156-р хичээл: Итгэлийн тунхаг ба Албан тунхаг 1, 2

Албан тунхаг 2

Санваарын талаарх илчлэл

Инээмсэглэж буй хос

Сайн мэдээ 20-р зуунд дэлхий даяар түгэн дэлгэрэх үед Сүмийн африк гаралтай гишүүдийг санваар хүлээн авахыг нь хязгаарласан бодлогын талаар Сүмийн удирдагчид удирдамж хүсэн залбирчээ. Олон гэгээнтэн уг бодлогын талаар асуулттай тулгарах үедээ Есүс Христэд итгэх итгэлээ хэрэгжүүлэхээр сонгосон. 1978 оны 6-р сарын 8-нд Тэргүүн зөвлөл эдгээр хоригийг цуцалсан илчлэлийг зарлав. Энэ хичээл тодорхой бус нөхцөл байдалтай эсвэл сүнслэг асуултуудтай тулгарсан үедээ итгэлээр үйлдэхэд нь суралцагчдад тусална.

Боломжит суралцах үйл ажиллагаа

Итгэлийн жишээ

Хэцүү нөхцөл байдалд Есүс Христэд итгэх агуу итгэлээ хэрэгжүүлсэн таньдаг хүмүүсийнхээ талаар бодоход суралцагчдыг урьснаар хичээлээ эхлүүл. Дараа нь Далын ахлагч Хэлвэсио Мартинс (1930–2005) эхнэр Рудатайгаа агуу итгэлтэй байх шаардлагатай нөхцөл байдалтай тулгарсан гэдгийг тайлбарла. Та эсвэл өөр нэг суралцагч дараах догол мөрийг ангийнханд уншиж өгч болно.

Ахлагч Хэлвэсио

1972 оны 4-р сард Есүс Христийн Хожмын Үеийн Гэгээнтнүүдийн Сүмийн номлогчид Бразилын Рио-де-Жанейро дахь Хэлвэсио, Руда Мартинс хоёрын гэрт зочилжээ. Мартинсын гэр бүлийнхэн номлогчдын захиас үнэн гэсэн гэрчлэлийг тэр даруй олж авсан байна. Тэд мөн африк гаралтай хар арьст эрэгтэйчүүдийг санваарт томилохыг хязгаарласан Сүмийн бодлогын талаар мэдэж авав. Африк гаралтай Хэлвэсио, Руда хоёрт номлогчдоос асуух асуулт байв (“Elder Helvécio Martins of the Seventy,” Ensign, May 1990, 106; Mark Grover, The Autobiography of Elder Helvécio Martins [1994], 43-ыг үзнэ үү).

• Хэрэв та нар ийм нөхцөл байдалд байсан бол номлогчдоос юу гэж асуух байсан бэ?

• Ийм нөхцөл байдалд хэн нэгэн ямар ямар арга замаар хариу үйлдэл үзүүлж болох вэ?

Өөрсдийн амьдралд тулгарч буй эсвэл тулгарсан тодорхой бус нөхцөл байдлуудын талаар бодоход суралцагчдыг урь. Үүнд одоогоор тэдэнд байгаа хариулагдаагүй сүнслэг асуултуудыг багтааж болох юм. Тэд нөхцөл байдал эсвэл асуултуудынхаа талаар судлах тэмдэглэлдээ бичиж болно. Нөхцөл байдалд нь тусалж чадах Сүнсний өдөөлтөд эсвэл сургаалуудад анхаарлаа хандуулахад суралцагчдыг урамшуул.

Итгэлээр үйлдэх

Мартинсын гэр бүл энэ нөхцөл байдалд хэрхэн хандсаныг ойлгоход нь суралцагчдад туслахын тулд дараах догол мөрүүдийг ангийнхандаа чанга уншиж өгөхөд нэг суралцагчийг урь.

Мартинсын гэр бүл санваарын хоригийн талаар мэдсэнийхээ дараа итгэлээр үйлдэхийг сонгожээ. Тэд удалгүй баптисм хүртэж, Сүмд олон жил итгэлтэйгээр үйлчилсэн юм. Ахлагч Мартинс хожим нь “‘Бид үнэнийг олсон. Үүний дагуу амьдрахад биднийг юу ч зогсоож чадахгүй байсан” хэмээн дурсжээ.

1975 онд Сүмээс Бразилын Сан Паулод ариун сүм баригдах болно гэдгийг зарлав. Ахлагч Мартинс ‘“Хэдийгээр бид ариун сүмд орно гэж бодоогүй ч бусад гишүүний адил ариун сүмийн барилгын ажилд оролцсон. Эцсийн эцэст, энэ бол Их Эзэний өргөө шүү дээ’ гэж дурсав. Мартинс эгч хандив цуглуулах ажилд туслахын тулд үнэт эдлэлээ зарсан бөгөөд Мартинс ах олон нийтийн мэдээллийн хороонд үйлчилж байв” (“Elder Helvécio Martins of the Seventy,” Ensign, May 1990, 106).

• Мартинсын гэр бүлийнхний үзүүлсэн хариу үйлдлийн юу нь та нарт онцгой санагдаж байна вэ?

• Яагаад тэд ийм нөхцөл байдалд итгэлээр үйлдэхийг сонгосон гэж та нар бодож байна вэ?

Хэрэв шаардлагатай гэж үзвэл, Мартинсын гэр бүлийнхэн мэдэхгүй зүйл дээрээ анхаарлаа төвлөрүүлэхийн оронд Ариун Сүнсээр дамжуулан Бурханы тэдэнд илчилсэн үнэнд анхаарлаа хандуулсан гэдгийг онцлон хэлж өг.

Асуулттай эсвэл тодорхой бус нөхцөл байдалтай тулгарах үед итгэлээр урагшлахад нь туслах Тэнгэрлэг Эцэг, Есүс Христ хоёрын талаар болон сайн мэдээний тухай мэддэг үнэнүүдийнхээ жагсаалтыг гаргахад суралцагчдыг урь. Дараа нь бичсэн зүйлээ хуваалцаж, тэдгээр үнэн нь итгэлээр урагшлахад тэдэнд хэрхэн тусалж чадах талаар тайлбарлахад тэднийг урь.

Албан тунхаг 2

Санваарын хоригтой холбоотой нөхцөл байдлуудыг болон үүнийг цуцалсан илчлэлийг ойлгоход нь суралцагчдад туслахын тулд тэднийг Албан тунхаг 2-ын удиртгалыг судар дээрээс олоход урь. Хэрэв шаардлагатай бол судруудын хуучин хэвлэлтэй суралцагчдад удиртгал хэсгийг хувилж өг.

Албан тунхаг 2-ын удиртгалыг уншаад, энэхүү тунхагтай холбоотой нөхцөл байдлыг олж мэд.

• Энэ догол мөрөөс юуг ойлгох нь чухал гэж та нар бодож байна вэ?

“Энэхүү дадал заншил хаанаас эх үндэстэй талаар Сүмийн түүхэнд тодорхой мэдээлэл байдаггүй” гэсэн мөр нь санваарын хоригийн талаарх Сүмийн албан ёсны байр суурийг төлөөлдөг гэдгийг тайлбарла. Яагаад ийм хориг тавьсныг бид тааварлахгүй байх нь чухал.

Та мөн удиртгал хэсгийн эхний өгүүлбэр дэх 2 Нифай 26:33-ын эшлэлийг онцлон хэлж болох юм. Энэ шүлгийг уншаад, энэ бодлогын талаар бодох үедээ санаж явахад чухал ач холбогдолтой үнэнүүдийг хуваалцахад суралцагчдыг урь.

Албан тунхаг 2 нь 1978 оны 6-р сарын 1-нд Тэргүүн зөвлөл, Арван хоёр төлөөлөгчийн чуулгын хүлээн авсан илчлэлтийн албан ёсны мэдэгдлийг агуулдаг.

Албан тунхаг 2-ыг ангиараа судлахын оронд жижиг бүлэг болж хамт судлахад суралцагчдыг урих талаар бодож үз. Хэрэв боломжтой бол тэд Албан тунхаг 2-т гардаг зарим мэдэгдлийг илүү сайн ойлгохын тулд “The Long-Promised Day” (Liahona, June 2018, 34–37) дахь эх сурвалжуудыг ашиглаж болно.

Албан тунхаг 2-ын “Эрхэм хүндэт Ах нар аа” гэсний доорх дөрвөн догол мөрийг унш. Та нарын хувьд ач холбогдолтой санагдсан үг, хэллэгийг тэмдэглэ.

• Та нарын уншсан зүйлээс юу нь онцгой санагдсан бэ?

• Энэ туршлага Тэнгэрлэг Эцэг, Есүс Христ хоёрын талаар юуг ойлгож авахад эсвэл мэдрэхэд та нарт тусалж байна вэ?

Илчлэлийн нөлөө

Африкийн гэгээнтнүүд баптисм хүртэж байна

Энэхүү илчлэл дэлхий даяарх эрэгтэйчүүд, эмэгтэйчүүдэд гүн гүнзгий нөлөө үзүүлсэн юм. Үүнийг хүлээн авсны дараа удалгүй Африк руу номлогчдыг илгээжээ. Ариун сүмүүд энэ тивд баригдаж эхэлснээс хойш олон зуун мянган африк гаралтай хүн тэнд өөрсдийнхөө төлөө болон нас барсан өвөг дээдсийнхээ төлөө сайн мэдээний ёслолуудыг хүлээн авсан.

Илчлэлд нөлөөлөгдсөн хүмүүсийн дунд Хэлвэсио, Руда Мартинс хоёр байсан гэдгийг тайлбарла. Дараах догол мөрүүдийг ангийнхандаа чанга уншиж өгөхөд нэг суралцагчийг урих талаар бод.

Бүх зохистой эрэгтэйд санваар хүртээх боломжийг олгосон илчлэлийн тухай мэдсэний дараа Хэлвэсио ийн дурсжээ.

“Би сэтгэл хөдлөлөө барьж чадахгүй байлаа! Руда бид хоёр унтлагынхаа өрөөнд ороод, өвдөг сөгдөн суугаад залбирсан. Бидний зөвхөн мөрөөдөж л байсан тэр үйл явдлын төлөө бид Тэнгэрлэг Эцэгтээ талархан уйлж билээ. Тэр өдөр үнэндээ иржээ. Энэ нь бидний мөнх бус амьдралд тохиов” (Хэлвэсио Мартинсын намтар [1994], 69–70).

1978 оны илчлэлийн дараахан Мартинсын гэр бүл ариун сүмд лацдан холбуулсан ажээ. Хэлвэсио орон нутгийн санваарын удирдагч болсон бөгөөд хожим Далын гишүүнээр үйлчлэхээр дуудагдсан (“Elder Helvécio Martins of the Seventy,” 106-г үзнэ үү).

• Хэрэв Мартинсын гэр бүл Есүс Христэд итгэх итгэлээ хэрэгжүүлэхийг сонгоогүй бол тэдний хувьд байдал хэрхэн өөр байх байсан бэ?

• Та нар Мартинсын гэр бүлийн жишээнээс тодорхой бус нөхцөл байдалд эсвэл хариулагдаагүй асуултуудад тань тусалж чадах юуг сурч мэдсэн бэ?

  Ярилцлагынхаа нэг хэсэг болгон дараах үнэнийг самбар дээр бич. Бид тодорхой бус нөхцөл байдлын үеэр итгэлээр үйлдэхдээ Их Эзэний адислалуудыг хүлээн авахад өөрсдийгөө бэлтгэдэг.

• Тодорхой бус нөхцөл байдал эсвэл сүнслэг асуултуудтай тулгарах үедээ итгэлээр үйлдэж чадах ямар арга замууд байдаг вэ?

  Шаардлагатай бол суралцагчид Төгс эзэмших сургаалыг судлах үндсэн материал (2023)-ын “Сүнслэг мэдлэг олж авах” хэсгийн 5–7-р догол мөрүүдээс санаа олж болно.

• Итгэлээр үйлдсэнээр та нарыг болон та нарын таньдаг хүмүүсийг Их Эзэн хэрхэн адисалсан бэ?

Өөрийнхөө амьдралд тохиолдсон жишээг хуваалц. Та мөн ChurchofJesusChrist.org дээрх “Struggling with the History of Race and the Priesthood” (4:04) видеог үзүүлж болно.

Нэмэлтээр та итгэлээр үйлдсэн хүмүүсийг Их Эзэн адисалж байгааг харуулсан судрын жишээнүүдийг хайж олоход суралцагчдыг урьж болно. Жишээнд Зарефатын бэлэвсэн эмэгтэй (1 Хаад 17:8–24); Лихайн гэр бүл (1 Нифай 2:2–5; 17:1–3); бошиглогч Иосеф Смит (Иосеф Смит—Түүх 1:8–17) зэрэг нь багтана.

Төлөвлөгөө гаргах

Хичээлийн эхэнд өөрсдийнх нь бодсон амьдралын нөхцөл байдал эсвэл асуултыг суралцагчдад сануул. Дараа нь судлах тэмдэглэл дээрээ дараах асуултуудад хариулж бичихэд тэднийг урь.

• Та нар өнөөдөр тодорхой бус нөхцөл байдалд эсвэл сүнслэг асуултуудад тань туслах юуг сурч мэдэж эсвэл мэдэрсэн бэ?

• Эдгээр нөхцөл байдалд Есүс Христэд итгэх итгэлээ хэрэгжүүлэхийн тулд та нар ямар тодорхой зүйлийг хийх вэ?

Нэмэлт эх сурвалж

Албан тунхаг 2-т зарлагдсан санваарын хориг, илчлэлийн талаар би хаанаас илүү ихийг мэдэж болох вэ?

Дараах эх сурвалжуудыг үзнэ үү. Үүнд:

• “Санваарын адислалуудыг түгээх” (Лиахона, 2018 оны 6-р сар)

• “Priesthood and Temple Restriction” (Сүмийн түүхийн сэдвүүд)

• “Race and the Priesthood” (Сайн мэдээний сэдвүүдийн эсээ)

• “Revelations in the Summer of 1978” (Personal Essay by Elder Ahmad Corbitt of the Seventy)

Сүмийн удирдагчид энэ илчлэлийг хүлээн авахаасаа өмнө хэрхэн Их Эзэний удирдамжийг эрэлхийлсэн бэ?

Илчлэлийг хүлээн авах үедээ Сүмийн ерөнхийлөгч байсан ерөнхийлөгч Спэнсэр В.Кимбалл (1895–1985) ийн дурсжээ.

Ерөнхийлөгч Спэнсэр В.Кимбалл

Бурханы олон хүүхдэд нэн чухал асуудал бидний өмнө тавигдаж байсныг би мэдэж байсан. … Би өдөр болгон ариун сүмийн дээд өрөөнд агуу чанд мөн нухацтай байдлаар ганцаараа очдог байв. Тэнд би хөтөлбөрийг урагшлуулах тухай хичээл зүтгэлээ болон өөрийн бодгалийг өргөл болгон өгдөг байсан. Би Түүний хүссэнийг хийхийг хүсэж байлаа. Би Түүнтэй энэ талаар ярьж, “Их Эзэн минь, би зөвхөн зөв гэсэн зүйлийг л хүсэж байна. … Бид зөвхөн Таны хүсэж буйг хүсэж байгаа бөгөөд зөвхөн Таныг үүнийг хүсэх үед л хүсэж байна” гэж хэлсэн. …

Их Эзэн юу хийгдэх ёстойг надад маш тодорхой мэдүүлсэн. (Teachings of Presidents of the Church: Spencer W. Kimball [2006],238–239)

Энэхүү илчлэлийг мэдэрсэн Сүмийн удирдагчдын хувьд энэ нь ямар байсан бэ?

Уг илчлэлийг авах үед Арван хоёр төлөөлөгчийн чуулгын гишүүн байсан ерөнхийлөгч Гордон Б.Хинкли (1910–2008) тэр өдөр ариун сүмд ямархуу байсныг гэрчилсэн юм.

Ерөнхийлөгч Гордон Б.Хинкли

Бид хамгийн ариун нандин хүрээлэлд залбиралд нэгдэв. Ерөнхийлөгч Кимбалл өөрөө залбирсан юм. … Өрөөг гэгээрүүлж ариусгасан уур амьсгалтай байлаа. Миний хувьд, ах нартайгаа хамт учирлан гуйж буй өвдөг сөгдсөн Бурханы бошиглогч, бурханлаг сэнтий хоёрын хооронд суваг нээгдсэн мэт мэдрэгдсэн. Бурханы Сүнс тэнд байлаа. Тэнд буй Ариун Сүнсний хүчээр бошиглогчид түүний залбирсан зүйл зөв гэсэн баталгаа ирсэн. …

Бид бүгдээрээ өөрчлөгдөх цаг нь болсныг мөн энэхүү шийдвэр тэнгэрээс ирсэн гэдгийг мэдэж байлаа. Хариулт нь тодорхой байв. Бидний мэдрэмж, ойлголт төгс нэгдмэл байв. (Gordon B. Hinckley, “Priesthood Restoration,” Ensign, Oct. 1988, 69–70)

Нэмэлт суралцах үйл ажиллагаа

Видео

Дараах видеонуудаас нэг юм уу хэд хэдийг хичээлийн хэсэг дээр ашигла. Эдгээр видео нь санваарын хоригийг цуцалсан илчлэлийн өмнөх болон дараах итгэлтэй гэгээнтнүүдийн жишээг харахад суралцагчдад тусалж чадна.

• “Long-Promised Day” (8:41). Энэ видеонд санваар хүртэх боломжийг удаан хүлээсэн Ганын гэгээнтнүүдийг харуулсан байдаг.

• “Be One—A Celebration of the Revelation on the Priesthood” видеог цагийн код 1:06:55-аас 1:09:14 хүртэл үз. Хар арьст хожмын үеийн гэгээнтнүүд санваар амьдралыг нь хэрхэн адисалсан талаар өгүүлдэг.

• “A New Day” (2:24). Хар арьст хожмын үеийн гэгээнтнүүд 1978 оны илчлэлтэд ямар хариу үйлдэл үзүүлсэн тухайгаа хуваалцаж байна.

Үйл ажиллагааг тайлбарлах

Яагаад санваарын хоригууд байсан талаар тайлбарлахыг суралцагчдаас хүсэх үе тэдний амьдралд тохиолдож болно. Ангидаа энэ тал дээр дадлага хийлгэх талаар бодож үз. Тэднийг тайлбарлах дадлага хийхээс өмнө, энэ бодлого яагаад хэрэгжиж байсныг бид мэдэхгүй гэдгийг сануулах нь тустай байж болно (Introduction to Official Declaration 2-ыг үзнэ үү).

Дараа нь дараах асуултуудад хариулахад суралцагчдыг урь. Суралцагчид хоёр хоёроороо эсвэл жижиг бүлгээр хариулах дадлага хийж болно.

• Санваарын болон ариун сүмийн хоригууд яагаад байсан талаар хэн нэгэн та нараас асуувал тэдэнд ойлгоход нь туслах ямар үнэнүүдийг хамгийн чухал гэж та нар бодож байна вэ? Яагаад?

Суралцагчдыг тайлбарлах дадлага хийсний дараа, аль үнэн дээр анхаарлаа төвлөрүүлснээ хуваалцахыг тэднээс хүс. Хэрэв шаардлагатай бол, Бурхан бүх хүүхдээ хайрладаг бөгөөд бүхнийг Өөр дээрээ ирэхэд урьдаг гэдгийг (2 Нифай 26:33-ыг үзнэ үү) бид мэддэг гэдгийг онцол. Бошиглогчид Их Эзэний Сүмийг удирдахдаа удирдамж эрэлхийлж, хүлээн авдаг гэдгийг бид бас мэднэ.

Итгэлээр үйлдэх жишээ

Тэргүүн зөвлөлийн ерөнхийлөгч Даллин Х.Өүксийн дараах дурсамжийг хуваалц. Санваарын хориг хэрэгжиж байх үед тэр хариулагдаагүй асуултуудынхаа учрыг хэрхэн олдог байсныг нь олж мэдэхэд суралцагчдыг урь.

Ерөнхийлөгч Даллин Х.Өүкс

Эдгээр хоригийг өөрийн биеэр мэдэрч, … учир шалтгааныг эрэлхийлж байсан хүмүүсийн зовж, сэтгэлээр унаж байсныг би харж байсан. Би тухайн үед шалтгаануудыг нь судалсан ч алиных нь ч үнэний баталгааг мэдрэхгүй байв. Би залбирч судалсныхаа үр дүнд Их Эзэн ерөнхийдөө Өөрийн үйлчлэгчдэд өгдөг зарлиг, удирдамжийнхаа шалтгааныг бараг өгдөггүй гэдгийг сурч мэдсэн. Би бошиглолын удирдагчдадаа үнэнч байж, эдгээр хоригийг тавихаас эхлэн өгөгдсөн амлалтын дагуу бүх хүн санваарын болон ариун сүмийн адислалаас хүртэх тэр өдөр ирэхийн төлөө залбирахаар шийдсэн билээ. (“President Oaks Remarks at Worldwide Priesthood Celebration,” newsroom.ChurchofJesusChrist.org)

• Сүмийн сургаал эсвэл бодлогын талаар асуух зүйл байвал та нарт тусалж болох ямар зүйлийг та нар ерөнхийлөгч Өүксийн хариултаас сурч мэдсэн бэ?

• Асуултуудынхаа хариултыг хүлээх явцдаа бошиглолын удирдагчдадаа үнэнч байх нь яагаад чухал гэж та нар бодож байна вэ?

Эргэлзэхийн оронд итгэхийг сонгох

“Doubt Not, but Be Believing” видеог цагийн код 15:26-аас 20:28 хүртэл үзүүлэх талаар бод. Энэ видеон дээр Арван хоёр төлөөлөгчийн чуулгын ахлагч Дэйл Г.Рэнланд, Рут Л.Рэнланд эгч хоёр сайн мэдээний асуултуудад нэг нь эргэлзэж, нөгөө нь итгэлээр хариулсан хоёр хүний жишээг өгүүлдэг. Видеог үзүүлсний дараа, онцгой санагдсан сургаал эсвэл ойлголтоо хуваалцахад суралцагчдыг урь.