171-р хичээл: Судраас судлах ур чадвар

Судрын тайлбар бичих

Тэмдэглэгээ үйлдэх ба тэмдэглэл нэмэх

Энэ хичээл нь суралцагчдад судруудад тэмдэглэгээ үйлдэж, тэмдэглэл хөтлөх нь тэднийг Тэнгэрлэг Эцэг, Есүс Христ хоёрт ойртоход тусалж, илүү утга учиртай судлахад тусална.

Суралцагчийн бэлтгэл: Өдөр бүрийн судрын уншлагын нэгэн хэсэг болгон, суралцагчдыг Тэнгэрлэг Эцэг, Есүс Христ хоёрын хайрыг мэдрэхэд туслах өөрсдөд нь онцгой санагдсан үг хэллэгүүдийг тэмдэглэхэд урь. Суралцагчид юуг, яагаад тэмдэглэснээ хуваалцахаар бэлдэж ирж болно.

Боломжит суралцах үйл ажиллагаа

Судрын уншлагыг илүү утга учиртай болгох

Суралцагчдыг ямар нэгэн үйл ажиллагааг хайхрамжгүй хийдэг эсвэл эсрэгээрээ илүү утга учиртай хийхийг хичээдэг цөөн хэдэн зүйлийг хуваалцахад урь. Жишээлбэл: Ангийнхаа хүүхэдтэй мэндлэх, ярих, баярласан тэмдэглэл илгээх эсвэл мессеж бичих, судраас судлах гэх мэт зүйлс багтаж болно.

Аврагч бидэнд судраас хайхрамжгүйхэн уншихыг бус Түүний үгийг “хайж,” “судалж” мөн үүн дээр “найрлахыг” зарлигласан (Сургаал ба Гэрээ 1:37; 11:22; 2 Нифай 32:3). Судруудаар дамжуулан бид Түүнийг танин мэдэж, Түүний хайрыг мэдэрч чадна (Иохан 5:39; Иаков 3:2-ыг үзнэ үү).

Суралцагчдыг судрын уншлага нь тэдэнд Тэнгэрлэг Эцэг, Есүс Христ хоёрт илүү ойртоход хэрхэн тусалж байгааг үнэлэхэд урь.

Та судрын уншлагыг илүү утга учиртай болгохын тулд юу хийсэн (эсвэл юуг хийж болох) бэ?

Суралцагчдын хариултыг анхааралтай сонсоод, самбар дээр бич. Дараах мэдээллийг өөрийн үгээр тайлбарлахыг бод.

Тодорхойлох: Судрууд дээр тэмдэглэгээ үйлдэх

Судрын уншлагыг утга учиртай болгох нэг арга нь судрууд дээр тэмдэглэж, тэмдэглэл нэмэх юм. Энэ хичээлийг судалж байхдаа та судраас судлах нь таныг Тэнгэрлэг Эцэг, Есүс Христ хоёрт илүү ойртоход туслах, судрууд дээр тэмдэглэх арга замуудыг хайж ол.

Загвар: Судрууд дээр тэмдэглэгээ үйлдэх

Энд үзүүлсэн зураг эсвэл видеонууд дээрх шиг, хүмүүс судрууд дээр хэрхэн тэмдэглэдэг тухай цөөн жишээг суралцагчдад үзүүл. Суралцагчид судрууд дээр тэмдэглэдэг аргуудаа хуваалцаж болно. Тэмдэглэсэн зүйлээ эргэж харах боломжит шалтгаануудыг олоход суралцагчдыг урь.

“Танд тохирдог тэмдэглэх арга” (1:56). Энэ видеонд Арван хоёр төлөөлөгчийн чуулгын ахлагч Дэвид A.Бэднар судруудыг хэрхэн тэмдэглэдгээ харуулдаг.

“Судруудыг тэмдэглэх нь” (1:45). Энэ видеонд Тэргүүн зөвлөлийн ерөнхийлөгч Даллин Х.Өүкс хэрхэн судрууд дээр тэмдэглэдэг тухайгаа харуулсан.

• Хүмүүс ямар шалтгаанаар судрууд дээр тэмдэглэдэг вэ?

• Судрууд дээр тэмдэглэх нь танд ямар ашиг тустай гэж бодож байна вэ?

Дадлага: Судруудад тэмдэглэгээ үйлдэх

Самбар дээр дараах шүлгүүдийг бүтнээр үзүүлэх эсвэл бичихийг бод. Хэрэв боломжтой бол Gospel Library-аас эдгээр шүлгийн цахим хувилбарыг үзүүлж болно. Та эдгээр шүлгийг өөр нэгэн төгс эзэмших сургаалын хэсгээр солих юм уу оронд нь өөр шүлэг сонгож болно.

Цахим судруудыг ашигладаг суралцагчдаас Gospel Library аппликэйшн дээр судрууд дээр хэрхэн тэмдэглэдэг талаар үзүүлэхийг хүсэж болно. Үүнийг хэрхэн хийх талаар Gospel Library аппликэйшн дээрх “Marking Content” цэс рүү ороод, Help” хэсгийг сонгон, Gospel Library User Guide (iOS) мөн Gospel Library User Guide (Android) гэх мэт заавруудыг харж болно.

Тэмдэглэх дадлага хийхийн тулд Сургаал ба Гэрээ 68:5–6-г уншаад, таны хувьд чухал санагдсан зүйлээ тэмдэглэ. Та Аврагчийн талаар юу сурсан мөн Тэр таны тухай юу гэж боддог гэдэгт онцгой анхаарал хандуулахыг хүсэж болох юм.

Хэрэв шүлгүүдийг самбар дээр үзүүлсэн бол суралцагчдыг маркер ашиглан өөрсдийн тэмдэглэсэн зүйлийг самбар дээр дахин тэмдэглэхэд урьж, тэднийг яагаад тэдгээрийг тэмдэглэснээ хуваалцахад урь.

• Та ямар үг, хэллэгийг тэмдэглэсэн бэ? Юу нь таны хувьд онцгой санагдсан бэ?

• Судруудыг тэмдэглэсний дараа таны судруудын талаарх бодол санаа өөрчлөгддөг үү? Энэ нь таны Аврагчийг гэсэн сэтгэлд нөлөөлсөн үү? Тийм бол яагаад?

Судрын нэг хэсэг тэдэнд онцгой санагдах үед энэ нь Их Эзэн Ариун Сүнсээр дамжуулан тантай харилцаж буй нэг арга байж болно гэдгийг суралцагчдад онцлох нь тустай байж магадгүй.

Тодорхойлох: Шүлгүүдийг бүлэглэх ба холбох

Нэмэлт шүлгүүдийг хамтад нь холбох эсвэл бүлэглэх нь тустай байж болно.

Загвар: Шүлгүүдийг бүлэглэх эсвэл холбох

• Эдгээр шүлэгт таныг хайрлах Аврагчийн хайрын тухай заасан шүлгүүдийг хамтад нь бүлэглэх эсвэл холбож болох ямар аргууд байдаг вэ?

  Суралцагчдын хариултыг сонсоод, дараах боломжит аргуудыг нэмэх талаар бодож үз. Сургаал ба Гэрээ 68:5–6 болон Сургаал ба Гэрээ 18:10–11-ийг жишээ болгон ашиглаж, тэдэнд Аврагчийн хайрыг мэдрэхэд тусалж болно. Дараах жагсаалтад суралцагчдын дурдаж болох эсвэл тэдний хуваалцсан зүйл дээр нэмж болох зарим санаа бий.

• Судрынхаа эхэнд юм уу төгсгөлд байгаа хоосон хуудаснууд дээр эсвэл судар судлах тэмдэглэл дээрээ эшлэлүүдийг бич.

• Шүлгийн хажуу захад уг шүлэгтэй холбоотой эшлэлүүдийг бич.

• Gospel Library аппликэйшныг ашиглахдаа холбох, тааглах үйлдлийг ашигла.

Хэрэв шаардлагатай бол холбох нь хоёр судрыг нийлүүлэхийг, харин тааглах нь адилхан сэдэв доорх судруудыг бүлэглэхэд тусалдаг гэдгийг тайлбарла. Энэ чадварыг Gospel Library аппликэйшн дээр загварчлан үзүүл эсвэл суралцагчдыг ийн үйлдэхэд урь. Хэрэв боломжтой бол суралцагчдын хийж байгаа эсвэл утсан дээрээ хийж байгаа зүйлийг том дэлгэцэн дээр харуулах нь хэрэгтэй байж болно. Үүнийг хэрхэн хийх тухай зааврыг Gospel Library аппликэйшны Help хэсгээс харна уу. Дэлгэцийн баруун дээд өнцөгт байгаа гурван цэгтэй тэмдэг дээр дарснаар энэ хэсэгт хандах боломжтой. (Тэмдэглэл: Та Gospel Library аппликэйшн дээрх Ерөнхий чуулганы үгс болон бусад материал дээрх догол мөрүүдийг холбож эсвэл тааглаж болно.)

Дадлага: Шүлгүүдийг бүлэглэх ба холбох

Дараах үйл ажиллагаа нь суралцагчдад судруудыг бүлэглэж, холбоход тусална. Үүнд: Та хичээлийн эхэнд суралцагчдад төрөл бүрийн хэсгүүдийг сонгочихсон бол адилхан сэдэв дээр өөр шүлгүүдийг сонгож, доорх шүлгийг сольж болно.

Дараах шүлгээс дор хаяж гурван шүлгийг уншаад, Аврагчийн хайрыг мэдрэхэд туслах шүлгүүдийг бүлэглэх эсвэл холбох талаар бодож үз. Үүнд: Сургаал ба Гэрээ 18:10–11; 34:1–3; 45:3–5; 49:26–27; 68:5–6; 138:3; Исаиа 49:15–16; Иохан 15:13; Ром 8:35–39; 1 Иохан 4:19; 1 Нифай 19:9.

Суралцагчдыг ангиараа эсвэл жижиг бүлгүүдээр шүлгүүдийг хэрхэн бүлэглэсэн, яагаад энэ нь тэдний хувьд чухал санагдсаныг хуваалцахад урь. Тэд өөрсдөө судраас судлах үедээ хэрхэн бүлэглэх эсвэл холбохыг хүсэж байгаа тухай санаагаа хуваалцаж болно.

Тодорхойлох: Тэмдэглэл нэмэх

Судар судлахуйгаар дамжуулан Их Эзэнтэй илүү ойртох бас нэг арга нь сурсан зүйлийнхээ тухай тэмдэглэл нэмэх юм.

Арван хоёр төлөөлөгчийн чуулгын ахлагч Дэвид А.Бэднар судраас судлах үедээ тэмдэглэл хөтлөхийн үнэ цэнийн талаар тайлбарлажээ.

Судраас судлахдаа сурсан, бодсон, мэдэрсэн зүйлээ бичих нь тунгаан бодоход болон үргэлжлүүлэн заавар авахад туслуулахаар Ариун Сүнсийг хүчирхгээр урьдаг нэг хэлбэр юм. (Дэвид А.Бэднар, “Because We Have Them before Our Eyes,” New Era, 2006 оны 4-р сар, 6)

Загвар: Тэмдэглэл нэмэх

Хичээлийн эхэнд үзүүлсэн зураг, видеонуудыг үзүүлэх юм уу суралцагчдыг эргэн санахад урьснаар тэд судрынхаа захад эсвэл сударт хавчуулсан жижиг цаасан дээр тэмдэглэл нэмж, судлах тэмдэглэлдээ бичнэ эсвэл Gospel Library аппликэйшныг ашиглан тэмдэглэл бичнэ.

Дадлага: Тэмдэглэл нэмэх

Та өнөөдөр сурсан хэсгүүдээс ядахнаа аль нэг хэсгээс нь судлахдаа мэдэрсэн зүйл болон санал бодлоо бичсэнээр хичээлийг төгсгө.

Та үг хэллэгийг тодруулах, Тэмдэглэлийг сонгох, текст бичих зэрэг арга замаар дижитал судрууд дээр тэмдэглэл нэмдэг гэдгээ үзүүлж болно.

Суралцагчдад тэмдэглэл нэмэх дадлага хийх хангалттай цаг гаргаж өгсний дараа, хэрэв хэт хувийн чанартай биш бол бичсэн зүйлээ хуваалцахыг цөөн суралцагчаас хүс. Та мөн суралцагчдаас судрууд дээрээ цаашдаа тэмдэглэхийг хүсэж байгаа эсэх мөн яагаад гэдгийг асууж болно.

Нэмэлт эх сурвалж

Яагаад би судрууд дээрээ тэмдэглэгээ үйлдэх хэрэгтэй вэ?

Арван хоёр төлөөлөгчийн чуулгын ерөнхийлөгч Боид К.Пакэр (1924–2015) ийн заасан.

Судруудын доогуур зурах маш олон төрлийн арга байдаг. Тэдгээр арга нь бага зэрэг ялгаатай бөгөөд тухайн хүнд тохирсон байдаг. Шүлгүүдийн доогуур зурж, дараа олоход хялбар байлгахын тулд зах хэсэгт зарим төрлийн тэмдэглэл үйлдэх нь хамгийн чухал.

Хэрэв би энэ аргыг тогтмол ашигладаг байсан бол амархан олж болох байсан зүйлийг олон цаг дахин эргэн харж, байршуулах шаардлагагүй байх байсан. Би одоо судруудыг өмнөхөөсөө илүү сайн тэмдэглэдэг болсон. (Teach Ye Diligently [1975], 166)

Нэмэлт суралцах үйл ажиллагаа

Хичээлийг эхлүүлэх өөр хувилбар

Суралцагчдыг судар судлахуйн үнэлгээ хийхэд урих байдлаар хичээлээ эхлүүлэх талаар бодож үз. Та дараахыг уншиж эсвэл үзүүлж болно. Та суралцагчдаас нүдээ аниад, хуруугаа өргөн, өөрсдийгөө үнэлэхийг хүсэж болно.

1–5 хүртэлх (1=хэзээ ч үгүй, 5=үргэлж) хэмжигдэхүүнээр дараах мэдэгдэл хэр үнэн талаар тунгаан бодохыг хүс.

• Судар судлах нь миний хувьд үнэ цэнтэй.

• Судар судлах нь надад Тэнгэрлэг Эцэг, Есүс Христ хоёрын хайрыг мэдэрч, ойлгоход тусалдаг.

• Би судруудаас судалж байхдаа төвлөрч чаддаг.

• Өөрт чухал санагдсан судруудыг би санаж бас олж чадна.

Суралцагчдын үзүүлсэн тоог хуваалцахгүйгээр, ангийн хүүхдүүд судраас судлах тал дээр хэр амжилттай байгааг ерөнхийд нь дүгнэж, хэрхэн сайжруулж болох арга замыг хуваалц. Суралцагчид судар судлах цагийг нь илүү утга учиртай болгож, Тэнгэрлэг Эцэг, Есүс Христ хоёрын хайрыг мэдрэхэд туслах чадваруудыг суралцаж чадна гэдгийг бататгаж хэл.

Суралцагчид судрууд дээрээ хэрхэн тэмдэглэж болох нэмэлт санаа

Судруудыг тэмдэглэхэд туслах дараах нэмэлт аргуудыг суралцагчидтайгаа хуваалцаж болно. Үүнд:

Өнгө ашиглах: Их Эзэний зан чанаруудыг нэг өнгөөр, Түүний өгдөг амлалтуудыг өөр нэг өнгөөр, Түүнд итгэх итгэлээ хөгжүүлэх арга замуудыг бас нэг өнгөөр гэх мэт төрөл бүрийн сэдэв, загваруудыг өөр өөр өнгө ашиглан тэмдэглэ.

Судрын жагсаалтыг тэмдэглэх: Жагсаалт агуулсан судрууд гарч ирэх үед тэдгээрийг тэмдэглэх нь тус болдог. Жишээлбэл: Сонгогдсон хатагтайд тавигдах шаардлагыг Сургаал ба Гэрээ 25, Бурханы өвч хуяг дуулганы бүрэлдэхүүн хэсгийг Сургаал ба Гэрээ 27:15–18 эсвэл Сүнсний бэлгүүдийг Сургаал ба Гэрээ 46-д гэх мэтээр шүлгүүдийг тэмдэглэж болно.

Зурах: Хэрэв хэвлэмэл цаасан судраас судалж байгаа бол Хиламан 5:12 дээрх хад чулуу мэтийн тухайн шүлэгт ашигласан бэлгэдэл, шүлгүүд зэргийг дүрслэн харуулах энгийн зураг зур.

Шүлгүүдийг хаяглах эсвэл бүлэглэхэд нь суралцагчдад хэрхэн туслах талаарх нэмэлт санаа

Суралцагчид итгэл, наманчлал, өршөөл, илчлэлт гэх мэт сэдвүүдийн дагуу шүлгүүдийг хаяглаж, бүлэглэн хувааж болно. Хэрэв энэ чадварыг дадлагажуулах нь суралцагчдад хэрэгтэй гэж үзвэл тэднийг Судруудын удирдамжийн сургаалын сэдвүүд дээрх шүлгүүдийг олж, тэдгээрийг бүлэглэн хуваахад урь.

Суралцагчид “Миний асуултад хариулахад туслах шүлгүүд” гэх мэт хувийн сэдэв үүсгэж, бүлэглэн хувааж болно (Сургаал ба Гэрээ 6:5, 8:2–3; 9:8–9; 88:63, 118; Иохан 7:17; Иаков 1:5–6; 2 Нифай 32:3, 8–9; Мозая 4:9; Моронай 10:4–5) эсвэл “Verses That Comfort Me in Difficult Times” (Сургаал ба Гэрээ 6:36; 10:4–5; 19:23; 58:4; 121:7–8; 122:5–8; 123:17; Матай 11:28–30; Иохан 16:33; Филиппой 4:13; Хиламан 5:12; Алма 36:3, 27). Суралцагчдад эдгээр бүлгийн аль нэгийг туршиж үзэх хэрэгтэй байвал хаалтан дотор байгаа шүлгүүд тус болж болох юм.

Төгс эзэмших сургаалын шүлгүүдийг бүлэг болгож, тэмдэглэх нь

Та суралцагчдыг төгс эзэмших сургаалын шүлгүүдийг бүлэглэх эсвэл тэмдэглэхэд урьж болно. Эшлэлүүд: Иосеф Смит—Түүх 1:15–20; Сургаал ба Гэрээ 1:30, 37–38; 6:36; 8:2–3; 13:1; 18:10–11, 15–16; 19:16–19; 21:4–6; 29:10–11; 49:15–17; 58:42–43; 64:9–11; 76:22–24; 82:10; 84:20–22; 88:118; 89:18–21; 107:8; 121:36, 41–42; 130:22–23; 131:1–4; 135:3.