Lesona 167: Fifehezana fotopampianarana: Mitady valiny ho an’ireo fanontaniako

Mamakafaka ireo lohahevitra sy fanontaniana momba ny filazantsara amin’ny fomba fijery mibanjina ny mandrakizay

Mahazo fahalalana ara-panahy, Tapany faha-3

Tanjona iray amin’ny fifehezana fotopampianarana ny hanampy ny mpianatra ho zatra an’ireo fitsipika hahazoana fahalalana ara-panahy, mba hahafahan’izy ireo mampiasa izany mandritra ny fiainan’izy ireo. Ity lesona ity dia afaka manampy ny mpianatra hamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay ary hahita izany mitovy kokoa amin’ny ahitan’i Jesoa Kristy izany.

Ireo sahanasa fianarana azo atao

Ny masom-pinoana

Asehoy ny sary eo ambany ary asao haka sary an-tsaina ny zava-misy ny mpianatra.

Alaovy sary an-tsaina hoe mankao amina tranombakoka iray ianao ary mahita zavatra aranty toy ity. Ahoana no hamaritanao ny zavatra hitanao?

• Inona no mety hoeritreretinao raha misy olona iray mijery io zavatra aranty io ka milaza aminao fa mahita endrika mason’olombelona?

Hazavao fa raha avy amin‘ny toerana hafa ianao no mijery, dia milahatra mampiseho sarina mason’olona ireo teboka ireo. Asehoy ity sary manaraka ity. Azonao atao ihany koa ny mandefa ilay horonan-tsary, izay maneho ny fiovam-pomba fijery mandra-pahita ilay maso.

• Inona no azontsika ianarana momba ny toerana ijerena amin’io hosodoko io?

• Inona avy no lesona ara-panahy mety ho azon’izy io anampiana antsika mba ho takatsika?

Rehefa avy mizara ny hevi-baovao hitan’izy ireo ny mpianatra, dia ampio izy ireo hianatra avy amin’ny Loholona Neil L. Andersen ao amin’ny Kôlejin’ny Apôstôly Roambinifolo.

Jereo ity sary nataon’i Michael Murphy ity. Raha jerena amin’izao ahitantsika azy izao dia sarotra aminao ny hino hoe fanehoana mason’olombelona iray amin’ny alalan’ny haikanto izy io. Kanefa rehefa jerenao avy amin’ny toerana hafa ireo teboka ireo dia hitanao ny hakanton’ny sangan’asan’ilay mpahaikanto.

Tahaka izany koa, mahita ireo fahamarinana ara-panahy avy amin’ Andriamanitra isika amin’ny alalan’ny fijerin’ny masom-pinoana. (Neil L. Andersen, “Ny masom-pinoana,” Liahona, mey 2019, 35)

• Inona no eritreretinao ho dikan’ny hoe mahita fahamarinana ara-panahy amin’ny “masom-pinoana”?

• Inona no mety hanasarotra ny fahitantsika fahamarinana ara-panahy amin’io fomba io indraindray?

Mahita amin’ny fomba ahitan’ny Tompo

Rehefa mila fanampiana amin’ny fahitana fotopampianarana, fanontaniana, na olana ara-piarahamonina amin’ny fomba fijerin’ny finoana isika, dia azontsika atao ny mampiasa ireo fitsipiky ny fahazoana fahalalana ara-panahy:

1. Manao asa amim-pinoana.

2. Mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay.

3. Mikatsaka fahatakarana bebe kokoa amin’ny alalan’ireo loharanom-pahalalana nofidin’ Andriamanitra.

Hifantoka amin’ny famakafakana ireo hevi-dehibe sy ireo fanontaniana amin’ny fomba fijery mibanjina ny mandrakizay isika ato amin’ity lesona ity.

Asao hanazava ny fahatakaran’izy ireo momba ny dikan’ny hoe mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay ny mpianatra.

Vakio ny andiam-pehezan-teny 8–10 ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023) mba hahitana ny zavatra azonao atao mba hananana fomba fijery mibanjina ny mandrakizay.

• Inona no zavatra nianaranao avy amin’ireo andiam-pehezan-teny ireo momba ny maha-zava-dehibe ny fihazonana fomba fijery mibanjina ny mandrakizay?

• Inona no afaka manampy anao hanana fomba fijery mibanjina ny mandrakizay?

Hevero ny hanisy marika ity andian-teny ao amin’ny andiam-pehezan-teny 8ity: Mikatsaka ny fanampian’ny Fanahy Masina isika mba hahitana ireo zavatra amin’ny fomba hahitan’ny Tompo azy ireny.

• Inona, araka ny eritreritrao, no mety ho tombontsoa amin’ny fiezahana mijery ny fanontaniantsika na fanahiantsika ara-panahy amin’ny fomba ahitan’ny Tompo izany?

Mitadiava soratra masina roa na telo afaka manampy anao hahatakatra ny lanjan’ny fomba fijerin’ny Tompo.

Afaka manomboka amin’ny fitadiavana soratra masina mikasika ny fahalalan’ Andriamanitra eo ambanin’ny hoe: “God, Omniscience of” ao amin’ny the Topical Guide.

Ireto misy andininy vitsivitsy hodinihina:

• Isaia 55:8-9

• 2 Nefia 9:20

• Fotopampianarana sy Fanekempihavanana 38:1–2

• Fotopampianarana sy Fanekempihavanana 88:6, 41

Angataho hanoratra famintinana ny zavatra nianaran’izy ireo momba an’ Andriamanitra ireo mpianatra mba hanampiana azy ireo hieritreritra ny zavatra novakin’izy ireo. Azonao atao ny manasa mpianatra vitsivitsy hizara ny zavatra nosoratan’izy ireo na mangataka ny mpianatra hizara amin’ny mpianatra iray miara-miasa aminy.

• Inona no ampianarin’ireo andininy ireo momba an’ Andriamanitra ka mety handrisika antsika hijery ny zavatra amin’ny fomba fijeriny?

Fomba fijery samy hafa

Afaka manampy ny mpianatra hampihatra ny fampitahana ny fomba fijerin’izao tontolo izao amin’ny fomba fijery mibanjina ny mandrakizay ity sahanasa manaraka ity. Hevero ny hampiditra rafi-tantara toy ity manaraka ity sy hanampy ny mpianatra handinika an’ireo fomba fijery roa.

Vao haingana no nahazo diplaoma avy tao amin’ny lisea i Ryan. Nanomboka niaraka tamina ankizivavy iray izay tsy mpikamban’ Ny Fiangonan’i Jesoa Kristy ho an’ny Olomasin’ny Andro Farany izy. Nihamatotra ny fiarahan’izy ireo, ka vao haingana ilay ankizivavy no namosa-kevitra hoe afaka miara-mipetraka izy ireo fa tsy mivady.

Asao hifanakalo hevitra amin’ity fanontaniana manaraka ity ny kilasy ary hanao lisitra ireo valiny eny amin’ny solaitrabe eo ambanin’ny lohateny hoe “Fomba fijerin’izao tontolo izao.” Hevero ny hampahatsiahy ny mpianatra an’ilay sary naseho tany am-panombohan’ny lesona. Azonao atao ny mampiseho ny fahitana avy any amin’ny sisiny an’ilay sarina maso mandritra ity fifanakalozan-kevitra ity.

• Raha nanana fomba fijery voafetra na araka izao tontolo izao i Ryan, dia inona no antony mety haha-hevitra tsara izany ho azy?

Raha mila fanampiana amin’ny fitadiavana antony ny mpianatra, dia azonao atao ny mizara ity andiam-pehezan-teny manaraka ity.

Mety hahita tombontsoa amin’ny hoe hiara-mipetraka izy sy ny olon-tiany fa tsy hivady, i Ryan, raha nijery io fanapahan-kevitra io tamin’ny fomba fijerin’izao tontolo izao. Mety hieritreritra izy hoe hitsitsy vola satria tsy handany vola amina peratra lafo vidy sy ny fampakaram-bady. Mety hieritreritra izy fa hihena ny rarin-tsainy satria raha manambady izy dia hitaky fanoloran-tena feno izany. Afaka mivady izy ireo any aoriandriana raha mandeha tsara ny zava-drehetra.

Rehefa avy nijery ilay zava-misy tamina fomba fijerin’izao tontolo izao ny mpianatra, dia ampio hijery izany amina fomba fijery mibanjina ny mandrakizay amin’izay izy ireo. Asehoy amin’izay ilay sary ahitana miharihary ilay maso, raha nasehonao ny fahitana avy amin’ny sisiny azy nandritra ilay fifanakalozan-kevitra farany.

Soraty eny amin’ny solaitrabe ny lohateny hoe “Fomba fijery mibanjina ny mandrakizay” ary asao ny mpianatra hanoratra ny valin’ity fanontaniana manaraka ity eo ambanin’io lohateny io. Hevero ny hampijery ny mpianatra ny loharanom-pahalalana toy ny “Ny fianakaviana: Fanambarana ho an’izao tontolo izao” na ny Ho zatovo mahery!: Torolalana amin’ny fanaovana safidy (2022).

• Inona ilay antony tsy hisafidianany ny hifindra hiara-mipetraka amin’ny olon-tiany raha manana ilay fomba fijery mibanjina ny mandrakizay i Ryan?

Azonao atao ny mizara ity andiam-pehezan-teny manaraka ity raha mila fanampiana amin’ny famaliana ilay fanontaniana ny mpianatra. Mahita valiny azy ireo manokana ny mpianatra, no tena tsara, rehefa mandray anjara amin’ny fifanakalozan-kevitra.

Mety hihevitra ireto zavatra manaraka ireto i Ryan raha mijery io fanapahan-kevitra io amin’ny fomba fijery mibanjina ny mandrakizay: Avy amin’ny fanarahana an’i Jesoa Kristy sy fiainana ny fampianarany ny fahasambarana. Tsy te “hanota amin’ Andriamanitra” (Genesisy 39:9) amin’ny alalan’ny fandikana ny lalàn’ny Tompo momba ny fahadiovam-pitondrantena i Ryan, tafiditra amin’izany ny fisorohana ny firaisana ara-nofo alohan’ny fanambadiana. Mampianatra ihany koa ny filazantsaran’i Jesoa Kristy fa manana zo ho teraka ao amina fianakaviana misy ray sy reny vita fanambadiana sy voafatotry ny voady ny zanaka. Takatr’i Ryan fa afaka manao fanekempihavanana amin’ Andriamanitra ao amin’ny tempoly izy mba hahatonga ny fifandraisany ho mandrakizay.

Afaka maneho ny fahazavana mety ho azontsika amin’ny fandraisana fanapahan-kevitra ity horonan-tsary fohy manaraka ity, rehefa mijery ireo fanontaniana sy olana ara-piarahamonina amina fomba fijery mibanjina ny mandrakizay isika.

Mety ho azonao atao amin’izay ny manasa azy ireo hifanakalo hevitra mombana toe-java-misy hafa, samirery na anatina vondrona kely maromaro, rehefa vitan’ny mpianatra ilay rafi-tantara. Azon’izy ireo atao ny mijery fanontaniana na olana ara-piarahamonina hafa amin’ny fomba fijerin’izao tontolo izao sy amin’ny fomba fijery mibanjina ny mandrakizay.

Mety ho afaka mametraka fanontaniana toy ireto manaraka ireto ianao mba hanampiana ny mpianatra hifanakalo hevitra momba ny lanjan’ny fampitahana ny fomba fijerin’izao tontolo izao sy ny fomba fijery mibanjina ny mandrakizay:

• Inona no zavatra nianaranao tamin’ny alalan’ny fampitahana ny fomba fijerin’izao tontolo izao sy ny fomba fijery mibanjina ny mandrakizay?

• Inona avy no tombony mety ho azo avy amin’ny fahitana ny safidintsika na ny fanontaniantsika amin’ny fomba fijery mibanjina ny mandrakizay?

• Oviana ianao no nahita ny fitahian’ny fahitana ny zavatra amin’ny fomba fijery mibanjina ny mandrakizay?

Mijoroa ho vavolombelona momba ireo fahamarinana noresahinareo androany. Amporisiho ny mpianatra hanohy hampihatra ireo fitsipika hahazoana fahalalana ara-panahy rehefa mikatsaka valiny amin’ireo fanontaniany izy ireo.

Loharanom-pitaovana fanampiny

Ahoana no ahafahako miresaka amin’ny hafa rehefa tsy mitovy amin’ny fomba fijeriko ny fomba fijerin’izy ireo?

Nilaza toy izao ny Filoha Dallin H. Oaks ao amin’ny Fiadidiana Voalohany:

Heveriko fa mety ho tsara kokoa amin’ny zatovontsika ny misoroka ny fiadiana hevitra amin’ny olona mifanerasera amin’izy ireo. … Ho tsara kokoa amin’izy ireo matetika ny mamaly amin’ny alalan’ny famantarana ireo petra-kevitra arak’izao tontolo izao hita ao anatin’ilay hevitra hizingizinina ho marina aloha dia avy eo mamantatra ireo petrakevitra samihafa izay mitarika ny fotopisainan’ny Olomasin’ny Andro Farany. Tsy hahatonga ny olona tsy mitovy finoana amintsika hanaiky izany, kanefa afaka mampanalavitra ilay fifanakalozan-kevitra amin’ny ady hevitra. (Dallin H. Oaks, “As He Thinketh in His Heart” [takariva niarahana tamina Manampahefana Ambony, Feb. 8, 2013], broadcasts.ChurchofJesusChrist.org)

Ahoana no ahafahan’ny fahatakarana ny drafitry ny famonjena miantraika amin’ny fomba fijeriko?

Toy izao no nampianarin’ny Filoha M. Russell Ballard ao amin’ny Kôlejin’ny Apôstôly Roambinifolo:

Tamin’ny alalan’ny Mpaminany Joseph Smith dia nomen’ Andriamanitra ho an’ny Fiangonana ny Bokin’i Môrmôna, ny Fotopampianarana sy Fanekempihavanana ary fampianarana maro fanampiny. Tafiditra ao anatin’izany ny fahalalana mikasika ny drafitry famonjena, izay fanoritsoritana momba ny hoe avy aiza isika, inona no tanjontsika eto an-tany, ary ho aiza isika rehefa maty. Manome antsika fomba fijery miavaka sy mandrakizay ihany koa ilay drafitra fa zanaka ara-panahin’ Andriamanitra isika. Amin’ny alalan’ny fahatakarantsika ny hoe iza ny Raintsika any An-danitra sy ny fifandraisantsika Aminy sy i Jesoa Kristy Zanany malala, dia hanaiky ireo didiny isika ka hanao fanekempihavanana Aminy izay hitondra antsika hiverina mandrakizay eo anatrehany. (M. Russell Ballard, “Andriamanitra no mpanamory,” Liahona, nôv. 2015, 25)

Sahanasa fianarana fanampiny

Ny fomba fijery mibanjina ny mandrakizay ananan’i Jesoa Kristy

Mety hanentana ny mpianatra ny fahitana fa nihazona fomba fijery mibanjina ny mandrakizay i Jesoa Kristy nandritra ny fiainany tety ambonin’ny tany. Hevero ny hamaky ohatra ao amin’ny soratra masina izay namalian’i Jesoa Kristy fanontaniana na olana iray niainga tamin’ny fahatakarany ny drafitry ny famonjen’ Andriamanitra. Isan’ny ohatra amin’izany ny Lioka 2:49; Jaona 6:35, 38, 42, 51; Jaona 18:36; sy soratra masina maro hafa. Mety hanampy ny famakiana ny sasany amin’ireo andininy manodidina izany na ny fanomezana fampahalalana fanampiny momba ny zavatra vakin’ny mpianatra. Mety hahazoan’ny mpianatra tombony ihany koa ny firesahana ny antony mahatonga azy ireo hankasitraka ny fihazonan’i Jesoa Kristy fomba fijery mibanjina ny mandrakizay mba hanatanterahana ny iraka masina nataony.

Mandalina ny tantaran’ny Fiangonana

Ampio ny mpianatra hahatakatra ny fahasamihafana ara-kolontsaina izay misy eo amin’ny fomba amam-panaontsika sy ny tany amin’ny lasa. Fomba iray hanaovana izany ny fampisehoana sarintanin’izao tontolo izao sy ny fanasana ny mpianatra hizara fohifohy ny zavatra fantatr’izy ireo mombana firenena samy hafa manerana izao tontolo izao. Azon’ny mpianatra ifanakalozana hevitra ny zavatra azontsika ianarana avy amin’ny fitsidihana firenena samy hafa sy ny zavatra mety ho sarotra. Asao ny mpianatra handalina ny andiam-pehezan-teny 9 sy 10 ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023), ka hitady ny zavatra tokony atao rehefa manana fanontaniana momba ny tantara. Azonao atao koa ny mampiseho ity horonan-tsary ity, izay nanoroan’ilay mpahay tantara ao amin’ny Fiangonana Matthew Grow ny fomba hitetezana ny tantaran’ny Fiangonana.

Mamerina mandrafitra ny olana sy fanontaniana amin’ny fomba fijery hafa

Araka ny voalazan’ny andiam-pehezan-teny 8 ao amin’ny fizarana hoe Mahazo fahalalana ara-panahy ao amin’ny Tahirin-kevitra fototra ho an’ny fifehezana fotopampianarana (2023), ahafahantsika mamerina mandrafitra amin’ny fomba fijery hafa ireo hevi-dehibe sy fanontaniana ary olana ara-piarahamonina, ny fahitana ireo zavatra amin’ny fomba ahitan’ny Tompo azy ireny. Ampio hianatra ny fomba mety hahafahan’izy ireo manomboka ny famerenana mandrafitra ny mpianatra, ary avelao hampihatra izy ireo avy eo. Ireto dingana telo manaraka ireto dia mety ho torolalana ilaina ka tokony harahin’ny mpianatra. Azon’izy ireo atao ny mampiasa ilay taratasy zaraina hoe Mamerina mandrafitra fanontaniana mba hanoratana ny fanontaniana sy ny fomba fiheveran’izy ireo. Azonao atao koa ny mampiseho ilay horonan-tsary mba hanehoana ny famerenana mandrafitra ireo fanontaniana sarotra.

1. Misafidiana fanontaniana na olana ara-piarahamonina iray.

2. Eritrereto ary soraty ny fiheverana samy hafa mety hananan’izy ireo na ananan’ny olona iray manana fomba fijerin’izao tontolo izao amin’io resaka io.

3. Jereo amin’ny fomba fijery mibanjina ny mandrakizay koa io fanontaniana io na io olana ara-piarahamonina io. Saintsaino ny fanontaniana toy ny hoe “Inona no zavatra efa fantatro momba ny Ray any An-danitra sy ny drafiny ary ny fomba hifandraisany amin’ireo zanany?” sy ny hoe “Inona avy ireo fampianaran’ny filazantsara izay mifandray amin’io foto-kevitra na olana io na manazava azy io?”