Lesona 164: Fifehezana fotopampianarana: Mitady valiny ho an’ireo fanontaniako

Hamafiso ny fototra ara-panahinao

Fampahafantarana ny fifehezana fotopampianarana

Amin’ny maha-mpianatr’i Jesoa Kristy antsika amin’ny andro farany dia miatrika loza sy zava-tsarotra ara-panahy maro isika. Mba hijoroana ho matanjaka manoloana ny fitaoman’ny fahavalo dia tsy maintsy manorina ny fiainantsika eo amin’ilay hany fototra azo antoka isika, dia i Jesoa Kristy. Ity lesona ity dia hanampy ireo mpianatra hahatakatra ny fomba ahafahan’ny fifehezana fotopampianarana mitahy ny fiainan’izy ireo sy manampy azy ireo hanorina ny fototra ara-panahin’izy ireo eo amin’i Jesoa Kristy.

Sahanasa fianarana azo atao

Ity lesona ity dia azo ampiasaina hampahafantarana ny mpianatra ny tanjon’ny fifehezana fotopampianarana. Azo ampiasaina ihany koa izany mba hampahatsiahivana ireo mpianatra izay mahafantatra tsara ny fifehezana fotopampianarana mikasika ny lanjan’io ampahany lehibe amin’ny fianaran’izy ireo ao amin’ny seminera io. Azonao atao ny mampianatra ity lesona ity amin’ny fiandohan’ny taona vaovao ao amin’ny kalandrie, kanefa azonao atao ihany koa ny mamerina mijery izany indray raha toa ka mampianatra vondrona mpianatra vaovao ianao.

Ny “Fiofanana momba ny fifehezana fotopampianarana” ho an’ny mpampianatra dia afaka ny ho loharano manampy mba hahatakarana ny fomba hampiharana ny fifehezana fotopampianarana ao amin’ny fampianaranao. Io fiofanana io dia azo jerena ao amin’ny ChurchofJesusChrist.org.

Ny fototra ara-panahintsika

Ampio ny mpianatra hahatakatra ny maha-zava-dehibe ny fanorenana ny fototra ara-panahiny eo amin’i Jesoa Kristy. Azonao atao izany amin’ny alalan’ny fifanakalozan-kevitra momba ny fanavaozana ny Tempolin’i Salt Lake, ka anantitranterana ny asa natao mba hanamafisana ny fototra hiadiana amin’ny horohoron-tany sy ireo loza hafa mety hitranga. Azonao atao ny mampiseho sary. Azonao aseho koa ny “Filoha Nelson: Fototra iorenan’ny tempoly” (2:03).

• Nahoana araka ny eritreritrao no betsaka ny fotoana sy loharanom-pitaovana nolaniana tamin’ny fanavaozana ny Tempolin’i Salt Lake sy ny fanatsarana ny fototra iorenany?

• Ahoana no azontsika ampitahana ny zavatra natao tamin’ny tempoly sy ny fiainantsika manokana?

Vakio ny Helamàna 5:12, ka tadiavo ireo fahamarinana sy fitsipika izay afaka manampy anao hahatakatra kokoa ny antony ilana fototra ara-panahy miorina eo amin’i Jesoa Kristy.

• Inona no lasa takatrao momba ny antony ilantsika ny hery avy amin’i Jesoa Kristy tamin’ny alalan’io andinin-tsoratra masina io?

• Inona no fahamarinana nianaranao avy amin’io andininy io mikasika ny zavatra mety hitranga rehefa mampifantoka ny fiainantsika amin’ny Mpamonjy isika?

  Azonao atao ny mangataka ireo mpianatra hanoratra ny zavatra nianarany ao anaty fehezan-teny iray eny amin’ny solaitrabe. Azonao omena fahafahana hanazava ny valin-teniny izy ireo avy eo. Mety hiteny zavatra toy izao izy ireo: raha manorina ny fototra ara-panahintsika eo amin’i Jesoa Kristy isika dia tsy hianjera mihitsy.

• Inona araka ny eritreritrao no dikan’ny hoe manorina ny fototra ara-panahintsika eo amin’i Jesoa Kristy?

Azon’ny mpianatra atao ny mizara hevitra toy ny fampifantohana ny fiainantsika amin’i Jesoa Kristy sy ny fampianarany, ny fanarahana ny ohatra nasehony ary ny fibebahana tsy tapaka.

Ny Filoha Russell M. Nelson dia namariparitra ny antony ilantsika manorina ny fototra iorenantsika eo amin’i Jesoa Kristy:

Fotoana ho antsika izao mba handraisana fepetra tsy mahazatra—angamba fepetra mbola tsy noraisintsika mihitsy taloha—entina hanamafisana orina ireo fototra ara-panahintsika. Mitaky fepetra tsy manam-paharoa ny fanamby tsy manam-paharoa.

Ry rahalahy sy anabavy malalako, andro farany izao. Raha tiantsika ny hahatohitra ireo fahasarotana sy ireo fampahoriana ho avy, dia tsy maintsy manana fototra ara-panahy mafy orina miorina eo amin’ny vatolampin’ny Mpanavotra antsika, Jesoa Kristy isika. …

Nanambara ny Tompo fa na dia eo aza ireo fanamby tsy manam-paharoan’izao andro izao, dia tsy mila mikoa eo anatrehan’ireo fanahiana amin’izao vanim-potoana izao ireo izay manorina ny fotony eo amin’i Jesoa Kristy, sy nianatra ny fomba fisintonana ny heriny. (Russell M. Nelson, “Ny tempoly sy ny fototra ara-panahinao,” Liahona, nôv. 2021, 93)

• Inona no lasa takatrao momba ny antony ilanao fototra ara-panahy matanjaka avy amin’io teny nambara io?

Asao ireo mpianatra hieritreritra ny zavatra misy eo amin’ny fiainany izay manampy azy ireo hahafantatra ny antony ilana ny fanorenana ny fototra iorenany eo amin’ny Mpamonjy. Avy eo dia asao izy ireo handinika ny tanjaky ny fototra ara-panahy ananany. Fomba iray hanaovana izany ny fanehoana ity fanombanan-tena manaraka ity, izay mifandray amin’ny vokatra samihafa azo avy amin’ny fifehezana fotopampianarana izay hianaran’ny mpianatra ato amin’ity lesona ity. Afaka manomban-tena mangina na manoratra ny valiny ao amin’ny diary fandalinany ireo mpianatra.

Ho an’ny tsirairay amin’ireto teny ambara manaraka ireto dia tombano ny tenanao amin’ny maridrefy 1 (tena tsy manaiky) hatramin’ny 5 (manaiky tanteraka).

1. Miantehitra amin’i Jesoa Kristy sy ny fampianarany aho rehefa alaim-panahy na taomin’ny fahavalo.

2. Haiko ny fomba handraisana ny valin’ireo fanontaniako momba ny fotopampianarana, na ny fanontaniako manokana, na mahakasika ny fiarahamonina, na momba ny tantara.

3. Afaka manazava ny fotopampianaran’i Jesoa Kristy amin’ny hafa aho.

4. Afaka mahita andalan-tsoratra masina manan-danja izay mirakitra fotopampianaran’i Kristy aho.

5. Miantehitra amin’ny ohatra nasehon’i Jesoa Kristy sy ny fampianarany aho mba hanampy ahy amin’ny fanaovako safidy isan’andro.

Fifehezana fotopampianarana

Hazavao fa ny iray amin’ireo fomba ahafahan’ny mpianatra manorina ny fototr’izy ireo eo amin’i Jesoa Kristy amin’ny alalan’ny traikefany ao amin’ny seminera ny fifehezana fotopampianarana. Raha manana mpianatra efa nandray anjara tamin’ny seminera ianao dia angataho izy ireo mba hanazava ny zavatra fantany momba ny fifehezana fotopampianarana. ChurchofJesusChrist.org

Vakio ny fizarana “Fampahafantarana ny fifehezana fotopampianarana” ao amin’ny Tahirin-kevitra fototra ho an’ny fifehezana fotopampianarana (2023). Eritrereto ny fomba ahafahan’ny fandraisana anjara amin’ny fifehezana fotopampianarana manampy anao hanorina fototra mafy orina eo amin’i Jesoa Kristy.

Azonao atao ny manasa ireo mpianatra hiara-hamaky ao anaty vondrona kely. Ny mpianatra iray dia afaka miandraikitra ny fanendrena ireo mpianatra ao amin’ny vondrona hamaky andiam-pehezan-teny isan-karazany, ny iray hafa dia azo tendrena hanao lisitra ireo zavatra manan-danja izay hita, ary ny iray hafa dia afaka mitatitra ny zavatra hitan’ilay vondrona amin’ny iray kilasy.

• Inona avy ireo vokatra roa lehibe azo avy amin’ny fifehezana fotopampianarana?

  Ataovy izay hahatakaran’ny mpianatra fa ireo vokatra ireo dia ny (1) fianarana sy fampiharana ireo fitsipika hahazoana fahalalana ara-panahy, ary ny (2) fifehezana ireo andalan-tsoratra masina fifehezana fotopampianarana sy ny fotopampianaran’ny filazantsaran’i Jesoa Kristy izay ampianariny.

  Mety hanampy ny manazava fa handray anjara amin’ny lesona mandritra ny taona izay mifantoka amin’ireo vokatra andrandraina ireo ny mpianatra. Hanana fahafahana izy ireo hanazava ny fotopampianarana amin’ny alalan’ny teniny manokana, sy hitadidy ireo andian-teny manan-danja ao amin’ny andalan-tsoratra masina fifehezana fotopampianarana ary hampiasa ireo fitsipika hahazoana fahalalana ara-panahy mba hampiharana ny fotopampianarana amin’ny toe-javatra tena misy eo amin’ny fiainana.

• Amin’ny fomba ahoana araka ny eritreritrao no ahafahan’ny fifehezana fotopampianarana manampy anao hanorina ny fototra iorenanao eo amin’i Jesoa Kristy?

• Amin’ny fomba ahoana no mety hiarovan’ny fandraisana anjara amin’ny fifehezana fotopampianarana anao amin’ireo fanamby ho avy sy ny fanafihan’ny fahavalo?

Ampio ny mpianatra hahatakatra fa ny ezaka amin’ny fandraisana anjara mavitrika amin’ny fifehezana fotopampianarana dia afaka manampy azy ireo hitodika amin’i Jesoa Kristy amim-patokiana kokoa. Angataho ireo mpianatra izay efa nandray anjara tamin’ny fifehezana fotopampianarana teo aloha mba hizara ny fomba nitahian’izany ny fiainan’izy ireo. Mijoroa ho vavolombelona fa rehefa miantehitra amin’i Jesoa Kristy izy ireo dia ho afaka hiatrika ireo olana mihatra aminy ankehitriny sy hiomana amin’ireo izay ho tonga amin’ny hoavy.

Loharanom-pitaovana fanampiny

Inona no azoko ianarana avy amin’ny fanorenana ny fototry ny tempoly?

Nampianatra toy izao ny Loholona Donald L. Hallstrom ao amin’ny Fitopololahy:

Hiresaka momba ireo fototra iorenana aho anio hariva amin’ny alalan’ny fampiasana ny tempoly ho toy ny fanoharana. Mahakasika ny tefibika sy ny fanorenana ny tempoly tsirairay dia misy asa manan-danja izay tsy ho hita mora foana rehefa vita ilay tetikasa—dia ny fototra izany. Ohatra, … ny Tempolin’i Philadelphie Pennsylvanie, izay … [rehefa] vita, … dia ho 25 metatra ny haavony eo amin’ny tafony ary hiakatra 60 metatra hatreo an-tampon’ny anjely Môrônia. Na … dia miezinezina sy mijoalajoala aza io trano io, dia mbola hiharan’ny herin’ny rivotra manimba sy ny rano misosoka any ambany tany foana. Ireo toe-javatra mahery vaika ireo raha tsy voatily dia mety hanimba mafy na handrava mihitsy aza an’io trano manana ny hajany io.

Noho ny fahafantaran’ireo injeniera fa hamely tsy tapaka ilay tempoly ireo hery ireo, dia namolavola drafitra izy ireo ary nandavaka lavaka lalina 9,75 metatra any ambanin’ny fototr’ilay rafitra iray manontolo ny mpiasa mpiantoka ny asa. Nolavahana tao anaty granitan’i Pennsylvanie ilay lavaka mba hanome fototra tsy azo hozongozonina izay hanaovana ny fanorenana. Avy eo dia miraikitra amin’ilay vato granita amin’ny alalan’ny vatofantsika ny andry fototra sy ny fototra mba hahatohitra na dia rivotra mahery sy rano misosoka mahery vaika any ambany tany aza. Milentika 15 hatramin’ny 69 metatra ao anaty granita ireo vatofantsika ireo ary nohenjanina 17,5 kilao isaky ny santimetatra toradroa. Mirefy 4,6 metatra ny elanelan’ireo vatofantsika amin’ny lafiny roa.

Manome izany fampahalalana izany amin’ny antsipiriany aho mba hampianarana izao: rehefa manorina ny fiainantsika maharitra (ary antenaina fa ho mandrakizay) isika izay tsy tahaka ny fanorenana rafitra iray (izay tsy maharitra), dia matetika tsy miraharaha loatra ny haitao sy ny fanorenana ny fototra iorenantsika. Vokatr’izany dia tena tandindomin’ny hery mampidi-doza isika ary mora voahozongozon’izany. (Donald L. Hallstrom, “How Firm a Foundation” [Fampaherezam-panahy ho an’ny tanora avy amin’ny Departemantan’ny Fampianarana an’ny Fiangonana, 2 nôv. 2014], broadcasts.ChurchofJesusChrist.org)

Inona no tanjon’ny fifehezana fotopampianarana?

Nilaza izao manaraka izao ny Filoha M. Russell Ballard tao amin’ny Kôlejin’ny Apôstôly Roambinifolo raha niresaka tamin’ireo mpampianatra seminera sy institiota:

Nanaiky ny famoahana tetikasa iray ao amin’ny seminera izay antsoina hoe Fifehezana Fotopampianarana ny Filankevitry ny Fampianarana vao haingana. … Ity tetikasa vaovao ity dia hifantoka amin’ny fanorenana sy amin’ny fanamafisana ny finoan’ireo mpianatsika an’i Jesoa Kristy ary amin’ny fampatanjahana azy ireo mba hitombo fahaizana miaina sy mampihatra ny filazantsara eo amin’ny fiainan’izy ireo. Amin’ny alalan’ny fisintonana lesona avy amin’ny soratra masina sy ny tenin’ireo mpaminany, dia hianatra ny fomba fanaovana asa amim-pinoana an’i Kristy mba hahazoana fahalalana ara-panahy sy hahatakarana ny filazantsarany izy ireo. Ary hanana fahafahana hianatra ny fomba hampiharana ny fotopampianaran’i Kristy sy ireo fitsipiky ny filazantsara izy ireo amin’ireo fanontaniana sy olana izay henony sy hitany isan’andro eo anivon’ny mpiara-mianatra aminy sy ao amin’ny tambajotran-tserasera.

Tena tsara ary mifanojo amin’ny fotoana ilàna azy ity tetikasa ity. Hisy fiantraikany tena tsara eo amin’ireo tanorantsika izany. (M. Russell Ballard, “Ireo zavatra azo atao sy andraikitry ny mpampianatra ao amin’ny DFF amin’ny taonjato faha-21” [takariva hiarahana amin’ny Manampahefana Ambony, 26 feb. 2016], broadcasts.ChurchofJesusChrist.org)

Sahanasa fianarana fanampiny

Sahanasa fanisiana marika soratra masina fifehezana fotopampianarana

Mampiasà sahanasa mahafinaritra iray hanampiana ireo mpianatra hanisy marika ireo andalan-tsoratra masina fifehezana fotopampianarana. Asao izy ireo hijery ny “Andalan-tsoratra masina fifehezana fotopampianarana sy ireo andian-teny fototra avy ao amin’ny soratra masina” ao amin’ny Tahirin-kevitra fototra ho an’ny fifehezana fotopampianarana (2023). Afaka mipetraka eo akaikin’ny namana iray ny mpianatra rehefa manisy marika ireo andalan-tsoratra masina ireo ary avy eo dia mizara ny valin-teniny amin’ny fanontaniana iray izay afaka manampy ireo mpianatra hifankahafantatra kokoa. Avy eo dia afaka mifamadika namana mpiara-miasa ny mpianatra ary mamerina izany dingana izany mandra-panisiana marika ny isan’ireo andalan-tsoratra masina niriana.

Fitadidiana soratra masina

Azonao asaina ireo mpianatra hijery ny “Andalan-tsoratra masina fifehezana fotopampianarana sy ireo andian-teny fototra avy ao amin’ny soratra masina” ao amin’ny Tahirin-kevitra fototra ho an’ny fifehezana fotopampianarana (2023). Hazavao fa ireo mpianatra dia hasaina handalina ireo andalan-tsoratra masina ireo mba hahafantarany ilay fotopampianarana sy hanomezana azy ireo fahafahana hanao fanazaran-tena amin’ny fanazavana ny zavatra ianarany. Lazao amin’ny mpianatra fa homena fahafahana hanao tsianjery ampahany manan-danja amin’ireo andininy voarakitra ao amin’ireo andian-teny manan-danja ao amin’ny soratra masina izy ireo.

Asao ny mpianatra hieritreritra fotoana izay maha-zava-dehibe ny fahalalana soratra masina manan-danja sy ny zavatra ampianariny. Anontanio ny mpianatra raha manana traikefa amin’ny fitadidiana sy ny fizarana soratra masina amin’ny hafa izy ireo.

Application Maîtrise de la doctrine

Ampio ny mpianatra haka ny application Maîtrise de la doctrine amin’ny finday. Ampiasao ny fotoam-pianarana hanampiana ny mpianatra hizatra amin’ny fampiasana ilay application ary hanao ny sasantsasany amin’ireo sahanasa ao. Amporisiho ny mpianatra hampiasa ilay application ivelan’ny fotoam-pianarana.