Lesson 156: Ang Mga Saligan ng Pananampalataya at Opisyal na Pahayag 1 at 2

Opisyal na Pahayag 2

Paghahayag tungkol sa Priesthood

Nang lumaganap ang ebanghelyo sa iba’t ibang panig ng mundo noong ikadalawampung siglo, nanalangin ang mga lider ng Simbahan para sa patnubay tungkol sa isang patakaran na nagbabawal sa mga miyembro ng Simbahan na may lahing African na matanggap ang priesthood. Maraming Banal ang piniling sumampalataya kay Jesucristo habang nahaharap sila sa mga tanong tungkol sa patakaran. Noong Hunyo 8, 1978, inanunsyo ng Unang Panguluhan ang isang paghahayag na nag-alis sa mga restriksyong ito. Ang lesson na ito ay makatutulong sa mga estudyante na kumilos nang may pananampalataya kapag nahaharap sila sa mga walang katiyakang sitwasyon o mga espirituwal na tanong.

Mga Posibleng Aktibidad sa Pag-aaral

Mga halimbawa ng pananampalataya

Maaari mong simulan ang lesson sa pamamagitan ng pag-aanyaya sa mga estudyante na isipin ang mga taong kilala nila na nagpakita ng matinding pananampalataya kay Jesucristo sa mahirap na sitwasyon. Pagkatapos ay ipaliwanag na si Elder Helvécio Martins (1930–2005) ng Pitumpu at ang kanyang asawang si Rudá ay minsang naharap sa isang sitwasyon na nangailangan ng matinding pananampalataya. Maaari mong basahin sa klase ang sumusunod na talata o maaari mo itong ipabasa sa isang estudyante.

Noong Abril 1972, bumisita ang mga misyonero mula sa Ang Simbahan ni Jesucristo ng mga Banal sa mga Huling Araw sa apartment nina Helvécio at Rudá Martins ng Rio de Janeiro, Brazil. Mabilis na nagkaroon ang mga Martins ng patotoo sa katotohanan ng mensahe ng mga misyonero. Nalaman din nila ang patakaran ng Simbahan na nagbabawal sa mga lalaking Itim na may lahing African na maorden sa priesthood. Sina Helvécio at Rudá, na may lahing African, ay may mga tanong para sa mga misyonero (tingnan sa “Elder Helvécio Martins of the Seventy,“ Ensign, Mayo 1990, 106; Mark Grover, The Autobiography of Elder Helvécio Martins [1994], 43).

• Ano kaya ang mga itatanong ninyo sa mga misyonero kung kayo ang nasa sitwasyong ito?

• Ano ang ilan sa mga posibleng paraan kung paano maaaring tumugon ang isang tao sa sitwasyong tulad nito?

Anyayahan ang mga estudyante na isipin ang mga walang katiyakang sitwasyon na kinakaharap o kinaharap nila sa kanilang buhay. Maaaring kabilang dito ang mga hindi pa nasasagot na espirituwal na tanong na mayroon sila ngayon. Maaari nilang isulat ang tungkol sa kanilang mga sitwasyon o mga tanong sa kanilang study journal. Hikayatin ang mga estudyante na bigyang-pansin ang mga turo o pahiwatig ng Espiritu na makatutulong sa kanila sa kanilang mga kalagayan.

Pagkilos nang may pananampalataya

Upang matulungan ang mga estudyante na malaman kung paano tumugon ang pamilya Martins sa sitwasyong ito, maaari mong ipabasa nang malakas sa isang estudyante ang mga sumusunod na talata sa klase:

Matapos malaman ang restriksyon sa priesthood, pinili ng pamilya Martins na kumilos nang may pananampalataya. Hindi nagtagal ay nabinyagan sila at tapat na naglingkod sa Simbahan sa loob ng maraming taon. Kalaunan ay ginunita ni Elder Martins na, “Natagpuan na namin ang katotohanan, at walang makapipigil sa amin na ipamuhay ito.”

Noong 1975, ibinalita ng Simbahan na magtatayo ng templo sa São Paulo, Brazil. ‘“Kahit hindi namin inaasahang makapasok dito, tumulong kami sa pagtatayo ng templo, tulad ng iba pang miyembro,’ pagbabalik-tanaw ni Elder Martins. ‘Sapagkat alam kong ito ay bahay ng Panginoon.’ Ipinagbili ni Sister Martins ang kanyang alahas upang makatulong sa paglikom ng pondo, at naglingkod si Brother Martins sa publicity committee” (sa “Elder Helvécio Martins of the Seventy,” Ensign, Mayo 1990, 106).

• Ano ang pinakamahalaga para sa inyo sa tugon ng pamilya Martins?

• Sa inyong palagay, bakit pinili nilang kumilos nang may pananampalataya sa sitwasyong ito?

Kung kinakailangan, ipaliwanag na sa halip na pagtuunan ang hindi nila alam, pinagtuunan ng pamilya Martins ang katotohanang inihayag sa kanila ng Diyos sa pamamagitan ng Espiritu Santo.

Maaari mong anyayahan ang mga estudyante na gumawa ng listahan ng mga katotohanang nalalaman nila tungkol sa Ama sa Langit, kay Jesucristo, at sa ebanghelyo na makatutulong sa kanila na sumulong nang may pananampalataya kapag nahaharap sila sa mga tanong o walang katiyakang sitwasyon. Pagkatapos ay anyayahan silang ibahagi ang isinulat nila at ipaliwanag kung paano makatutulong ang mga katotohanang iyon sa kanila na sumulong nang may pananampalataya.

Opisyal na Pahayag 2

Upang matulungan ang mga estudyante na maunawaan ang mga sitwasyong may kaugnayan sa restriksyon sa priesthood at sa paghahayag na nag-alis dito, anyayahan silang hanapin ang pambungad sa Opisyal na Pahayag 2 sa kanilang mga banal na kasulatan. Kung kinakailangan, magbigay ng mga kopya ng pambungad para sa mga estudyanteng may mas lumang edisyon ng mga banal na kasulatan.

Basahin ang pambungad sa Opisyal na Pahayag 2, at hanapin ang impormasyon na nauugnay sa pahayag na ito.

• Ano sa palagay ninyo ang mahalagang maunawaan mula sa talatang ito?

Ipaliwanag na ang linya na nagsasaad na, “Ang mga talaan ng Simbahan ay walang maibibigay na malinaw na kaalaman tungkol sa pinagmulan ng gawaing ito” ay kumakatawan sa opisyal na posisyon ng Simbahan sa restriksyon sa priesthood. Mahalaga na huwag tayong magbigay ng haka-haka kung bakit nagkaroon ng restriksyon.

Maaari mo ring banggitin ang pagtukoy sa 2 Nephi 26:33 sa unang pangungusap ng pambungad. Maaari mong anyayahan ang mga estudyante na basahin ang talatang ito at ibahagi ang mga katotohanan na mahalagang tandaan kapag iniisip ang patakarang ito.

Ang Opisyal na Pahayag 2 ay naglalaman ng opisyal na anunsyo ng paghahayag na natanggap ng Unang Panguluhan at ng Korum ng Labindalawang Apostol noong Hunyo 1, 1978.

Sa halip na pag-aralan ang Opisyal na Pahayag 2 bilang klase, maaari mong anyayahan ang mga estudyante na pag-aralan ito sa maliit na grupo. Kung mayroon nito, maaari nilang gamitin ang resources mula sa “The Long-Promised Day” (Liahona, Hunyo 2018, 34–37) para mas maunawaan nila ang ilan sa mga pahayag na ginawa sa Opisyal na Pahayag 2.

Basahin ang apat na talata sa ilalim ng pariralang “Mga Minamahal na Kapatid” sa Opisyal na Pahayag 2. Maaari ninyong markahan ang mga salita o mga parirala na sa palagay ninyo ay mahalaga.

• Ano ang pinakamahalaga para sa inyo mula sa binasa ninyo?

• Ano ang ipinauunawa o ipinadarama sa inyo ng karanasang ito tungkol sa Ama sa Langit at kay Jesucristo?

Epekto ng paghahayag

Ang paghahayag na ito ay nagkaroon ng malaking epekto sa kalalakihan at kababaihan sa iba’t ibang panig ng mundo. Hindi nagtagal matapos itong matanggap, nagpadala ng mga misyonero sa Africa. Mula noon, nagtayo ng mga templo sa kontinenteng iyon, at daan-daang libo ng tao na may lahing African sa buong mundo ang tumanggap ng mga ordenansa ng ebanghelyo para sa kanilang sarili at sa kanilang mga pumanaw na ninuno.

Ipaliwanag na kabilang sa mga naapektuhan ng paghahayag ay sina Helvécio at Rudá Martins. Maaari mong ipabasa nang malakas sa isang estudyante sa klase ang mga sumusunod na talata:

Matapos malaman ang paghahayag na nagkakaloob ng priesthood sa lahat ng karapat-dapat na kalalakihan, ginunita ni Helvécio:

“Nag-uumapaw sa galak ang puso ko. Nagpunta kami ni Rudá sa aming silid, lumuhod, at nanalangin. Umiyak kami at nagpasalamat sa ating Ama sa Langit para sa pangyayaring pinangarap lamang namin. Sa wakas ay sumapit na ang araw na pinakahinihintay, at nangyari ito sa panahon ng aming mortal na buhay” (The Autobiography of Elder Helvecio Martins, [1994], 69–70).

Hindi nagtagal matapos ang paghahayag noong 1978, nabuklod sa templo ang pamilya Martins. Si Helvécio ay naging lokal na priesthood leader at kalaunan ay tinawag na maglingkod bilang miyembro ng Pitumpu (tingnan sa “Elder Helvécio Martins of the Seventy,” 106).

• Paano kaya mag-iiba ang mga mangyayari sa pamilya Martins kung hindi nila piniling manampalataya kay Jesucristo?

• Ano ang natutuhan ninyo mula sa halimbawa ng pamilya Martins na makatutulong sa inyo sa mga walang katiyakang sitwasyon o mga tanong na hindi nasagot?

  Bilang bahagi ng inyong talakayan, maaari mong isulat sa pisara ang sumusunod na katotohanan: Kapag kumikilos tayo nang may pananampalataya sa mga walang katiyakang sitwasyon, inihahanda natin ang ating sarili na tanggapin ang mga pagpapala ng Panginoon.

• Ano ang ilang paraan kung paano kayo maaaring kumilos nang may pananampalataya kapag nahaharap kayo sa mga walang katiyakang sitwasyon o espirituwal na tanong?

  Kung kinakailangan, maaaring makakuha ang mga estudyante ng ideya sa talata 5–7 sa bahaging “Pagtatamo ng Espirituwal na Kaalaman” ng Doctrinal Mastery Core Document (2023).

• Paano kayo pinagpala ng Panginoon o ang mga taong kilala ninyo dahil sa pagkilos nang may pananampalataya?

Maaari kang magbahagi ng halimbawa mula sa buhay mo. Maaari mo ring ipanood ang video na “Struggling with the History of Race and the Priesthoodd” (4:04), na makikita sa ChurchofJesusChrist.org.

Bukod pa rito, maaari mong anyayahan ang mga estudyante na maghanap ng mga halimbawa mula sa mga banal na kasulatan na nagpapakita ng pagpapala ng Panginoon sa mga taong kumilos nang may pananampalataya. Kabilang sa mga halimbawa ang babaeng balo ng Zarefta (1 Mga Hari 17:8–24); ang pamilya ni Lehi (1 Nephi 2:2–5; 17:1–3); at si Propetang Joseph Smith (Joseph Smith—Kasaysayan 1:8–17).

Gumawa ng plano

Ipaalala sa mga estudyante ang sitwasyon o tanong mula sa kanilang buhay na naisip nila sa simula ng lesson. Pagkatapos ay anyayahan silang sagutin ang mga sumusunod na tanong sa kanilang study journal:

• Ano ang natutuhan o nadama mo ngayon na makatutulong sa iyo sa iyong mga walang katiyakang sitwasyon o mga espirituwal na tanong?

• Ano ang isang partikular na bagay na gagawin mo upang sumampalataya kay Jesucristo sa mga sitwasyong ito?

Karagdagang Resources

Saan ko matututuhan pa ang tungkol sa restriksyon sa priesthood at paghahayag na inanunsyo sa Opisyal na Pahayag 2?

Tingnan ang sumusunod na resources:

• “Pagpapaabot ng mga Pagpapala ng Priesthood” (Liahona, Hunyo 2018)

• “Restriksyon sa Priesthood at sa Templo” (Mga Paksa sa Kasaysayan ng Simbahan)

• “Race and the Priesthood” (Gospel Topics Essays)

• “Revelations in the Summer of 1978” (Personal na Sanaysay ni Elder Ahmad Corbitt ng Pitumpu)

Paano hiningi ng mga lider ng Simbahan ang patnubay ng Panginoon bago matanggap ang paghahayag na ito?

Naalala ni Pangulong Spencer W. Kimball (1895–1985), na siyang Pangulo ng Simbahan noong natanggap ang paghahayag:

Batid kong may isang bagay tayong kinakaharap na lubos na mahalaga para sa karamihan ng mga anak ng Diyos. … Araw-araw akong pumupuntang mag-isa sa mga silid sa itaas ng templo nang may lubos na kataimtiman, at iniaalay ko roon ang aking kaluluwa at iniaalay ang aking mga pagpupunyagi na maisulong ito. Nais kong gawin ang nais niya. Nakipag-usap ako sa kanya tungkol dito at nagsabing, “Panginoon, ang nais ko lamang ay ang tama. … Ang hangad lang po namin ay ang bagay na nais ninyo, at nais namin iyon kung nais po ninyo, at hindi kung kailan namin gusto.” …

Nilinaw sa akin ng Panginoon ang nararapat gawin. (Mga Turo ng mga Pangulo ng Simbahan: Spencer W. Kimball [2006],282–83)

Ano kaya ang naramdaman ng mga lider ng Simbahan na nakaranas ng paghahayag na ito?

Si Pangulong Gordon B. Hinckley (1910–2008), na miyembro ng Korum ng Labindalawang Apostol noong panahong natanggap ang paghahayag, ay nagpatotoo sa naranasan niya sa templo noong araw na iyon:

Sama-sama kaming nanalangin nang napakataimtim. Si Pangulong Kimball mismo ang nag-alay ng panalangin. … Nagkaroon ng isang sagrado at pinabanal na diwa sa silid. Para sa akin, isang lagusan ang sa wari ay nagbukas sa pagitan ng luklukan ng langit at ng nakaluhod at nagsusumamong propeta ng Diyos na sinamahan ng kanyang mga Kapatid. Naroon ang Espiritu ng Diyos. At sa kapangyarihan ng Espiritu Santo ay nadama ng propeta ang katiyakan na ang bagay na ipinagdarasal niya ay tama, …

Alam naming lahat na dumating na ang panahon para sa pagbabago at ang desisyong iyon ay nagmula sa kalangitan. Malinaw ang sagot. Nagkaroon kami ng ganap na pagkakaisa sa aming naranasan at naunawaan. (Gordon B. Hinckley, “Priesthood Restoration,” Ensign, Okt. 1988, 69–70)

Mga Karagdagang Aktibidad sa Pag-aaral

Mga Video

Maaari kang gumamit ng isa o mahigit pa sa mga sumusunod na video sa mga bahagi ng lesson. Ang mga video na ito ay makatutulong sa mga estudyante na makita ang mga halimbawa ng matatapat na Banal, bago at pagkatapos matanggap ang paghahayag na nag-alis sa mga restriksyon sa priesthood.

• “Long-Promised Day” (8:41). Ipinapakita sa video na ito ang mga Banal sa Ghana na naghintay nang matagal para sa pagkakataong taglayin ang priesthood.

• “Be One—A Celebration of the Revelation on the Priesthood” mula sa time code na 1:06:55 hanggang 1:09:14. Inilarawan ng mga Itim na Banal sa mga Huling Araw kung paano pinagpala ng priesthood ang kanilang buhay.

• “A New Day” (2:24). Ibinahagi ng mga Itim na Banal sa mga Huling Araw ang kanilang mga naging reaksyon sa paghahayag noong 1978.

Ipaliwanag ang aktibidad

Maaaring maranasan ng mga estudyante ang mga pagkakataon sa kanilang buhay na hihilingin sa kanila na ipaliwanag kung bakit nagkaroon ng mga restriksyon sa priesthood. Maaari mo silang hayaang praktisin ito sa klase. Bago sila magpraktis sa pagpapaliwanag, maaaring makatulong na ipaalala sa kanila na hindi natin alam ang mga dahilan kung bakit ipinatupad ang patakarang ito (tingnan sa Introduction to Official Declaration 2 [Pambungad sa Opisyal na Pahayag 2]).

Pagkatapos ay anyayahan ang mga estudyante na sagutin ang mga sumusunod na tanong. Maaaring magpraktis ang mga estudyante na sagutin ang mga ito kasama ang isang kapartner o sa maliit na grupo.

• Kung may nagtanong sa iyo kung bakit nagkaroon ng mga restriksyon sa priesthood at templo, ano sa palagay mo ang mga katotohanan na pinakamahalagang ipaunawa sa kanila? Bakit?

Kapag nakapagpraktis nang magpaliwanag ang mga estudyante, hilingin sa kanila na ibahagi kung aling mga katotohanan ang pinagtuunan nila. Kung kinakailangan, bigyang-diin na alam natin na mahal ng Diyos ang lahat ng Kanyang anak at inaanyayahan Niya ang lahat na lumapit sa Kanya (tingnan sa 2 Nephi 26:33). Alam din natin na hinahangad at tinatanggap ng mga propeta ang patnubay ng Panginoon sa pamamahala sa Kanyang Simbahan.

Halimbawa ng pagkilos nang may pananampalataya

Maaari mong ibahagi ang sumusunod na alaala mula kay Pangulong Dallin H. Oaks ng Unang Panguluhan. Anyayahan ang mga estudyante na alamin kung paano niya tinugunan ang kanyang mga tanong na hindi pa nasagot noong magkaroon ng restriksyon sa priesthood.

Nakita ko ang sakit at kabiguan na naranasan ng mga tao dahil sa mga restriksyong ito at ng mga taong … naghanap ng mga kadahilanan [para dito]. Pinag-aralan ko ang mga dahilang ibinigay noon at hindi ko madama ang pagpapatibay tungkol sa katotohanan ng anuman sa mga ito. Bilang bahagi ng aking mapanalanging pag-aaral, natutuhan ko na, karaniwan, ang Panginoon ay bihirang nagbibigay ng mga dahilan para sa mga kautusan at tagubilin na ibinibigay Niya sa Kanyang mga tagapaglingkod. Nagpasiya ako na maging matapat sa ating mga lider na propeta at manalangin—tulad ng ipinangako mula sa simula ng mga restriksyong ito—na darating ang araw na matatamasa ng lahat ang mga pagpapala ng priesthood at ng templo. (“President Oaks Remarks at Worldwide Priesthood Celebration,” newsroom.ChurchofJesusChrist.org)

• Ano ang natutuhan ninyo mula sa tugon ni Pangulong Oaks na makatutulong sa inyo kapag may mga tanong kayo tungkol sa isang doktrina o patakaran ng Simbahan?

• Sa inyong palagay, bakit mahalagang maging tapat sa ating mga lider na propeta habang hinihintay natin ang mga sagot sa ating mga tanong?

Pagpiling manampalataya sa halip na mag-alinlangan

Maaari mong ipanood ang “Huwag Mag-alinlangan, Kundi Maging Mapagpaniwala” mula sa time code na 15:26 hanggang 20:28. Sa video na ito, inilarawan nina Elder Dale G. Renlund ng Korum ng Labindalawang Apostol at Sister Ruth L. Renlund ang mga halimbawa ng dalawang tao na magkaiba ng itinugon sa kanilang mga tanong sa ebanghelyo, ang isa ay may pag-aalinlangan at ang isa ay may pananampalataya. Pagkatapos ipanood ang video, anyayahan ang mga estudyante na ibahagi ang mga turo o kaalamang pinakamahalaga para sa kanila.