Apendiks

Mga Kalihokan sa Pagrebyo sa Doktrinal nga Kahanas

Mga Ideya sa Pagrebyo sa mga Baroganan sa Pag-angkon og Espirituhanong Kahibalo

Atol sa kada leksiyon sa Pagbansay sa Doktrinal nga Kahanas, makatabang ang paghatag sa mga estudyante og kahigayonan sa pagrebyo sa mga baroganan sa pag-angkon og espirituhanong kahibalo. Makatabang ni nila nga mas andam sa paggamit niini nga mga baroganan diha sa mga senaryo sulod sa klase ug sa mga sitwasyon sa tinuod nga kinabuhi.

Ang mosunod mao ang pipila ka mga ehemplo sa mga paagi nga imong matabangan ang imong mga estudyante sa pagrebyo sa mga baroganan sa pag-angkon og espirituhanong kahibalo:

Isulti ang mga baroganan gikan sa panumdoman. Pangutan-a ang mga estudyante kon mahimo ba nilang sublion ang tulo ka baroganan sa pag-angkon og espirituhanong kahibalo gikan sa panumdoman. Pwedeng tagsa-tagsaon og sulat sa mga estudyante ang mga baroganan diha sa ilang mga journal sa pagtuon, o ang lainlaing mga sakop sa klase pwedeng mosulti og kusog sa mga baroganan. Kon nagkinahangla og tabang ang mga estudyante, pwede nilang tan-awon ang parapo 4 sa seksiyon nga “Pag-angkon og Espirituhanong Kahibalo” diha sa Mahinungdanong Dokumento sa Doktrinal nga Kahanas (2023). Pwede usab kang maghatag og mga timaan [clue], sama sa mga kalihokan nga sumpayan ang blangko o maghatag og unang letra sa kada pulong sa managlahing mga baroganan.

Ipares ang mga kapahayag ngadto sa eksaktong baroganan. Ilista ang tulo ka baroganan sa pag-angkon og espirituhanong kahibalo diha sa pisara. Dayon basaha o ipakita ang lainlaing kapahayag o hugpong sa mga pulong gikan sa parapo 5–12 sa seksiyon nga “Pag-angkon og Espirituhanong Kahibalo” diha sa Mahinungdanong Dokumento sa Doktrinal nga Kahanas. Dapita ang mga estudyante nga ipakigbahin kon hain sa mga baroganan sa pag-angkon og espirituhanong kahibalo ang labing konektado sa kapahayag.

Ipasabot ang kahulogan. Dapita ang lainlaing estudyante sa pagpasabot sa mga baroganan sa pag-angkon og espirituhanong kahibalo sa kaugalingon nilang mga pulong. Mahimo kini pinaagi sa pagpangutana sa lainlaing estudyante bahin sa managlahing mga baroganan, o pwede nimong bahinon ngadto sa tinagtulo ang mga estudyante ug iasayn ang usa sa mga baroganan sa kada estudyante. Kon gikinahanglan, pwede nilang rebyohon kini nga mga baroganan diha sa mga parapo 5–12 sa seksiyon nga “Pag-angkon og Espirituhanong Kahibalo” diha sa Mahinungdanong Dokumento sa Doktrinal nga Kahanas sa dili pa sila hangyoon sa pagpasabot.

I-summarize sa 10 ka pulong o mubo pa. Dapita ang mga estudyante nga maghimo og summary para sa kada baroganan sa pag-angkon og espirituhanong kahibalo gamit ang 10 ka pulong o mubo pa. Dapita ang lainlaing estudyante sa pagpakigbahin sa ilang mga summary ug ipasabot kon nganong ilang gipili ang mga pulong nga ilang gibuhat.

Paghimo og imahe o icon. Dapita ang mga estudyante sa paghimo og simbolo, litrato, o icon para sa kada baroganan sa pag-angkon og espirituhanong kahibalo. Ang ilang gihimo kinahanglang magrepresenta kon unsay gitudlo sa mga baroganan. Dihang mahuman na ang mga estudyante, dapita sila nga ipakita ang ilang nahimo ngadto sa uban ug ipasabot kon nganong ilang gilakip ang unsay ilang gihimo.

Rebyoha samtang naghisgot sa senaryo. Human ipakigbahin ang realistikong senaryo, dapita ang mga estudyante nga tun-an ang mga parapo 5–12 sa seksiyon nga “Pag-angkon og Espirituhanong Kahibalo” diha sa Mahinungdanong Dokumento sa Doktrinal nga Kahanas. Pwedeng pangitaon ug ipakigbahin sa mga estudyante ang mga pagtulun-an gikan niini nga mga parapo nga makatabang sa tawo diha sa senaryo nga (1) molihok uban ang hugot nga pagtuo, (2) mosusi sa mga konsepto ug mga pangutana uban ang mahangtorong panglantaw, ug (3) motinguha og dugang pagsabot pinaagi sa balaanong gitudlo nga mga tinubdan.

Pagpakigbahin og mga kasinatian. Pwedeng hangyoon ang mga estudyante nga ipakigbahin ang ilang mga kasinatian sa paggamit sa mga baroganan sa pag-angkon og espirituhanong kahibalo. Pwede nilang ipasabot kon giunsa sila pagtabang sa maong mga baroganan sa ilang kaugalingong mga pangutana o mga sitwasyon o kon giunsa nila paggamit ang mga baroganan aron tabangan ang uban.

Pagpili og usa ka hugpong sa mga pulong. I-asayn ang kada estudyante nga magpunting sa usa lang ka baroganan sa pag-angkon og espirituhanong kahibalo. Hatagi sila og panahon sa pagpili og usa ka hugpong sa mga pulong gikan sa kada parapo diha sa naasayn nila nga seksiyon nga para nila nagrepresentar kon unsay gitudlo niana nga parapo. Dayon, dapita ang mga estudyante nga liboton ang klasrom ug mangita og usa ka tawo nga naasayn sa parehas nila og baroganan ug ikompara ang hugpong sa mga pulong nga ilang gipili. Unya, pwedeng pangitaon sa mga estudyante kadtong naasayn sa laing duha ka baroganan ug ipakigbahin ang hugpong sa mga pulong nga ilang gipili.

Mga ideya sa Pagrebyo sa mga Tudling sa Doktrinal nga Kahanas

Paggahin og panahon sa tibuok tuig aron regular nga marebyo ang mga tudling sa doktrinal nga kahanas nga gitun-an sa mga estudyante. Makatabang kini nga madugangan ang abilidad sa imong mga estudyante sa paghinumdom sa mga pakisayran sa kasulatan ug mahinungdanong hugpong sa mga pulong sa kasulatan. Makatabang usab kini aron mas masabtan, mapasabot, ug magamit ang doktrina nga gitudlo sa mga tudling sa doktrinal nga kahanas. Usa ka lista sa mga tudling sa doktrinal nga kahanas ug mahinungdanong hugpong sa mga pulong sa kasulatan nga makita sa Mahinungdanong Dokumento sa Doktrinal nga Kahanas.

Sa ubos mao ang pipila ka kalihokan nga magamit o mapahaom aron tabangan ang imong mga estudyante sa pagrebyo sa mga tudling sa doktrinal nga kahanas sa lainlaing paagi.

Sag-uloha

Mga memory card. Dapita ang mga estudyante sa paghimo og mga memory card nga gisulatan og pakisayran sa kasulatan sa usa ka bahin sa papel ug ang mahinungdanong hugpong sa mga pulong sa kasulatan sa pikas bahin. Pwedeng maghimo og mga memory card ang mga estudyante para sa daghang tudling sa doktrinal nga kahanas diha sa usa ka pirasong papel ug dayon gunting-guntingon kini. Dayon, pwede silang magtrabaho nga silasila ra o uban sa usa ka kapares aron magpraktis sa pagsag-ulo sa mga pakisayran ug mahinungdanong hugpong sa mga pulong sa kasulatan. Kini nga mga pagrebyo gamit ang mga memory card pwedeng himoon matag karon ug unya sa tibuok tuig.

Doktrinal nga Kahanas nga app [Doctrinal Mastery nga app]. Gamita ang mga kalihokan sa pagsag-ulo diha sa Doktrinal nga Kahanas nga app. Kon posible, pwede nimong ikonektar ang imong selpon diha sa projector o telebisyon aron ipakita ang sulod sa app aron makompleto sa mga estudyante ang mga kalihokan sa pagsag-ulo isip usa ka klase. Pwede usab nimong dapiton ang mga estudyante nga naay mga selpon nga gamiton ang app aron makagahin og panahon sa paghimo sa mga kalihokan sa pagsag-ulo diha man sa klase o sa gawas sa klase.

Pag-recite diha sa klase. Human nimo masulti ang pakisayran sa kasulatan, pwedeng magdungan ang klase sa pagsubli sa mahinungdanong hugpong sa mga pulong sa kasulatan. Pwede usab nimong isulti ang usa ka mahinungdanong hugpong sa mga pulong sa kasulatan ug dapiton ang klase sa pagsubli og dungan sa katugbang nga pakisayran sa kasulatan.

May kalabotan nga mga litrato. Pangita og mga litrato o mga drowing nga may kalabotan sa mga pagtulun-an sa mga tudling sa doktrinal nga kahanas. Ipakita sa mga estudyante kini nga mga litrato samtang nagbansay sila sa pagsag-ulo sa mga pakisayran sa kasulatan ug mahinungdanong hugpong sa mga pulong sa kasulatan. Pwede pod dapiton ang mga estudyante nga mangita o maghimo og kaugalingon nilang mga litrato nga makatabang nila sa pagsag-ulo sa mga tudling. Kon parehas ra nga mga imahe ang gigamit sa tibuok klase dihang nagsag-ulo sa gihatag nga mga tudling, pwede nimong ipakita ang maong mga litrato matag karon ug unya sa umaabot nga mga sesyon sa klase aron makita kon mahinumdoman pa ba sa mga estudyante ang hugpong sa mga pulong ug pakisayran.

Han-aya. Ipakita ang mga pulong sa pakisayran sa kasulatan ug mahinungdanong hugpong sa mga pulong nga wala sa han-ay ug dapita ang mga estudyante sa paghan-ay niini.

Unang mga letra. Ipakita lang ang unang letra sa kada pulong para sa pakisayran sa kasulatan ug mahinungdanong hugpong sa mga pulong sa kasulatan ug dapita ang mga estudyante nga sulayan og sulti ang hustong pakisayran ug mahinungdanong hugpong sa mga pulong. Anam-anama og papas ang unang mga letra samtang nagkamaayo ang abilidad sa mga estudyante nga i-recite ang pakisayran ug ang mahinungdanong hugpong sa mga pulong.

Butangi ang blangko. Ipakita ang pakisayran sa kasulatan ug importanteng hugpong sa mga pulong sa kasulatan nga nawala ang pipila ka pulong. Dapita ang mga estudyante sa pag-recite sa pakisayran ug mahinungdanong hugpong sa mga pulong samtang nagbutang diha sa blangko. Anam-anama og papas ang mga pulong samtang nagkamaayo ang abilidad sa mga estudyante nga i-recite ang pakisayran ug ang importanteng hugpong sa mga pulong.

Pagparespares. Ipakita ang daghang pakisayran sa kasulatan ug mahinungdanong hugpong sa mga pulong sa kasulatan diha sa duha ka kolum. Sa unang kolum, pasunod nga ilista ang mga pakisayran sa kasulatan. Sa ikaduhang kolum, ilista ang hugpong sa mga pulong sa kasulatan nga wala magsunod. Dayon dapita ang mga estudyante nga pareson ang ensaktong pakisayran sa kasulatan ug mahinungdanong hugpong sa mga pulong sa kasulatan.

Sabta ug ipasabot

Mga cross-reference. Dapita ang mga estudyante nga pangitaon ang daghang cross-reference nga may kalabotan sa tudling sa doktrinal nga kahanas. Dayon, pwede nilang itudlo sa ilang mga klasmeyt ang ilang nakat-onan, lakip kon sa unsang paagi ang dugang nga mga kasulatan nga ilang gitun-an adunay kalabotan ngadto sa tudling sa doktrinal nga kahanas. Pwede nimong isugyot nga ang pipila sa mga cross-reference nga ilang makita nga naggikan sa mga tudling sa doktrinal nga kahanas sa laing mga basahon sa kasulatan.

Pagkonektar ngadto kang Jesukristo. I-asayn ang mga estudyante nga tun-an ang usa ka tudling sa doktrinal nga kahanas, ug hangyoa sila sa paghunahuna og lainlaing paagi nga ang maong tudling konektado kang Jesukristo. Pwede silang maghunahuna ug maghisgot kon unsay gikatabang sa tudling nga nakaasayn nila aron mas masabtan ang bahin kang Jesukristo, Iyang doktrina, o plano sa kaluwasan. Pwede usab silang mangita og mga pananglitan kon sa unsang paagi gitudlo o gipakita sa Manluluwas ang kamatuoran nga makaplagan diha sa tudling.

Simpleng mga pagpasabot. Dapita ang mga estudyante nga mangandam sa pagpasabot sa doktrina nga gitudlo sa lainlaing tudling sa doktrinal nga kahanas ngadto sa usa ka tawo nga dili pamilyar sa maong mga pagtulun-an. Pwede nilang hunahunaon nga gipasabot nila kini nga mga pagtulun-an ngadto sa usa ka bata o sa usa ka tawo nga dili miyembro sa Simbahan. Dapita sila sa pagsulat sa ilang pagpasabot diha sa ilang journal sa pagtuon ug dayon ipakigbahin kini sa usa ka klasmeyt.

Pagtulun-an human sa usa ka Pagtulun-an. Ipakita sa mga estudyante ang mga pananglitan sa pipila sa mga panid sa Pagtulun-an human sa usa ka Pagtulun-an gikan sa Alang sa Kalig-on sa mga Kabatan-onan diin ang importanteng mga pulong o hugpong sa mga pulong gikan sa mga tudling sa kasulatan gianalisar. Usa ka pananglitan sa maong pahina mao ang “Pagtulon-an human sa usa ka Pagtulon-an: Usa ka Magbalantay” (Alang sa Kalig-on sa mga Kabatan-onan, Okt. 2022, 32). Dapita ang mga estudyante sa paghimog kaugalingon nilang bersiyon sa Pagtulun-an human sa usa ka Pagtulun-an. Hangyoa silang mopili og pipila ka mahinungdanong mga pulong gikan sa usa ka tudling sa doktrinal nga kahanas ug ilakip ang may kalabotan nga mga kasulatan, mga pamahayag sa mga lider sa Simbahan, ug mga kahulogan nga makatabang sa pagpalawom sa pagsabot sa maong importanteng mga pulong.

Pangutana. Dapita ang mga estudyante sa pagpili og tudling sa doktrinal nga kahanas nga gusto nilang mas masabtan og maayo. Dapita sila sa pagbasa sa tudling ug paglista sa ilang duha o tulo ka pangutana bahin sa maong tudling. Kini nga mga pangutana pwedeng konektado sa mga pulong o hugpong sa mga pulong nga gusto nilang mas masabtan o kon nganong importanteng masabtan ang tudling. Dihang mahuman na og lista ang mga estudyante sa ilang mga pangutana, dapita silang gamiton ang mga kapanguhaan nga sama sa Librarya sa Ebanghelyo nga app, Giya ngadto sa mga Kasulatan, o uban pang himan sa pagtuon aron makakita og mga tubag sa ilang mga pangutana. Dapita ang mga estudyante sa pagpakigbahin kon unsay ilang nakat-onan.

Biswal nga representasyon. Ang mga estudyante pwedeng maghimo og drowing, collage, meme, word art, word cloud, o lain pang biswal nga representasyon nga makatabang aron makita kon unsay gitudlo sa tudling sa doktrinal nga kahanas. Dayon pwedeng ipakita sa mga estudyante ngadto sa uban ang ilang gihimo ug ipasabot kon sa unsang paagi kini konektado sa tudling sa doktrinal nga kahanas diin sila nagppunting.

Paggamit

Mga senaryo. Pagpakigbahin og lainlaing senaryo nga may kalabotan sa mga sitwasyon, mga hagit, o espirituwal nga mga pangutana sa mga tin-edyer. Dapita ang mga estudyante sa pagpakigbahin sa usa o daghan pang mga tudling sa doktrinal nga kahanas nga para nila magamit diha sa senaryo ug ipasabot kon sa unsang paagi makatabang kini nga mga tudling.

Pagpakigbahin og mga kasinatian. Ang mga estudyante pwedeng magpili og usa sa mga tudling sa doktrinal nga kahanas nga bag-ohay lang nilang naggamit sa ilang kinabuhi o gusto nilang mas bug-os pang gamiton diha sa ilang kinabuhi. Pwedeng dapiton ang mga estudyante nga ipakigbahin ang epekto niini nga mga pagtulun-an ngadto kanila.

Tun-i ang mga tudling samtang gihunahuna ang personal nga mga kahimtang. Dapita ang mga estudyante sa paghunahuna og mga kahimtang, pangutana, o desisyon nga ilang giatubang. Dapita sila sa pagpangita og mga tudling sa doktrinal nga kahanas nga makatabang sa ilang sitwasyon ug sa pagpakigbahin sa unsay ilang nakaplagan nga makatabang.

Tabangi ang usa ka tin-edyer. Dapita ang mga estudyante nga magdrowing og stick figure sa usa ka tin-edyer ug isulat ang iyang ngalan, edad, ug kahimtang sa pamilya ug ang bisan unsang mga pangutana, mga problema, o mga hagit nga giatubang niya sa kasamtangan. Dayon, pwedeng ilhon sa mga estudyante ang mga tudling sa doktrinal nga kahanas nga para nila makatabang niini nga tin-edyer. Pwede nilang ipasabot ang doktrina sa napili nilang tudling ug mosugyot og posibleng mga aksiyon nga pwedeng himoon niini nga tin-edyer.

Pag-andam og debosyonal o pakigpulong. Hatagi og mga kahigayonan ang mga estudyante sa paggamit og mga tudling sa doktrinal nga kahanas sa pagpangandam og debosyonal nga mensahe o mubong pakigpulong. Pwede nimong ikonsiderar ang pag-eskedyul sa kada estudyante nga ipakigbahin ang ilang debosyonal o pakigpulong sa sinugdanan sa klase sa tibuok semester. Tabangi silang mangandam sa pag-summarize sa konteksto ug pagpasabot sa mga kamatuoran nga gitudlo diha sa mga tudling. Dapita ang mga estudyante sa pagpakigbahin og makahuloganong mga kasinatian o mga pananglitan sa paggamit sa mga kamatuoran gikan sa mga tudling nga ilang gipili ug sa pagpamatuod sa mga kamatuoran nga gitudlo diha sa mga tudling.