Lesona 156: Ireo Fanekem-pinoana sy ny Filazana Ôfisialy 1 sy 2

Filazana Ôfisialy 2

Fanambarana momba ny fisoronana

Rehefa niparitaka manerana izao tontolo izao ny filazantsara nandritra ny taonjato faha-roapolo dia nivavaka ireo mpitarika tao amin’ny Fiangonana mba hahazo fitarihana mikasika ny lalàna iray izay nametra ny mpikamban’ny Fiangonana taranaka Afrikana tsy handray ny fisoronana. Olomasina maro no nisafidy ny hampihatra finoana an’i Jesoa Kristy nanoloana ireofanontaniana mikasika ilay lalàna. Tamin’ny 8 jona 1978 dia nampahafantatra ny fanambarana iray izay nanafoana ireo famerana ireo ny Fiadidiana Voalohany. Ity lesona ity dia afaka manampy ny mpianatra hanao asa amim-pinoana rehefa manoloana toe-javatra mampiahiahy na fanontaniana ara-panahy izy ireo.

Sahanasa fianarana azo atao

Ohatra momba ny finoana

Hevero ny hanomboka ny lesona amin’ny alalan’ny fanasana ny mpianatra hieritreritra olona fantatr’izy ireo izay nampihatra finoana lehibe an’i Jesoa Kristy tao anatin’ny toe-javatra sarotra iray. Avy eo dia hazavao fa ny Loholona Helvécio Martins (1930–2005) tao amin’ny Fitopololahy sy i Rudá vadiny dia niatrika toe-javatra iray izay nitaky finoana lehibe. Azonao na ny mpianatra iray vakina amin’ny mpianatra rehetra ity andiam-pehezan-teny manaraka ity.

Tamin’ny aprily 1972 dia nitsidika ny tranon’i Helvécio sy Rudá Martins avy any Rio de Janeiro, Brésil, ireo misiônera avy ao amin’ Ny Fiangonan’i Jesoa Kristy ho an’ny Olomasin’ny Andro Farany. Vetivety dia nahazo fijoroana ho vavolombelona momba ny fahamarinan’ny hafatry ny misiônera ry Martins. Nianatra ihany koa mikasika ny fitsipiky ny Fiangonana iray izay nametra ny lehilahy mainty hoditra taranaka Afrikanina tsy hotendrena ho amin’ny fisoronana izy ireo. Nanana fanontaniana ho an’ireo misiônera i Helvécio sy i Rudá, izay taranaka Afrikanina (jereo ny “Elder Helvécio Martins of the Seventy,” Ensign, Mey 1990, 106; Mark Grover, The Autobiography of Elder Helvécio Martins [1994], 43).

• Inona avy ireo fanontaniana mety ho napetrakao tamin’ireo misiônera raha toa ka niaina io toe-javatra io ianao?

• Inona avy no mety ho fihetsika asehon’ny olona iray manoloana ny toe-javatra toy izany?

Asao ny mpianatra hieritreritra toe-javatra mampiahiahy izay atrehiny amin’izao fotoana izao na natrehiny teo amin’ny fiainany. Mety ho tafiditra ao anatin’izany ireo fanontaniana ara-panahy tsy voavaha izay ananan’izy ireo amin’izao fotoana izao. Azon’izy ireo atao ny manoratra momba ny toe-javatra iainan’izy ireo na ireo fanontaniana ananany ao amin’ny diary fandalinany. Amporisiho ny mpianatra mba hihaino tsara ireo fampianarana na bitsiky ny Fanahy izay afaka manampy azy ireo eo amin’ny toe-javatra iainan’izy ireo.

Manao asa amim-pinoana

Mba hanampiana ny mpianatra hahita ny fomba niatrehan’ny fianakaviana Martins io toe-javatra io dia asao ny mpianatra iray hamaky mafy ireto andiam-pehezan-teny manaraka ireto amin’ny iray kilasy:

Rehefa nahafantatra ny momba ilay famerana teo amin’ny fanendrena ho amin’ny fisoronana ny fianakaviana Martins dia nisafidy ny hanao asa amim-pinoana izy ireo. Vetivety izy ireo dia natao batisa sy nanompo tamim-pahatokiana tao amin’ny Fiangonana nandritra ny taona maro. Hoy ny Loholona Martins raha nitantara taty aoriana: “Nahita ny fahamarinana izahay, ary tsy nisy na inona na inona afaka nanakana anay hiaina izany.”

Ny taona 1975 dia nanambara ny Fiangonana fa hisy tempoly haorina koa any Sao Paulo any Brésil. –“Na dia tsy nanantena ny hiditra izany aza izahay dia niasa mba hananganana ny tempoly tahaka ireo mpikambana hafa,– hoy ny Loholona Martins mitadidy. –Tranon’ny Tompo rahateo izany.– Nivarotra ny firavaka nananany Rahavavy Martins mba hanampy tamin’ny fanangonana vola, ary nanompo tao amin’ny kômity nisahana ny fampahafantarana ny olona ny asa natao Rahalahy Martins” (ao amin’ny “Elder Helvécio Martins of the Seventy,” Ensign, May 1990, 106).

• Inona no zavatra nanaitra anao teo anatrehan’ny fihetsika nasehon’ny fianakaviana Martins?

• Inona araka ny eritreritrao no nahatonga azy ireo hisafidy ny hanao asa amim-pinoana tao anatin’izany toe-javatra izany?

Raha ilaina dia hazavao fa tsy nifantoka tamin’ny zavatra tsy fantatr’izy ireo ny fianakaviana Martins fa nifantoka kosa tamin’ny fahamarinana izay nambaran’ Andriamanitra tamin’izy ireo tamin’ny alalan’ny Fanahy Masina.

Hevero ny hanasa ny mpianatra hanao lisitra ireo fahamarinana fantatr’izy ireo momba ny Ray any An-danitra sy an’i Jesoa Kristy ary ny filazantsara izay afaka manampy azy ireo handroso amim-pinoana rehefa manoloana fanontaniana na toe-javatra mampiahiahy izy ireo. Avy eo dia asao izy ireo hizara ny zavatra nosoratany ary hanazava ny fomba ahafahan’ireo fahamarinana ireo manampy azy ireo handroso amim-pinoana.

Filazana Ôfisialy 2

Mba hanampiana ny mpianatra hahatakatra ireo toe-javatra nifandray tamin’ny famerana teo amin’ny fanendrena ho amin’ny fisoronana sy ny fanambarana izay nanafoana izany dia asao izy ireo hitady ny teny fanolorana ny Filazana Ôfisialy 2 ao amin’ny soratra masin’izy ireo. Raha ilaina dia omeo ny tahadikan’ilay teny fanolorana ny mpianatra izay manana edisiônan’ny soratra masina tranainy kokoa.

Vakio ny teny fanolorana ny Filazana Ôfisialy 2, ka tadiavo ny fampahalalana ny zava-niseho nifandray tamin’io filazana io.

• Inona araka ny eritreritrao no zavatra manan-danja ka tokony hotakarina avy amin’io andiam-pehezan-teny io?

Hazavao fa ilay andalana izay milaza hoe: “Tsy manome fanazavana feno mikasika ny loharano niavian’izany fomba fanao izany ny tahirintsoratry ny Fiangonana.” dia maneho ny foto-kevitra ôfisialy ijoroan’ny Fiangonana momba ny famerana teo aamin’ny fanendrena ho amin’ny fisoronana. Zava-dehibe ny tsy haminavinantsika ny antony nametrahana ilay famerana.

Azonao atao ihany koa ny mampahafantatra ilay firesahana ny 2 Nefia 26:33 ao amin’ny fehezan-teny voalohany ao amin’ny teny fanolorana. Hevero ny hanasa ny mpianatra hamaky io andininy io ary hizara fahamarinana izay tokony hotsaroana rehefa mieritreritra momba io lalàna io.

Ny Filazana Ôfisialy 2 dia ahitana ny filazana amin’ny fomba ôfisialy ilay fanambarana izay noraisin’ny Fiadidiana Voalohany sy ny Kôlejin’ny Apôstôly Roambinifolo tamin’ny 1 jona 1978.

Ho solon’ny fandalinana ny Filazana Ôfisialy 2 ataon’ny mpianatra rehetra, dia hevero ny hanasa ny mpianatra handalina izany anaty vondrona kely.

Vakio ireo andiam-pehezan-teny efatra eo ambanin’ny andian-teny hoe “Ry rahalahy malala” ao amin’ny Filazana Ôfisialy 2. Asio marika ireo teny na andian-teny izay heverinao fa manan-danja.

• Inona no nisarika ny sainao tao anatin’ireo zavatra novakinao?

• Nanampy anao hahatakatra na hahatsapa inona momba ny Ray any An-danitra sy an’i Jesoa Kristy io zavatra niainana io?

Fiantraikan’ilay fanambarana

Ity fanambarana ity dia nisy fiantraikany lalina teo amin’ny lehilahy sy vehivavy manerana izao tontolo izao. Fotoana fohy taorian’ny nandraisana izany dia nisy misiônera nalefa tany Afrika. Nanomboka teo dia nisy fananganana tempoly koa tany amin’io kaontinanta io, ary an-jatony sy an’arivony ireo olona taranaka Afrikanina izay nandray ho an’ny tenany ny ôrdônansin’ny filazantsara ary nandray izany ho an’ireo razambeny.

Hazavao fa nisy fiantraikany ilay fanambarana ka anisan’ireo izay voakasik’izany i Helvécio sy i Rudá Martins. Hevero ny hanasa mpianatra iray hamaky mafy amin’ny iray kilasy ireto andiam-pehezan-teny manaraka ireto:

Rehefa avy nahafantatra momba ilay fanambarana izay nanolotra ny fisoronana tamin’ny lehilahy mendrika rehetra i Helvécio dia nitantara hoe:

“Tena nihetsi-po aho. Nankay amin’ny efitra fatorianay izaho sy i Rudá, dia nandohalika ary nivavaka. Nitomany izahay rehefa nisaotra ny Ray any An-danitra noho ny zava-nitranga izay nonofinofisinay fotsiny hatramin’izay. Tonga ihany ilay andro ary nandritra ny fiaina nay teto an-tany” (The Autobiography of Elder Helvécio Martins [1994], 69–70).

Fotoana fohy taorian’ilay fanambarana tamin’ny 1978 dia nofehezina tany amin’ny tempoly ny fianakaviana Martins. Lasa mpitarika tao amin’ny fisoronana tao an-toerana i Helvécio ary voantso ho mpikambana tao amin’ny Fitopololahy izy tamin’ny farany (jereo ny “Elder Helvécio Martins of the Seventy,” 106).

• Inona no mety ho niova ho an’ny fianakaviana Martins raha toa ka tsy nisafidy ny hampihatra finoana an’i Jesoa Kristy izy ireo?

• Inona no nianaranao avy amin’ny ohatra nasehon’ny fianakaviana Martins ka afaka manampy anao amin’ny toe-javatra tsy mampiahiahy iainanao na amin’ny fanontaniana tsy voavaly anananao?

  Hevero ny hanoratra ity fahamarinana manaraka ity eny amin’ny solaitrabe mandritra ny fifanakalozan-kevitra ataonareo: Rehefa manao asa amim-pinoana isika mandritra ireo toe-javatra mampiahiahy dia manomana ny tenantsika handray ireo fitahian’ny Tompo.

• Inona avy ireo fomba sasantsasany ahafahanao manao asa amim-pinoana rehefa manoloana toe-javatra mampiahiahy na fanontaniana ara-panahy ianao?

  Raha ilaina dia afaka mitady hevitra ao amin’ny andiam-pehezan-teny 5–7 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023) ny mpianatra.

• Ahoana no nitahian’ny Tompo anao na nitahiany ny olona fantatrao noho ny fanaovana asa tamim-pinoana?

Hevero ny hizara ohatra iray eo amin’ny fiainanao. ChurchofJesusChrist.org

Ankoatra izany dia azonao atao ny manasa ireo mpianatra hikaroka ohatra avy ao amin’ny soratra masina izay mampiseho ny Tompo mitahy ireo olona izay nanao asa tamim-pinoana. Anisan’ireo ohatra amin’izany ilay mpitondratena tao Zarefata (1 Mpanjaka 17:8–24); ny fianakavian’i Lehia (1 Nefia 2:2–5; 17:1–3); ary ny Mpaminany Joseph Smith (Joseph Smith—Tantara 1:8–17).

Manaova drafitra

Ampahatsiahivo ny mpianatra ny toe-javatra na fanontaniana avy amin’ny fiainan’izy ireo izay neritreretin’izy ireo tany am-piandohan’ny lesona. Avy eo dia asao ny mpianatra hamaly ireto fanontaniana manaraka ireto ao amin’ny diary fandalinan’izy ireo:

• Inona no nianaranao na tsapanao androany ka afaka manampy anao amin’ireo toe-javatra mampiahiahy anao na ireo fanontaniana ara-panahy anananao?

• Inona no zavatra manokana hataonao mba hampiharana finoana an’i Jesoa Kristy amin’ireo toe-javatra ireo?

Loharanom-pitaovana fanampiny

Aiza no ahafahako mianatra misimisy kokoa momba ny famerana teo amin’ny fanendrena ho amin’ny fisoronana sy ny fanambarana nambara ao amin’ny Filazana Ôfisialy 2?

Jereo ireto loharanom-pitaovana manaraka ireto:

• “Restriction concernant la prêtrise et le temple” (Sujets de l’histoire de l’Église)

• “Race et prêtrise” (Essais sur des sujets de l’Évangile)

• “Révélations de l’été 1978” (Essai personnel sur la race et la prêtrise, première partie)

Ahoana no nikatsahan’ireo mpitarika tao amin’ny Fiangonana ny fitarihan’ny Tompo talohan’ny nandraisana io fanambarana io?

Ny Filoha Spencer W. Kimball (1895–1985), izay Filohan’ny Fiangonana tamin’ny fotoana nandraisana ilay fanambarana, dia nahatsiaro izao manaraka izao:

Nahafantatra aho fa nisy zavatra teo anoloanay izay tena manan-danja tokoa ho an’ny zanak’ Andriamanitra maro. … Isan’andro isan’andro, dia nandeha irery tao anatin’ny fanehoam-panajana sy fahamatorana lehibe tao amin’ny efitrano ambony rihan’ny tempoly aho, ary tao aho no nanolotra ny fanahiko sy nanolotra ny ezaka nataoko mba handrosoana miaraka amin’ilay fandaharan’asa. Te hanao ny zavatra tiany aho. Noresahiko taminy izany ka hoy aho hoe, “Tompo ô, izay mety ihany no tadiaviko. … Izay zavatra tianao ihany no tadiavinay, ka tianay izany amin’ny fotoana itiavanao azy ary tsy alohan’izay.” …

Nataon’ny Tompo nazava tsara tamiko izay tokony natao. (Teachings of Presidents of the Church: Spencer W. Kimball [2006], 238–39)

Toy ny ahoana izany ho an’ireo mpitarika tao amin’ny Fiangonana izay niaina ny fandraisana io fanambarana io?

Ny Filoha Gordon B. Hinckley (1910–2008), izay mpikambana tao amin’ny Kôlejin’ny Apôstôly Roambinifolo tamin’ny fotoana nahazoana ilay fanambarana, dia nijoro ho vavolombelona ny amin’ny hoe toy ny ahoana izany tao amin’ny tempoly izany tamin’io andro io:

Niara-nanao vavaka tao anatin’ilay toe-javatra niainana masina indrindra izahay. Ny Filoha Kimball mihitsy no nanonona ilay vavaka. … Tontolo masina no niainana tao amin’ilay efitra. Tamiko izany dia toy ireny hoe nisy lalana nisokatra ireny teo anelanelan’ny seza fiandrianana masina any an-danitra sy ny Mpaminanin’ Andriamanitra izay nandohalika sy nitalaho ary nanatevin-daharana azy tamin’izany ireo Rahalahiny. Teo ny Fanahin’ Andriamanitra. Ary tamin’ny alalan’ny herin’ny Fanahy Masina no nahatongavan’ny fanomezan-toky tamin’izany mpaminany izany fa araka ny tokony ho izy ny zavatra izay nentiny am-bavaka, …

Nahafantatra izahay rehetra fa efa tonga ny fotoana izay hisian’ny fiovana ary ilay fanapahan-kevitra dia avy any an-danitra. Nazava ny valinteny. Nisy firaisan-kina feno teo anivonay tao anatin’ny zavatra niainanay sy tao amin’ny fahatakaranay. (Gordon B. Hinckley, “Priesthood Restoration,” Ensign, Oct. 1988, 69–70)

Sahanasa fianarana fanampiny

Horonan-tsary

Hevero ny hampiasa ity horonan-tsary manaraka ity mandritra ny ampahany amin’ny lesona. Ity horonan-tsary ity dia afaka manampy ny mpianatra hahita ohatra momba ireo Olomasina mahatoky, na taloha na taorian’ilay fanambarana izay nanesorana ny famerana teo amin’ny fanendrena ho amin’ny fisoronana.

• “Soyez un - Célébration de la révélation sur la prêtrise” manomboka amin’ny mari-potoana 1:06:55 hatramin’ny 1:09:14. Mamariparitra ny fomba nitahian’ny fisoronana ny fiainan’izy ireo ireo Olomasin’ny Andro Farany mainty hoditra.

Sahanasa momba ny fanomezana fanazavana

Ny mpianatra dia mety hiaina fotoana eo amin’ny fiainany izay hangatahana azy ireo hanazava ny antony nisian’ilay famerana teo amin’ny fanendrena ho amin’ny fisoronana. Hevero ny hamela azy ireo hanao fanazaran-tena amin’izany ao an-dakilasy. Alohan’ny hanazaran’izy ireo tena amin’ny fanomezana fanazavana dia mety hanampy ny mampahatsiahy azy ireo fa tsy fantatsika ny antony nametrahana io lalàna io (jereo ny Teny fanolorana ny Filazana Ôfisialy 2).

Hevero ny hanasa ny mpianatra hamaly ireto fanontaniana manaraka ireto avy eo. Azon’ny mpianatra atao ny manazatra tena mamaly azy ireo miaraka amina namana iray na ao anatina vondrona kely.

• Raha misy olona manontany anao hoe nahoana no nisy ny famerana ny fanendrena ho amin’ny fisoronana sy ny fidirana ny tempoly dia inona avy ireo fahamarinana tsapanao fa manan-danja indrindra mba hanampiana azy ireo hahatakatra? Nahoana?

Rehefa avy nanao fanazaran-tena nanazava ny mpianatra dia angataho izy ireo hizara ireo fahamarinana nifantohan’izy ireo. Raha ilaina dia antitrantero fa fantatsika fa tia ny zanany rehetra Andriamanitra ary manasa ny rehetra hanatona Azy Izy (jereo ny 2 Nefia 26:33). Fantatsika ihany koa fa ireo mpaminany dia mikatsaka sy mandray ny fitarihan’ny Tompo amin’ny fitarihana ny Fiangonany.

Ohatra amin’ny fanaovana asa amim-pinoana

Vakio ity teny nambaran’ny Filoha Dallin H. Oaks ao amin’ny Fiadidiana Voalohany manaraka ity. Asao ny mpianatra hitady ny fomba niatrehany ireo fanontaniana tsy voavaly nananany rehefa napetraka ilay famerana teo amin’ny fanendrena ho amin’ny fisoronana.

Hitako ny fijaliana sy ny fahasorenana niainan’ireo izay niharan’ireo famerana ireo ary ireo izay … niezaka nitady ny antony. Nandalina ireo antony nomena tamin’izany aho ary tsy nahatsapa fanamafisana ny fahamarinan’izy ireny. Tao anatin’ny fandalinana ombam-bavaka nataoko dia nianatra aho fa amin’ny ankapobeny dia mahalana ny Tompo no manome ny antony anomezany ireo didy sy torolalana ho an’ireo mpanompony. Nanapa-kevitra aho ny tsy hivadika amin’ireo mpitarika antsika voafidin’ Andriamanitra ary hivavaka, araka ny nampanantenaina hatrany am-piandohan’ireo famerana ireo, mba hiavian’ilay andro izay hahazoan’ny rehetra ireo fitahiana avy amin’ny fisoronana sy ny tempoly. (“President Oaks Remarks at Worldwide Priesthood Celebration,” newsroom.ChurchofJesusChrist.org)

• Inona no nianaranao avy amin’ny valintenin’ny Filoha Oaks izay afaka manampy anao rehefa manana fanontaniana momba ny fotopampianarana na fitsipika iray ao amin’ny Fiangonana ianao?

• Nahoana araka ny eritreritrao no zava-dehibe ny tsy mivadika amin’ireo mpitarika antsika ara-paminaniana rehefa miandry ny valin’ireo fanontaniantsika isika?

Misafidy ny finoana fa tsy ny fisalasalana

Hevero ny hampiseho ny “Ne doutez pas, mais croyez ” manomboka amin’ny mari-potoana 15:26 hatramin’ny 20:28. Ao amin’io horonan-tsary io, ny Loholona Dale G. Renlund ao amin’ny Kôlejin’ny Apôstôly Roambinifolo sy Rahavavy Ruth L. Renlund dia mamariparitra ohatra momba ny olona roa izay naneho fihetsika samy hafa nanoloana ny fanontanian’izy ireo momba ny filazantsara, ny iray fihetsika nifono fisalasalana ary ilay iray hafa fihetsika niaraka tamin’ny finoana. Rehefa avy mampiseho ilay horonan-tsary dia asao ny mpianatra hizara fampianarana na hevi-baovao izay nanaitra azy ireo.