Lesona 166: Fifehezana fotopampianarana: Mitady valiny ho an’ireo fanontaniako

Manao asa am-pinoana mba hahitana valiny

Mahazo fahalalana ara-panahy, Tapany faha 2

Manasa antsika hitodika Aminy sy hanao asa amim-pinoana mandritra ny fiainantsika i Jesoa Kristy. Manan-danja ny hifantohantsika amin’ny Mpamonjy, indrindra fa rehefa tsy afaka mamaly mora foana ireo fanontaniana na mamaha ireo toe-javatra iainana isika. Afaka manampy ny mpianatra hahatakatra ny fomba anaovana asa amim-pinoana an’i Jesoa Kristy ity lesona ity rehefa mikatsaka valiny amin’ny fanontaniany izy ireo.

Ireo sahanasa fianarana azo atao

Ny maha-zava-dehibe ny fametrahana fanontaniana

Azonao atao ny manoratra ity fanontaniana avy amin’ny Filoha Dieter F. Uchtdorf manaraka ity eny amin’ny solaitrabe alohan’ny fotoam-pianarana. Asao ny mpianatra, rehefa miditra izy ireo, hisaintsaina ny fomba mety hamalian’izy ireo ny fanontaniany sy ny antony hamalian’izy ireo araka izany fomba izany. Rehefa avy omena fotoana hisaintsainana ny mpianatra, dia asao izy ireo hizara ny valintenin’izy ireo.

Ny Filoha Dieter F. Uchtdorf, izay tao amin’ny Fiadidiana Voalohany tamin’izany, dia nametraka ity fanontaniana manaraka ity:

Mety ve ny manana fanontaniana mikasika ny Fiangonana na ny fotopampianarany? (Dieter F. Uchtdorf, “The Reflection in the Water” [Fampaherezam-panahin’ny Departemantan’ny Fampianarana an’ny Fiangonana, 1 nôv. 2009], thechurchnews.com)

• Ahoana no hamalianao izany fanontaniana izany? Nahoana no izany no hamalianao azy?

Rehefa mamaky ny ambin’ny teny nambaran’ny Filoha Uchtdorf ianao, dia tadiavo ny fomba azo ampitahana ny valin-teninao amin’ny azy.

Ry tanora namako, olona mpametram-panontaniana isika … satria fantatsika fa mitondra any amin’ny fahamarinana ny fametrahana fanontaniana. Izany no fomba niantombohan’ny Fiangonana—avy tamin’ny zatovolahy iray izay nanana fanontaniana maro. Raha ny marina dia tsy azoko antoka hoe afaka mahita ny fahamarinana ny olona iray raha tsy mametraka fanontaniana. …

… Ny fametrahana fanontaniana no hiavian’ny fijoroana ho vavolombelona. … Ny fametrahana fanontaniana dia tsy mariky ny fahalemena; fa fiantombohan’ny fitomboana. (Dieter F. Uchtdorf, “The Reflection in the Water” [Fampaherezam-panahin’ny Departemantan’ny Fampianarana an’ny Fiangonana, 1 nôv. 2009], thechurchnews.com)

• Inona avy no ohatra hitanao tao amin’ny sorara masina, na ny tantaran’ny Fiangonana, na ny fiainanao manokana ka maneho fa tian’ny Ray any An-danitra sy i Jesoa Kristy hametraka fanontaniana isika?

Mety hahita fampahalalana vaovao momba ny fotopampianarana, ny fomba fanao, na ny tantaran’ny Fiangonana izay toa saro-takarina isika indraindray. Mety hanana fanontaniana sarotra valiana ihany koa isika. Tsy mitovy ny hoe manana fanontaniana sy ny misalasala. Afaka mampitombo ny fahatakarantsika sy ny fijoroana ho vavolombelona momba an’i Jesoa Kristy ny fametrahana fanontaniana amim-pahatokiana. Mety hisy fiantraikany ratsy amin’ny finoantsika Azy ny fanomezana vahana ny fisalasalana (jereo ny Lohahevitra sy fanontaniana, “Famaliana fanontaniana momba ny filazantsara,” topics.ChurchofJesusChrist.org).

Asao ireo mpianatra hieritreritra ireo fanontaniana mety ananany momba ny Fiangonana na ny fotopampianarany izay tsy hain’izy ireo valiana mora foana. Azonao asaina ny mpianatra hanoratra ireo fanontaniana ireo ao amin’ny diary fandalinan’izy ireo. Asao izy ireo hitady ato amin’ity lesona ity ireo fahamarinana izay afaka manampy azy ireo rehefa misy fanontaniana sarotra mipoitra.

Mamaly fanontaniana sarotra

Manolora rafi-tantara amin’ny kilasy mba hanehoana ny maha-zava-dehibe ny fametrahana fanontaniana sy hanomezana maodely amin’ny fomba anaovana asa amim-pinoana. Ampiasao ny famariparitana eo ambany na alefaso ilay horonan-tsary hoe “Acquiring Spiritual Knowledge: Madison’s Story” izay hita ao amin’ny ChurchofJesusChrist.org, manomboka eo amin’ny kaodim-potoana 0:00 hatramin’ny 1:44.

Nianaran’i Madison nandritra ny seminera fa nanao fampakarana vady maro i Joseph Smith. Nisy fanontaniana vitsivitsy tonga tao an-tsainy rehefa avy nandre izany izy.

Azonao atao ny mizara ny kilasy ho mpianatra mpiara-miasa na vondrona kely maromaro mba hanampiana ny mpianatra hifanakalo hevitra amin’ireto fanontaniana manaraka ireto. Afaka mizara ny valin-tenin’izy ireo amin’ny kilasy izy ireo rehefa avy mifanakalo hevitra amin’ireo fanontaniana ireo.

• Inona avy no zavatra ratsy sy tsara azon’i Madison natao teo anatrehan’ny fanontaniany?

• Nahoana ianao no mahatsapa fa ho tsara na ho ratsy izany fomba izany?

Mety hilaina ny fampiasana ireo fitsipika hahazoana fahalalana ara-panahy rehefa tojo fanontaniana sarotra isika.

Mety ho efa manana traikefa tany aloha amin’ny fandalinana ireo fitsipika hahazoana fahalalana ara-panahy amin’ny seminera ny mpianatra sasany. Anontanio ny mpianatra, raha izany no izy, raha afaka manonona tsy an-kijery ireo fitsipika telo hahazoana fahalalana ara-panahy izy ireo. Asao izy ireo hamaky ny andiam-pehezanteny 4 raha ilaina, ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023). Hevero ny hanoratra ireto fitsipika ireto eny amin’ny solaitrabe:

• Manao asa amim-pinoana.

• Mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay.

• Mikatsaka fahatakarana bebe kokoa amin’ny alalan’ireo loharanom-pahalalana voatondron’ Andriamanitra.

Manao asa amim-pinoana

Hiompana amin’ny fitsipiky ny fanaovana asa amim-pinoana ny fianarana ataontsika androany.

Vakio ny Fotopampianarana sy Fanekempihavanana 6:36. Fantaro ny fomba ahafahan’io fanasana avy amin’ny Mpamonjy io manampy antsika hanao asa amim-pinoana.

• Inona avy no teny na andian-teny ao amin’io andininy io afaka manampy an’i Madison na ny hafa izay manana fanontaniana momba ny filazantsara sy ny Fiangonana?

• Nahoana no mety hanampy ireo teny na andian-teny ireo?

Ampio ny mpianatra hamantatra ity fahamarinana manaraka ity, rehefa mizara ny valin-teniny izy ireo: Rehefa manana fanontaniana tsy voavaly isika, dia afaka mibanjna an’i Jesoa Kristy ary tsy misalasala.

Hazavao amin’ny mpianatra fa misy ohatra maro amin’ny fomba ahafahantsika mibanjina an’i Jesoa Kristy ao amin’ny Tahirin-kevitra fototra ho an’ny fifehezana fotopampianarana.

Vakio ny andiam-pehezan-teny 5–7 ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana, hitadiavana ireo fomba ahafahanao manao asa amim-pinoana rehefa manana fanontaniana ara-panahy ianao.

• Iza amin’ireo teny nambara avy ao amin’ireo andiam-pehezan-teny ireo no tsapanao fa mety hanampy ny olona iray tojo fanontaniana sarotra? Nahoana?

Hevero ny hanasa ny mpianatra hitady soratra masina izay manohana ny valin-tenin’izy ireo. Ohatra, azon’izy ireo jerena ny 2 Nefia 32:8–9 na ny Jakoba 1:5–6raha milaza hoe vavaka ny mpianatra. Azon’izy ireo jerena ny 2 Nefia 32:3 na ny 2 Timoty 3:15–17raha miresaka momba ny fandalinana soratra masina izy ireo.

Mitadiava fahafahana mandeha ho azy hampahatsiahivana ny mpianatra ny maha-zava-dehibe ny fanaovana ireo asa ireo omban’ny fifantohana amin’i Jesoa Kristy. Mety ho azonao atao ny manasa ny mpianatra hihevitra ny fomba ahafahan’ireo asa hitan’izy ireo ho ohatra amin’ny fitodihana amin’i Jesoa Kristy.

Ohatra amin’ny fanaovana asa amim-pinoana

Zarao ny tsoakevitra tamin’ilay tantara momba an’i Madison. Asao ny mpianatra hijery ny fomba nisafidianan’i Madison hanao asa amim-pinoana rehefa nitady ny valin’ny fanontaniany izy. Azonao alefa ilay horonan-tsary hoe “Acquiring Spiritual Knowledge: Madison’s Story” manomboka eo amin’ny kaodim-potoana 1:44 hatramin’ny 8:35; raha tsy misy ilay horonan-tsary, dia vakio ity andiam-pehezan-teny manaraka ity.

Nanatona ny mpampianany i Madison rehefa nirava ary nanontany ny antony nampakaran’i Joseph Smith vady maro. Namporisihin’ny mpampianatra azy izy hanohy hiaina ny filazantsara sy hanolotra vavaka amin-kitsimpo eo am-pitadiavana valiny. Naharay fitariham-panahy i Madison fa hahazo valiny amin’ny fotoanany, rehefa nivavaka sy nanadihady ny soratra masiny izy. Nanohy nanao asa tamim-pinoana i Madison ary niantehitra tamin’ny fijoroana ho vavolombelona nananany momba ny Ray any An-danitra sy ny drafiny, dia nanomboka nahazo valiny tsikelikely izy izay nanampy azy hahatsapa fiadanana. Nahatsapa i Madison fa nitombo ny fifandraisany tamin’ny Ray any An-danitra sy i Jesoa Kristy nandritra ilay dingana. Lasa fantany fa hanome ny valinteny sy ny fiadanana katsahintsika Andriamanitra, rehefa manao asa amim-pinoana isika .

Asao ny mpianatra, ao anatin’ny fifanakalozan-kevitra amin’ity fanontaniana manaraka ity, hanazava ny hoe iza amin’ireo asa nataon’i Madison no mifandray amin’ny zavatra nohalalinin’izy ireo tao amin’ny Tahirin-kevitra fototra ho an’ny fifehezana fotopampianarana.

• Ahoana no nanehoan’ny asa nataon’i Madison ny finoany an’i Jesoa Kristy?

• Inona no azontsika ianarana mikasika ny Ray any An-danitra sy i Jesoa Kristy avy amin’ny zavatra niainan’i Madison?

Asao ny mpianatra hieritreritra sy hiresaka ireo fotoana nitahiana azy ireo noho ny fanaovana asa tamim-pinoana rehefa nanana fanontaniana sarotra. Dia asao avy eo ny mpianatra hieritreritra ny zavatra nianarany sy tsapany androany ka afaka manampy azy ireo amin’ireo toe-javatra iainan’izy ireo manokana sy ny fanontaniany. Hevero ny hanome azy ireo fotoana hiraketana an-tsoratra ny eritreritra sy ny zavatra tsapan’izy ireo ao amin’ny diary fandalinan’izy ireo.

Farano amin’ny fijoroana ho vavolombelona anananao momba ny maha-zava-dehibe ny fanaovana asa amim-pinoana mifantoka amin’i Jesoa Kristy rehefa mikatsaka valiny amin’ireo fanontaniantsika isika.

Loharanom-pitaovana fanampiny

Ahoana no ahafahako mampitombo ny finoako an’i Jesoa Kristy?

Nampianatra ny Filoha Russell M. Nelson hoe:

Manaova asa amim-pinoana. Inona no hataonao raha toa ka nanam-pinoana bebe kokoa ianao? Saintsaino izany. Soraty ny momba izany. Ary avy eo dia mandraisa finoana misimisy kokoa amin’ny alalan’ny fanaovana zavatra izay mitaky finoana bebe kokoa . (Russell M. Nelson, “Nitsangana i Kristy; hamindra tendrombohitra ny finoana Azy,” Liahona, mey 2021, 103)

Nampianatra izao ny Loholona Dale G. Renlund ao amin’ny Kôlejin’ny Apôstôly Roambinifolo:

Ny fanaovan’ny olona iray asa amim-pinoana no hany fomba hahafahan’ny finoana hitombo. Mitranga avy amin’ny fanasana nomen’ny hafa ireo fihetsika ireo, saingy tsy afaka “mampitombo” ny finoan’olon-kafa isika na miantehitra amin’ny hafa irery ihany mba hampitombo ny an’ny tena manokana. Tsy maintsy misafidy isika ny hanao zavatra manorina finoana mba hahafahan’ny finoantsika hitombo, toy ny mivavaka, mandalina soratra masina, mandray ny fanasan’ny Tompo, mitandrina ny didy ary fanompoana ny hafa. (Dale G. Renlund, “Fanoloran-tena tsy voahozongozona amin’i Jesoa Kristy,” Liahona, nôv. 2019, 23)

Dia ahoana raha toa ka manana fanontaniana toa tsy ahitam-baliny aho?

Nizara izao manaraka izao ny Filoha M. Russell Ballard ao amin’ny Kôlejin’ny Apôstôly:

Fa raha hiaina mandritra ny fotoana ela toy izay efa niainako izay ianareo dia ho fantatrareo fa misy ny fomba izay mampivaha ho azy ny olana. Mety hisy hevi-baovao na fanambarana azo avy amin’ny fanentanam-panahy hitondra fanazavana vaovao mikasika ny olana iray. Tsarovy fa ny Famerenana amin’ny laoniny dia tsy tranga iray fa mbola mitohy mivelatra hatrany.

Aza ariana mihitsy ireo fahamarinana lehibe nambara tamin’ny alalan’ny Mpaminany Joseph Smith. Aza mitsahatra mamaky sy mandalina ary mampihatra ny fotopampianaran’i Kristy voarakitra ao anatin’ny Bokin’i Môrmôna.

Aza hadinoina velively ny manome fotoana ho an’ny Tompo amin’ny alalan’ny fiezahana marina ny hahatakatra ny zavatra izay efa nambaran’ny Tompo. Araka ny notenenin’ny Loholona Neal A. Maxwell, namako malala sy mpiara-miasa tamiko teo aloha indray mandeha hoe: “Tsy tokony hieritreritra isika … hoe satria tsy haintsika hazavaina ny zavatra iray, dia tsy azo hazavaina” [Not My Will, but Thine (1988), 124].

Koa mialoha ny handraisanareo izany safidy mampidi-doza ara-panahy ny hiala izany, dia mamporisika anareo aho mba hijanona ka hieritreritra tsara mialoha ny hamelanareo na inona na inona zavatra izay nahatonga anareo hahazo fijoroana ho vavolombelona momba ny Fiangonan’i Jesoa Kristy naverina tamin’ny laoniny tany am-boalohany. Mijanòna dia diniho ny zavatra izay efa tsapanareo tato sy ny antony nahatsapanareo izany. Eritrereto ireo fotoana izay efa nijoroan’ny Fanahy Masina ho vavolombelona taminareo momba ny fahamarinana mandrakizay. (M. Russell Ballard, “Hankany amin’iza moa isika?,” Liahona, nôv. 2016, 91)

Sahanasa fianarana fanampiny

Rafi-tantara hafa azo ampiasaina

Azonao ampiasaina ny iray amin’ireto manaraka ireto, ho solon’ilay rafi-tantara ao amin’ilay lesona:

1. Soratra masina: Asao ny mpianatra handalina ohatra iray avy amin’ny soratra masina momba ny olona nanao asa tamim-pinoana rehefa nanana fanontaniana na tao anatina toe-javatra niainana sarotra. Mety ho isan’ny ohatra amin’izany i Joseph Smith (jereo ny Joseph Smith—Tantara 1:8–18), i Nefia (jereo ny 1 Nefia 3:31–4:7), i Lehia sy i Sarià (jereo ny 1 Nefia 5:1–8), na i Petera sy ny Apôstôly (jereo ny Jaona 6:59–69).

2. Tantaran’ny Fiangonana: Mampiasà ohatra iray avy amin’ny tantaran’ny Fiangonana izay maneho ireo fitsipiky ny fanaovana asa amim-pinoana. Mety ho ny fihetsika nasehon’i Brigham Young sy i Joseph rahalahiny izany tantara izany, rehefa nanana olana tamin’ny fanakarana ny fanambarana azon’i Joseph Smith momba ny ambaratongam-boninahitra telo izy ireo, izay hita ao amin’ny Fotopampianarana sy Fanekempihavanana 76. (Jereo ny La Vision,” Révélations dans leur contexte, izay hita ao amin’ny ChurchofJesusChrist.org.)

3. Ilay mpandrafi-bato: Jereo ilay horonan-tsary hoe “Act in Faith: The Stonemason” (4:57). Ampio ny mpianatra hahatakatra ny fomba ahafahan’izy ireo mifikitra amin’ireo fahamarinana fantatr’izy ireo rehefa mikatsaka ny hahatakatra ireo fanontaniana momba ny filazantsara izay ananany izy ireo.

4. Liahona: Raha manana fitaovana nomerika ny mpianatra, dia asao izy ireo hifantina laharana vao haingana ao amin’ny gazetiboky Liahona ary hitady ilay lahatsoratra hoe “Fanehoana ny finoana”. Omeo toromarika izy ireo hisafidy ny “Tohin’ilay tantara” (amin’ny endrika nomerika fotsiny ihany) any amin’ny faran’ny pejy ary hamaky ilay tantara. Afaka mizara ny tantara izay hitany amin’ny olona eo akaikiny na amin’ny iray kilasy ny mpianatra ary mamantatra ny olana natrehan’ilay olona sy ny fomba nampiharany ireo fitsipiky ny fanaovana asa amim-pinoana, rehefa vitany izany.