“Lesona 155: Filazana Ôfisialy 1: –Nasehon’ny Tompo ahy, tamin’ny fahitana sy ny fanambarana,–” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Filazana Ôfisialy 1,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 155: Ireo Fanekem-pinoana sy Fanambarana Ôfisialy 1 sy 2
Filazana Ôfisialy 1
“Nasehon’ny Tompo ahy, tamin’ny fahitana sy ny fanambarana”
Nandritra ny 50 taona teo ho eo dia nataon’ny mpikamban’ny Fiangonana sasany ny fampakarana vady maro ho setrin’ny didy iray avy amin’ny Tompo. Tamin’ny taona 1890 dia nandidy ny Filoha Wilford Woodruff (1807–98) ny Tompo mba hanambara ny fiafaran’ny fampakarana vady maro ao amin’ny Fiangonana. Ity lesona ity dia afaka manampy ny mpianatra hahatakatra fa mitarika ny Fiangonany amin’ny alalan’ny fanambarana mitohy omeny ireo mpaminaniny ny Tompo.
Sahanasa fianarana azo atao
Ity lesona ity dia mifantoka amin’ny didin’ny Tompo ho an’ny Olomasina mba hanatsahatra ny fanaovana fampakarana vady maro. Alohan’ny hampianarana ity lesona ity dia mety hanampy ny mamerina mijery ireo loharanom-pitaovana avy ao amin’ny lesona “Fotopampianarana sy Fanekempihavanana 132:1–2, 34–66” mba hanampiana ireo mpianatra izay mety mbola manana fanontaniana momba ny fampakarana vady maro.
Ambaran’ Andriamanitra amin’ireo zanany ny sitrapony
Amporisiho ny fandinihan-tena sy ny fanaovana fanombantombanana. Mba hahitana fampiofanana misimisy kokoa momba ny fomba hanaovana izany dia jereo ny fampiofanana mitondra ny lohateny hoe “Mamoròna sehatra sy fahafahana ho an’ireo mpianatra mba ho ampianarina amin’ny alalan’ny Fanahy Masina izy ireo,” izay hita ao amin’ny Fahaiza-manao ho fampivoarana ny mpampianatra: Mampianara amin’ny alalan’ny Fanahy. Hevero ny hanao fanazaran-tena hamorona fanombanan-tena ho an’ny mpianatra momba ny fotopampianarana, ny fahamarinana, na ny fitsipika iray.
Hevero ny hanomboka ny lesona amin’ny alalan’ny fanasana mpianatra iray hamaky na hitanisa ny Fanekem-pinoana 1:9. Avy eo dia ampio ny mpianatra hanombantombana ny finoan’izy ireo momba an’ Andriamanitra izay manambara ny sitrapony amin’ireo zanany amin’ny alalan’ireo mpaminany. Azonao aseho ity manaraka ity ary omeo fotoana ireo mpianatra hieritreretana mangina ny valintenin’izy ireo.
Ho an’ireo fehezan-teny etsy ambany dia safidio ny safidy (Fantatro fa; Inoako fa; Somary inoako ihany fa; Tsy fantatro raha) izay mahalaza indrindra ny fomba hamenoanao ny banga: “ marina izany.”
-
Nambaran’ Andriamanitra tamin’ireo zanany tamin’ny alalan’ireo mpaminaniny ny sitrapony.
-
Manambara ny sitrapony amin’ireo zanany amin’ny alalan’ireo mpaminaniny Andriamanitra amin’izao fotoana izao.
-
Mbola hanambara ny sitrapony amin’ireo zanany amin’ny alalan’ireo mpaminaniny Andriamanitra.
Asao ny mpianatra hieritreritra ny antony namaliany toy izany. Afaka manasa olona vitsivitsy hizara ianao.
Hazavao fa ny lesona anio dia hifantoka amin’ny ohatra iray avy amin’ny tantaran’ny Fiangonana izay maneho ny fitarihan’ny Tompo ny Fiangonany amin’ny alalan’ny fanambarana mitohy izay omeny ireo mpaminaniny. Amporisiho izy ireo hihaino tsara ireo bitsika avy amin’ny Fanahy izay afaka manampy azy ireo hamantatra ny fitahiana avy amin’ny fananana fanambarana mitohy avy amin’ny Tompo.
Filazana Ôfisialy 1
Ampio ny mpianatra hahatakatra fa ny Filazana Ôfisialy 1 dia mifandray amin’ny didin’ny Tompo ho an’ny Olomasina mba hampitsahatra ny fampakarana vady maro. Asao ny mpianatra hitady ny andiam-pehezan-teny fampidirana any amin’ny fiandohan’ny Filazana Ôfisialy 1 ao amin’ny soratra masin’izy ireo. Raha ilaina dia omeo ny tahadikan’ilay teny fanolorana ny mpianatra izay manana edisiôna efa tranainy kokoa.
Vakio ny teny fanolorana ny Filazana Ôfisialy 1, ka tadiavo ny zavatra ampianarin’izany mikasika ny fanaovan’ireo Olomasina ny fampakarana vady maro.
-
Inona no nahasarotra ny fanohizan’ireo Olomasina nanao fampakarana vady maro?
Mba hanampiana ny mpianatra hahatakatra kokoa momba ireo fahasarotana ireo dia hevero ny hamaky na hamintina ireto andiam-pehezan-teny manaraka ireto. Azonao atao ihany koa ny manasa mpianatra iray hamaky izany amin’ny iray kilasy.
Taorian’ny nanorenan’ireo Olomasina fonenana tany Utah tamin’ny taona 1800 tany ho any dia maro tamin’ireo mpikamban’ny Fiangonana no nanao fampakarana vady maro ampahibemaso. Taty aoriana dia nandany lalàna izay nahatonga ny fampakarana vady maro ho tsy ara-dalàna tany Etazonia ireo mpitarika tao amin’ny governemanta. Ireo lalàna ireo dia nitarika tamin’ny fisamborana sy ny fanagadrana ireo lehilahy Olomasin’ny Andro Farany maro. Ny sasany dia niafina mba tsy ho voasambotra (jereo ny Saints: The Story of the Church of Jesus Christ in the Latter Days, vol. 2, No Unhallowed Hand, 1846–1893 [2020], 142, 408–9, 518–20).
Tao anatin’ireo toe-javatra sarotra ireo dia nikatsaka ombam-bavaka hahazo fitarihana avy tamin’ny Tompo ny Filoha Wilford Woodruff, ka dia nahazo izany izy. Nahatsapa ho nentanim-panahy izy hanome torolalana ny mpitarika tao amin’ny Fiangonana mba hanatsahatra ny fampianarana ny fitsipiky ny fampakarana vady maro. Tamin’ny volana septambra 1890 ny Filoha Woodruff dia namoaka manifestô (fantatra ankehitriny amin’ny hoe Filazana Ôfisialy 1). Tao amin’ilay manifestô, ny Filoha Woodruff dia namaly mikasika ireo tatitra diso fa ireo mpitarika tao amin’ny Fiangonana dia mbola namporisika ampahibemaso ny fampakarana vady maro (jereo ny Olomasina, 2:584–85, 597–601).
Io manifestô io dia fantatra ankehitriny amin’ny anarana hoe Filazana Ôfisialy 1 ao amin’ny Fotopampianarana sy Fanekempihavanana.
Omeo fahafahana ny mpianatra handalina ny sasany amin’ireo torohevitra sy torolalana nomen’ny Filoha Woodruff ho an’ny Olomasina. Raha ilaina dia asehoy ny mpianatra hoe aiza ao amin’ny soratra masina no ahafahan’izy ireo mahita ireo andiam-pehezan-teny hohalalinin’izy ireo.
Halalino ireto lahatsoratra manaraka ireto ka tadiavo ny torohevitry ny Filoha Woodruff ho an’ny Olomasina:
-
Andiam-pehezan-teny 4–5 ao amin’ny Filazana Ôfisialy 1 (manomboka amin’ny hoe “Koa satria efa …”)
-
Andiam-pehezan-teny 1–2 amin’ireo ampahan-dahateny aorian’ny Filazana Ôfisialy 1
Raha ampy ny fotoana dia mety hanampy ny manasa ny mpianatra handalina andiam-pehezan-teny bebe kokoa avy amin’ireo ampahan-dahateny ireo. Azonao atao ny manome andrakitra vondrona kely maromaro ahitana mpianatra vitsivitsy handalina andiam-pehezan-teny vitsivitsy ka hitady ny zavatra nianaran’ny Filoha Woodruff avy amin’ny Tompo. Avy eo dia azon’ny mpianatra atao ny mamintina izay zavatra hitan’izy ireo amin’ny iray kilasy.
-
Manampy anao hahatakatra inona momba ny fomba itarihan’ny Mpamonjy ny Fiangonany ireo andiam-pehezan-teny ireo?
Omeo fahafahana hamaly ny fanontaniana teo aloha ny mpianatra maromaro. Mety hahita fahamarinana mitovy amin’izao manaraka izao ny mpianatra: Tsy hamela ny Filohan’ny Fiangonana hitarika ny Fiangonana ho any amin’ny lalan-diso velively ny Tompo. Mitarika ny Fiangonany amin’ny alalan’ny fanambarana mitohy omeny ireo mpaminaniny ny Tompo.
-
Ahoana no ahafahan’ny fahafantarana ireo fahamarinana ireo mitahy na mitondra akony eo amin’ny fiainanao?
-
Inona no ampianarin’ireo fahamarinana ireo anao mikasika ny Mpamonjy sy ny zavatra iriny ho antsika?
Fanambarana mitohy ankehitriny
Nizara izao fijoroana ho vavolombelona manaraka izao ny Filoha Russell M. Nelson:
Fantatro tsara fa mitarika ny raharahan’ny Fiangonany ny Tompo. Hoy Izy, “Hasehoko [anao] fa mahavita ny asako ihany Aho” [2 Nefia 27:21].
Matetika izaho sy ireo mpanolotsaiko no nahita tamin’ny masonay manganohano raha iny Izy niditra an-tsehatra tamin’ny toe-javatra faran’izay nanahirana rehefa avy nanao izay rehetra azonay natao izahay ka tsy afaka nanao mihoatra intsony. Tena talanjona marina tokoa izahay! (Russell M. Nelson, “Fiarahabana tonga soa,” Liahona, mey 2021, 6)
Hevero ny hanasa ny mpianatra hifanakalo hevitra momba ity fanontaniana manaraka ity miaraka amina namana iray na vondrona kely rehefa avy mizara ilay teny nambara teo aloha. Afaka mankeny amin’ny solaitrabe ny mpikambana ao amin’ny vondrona tsirairay dia manoratra ny valintenin’izy ireo.
-
Inona no porofo hitanao fa manohy mitarika ny Fiangonany amin’ny alalan’ny fanambarana omeny ireo mpaminaniny amin’izao androntsika izao ny Tompo?
Ny ohatra sasany mety holazain’ny mpianatra dia mety hahitana ireo hafatra zarain’ireo mpaminany sy apôstôly mandritra ny fihaonamben’ny Fiangonana maneran-tany, ary ny fitoriana sy fiarovana ireo fahamarinana manan-danja amin’ny alalan’ny “Ny Fianakaviana: Fanambarana ho an’izao tontolo izao,” “Ilay Kristy Velona: Tenivavolombelon’ny Apôstôly,” ary “Ny Famerenana amin’ny laoniny ny fahafenoan’ny filazantsaran’i Jesoa Kristy: Fanambarana ho an’izao tontolo izao nandritra ny fankalazana ny faha-roanjato taona.”
-
Nitahy ny fiainanao tamin’ny fomba ahoana ny fanambarana mitohy nomen’ny Tompo tamin’ny alalan’ireo mpaminaniny?
Mampiseho ny fahatakarana
Mba hanampiana ny mpianatra hampiseho ny fahatakarany momba ny zavatra nianarany androany dia zarao ity rafi-tantara manaraka ity:
Sorena amin’ireo fanovana sasany hitany tao amin’ny Fiangonana i Sofia. Manontany tena izy hoe nahoana ny sasany amin’ireo zavatra asain’ny mpaminany ataontsika ankehitriny no tsy mitovy amin’izay nisy tamin’ny fahazazany.
-
Inona avy ireo zavatra nianaranao androany ka mety hanampy an’i Sofia ny mizara izany aminy?
Azon’ny mpianatra atao ny mamaly izany ao anatina fifanakalozan-kevitra ataon’ny kilasy, na azonao atao ny manasa azy ireo hilalao an-tsehatra io rafi-tantara io miaraka amin’ny namana iray.
Mijoroa ho vavolombelona momba ireo fahamarinana noresahinareo androany. Amporisiho ny mpianatra hiaiky fa ny fitarihana mitohy avy amin’ny Tompo amin’ny alalan’ireo mpaminaniny dia afaka ny ho fitahiana eo amin’ny fiainan’izy ireo.