“170-р хичээл—Судруудаас сайн мэдээний үнэнүүдийг олох: Сургаал, зарчмуудыг тодорхойлж сурах нь,” Сургаал ба Гэрээний семинарын багшийн гарын авлага (2025)
“Судруудаас сайн мэдээний үнэнүүдийг олох,” Сургаал ба Гэрээний семинарын багшийн гарын авлага
170-р хичээл: Судар судлах эр чадвар
Судруудаас сайн мэдээний үнэнүүдийг олох
Сургаал, зарчмуудыг тодорхойлж сурах нь
Их Эзэн судруудад бидний өсөлт хөгжил, авралд нэн ач холбогдолтой, Түүнд илүү ойртуулдаг сайн мэдээнийхээ мөнхийн сургаал, зарчмууд болох сайн мэдээний үнэнүүдийг хадгалсан байдаг. Энэ хичээл танд судруудаас сайн мэдээний үнэнүүдийг олох чадвараа нэмэгдүүлж, Тэнгэрлэг Эцэгт болон Аврагчид илүү ойртоход тусална.
Боломжит суралцах үйл ажиллагаа
Эрдэнийн чулууны тухай сургаалт зүйрлэл
Суралцагчдаас далайн эргийн элснээс хэн нэгэн эрдэнийн чулуу хайж, олж байгаагаар төсөөлөхийг хүсээрэй. “Судруудыг судлах нь хэрхэн элсэн дотроос эрдэнийн чулуу хайхтай адилхан бэ?” гэж асуу.
Мөн та сүүлийн асуултыг “Эрдэнийн чулууг шинжиж, үүнд талархахын тулд хүн юу хийж болох вэ?” гэж өөрчилж болно.
-
Элс юуг төлөөлж болох вэ? Эрдэнийн чулуу юуг төлөөлж болох вэ?
Дараахыг өөрийн үгээр тайлбарла.
Сайн мэдээний сургаал, зарчмуудыг сургаалт зүйрлэл дэх эрдэнийн чулуутай адилтгаж болно. Судруудын нэг гол зорилго бол сайн мэдээний сургаал, зарчмуудыг заах явдал. Сургаал нь Есүс Христийн сайн мэдээний үндсэн бөгөөд хэзээ ч өөрчлөгдөшгүй үнэн юм. Сайн мэдээний зарчим нь хувь хүмүүс шийдвэр гаргахдаа тусламж болгон ашиглаж болох сургаалд суурилсан удирдамж. Судруудаас бидний сурдаг хамгийн чухал сургаал, зарчмууд нь Тэнгэрлэг Эцэг, Есүс Христ хоёрыг таньж мэдэхэд туслан, Тэдний оршихуйд хэрхэн эргэн очиж болох талаар ойлгоход тусалдаг.
Энэ гарын авлагад “үнэнийг” тодорхойлоход суралцагчдыг урьсан урилга үе үе гарахыг харж болно. Энэ нь сургаалын зарчмууд эсвэл мэдэгдлүүдийг илэрхийлэх илүү хялбар арга юм. Суралцагчдыг судруудаас үнэнийг (сургаалын зарчмууд эсвэл мэдэгдлүүд) хэр амархан тодорхойлж чадахаа дүгнэхэд урь.
-
Дараах мэдэгдлүүдийн аль нь сударт агуулагдах сайн мэдээний үнэнүүдийг олох чадвартаа хэр итгэлтэй байгааг тань хамгийн сайн илэрхийлж байна вэ?
-
Огтхон ч итгэлгүй
-
Бага зэрэг итгэлтэй
-
Маш их итгэлтэй
-
Суралцагчдын хариултыг анхааралтай сонс. Яагаад ингэж дүгнэснийг нь суралцагчдаас асуухыг бод. Хичээлийн явцад сайн мэдээний үнэнүүдийг олохыг хичээн чармайхад нь өөрсдөдөө илүү итгэлтэй байхад нь туслахыг хичээгээрэй.
Тодорхойлох
Суралцагч бүрд дараах тараах материалын хуулбарыг өг. Үүнийг ангиараа хамтдаа унш. Энэ ур чадварыг тодорхойлоход шаардлагатай гэж үзсэн нэмэлт тайлбарыг өг.
Сургаал, зарчмуудыг тодорхойлж сурах
Сайн мэдээний зарим сургаал, зарчмыг судруудад тодорхой дурдсан байдаг. Зарим сургаал, зарчмыг үйл явдалд суулгаж өгсөн байж болох бөгөөд гагцхүү ном, бүлгийг бүтнээр нь судалснаар юм уу ганц шүлэг судалснаар олж мэддэг. Та судраас судлахдаа сайн мэдээний үнэнүүдийг тодорхойлоход туслах дараах чухал алхмуудыг дагах дасгал хийж болно. Үүнд:
-
Удаан, анхааралтай унш.
-
Тодорхой илэрхийлсэн үнэнүүдийг эрж хай. Тэдгээрийн зохиогч заримдаа “бид харлаа,” “тиймийн тул,” “иймийн тул” эсвэл “болгоогтун” гэх мэт үгсийг ашиглан илэрхийлдэг.
-
Далд үнэнүүдийг эрж хай. Та нар дараахтай адил асуултуудыг өөртөө тавих замаар тэдгээр үнэнийг олж болно.
-
Энд чухал санаа, үг, хэллэг; ялангуяа Тэнгэрлэг Эцэг, Түүний төлөвлөгөөг эсвэл Есүс Христ, Түүний сайн мэдээг илүү сайн мэдэхэд туслах санаа, үг хэллэг байна уу?
-
Энэ түүхэд учир шалтгаан, үр дагаврын ямар холбоо хамаарал байна вэ?
-
Энэ түүхийн сургамж эсвэл гол санаа юу вэ?
-
Яагаад бичээч эдгээр үйл явдал, судрын хэсгийг оруулсан гэж бодож байна вэ?
-
-
Олсон зүйлээ өөрийн үгээр бичээд, энэ тухай заасан үгсийг судар дээрээ тэмдэглэ.
-
Уг үнэн яагаад чиний хувьд чухал болохыг тунгаан бод. Арван хоёр төлөөлөгчийн чуулгын ахлагч Жэффри Р.Холланд ийн заасан.
Судрын үг бүрийг, эрдэнэс бүрийг нарийн шинжиж, … тунгаан бод. … Үүнийг гэрэлд барин, эргүүлж тойруулан үзэж, юу тусаж, юу ойж байгааг хар. … Ингэж нягтлан судалснаараа талбайд нуусан эрдэнэсийг, агуу үнэт сувд буюу ямар ч зүйлээс үнэтэй сувдыг … нээж олж болох юм. (“Students Need Teachers to Guide Them” [address to Church Educational System religious educators, June 20, 1992], 4)
Загвар
Тараах материал дээр дурдсан алхмуудыг ангиараа хэрхэн дагах загварыг гарга. Дараа нь өөрсдөө үүнийг туршиж үзэх боломжийг олгоно гэдгийг суралцагчдад хэл. Самбарт эрдэнийн чулуу зурахыг бод. Хажууд нь суралцагчдын тодорхойлсон үнэнүүдийг бич. Суралцагчдын хэлсэн үгсийг ашиглах нь хичээлд оролцох итгэлийг нь нэмэгдүүлэх гайхалтай арга зам юм.
-
Сургаал ба Гэрээ 18:10–11-ийг удаан, анхааралтай унш.
-
Тодорхой илэрхийлсэн үнэнүүдийг эрж хай.
Суралцагчид “Бодгалийн үнэ цэн Бурханы мэлмийд агуу” гэх сургаалыг олж болох юм.
-
Тараах материалд жагсаан бичсэн зарим асуултыг тавих замаар далд үнэнүүдийг эрж хай.
Тараах материалын эхний асуултын хариуд суралцагчид “Христ бидний нүгэл, зовлон шаналлын төлөө зовж, эцэст нь бидний төлөө амиа өгсөн учраас бид наманчилж, Түүн дээр очиж чадна” гэх үнэнийг олж болох юм.
Хэрэв суралцагчид 10, 11-р шүлэг дэх учир шалтгаан, үр дагаврын хоорондох холбоо хамаарлыг олж харвал, тэд “Бидний бодгалийн үнэ цэн Бурханы мэлмийд үнэхээр агуу учраас Есүс Христ бидэнд наманчилж, Түүн дээр ирэх боломжийг олгохын тулд Өөрийн хүслээр зовж шаналсан” гэх үнэнийг ч мөн олж харж магад.
Хэрэв суралцагчид сүүлчийн асуултыг бодож үзсэн бол “Бидний Гэтэлгэгч Есүс Христ Түүний хувьд бид ямар чухал болохыг олж мэдээсэй хэмээн хүсдэг” гэх үнэнийг олж харсан байж болох юм.
Олсон үнэнээ жижиг цаасан дээр, судрынхаа захад аль эсвэл Gospel Library аппликэйшн дээр тэмдэглэл болгон бич. Та мөн сударт уг үнэнийг заасан үгсийг тэмдэглэж болно.
Цаг гарган таны олж мэдсэн үнэн яагаад таны хувьд чухал эсвэл утга учиртай байж болох талаар тунгаан бодоорой. Цаг гарган тодорхойлсон үнэнээ тунгаан бод. Дараах 3 асуулт тус болж магад.
-
Яагаад энэ үнэнийг эрдэнийн чулуу гэж үзэж болох вэ?
-
Энэ нь Тэнгэрлэг Эцэг, Есүс Христ хоёрын талаар танд юу зааж байна вэ?
-
Энэ нь өнөөдөр танд хэрхэн тусалж болох вэ?
Хэдэн суралцагчийг бодол санаагаа хуваалцахад урь. Ангийнхныхаа бодол, санааг сонсох нь судар дахь үнэнүүдийн талаар илүү гүн гүнзгий тунгаан бодоход тэднийг урамшуулах болно.
Дадлага
Суралцагчдыг дараах үйл ажиллагааг бие даан гүйцэтгэхэд урь. Суралцагчид уг үйл ажиллагааг судлах тэмдэглэлдээ хийж болно. Хэрэв та тэднийг доорх үйл ажиллагаанаас олж мэдсэн зүйлээ бусадтай хуваалцаасай гэж хүсвэл тусад нь цаасан дээр хийлгээрэй. Тэд тэдэнд туслах зориулалттай тараах материалыг ашиглаж болно.
Дадлага болгон дараах үйл ажиллагааг явуул.
-
Хоёр эрдэнийн чулуу зур.
-
Доорх эсвэл өөрийн сонгосон эшлэлүүдээс хамгийн багадаа хоёрыг судлаад, тус бүрээс олж мэдсэн нэг үнэнийг буюу “эрдэнийн чулууг” жагсаан бич. Сургаал ба Гэрээ 1:30; 8:2–3; 18:15–16; 19:16–19; 21:4–6; 49:15–17; 58:42–43; 76:22–24; 131:1–4; 135:3.
-
Яагаад эдгээр үнэн чиний хувьд сүнслэг эрдэнэс болохыг бич. Энэ нь Тэнгэрлэг Эцэг, Есүс Христ хоёрын талаар юу зааж байгааг, мөн өнөөдөр хэрхэн танд тусалж болохыг тэмдэглэлдээ оруул.
Суралцагчид уг үйл ажиллагааг тусдаа цаасан дээр гүйцэтгэсэн бол тэд бусадтайгаа цаасаа солилцож, бусдаасаа юу сурснаа хуваалцаж болно. Суралцагчид мөн өнөөгийн өсвөр үеийнхэнд онцгой ач холбогдолтой гэж үзэж байгаа судрын эрдэнийн чулуунуудыг нэрлээд, самбарт жагсаан бичиж болно.
Өнөөдрийн туршлага дээрээ үндэслэхэд, та юуны учир судлах явцдаа үнэнүүдийг олж, тунгаан бодохыг хүсэх вэ?
Сайн мэдээг судлахдаа үнэнүүдийг хэрхэн олохыг хүсэж байгаагаа судлах тэмдэглэлдээ бич. Ийн үйлдэх нэг арга зам бол хувиараа судраас судлахдаа өдөр бүр хамгийн багадаа нэг үнэнийг олж, эргэцүүлэн бодох явдал юм. Та олж мэдсэн үнэнүүдээ судар дээрээ эсвэл судрын тэмдэглэлдээ бичиж болно.
Дараагийн хэдэн хичээлийн үеэр өдөр бүр нэг суралцагчийг судраас судлахдаа олж мэдсэн судрын нэг эрдэнийн чулууг хуваалцахад урьж болох юм. Суралцагчид онцгой цугларалтын үеэр сүнслэг бодлоо хуваалцах замаар үүнийг гүйцэтгэж болно. Дараа дараагийн хичээлээр энэ чухал ур чадвараар дадлага хийх боломжийг суралцагчдад олгохыг хичээ.