay mpianatra vonona hanao izany mba ho hitan’ny hafa.

Loharanom-pitaovana fanampiny

Aiza no ahafahako mianatra bebe kokoa momba ilay taratasin’i Wentworth sy ireo Fanekem-pinoana?

Tamin’ny 1851, dia nampidirina tao amin’ny edisiôna voalohan’ny Voahangy Lafo Vidy ny Fanekem-pinoana ka navoaka tao amin’ny Misiôna Britanika an’ny Fiangonana. Lasa fotopampianarana ôfisialin’ny Fiangonana izy ireo taorian’ny fanavaozana ny Voahangy Lafo Vidy tamin’ny 1878 ary nohamafisina nandritra ny fihaonamben’ny Fiangonana maneran-tany tamin’ny Ôktôbra 1880. Mety hanampy ireto loharanom-pitaovana manaraka ireto.

Mba hahitana ny lahatsoratr’ilay taratasy iray manontolo nosoratan’i Joseph Smith dia jereo ny “The Wentworth Letter,” Ensign, jolay 2002, 26–32, na ny tranokala Joseph Smith Papers.

Raha te hianatra bebe kokoa momba ireo Fanekem-pinoana dia halalino ity lahateny nandritra ny fihaonambe manaraka ity:

• L. Tom Perry, “Ireo fotopampianarana sy fitsipika ao anatin’ireo fanekem-pinoana” (Liahona, nôv. 2013, 46–48)

Ahoana no ahafahan’ireo Fanekem-pinoana manampy ahy hizara ny filazantsara amin’ny hafa?

Nampianatra izao ny Filoha M. Russell Ballard tao amin’ny Kôlejin’ny Apôstôly Roambinifolo:

Na inona na inona zavatra safidinao mba hampiasaina mba hampahafantarana ny namanao sy ny olom-pantatrao momba ny Fiangonana dia soraty izany, jereo raha marina, ary ataovy tsotra sy fohy izany.

Ny fitomboan’ny lazan’ny Fiangonana sy ny fitomboan’ireo fanontaniana avy amin’ny hafa dia manome fahafahana lehibe ho antsika hanorina tetezana, hahazo namana ary hampita vaovao marina. Mety hiteraka tsy fifankahazoan-kevitra lehibe kokoa anefa izany, ary mety hisy fitsarana an-tendrony mihitsy aza indraindray, raha avelantsika ny hafa no hamaritra ny maha-isika antsika sy ny zavatra inoantsika toy izay isika. …

Manantena aho fa ireo izay mahafantatra kely momba ny Fiangonana dia hikatsaka ny hianatra bebe kokoa momba antsika. …

Ianareo amin’ny maha-mpikambana anareo dia afaka manampy izany hitranga amin’ny alalan’ny fanatonana sy fizarana amin’ny hafa ny fampahalalana fototra hita ao amin’ireo Fanekem-pinoana. (M. Russell Ballard, “Faith, Family, Facts, and Fruits,” Liahona, Nov. 2007, 27)

Ahoana no ahafahan’ny fianarana sy fiainana araka ny fahamarinana sy fitsipika ao amin’ny fanekem-pinoana fahatelo ambin’ny folo mitahy ny fiainako?

Raha niresaka momba ny fanekem-pinoana fahatelo ambin’ny folo ny Filoha Gordon B. Hinckley (1910–2008) dia nilaza izao:

[Io] fanekem-pinoanantsika [io] dia iray amin’ireo fanambarana fototry ny teôlôjiantsika. Tokony hamerimberina hisaintsaina izany isika. Avy eo, isaky ny mety halaim-panahy hanao zavatra mifono fahalotoana na tsy fahamarinan-toetra na fahalotoam-pitondran-tena isika, dia ho tonga ao an-tsaintsika miaraka amina hery iray io fanambarana lehibe sy mahafaoka ireo fitsipiky ny fitondran-tenantsika rehetra io. (Gordon B. Hinckley, “Fear Not to Do Good,” Liahona, Feb. 2000, 5; Ensign, Jan. 2000, 2)

Sahanasa fianarana fanampiny

Ny fanekem-pinoana fahatelo ambin’ny folo

Mba hanampiana ireo mpianatra handalina ny sasany amin’ireo toetra tahaka ny an’i Kristy voatanisa ao amin’ny fanekem-pinoana fahatelo ambin’ny folo, dia soraty eny amin’ny solaitrabe ireto teny manaraka ireto:

Marina, Mahatoky, Madio fitondran-tena, Antra olona, Mendrika, Mino, Manantena, Tsy voahozongozona (“afaka miaritra ny zavatra rehetra”).

Anontanio ny mpianatra raha toa ka fantatr’izy ireo hoe fanekem-pinoana fahafiry no miresaka momba ireo fenitra sy toetra ireo. Tanisao miaraka ny fanekem-pinoana fahatelo ambin’ny folo. Azonao atao ny manazava fa ny “fananaran’i Paoly” dia avy ao amin’ny Filipiana 4:8 ao amin’ny Testamenta Vaovao.

Zarao ho vondrona kely ny mpianatra, ary omeo ny iray amin’ireo teny eny amin’ny solaitrabe ny vondrona tsirairay mba hohalalininy. Amporisiho ny vondrona tsirairay hitady ny dikan’ny teny nomena azy ary hitady soratra masina na fanambarana fanampiny avy amin’ireo mpitarika ao amin’ny Fiangonana izay mampianatra bebe kokoa momba izany. Afaka mahita ohatra iray avy amin’ny fiainan’ny Mpamonjy izay nanehoany ilay fenitra na ilay toetra ihany koa ny mpianatra. Asao ireo mpianatra hizara ny zavatra nianarany. Hevero ny hametraka fanontaniana vitsivitsy toy ireto manaraka ireto:

• Ahoana no ahafahan’ny fiainana ireo fenitra sy toetra ao amin’io fanekem-pinoana io manampy anao ho tonga mpanara-dia tsara kokoa an’i Jesoa Kristy?

• Ahoana no ahafahan’ny fanaovana soa amin’ny hafa sy ny fikatsahana zavatra mendrika sy mendri-piderana manampy anao hiala amin’ny fahotana sy ny fakam-panahy?

Rehefa avy mamaly sy mizara ny heviny ny mpianatra dia zarao ny teny nambaran’ny Filoha Hinckley ao amin’ny fizarana “Loharanom-pitaovana fanampiny”.

Ny fenitry ny fahamarinana

Ampahany manan-danja iray hafa amin’ny asa soratr’i Joseph Smith ao amin’ny taratasin’i Wentworth ilay antsoina indraindray hoe “Ny fenitry ny fahamarinana.” Asao ny mpianatra handalina ity teny nambara manaraka ity ka hitady ireo teny na andian-teny izay manan-danja amin’izy ireo.

Natsangana ny Fenitry ny Fahamarinana; tsy misy tanana tsy masina afaka hampitsahatra ny asa tsy handroso; mety hamaivay ny fanenjehana, mety hikaon-doha ny mpanakorontana, mety hivondrona ny tafika, mety hanala baraka ny fanaratsiana, saingy ny fahamarinan’ Andriamanitra dia handroso amim-pahasahiana sy amim-boninahitra ary mahaleo tena mandra-pitsofok’izany any amin’ny kaontinanta rehetra, nitsidika ny faritra rehetra, nandalo ny firenena rehetra, ary ren’ny sofina rehetra, mandra-pahatontosan’ny tanjon’ Andriamanitra, ary ilay Jehovah Lehibe hilaza hoe vita ny asa. (“The Wentworth Letter,” Ensign, July 2002, 31)

Ifanakalozy hevitra ny zavatra nianaran’ny mpianatra avy amin’io teny nambara io amin’ny alalan’ny fametrahana fanontaniana toy ireto manaraka ireto:

• Inona no nisongadina taminao tao anatin’io teny nambara io?

• Ahoana no fahitanao ny fahatanterahan’ny tenin’ny Mpaminany Joseph Smith amin’izao androntsika izao?

Ny fomba iray hafa hanampiana ny mpianatra hiaina io teny nambara io dia ny fanomezana azy ireo fahafahana hamorona sary izay maneho ny zavatra ampianarina ao amin’io teny nambara io. Ohatra, afaka mieritreritra fomba tsara sy miavaka mba hanehoana ny fahamarinan’ Andriamanitra miely manerana an’izao tontolo izao ny mpianatra. Afaka mizara ny sary nataony amin’ny hafa ny mpianatra ary manazava ny antony nampidiran’izy ireo ny zavatra nataony tao anatin’izany.