Հավելված

Գաղափարներ բազմազանության համար

Գաղափարներ բազմազանության համար

Այս նյութը ներառում է տարբեր եղանակներ՝ օգնելու ուսանողներին ակտիվորեն մասնակցել դասերին: Նույնիսկ հիմնավորված և վստահելի ուսուցման մեթոդները չափից ավելի օգտագործելու դեպքում կարող են դառնալ անարդյունավետ կամ ձանձրալի: Թեև պետք չէ ընտրել ուսուցման մեթոդները միայն բազմազանության համար, մտածեք, թե ինչպես կարելի է բազմազանեցնել այն եղանակները, որոնցով դուք ուսուցանում եք յուրաքանչյուր դաս: Ուսուցման բազմազան մեթոդների կիրառումը կարող է օգնել ավելի շատ ուսանողների ներգրավել ուսումնական գործընթացում: Ահա մի քանի հարցեր, որոնք պետք է հաշվի առնել՝ ուսումնական պրոցեսում ներառվող վարժություններ ընտրելիս․

• Արդյո՞ք տվյալ վարժությունը նպաստում է Քրիստոսի վրա կենտրոնացած, սուրբ գրությունների վրա հիմնված և սովորողների վրա կենտրոնացած ուսումնական գործընթացի ապահովմանը: Այս մասին ավելին իմանալու համար տես Ընդունեք, ապա հարմարեցրեք սեմինարիայի ուսումնական ծրագիրը նյութը։

• Արդյո՞ք վարժությունը հրավիրում է Սուրբ Հոգուն՝ ուսուցանելու և վկայելու: Մտածեք, թե ինչպես կարող է վարժությունը նպաստել ակնածալից միջավայրի ստեղծմանը, որն անհրաժեշտ է Սուրբ Հոգուն՝ Իր դերը կատարելու համար:

• Ինչպե՞ս է տվյալ մեթոդը ներկայացնում Աստծո սուրբ խոսքը: Սուրբ գրություններն ու մարգարեների խոսքերը պետք է ներկայացվեն արժանապատիվ և սուրբ ձևով:

• Արդյո՞ք յուրաքանչյուր ուսանող արժանապատիվ վերաբերմունքի է արժանանում: Միշտ ձգտեք խթանել միասնության և սիրո զգացումները: Խուսափեք այնպիսի վարժություններից, որոնք կարող են ուսանողի մոտ առաջացնել անհարմարության, հուսահատության կամ մեկուսացվածության զգացում:

• Արդյո՞ք վարժության վրա արժե ծախսել այն ժամանակը, որը պահանջվում է այն կատարելու համար։ Այն ժամանակը, երբ դուք հավաքված եք սեմինարիայում ուսանողների հետ, շատ արժեքավոր ժամանակ է: Վարժությունները կարող են արդյունավետ լինել առանց դրանց կատարման համար չափազանց շատ ժամանակ ծախսելու:

• Որքա՞ն ժամանակ և ռեսուրսներ կպահանջվեն վարժությանը նախապատրաստվելու համար: Կարևոր է ճիշտ կառավարել ձեր արժեքավոր ժամանակը և ռեսուրսները:

Այս գաղափարները հաճախ կարող են օգտագործվել մի քանի տեղ՝ դասի ընթացքում: Շատ դեպքերում ուսանողներին մոդելի տրամադրումը, թե ինչ է իրենցից պահանջվում անել, օգնում է նրանց ավելի հաջող կատարել առաջադրանքները: Համոզվեք, որ լավ եք հասկանում վարժությունը և, եթե դա օգտակար լինի, կարող եք հստակ հրահանգներ և մոդել տրամադրել՝ նախքան ուսանողները կսկսեն կատարել վարժությունը: Այդ վարժությունները բաժանվում են հետևյալ բաժինների.

1. Ուսումնասիրել սուրբ գրությունները՝ պատմությունը հասկանալու և ավետարանի սկզբունքները կամ վարդապետությունը բացահայտելու համար

2. Խորացնել հասկացողությունը մեջբերումների և սուրբ գրությունների միջոցով

3. Կիսվել այն ամենով, ինչ իրենք սովորում են

4. Ստեղծել իրենց սովորածի պատկերավոր ներկայացում

Հետադարձ կապ տրամադրելու կամ լրացուցիչ գաղափարներ առաջարկելու համար ուղարկեք էլեկտրոնային նամակ [e-mail] հասցեով։ Նամակի թեմայի տողում գրեք «Գաղափարներ բազմազանության համար»:

1. Ուսումնասիրել սուրբ գրությունները՝ պատմությունը հասկանալու և ավետարանի սկզբունքները կամ վարդապետությունը բացահայտելու համար

Դասերը հաճախ ներառում են վարժություններ, որոնցում ուսանողները ուսումնասիրում են սուրբգրային հատվածների շարք, որպեսզի բավականաչափ լավ հասկանան սուրբգրային բաժնի հիմնական համատեքստն ու պատմությունը և կարողանան բացահայտել սկզբունքները կամ վարդապետությունը: Հետևյալ վարժությունները ներկայացնում են մի քանի եղանակ, որոնցով կարող եք օգնել ուսանողներին դա անել։

Նկարների մեկնաբանություն

Օգտագործեք Ավետարանի պատկերագիրքը՝ պատմությունը քննարկելու համար Ցուցադրեք մի նկար Եկեղեցու Media Library հավելվածից և առաջարկեք ուսանողներին ուսումնասիրել նկարում պատկերված հատվածները: Հարցրեք ուսանողներին.

• Ի՞նչը դուք կփոխեիք:

• Ի՞նչ է նկարների ​​մեկնաբանությունը (որը տեքստում չկա):

• Սուրբ գրությունների ո՞ր հատվածներն են ներկայացված:

Տարբերակ. Քննարկում սկսելու համար դասի սկզբում նկարն ամբողջովին ցուցադրելու փոխարեն այն բաժանեք մասերի: Հատ-հատ՝ իրար հետևից ցույց տվեք նկարի մասերը և խնդրեք ուսանողներին գուշակել, թե ինչ է պատկերված ամբողջ նկարում: Խնդրեք նրանց նկարագրել, թե ինչ են իրենք տեսնում և ենթադրություններ անել այն մասին, ինչ իրենք չեն տեսնում:

Տարբերակ. Ընտրեք Փրկչի մի քանի նկար և փակցրեք դրանք գրատախտակին: Առաջարկեք ուսանողներին հանգամանորեն ուսումնասիրել նկարների գույնը, ֆոկուսը և դիրքը և բացահայտել, թե դրանցից յուրաքանչյուրն ինչ է ուսուցանում այն մասին, թե ով է Հիսուս Քրիստոսը: Սկզբունքը բացահայտելուց հետո կարող եք տալ հետևյալ հարցերը․

• Ձեր կարծիքով, Քրիստոսի ո՞ր նկարն է ներկայացնում ձեր գտած սկզբունքը և ինչու:

• Հիսուսի այս նկարներից ո՞րն է օգնում ձեզ զգալ այդ ճշմարտության կարևորությունը:

• Ի՞նչ կցանկանայիք, որ ձեր ընկերն իմանա Հիսուս Քրիստոսի մասին՝ այդ ճշմարտության մասին մտածելիս։

Ավելացրեք երկխոսություն նկարի համար

Պատճենեք նկարները Scripture Stories for Children գրքից և տեղադրեք դրանք ուսանողների համար նախատեսված աշխատաթերթում: Ավելացրեք բառերի նշումների ամպեր, որտեղ ուսանողները կարող են գրել, թե ինչ են ասում կամ մտածում նկարի հերոսները:

Սյուժեի կամ պատմության վերլուծությունը

Յուրաքանչյուր ուսանողի տրամադրեք սուրբգրային հատվածի մի մասը՝ ուսումնասիրելու համար։ Այնուհետև տրամադրեք նրանց սյուժեի կամ պատմության վերլուծության պահանջները (թղթի կամ գրատախտակի վրա): Այն կարող է ներառել գլխավոր հերոսներին, սյուժետային գիծը, նշում մեկ կամ երկու դասի մասին, որ կարող ենք սովորել այս պատմությունից (մեջբերելով այն հատվածները, որոնցից այդ դասերը կարող ենք քաղել) և նշում այն մասին, թե ինչպես պատմությունը կարող է կիրառվել դեռահասի համար: Ուսանողներին ժամանակ տվեք մեկ այլ ուսանողի հետ կիսվելու իրենց պատրաստածով:

Տարբերակ. Փոքր խմբում յուրաքանչյուր ուսանող կարող է վերցնել սյուժեի կամ պատմության վերլուծության մի մասը՝ գլխավոր հերոսները, պատմությունը, քաղված դասերը կամ կիրառումը:

Բացահայտումների մղող հարցեր

Երբ ուսանողները կարդան սուրբգրային հատվածների շարքը, առաջարկեք նրանց գրել հարցեր, որոնց պատասխանները կարելի է գտնել այդ հատվածներում։ Առաջարկեք ուսանողներին գրել կարևոր հարցեր, որոնք առնչվում են դեռահասների կյանքին, այլ ոչ թե պարզապես որոնման մղող պարզ հարցեր: Օրինակ՝ հարցնելու փոխարեն «Ի՞նչ է ասում Ալման այն մասին, թե ինչ է հավատքը: Եվ ինչ է նա ասում այն մասին, թե ինչը հավատք չէ», ուսանողները կարող են հարցնել. «Ի՞նչ պետք է անեմ, որպեսզի ինքս հասկանամ, որ Փրկչի ուսուցանած այս կամ այն բանը ճշմարիտ է»: Եթե ​​ուսումնասիրության համար ուսանողներին հանձնարարել եք սուրբգրային հատվածների մի քանի շարք, ապա ուսանողները կարող են գրել իրենց հարցերը և կիսվել դրանցով մի ուսանողի հետ, որը ուսումնասիրել է մեկ այլ հատվածների շարք: Ուսանողները կարող են որոնել իրենց դասընկերների տված հարցերի պատասխանները և մտածել դրանց շուրջ:

Հարցազրույց հեղինակի հետ

Խնդրեք ուսանողներին պատկերացնել, որ իրենք սուրբգրային պատմության հեղինակն են, և ինչ-որ մեկը իրենցից հարցազրույց է վերցնում իրենց գրածի մասին: Ուսանողները կարող են կարդալ սուրբգրային պատմությունը և փոխ առ փոխ կատարել հարցազրուցավարի և հեղինակի դերերը: Հարցազրուցավարը կարող է տալ հետևյալ տիպի հարցեր.

• Այս հատվածների ո՞ր կարևոր կետերը չէիք ցանկանա, որ դուրս մնան ընթերցողների ուշադորթյունից:

• Կարո՞ղ եք ասել, թե որն էր ձեր հիմնական միտքը կամ ձեր հիմնական մտքերից մեկը այս պատմությունում:

• Ինչպե՞ս կցանկանայիք, որ ընթերցողները դա կիրառեն իրենց կյանքում:

Ուսանողներին առաջարկեք կիսվել, թե ինչ սովորեցին այս փորձառությունից։ Օգտագործեք նրանց մեկնաբանությունները՝ թավագիր ճշմարտությունը ասելու համար:

Համապատասխանեցում

Մի սյունակում գրեք սուրբ գրությունների մի քանի հղում, իսկ մյուս սյունակում՝ այդ հղումներին համապատասխանող ճշմարտություններ՝ խառը կարգով։ Ուսանողները պետք է ուսումնասիրեն և համապատասխանեցնեն հղումները և ճշմարտությունները։

Ամենակարևոր ճշմարտությունը

Երբ ուսանողներն ուսումնասիրում են սուրբ գրությունների մի գլուխ, որը պարունակում է մի քանի ճշմարտություն, որ ուսանողները կարող են բացահայտել, կարող եք առաջարկել նրանց սկսել ինքնուրույն ուսումնասիրություն: Յուրաքանչյուր ուսանող կարող է որոշել, թե որոնք են իր կարծիքով այդ հատվածների երեք կամ չորս ամենակարևոր ճշմարտությունները կամ գաղափարները և գրել դրանք: Այնուհետև ուսանողները կարող են բաժանվել երկու հոգանոց խմբերի և համեմատել իրենց բացահայտած ճշմարտությունները: Ուսանողների յուրաքանչյուր զույգի անդամները որոշում են, թե որոնք են իրենց կարծիքով երկու ամենակարևոր ճշմարտությունները և գրանցում են դրանք: Նշում. գաղափարները կարող են տարբերվել զույգի անդամների նշած սկզբնական չորս գաղափարից: Այնուհետև յուրաքանչյուր զույգ միանում է մեկ այլ զույգի՝ կազմելով չորս հոգանոց խումբ. խմբի չորս անդամնեը միասին կիսվում և համեմատում են իրենց գաղափարները և աշխատում են որպես մեկ թիմ՝ որոշելու տեքստի մեկ ամենակարևոր ճշմարտությունը։

Նկարների ժամանակագրությունը

Ցուցադրեք մի քանի նկար, որոնք ներկայացնում են այն սուրբգրային պատմությունը, որն ուսանողներն ուսումնասիրելու են: Ցուցադրեք այն հատվածները, որոնք ուսանողները կարդալու են: Ուսանողներին առաջարկեք նկարները դնել ճիշտ հերթականությամբ:

Սյուժեի ներկայացում՝ գծապատկերի տեսքով

Օգնեք ուսանողներին բացահայտել սուրբգրային պատմություններում ուսուցանվող վարդապետությունը կամ սկզբունքները սսյուժետային գծապատկերի միջոցով: Առանձնացրեք սյուժեի տարրերը, այդ թվում՝.

1. Սկզբնական իրավիճակը (ներառյալ ով, ինչ, որտեղ, երբ կետերը):

2. Հակասության կամ գործողությունների զարգացումը։ Գտեք այն փոփոխությունները, որոնք ազդում են պատմության գործող անձանց կյանքի վրա:

3. Պատմության գագաթնակետը։ Դա պատմության ամենակարևոր պահն է։ Հաճախ գագաթնակետային պահին կարևոր փոփոխություն է տեղի ունենում, օրինակ՝ մարդը հաղթահարում է խոչընդոտը կամ որևէ բացահայտում է անում:

4. Գործողությունների ինտենսիվության նվազում և հանգուցալուծման սկիզբ։ Գագաթնակետային պահի հետևանքները գործողությունների նվազման փուլում։

5. Հանգուցալուծում։ Այս փուլը նկարագրում է մարդկանց նոր հասկացողությունը՝ իրենց փորձի շնորհիվ:

Գրատախտակին գրեք սուրբ գրությունների հղումները սյուժեի յուրաքանչյուր տարրի համար: Առաջարկեք ուսանողներին կարդալ սյուժեի յուրաքանչյուր տարրին համապատասխանող հատվածները և նկարել այն, ինչ իրենք կարդում են, կամ գրել հիմնական իրադարձությունների ցանկը: Երբ ուսանողներն ավարտեն վերջին քայլը, առաջարկեք նրանց վերանայել ամբողջ պատմությունը և մեկ նախադասությամբ գրել այն ճշմարտությունը, որը իրենք սովորեցին:

Փազլ

Պատրաստեք մի պարզ փազլ այն նկարից, որը ներկայացնում է սուրբգրային հատվածների ամբողջ շարքը: Փազլի յուրաքանչյուր կտորի հետևի մասում գրեք սուրբ գրությունների հղումները: Ուսանողները կարող են բաժանվել խմբերի և յուրաքանչյուր խմբի կարող եք տալ փազլի մի կտորը: Ուսանողները ուսումնասիրում են հղումների հատվածները և պատրաստվում՝ ամփոփ ներկայացնելու իրենց հատվածները: Երբ խմբերը կիսվեն իրենց ամփոփումներով դասարանի հետ, կարող են փազլի կտորները կպչուն ժապավենով փակցնել գրատախտակին՝ ամբողջական նկարը հավաքելու համար:

Պատմության ներկայացում՝ ընթերցողների դերախաղի միջոցով

Եթե պատմության մեջ շատ երկխոսություններ կան, կարող եք սուրբ գրությունների հատվածների համար կազմել դերախաղի սցենար, որպեսզի դերերը կատարող ուսանողներից յուրաքանչյուրը կարողանա արագ գտնել իր մասը: Դերախաղի ներկայացման մեջ ներառեք պատմողին՝ կարդալու այն հատվածները, որոնք երկխոսություն չեն: Կարող եք թղթի վրա տպել սուրբ գրությունների հատվածները և դերերի տեքստը նշել տարբեր գույների մարկերներով։ Նշում․ նկատի առեք, որ Աստվածագլխի անդամները միշտ պետք է ներկայացվեն բարձրագույն աստիճանի ակնածանքով: Եթե ​​Աստվածագլխի անդամը, ներառյալ Հիսուս Քրիստոսը, ներկայացված է սուրբգրային այն պատմության մեջ, որի համար դուք ցանկանում եք կատարել այս վարժությունը, ապա Նրա խոսքերը պետք է կարդա պատմողը:

Սուրբ գրությունների ընթերցում

Դասարանում սուրբ գրությունները կարդալու բազմաթիվ եղանակներ կան։ Յուրաքանչյուր եղանակ կարող է ծառայել որոշակի նպատակի։ Ընթերցման մեթոդ ընտրելիս հաշվի առեք ձեր դասարանի կարիքները:

• Լուռ ընթերցում. ուսանողները կարող են լուռ կարդալ իրենց մտքում: Այս մեթոդը ուսանողներին ժամանակ է տալիս մտածելու սուրբ գրությունների շուրջ և կարդալու իրենց նախընտրած արագությամբ:

• Ընթերցում զույգերով կամ խմբերով. այս մեթոդը հնարավորություն է տալիս ավելի շատ թվով ուսանողների մասնակցել ընթերցանությանը և ավելի քիչ անհանգստանալ բարձրաձայն կարդալու համար:

• Ընթերցում ուսուցչի կողմից կամ ձայնագրված աուդիո. ուսուցիչը կարող է կարդալ տեքստը կամ միացնել դրա ընթերցման ձայնագրությունը և առաջարկել ուսանողներին հետևել տեքստին:

• Բարձրաձայն ընթերցում․ կարող եք առաջարկել ամբողջ դասարանով միասին կարդալ հատվածները: Մի քանի պատրաստակամ ուսանող կարող է բարձրաձայն կարդալ դասարանի համար կամ ուսանողներին կարող եք նախօրոք հանձնարարել կարդալ և ժամանակ տալ ընթերցանությանը պատրաստվելու համար: Ասեք ուսանողներին, որ իրենք կարող են հրաժարվել կարդալ, եթե որևէ անհարմարություն են զգում։

Որոնումներ սուրբ գրություններում

Առանձին թղթերի վրա մի քանի հարց պատրաստեք սուրբգրային հատվածների շարքի վերաբերյալ: Կանչեք ուսանողներին դասասենյակի դիմացի հատված և նրանց տվեք հարցերից մեկը: Առաջարկեք նրանց վերադառնալ իրենց դասասեղանների մոտ՝ պատասխանը գտնելու համար: Պատասխանը գտնելուց հետո նրանք նորից գալիս են սենյակի դիմացի հատված և ստանում են հաջորդ հարցը՝ պատասխանը գտնելու համար: Սա նաև կարելի է կատարել փոքր խմբերով։

Մոդելավորում

Դասասենյակը հարմարեցրեք այնպես, որ այն ներկայացնի այդ օրը ընթերցվող սուրբգրային պատմության միջավայրի մոդելը։ Օրինակ, եթե կարդում եք Վարդապետություն և Ուխտեր 121 բաժինը, կարելի է աթոռները շարել այնպես, որ առանձնանա Լիբերթիի բանտի խցի չափ տարածք: Այս մեթոդը օգնում է ուսանողներին տեսողական պատկերացում կազմել այն մասին, ինչ իրենք սովորելու են: Վարդապետություն և Ուխտեր 136 բաժնի համար ուսանողները կարող են բաժանվել ռահվիրաների խմբերի և ընտրել կապիտան՝ որպես խոսնակ:

Դադարի նշան

Ուսանողներին տրամադրեք թավագիր ճշմարտություն։ Նրանց համար դանդաղ կարդացեք մի քանի հատված և խնդրեք ձեռք բարձրացնել կամ ասել «Դադար», երբ հատվածում որևէ բան լսեն, որն օգնում է ուսուցանել այդ թավագիր ճշմարտությունը: Այնուհետև առաջարկեք ուսանողներին կիսվել իրենց նկատածով:

Ուսանողների կողմից ամփոփում ներկայացնելը

Դասից առաջ մեկ կամ մի քանի ուսանողի տրամադրեք համատեքստ կամ բովանդակություն այն սուրբ գրությունների վերաբերյալ, որոնք ցանկանում եք, որ նրանք ամփոփ ներկայացնեն դասարանին: Դրանք կարելի է տպել և բաժանել մեկ օր առաջ, կամ հանձնել ուսանողներին, երբ նրանք մտնում են դասարան: Առաջարկեք նրանց պատրաստվել՝ կիսվելու իրենց ամփոփումով դասի ընթացքում, երբ իրենց կանչեն պատասխանելու:

Թարգմանեք հատվածը

Երբ ուսանողները կարդան սուրբգրային հատվածների շարքը, կարող եք նրանց առաջարկել ընտրել մի հատված՝ թարգմանելու համար կամ սեփական բառերով հատվածի յուրաքանչյուր տողը գրելու համար: Օգնեք նրանց սովորել գտնել սահմանումներ կամ օգտագործել սուրբ գրությունները և սուրբ գրությունների ուսումնասիրության այլ գործիքներ՝ դժվար բառերն ու արտահայտությունները հասկանալու համար:

Ճի՞շտ է, թե՞ սխալ

Գրեք տարբեր ճիշտ կամ սխալ պնդումներ՝ սուրբ գրությունների հատվածներում պարունակվող կարևոր մանրամասների վերաբերյալ: Առաջարկեք ուսանողներին նշել, թե արդյոք իրենք ի սկզբանե համաձայն են կամ համաձայն չեն այդ պնդումների հետ: Առաջարկեք նրանց սուրբգրային հատվածների շարքն ուսումնասիրելով՝ գտնել այդ պնդումները հաստատող կամ հերքող ապացույցներ։ Այնուհետև՝ կարդալով սուրբ գրության հատվածը, ուսանողները նորից գրում են պնդումը ճիշտ ձևով։

Օգտագործեք լուսանկար

Առաջարկեք ուսանողներին ընտրել իրենց համար կարևոր մի լուսանկար: Այն կարող է լինել իրենց հեռախոսում, կամ կարող են բերել տնից: Առաջարկեք նրանց պատրաստվել՝ կիսվելու հետևյալով․

• Լուսանկարի նախապատմությունը՝ նկարագրելով, թե ինչ է տեղի ունեցել լուսանկարն անելուց առաջ։

• Լուսանկարի հիմնական միտքը կամ նպատակը։

• Իրենց համար կարևոր մի քանի մանրամասնություն։

Լուսանկարով կիսվելուց հետո ուսանողները կարող են կարդալ դասի համար նախատեսված սուրբգրային հատվածների շարքը և վերը նշված նույն երեք կետերի պատասխանները պատրաստել սուրբ գրությունների հատվածների վերաբերյալ։

Պատկերացում

Առաջարկեք ուսանողներին պատկերացնել իրենց ուսումնասիրած պատմությունը կամ տեքստային հատվածը: Ուսանողները կարող են փակել իրենց աչքերը և կենտրոնանալ ուսուցչի նկարագրած պատկերները պատկերացնելու վրա: Օրինակ՝ կարող եք առաջարկել ուսանողներին պատկերացնել, որ իրենք այն հովիվներն են, որոնք հետևեցին հրեշտակի հրավերին՝ գտնել մսուրում պառկած մանուկ Քրիստոսին։ Այնուհետև կարող եք ասել նմանատիպ բան․ «Դուք մտնում եք այն ախոռը, որտեղ Մարիամն է՝ մանուկ Քրիստոսը գրկին: Ո՞ւմ եք դուք տեսնում այնտեղ։ Ի՞նչ կենդանիներին եք պատկերացնում այնտեղ: Ձեր պատկերացման մեջ ինչպե՞ս է Մարիամը արձագանքում ձեր ներս մտնելուն»։ Շարունակեք հարցեր տալ, որոնք կօգնեն ուսանողներին պատկերացնել իրավիճակը:

Բառերի ամպ

Առաջարկեք ուսանողներին նշել այն բառերն ու արտահայտությունները, որոնք, իրենց կարծիքով, կարևոր են սուրբգրային հատվածում: Ստեղծեք բառերի ամպ՝ նրանց նշած ամենաբնորոշ կամ նշանակալից բառերով և արտահայտություններով: Բառերի ամպի չափը կարող է ցույց տալ դրանց կարևորության աստիճանը:

2. Խորացնել հասկացողությունը մեջբերումների և սուրբ գրությունների միջոցով

Հաճախ դասերը կարող են ներառել սուրբգրային մի քանի հատված կանոնիկ գրքերից՝ օգնելու ուսանողներին խորացնել այն սկզբունքի կամ վարդապետության հասկացողությունը, որն իրենք ուսումնասիրում են: Կարող են լինել նաև դասեր, որոնք կներառեն Եկեղեցու ղեկավարների մի քանի մեջբերում: Հետևյալ վարժությունները ներկայացնում են մի քանի եղանակ, որոնք օգնում են ուսանողներին ուսումնասիրել տարբեր սուրբգրային հատվածներ կամ մեջբերումներ և հնարավորություն են տալիս նրանց ինքնուրույն բացահայտել ճշմարտությունը:

Ստեղծեք ուսումնասիրության կայաններ

Տեղադրեք ուսումնասիրության կայաններ ամբողջ դասարանում: Յուրաքանչյուր կայան կարող է ներառել հրահանգներ՝ փակցված պատերին կամ գրասեղաններին: Այդ հրահանգները կարող են ներառել սուրբ գրություններ կամ մեջբերումներ՝ կարդալու համար և հարցեր կամ այլ վարժություններ՝ կատարելու համար: Ուսանողները կարող են շրջել սենյակում փոքր խմբերով՝ քննարկելով, թե ինչ սովորեցին յուրաքանչյուր կայանում: Նրանք նաև կարող էին դա անել անհատապես և կայանից կայան անցնել իրենց նախընտրած տեմպով: Յուրաքանչյուր կայանում կարող եք ունենալ մեծ թուղթ, որպեսզի յուրաքանչյուր խումբ կամ ուսանող գրի իր պատասխանները: Նրանք կարող են կարդալ ուրիշների գրածը և խորհել դրա շուրջ:

Ստեղծեք ձեր ծանոթագրությունները

Առաջարկեք ուսանողներին ծանոթագրություններ ավելացնել իրենց ուսումնասիրած սուրբ գրություններին։ Այդ ծանոթագրությունները կարող են ավելացվել՝ ուսումնասիրվող հատվածները և սուրբգրային այլ հատվածներ և եկեղեցու ղեկավարների ուղերձներ միմյանց կապելու միջոցով: Ուսանողները կարող են խաչաձև հղումները գրել իրենց լուսանցքներում կամ օգտագործել Gospel Library հավելվածի՝ հատվածների կապակցման գործառույթը։ Նրանք կարող են կիսվել հնարավորինս շատ լրացուցիչ հղումներով, որոնք ավելի շատ գաղափարներ կտան թեմայի վերաբերյալ: Տարբերակ. Ուսանողները կարող են օգտագործել պիտակներ իրենց Gospel Library հավելվածում, որպեսզի միմյանց կապեն տարբեր սուրբ գրություններ և մեջբերումներ դասից:

Սահմանել

Ուսանողները նշում են որևէ բառ կամ հասկացություն, որը դժվար է հասկանալ: Հանձնարարեք նրանց որոնում կատարել տարբեր աղբյուրներում, այդ թվում՝ սուրբ գրություններում և սուրբ գրությունների ուսումնասիրության գործիքներում (Թեմաների ուղեցույց, Սուրբ գրքերի ուղեցույց, Թեմաներ և հարցեր), որոնք կօգնեն նրանց ավելին իմանալ եզրույթի մասին: Հանձնարարեք նրանց իրենց բառերով սահմանել եզրույթը կամ արտահայտությունը:

Նշումներ և գրառումներ

Ուսանողների ուսումնասիրության ժամանակ նրանց տվեք մի թուղթ՝ մտքերի պղպջակներով կամ բաժիններով, որտեղ նրանք կարող են գրել այն, ինչ բացահայտում են:

Փորձագետներ

Ուսանողներին բաժանեք փոքր խմբերի և յուրաքանչյուր խմբի հանձնարարեք մի թեմա ուսումնասիրել։ Խմբերին ժամանակ և աղբյուրներ տրամադրեք թեմաներն ուսումնասիրելու համար, որպեսզի խմբի յուրաքանչյուր անդամ դառնա իր խմբի թեմայի փորձագետ։ Բավարար ժամանակ տրամադրելուց հետո ուսանողներին բաժանեք նոր խմբերի այնպես, որ յուրաքանչյուր խումբ ներառի մեկ այլ թեմայի «փորձագետ»: Այնուհետև, ուսանողները կարող են կիսվել, թե ինչ սովորեցին իրենց թեմաներից:

Կապակցումներ «Երիտասարդներին զորացնելու համար» ուղեցույցի հետ

Ընտրեք Երիտասարդներին զորացնելու համար. ուղեցույց ընտրություն կատարելու համար գրքույկի մի բաժին և առաջարկեք ուսանողներին գտնել արտահայտություններ, որոնք ամրացնում են այն ճշմարտությունը, որն իրենք բացահայտել են սուրբ գրությունների հատվածում:

Տող առ տող

Ուսանողներին հանձնարարեք գրել սուրբ գրության հատվածը իրենց ուսումնական օրագրում՝ տող առ տող կամ նախադասություն առ նախադասություն: Տողերի կամ նախադասությոնների միջև պետք է տարածություն թողնել: Ուսանողները պետք է ուշադիր ուսումնասիրեն և խորհեն տվյալ տողի կամ նախադասության յուրաքանչյուր բառի շուրջ: Տվյալ տողի մասին նրանք կարող են նաև գտնել խաչաձև հղումներ կամ այլ տեղեկություններ Gospel Library հավելվածից։ Այնուհետև նույնը կատարում են հատվածի հաջորդ տողի համար: Դրա օրինակը կարելի է գտնել «Մի վախեցիր» նյութում՝ Երիտասարդներին զորացնելու համար գրքույկում, փետր. 2021, 32:

Գաղափարների քարտեզ

Առաջարկեք ուսանողներին իրենց ուսումնական օրագրում ստեղծել գաղափարների քարտեզ՝ վերևում ներկայացվածի օրինակով։ Մեջտեղի վանդակում նրանք կարող են գրել իրենց բացահայտած սկզբունքը կամ վարդապետությունը։ Ապա պետք է որոնեն լրացուցիչ սուրբ գրություններ կամ մեջբերումներ, որոնք կավելացնեն իրենց հասկացողությունը: Այդ թեմայի վերաբերյալ իրենց գաղափարները նրանք կարող են գրել արտաքին վանդակներում։ Առաջարկեք ուսանողներին ընդլայնել գաղափարների իրենց քարտեզը՝ շարունակաբար վանդակներ ավելացնելով և դրանք կապելով այն ճշմարտությունների հետ, որ իրենք սովորում են:

Համընկնող գաղափարներ

Առաջարկեք ուսանողներին դասից ընտրել երկու կամ ավելի թեմաներ, որոնք որոշ առումներով նման են, որոշ առումներով՝ տարբեր: Ստեղծեք մի գծապատկեր՝ վերևի նկարի նման, որտեղ ուսանողները կարող են համակարգված ներկայացնել, թե այդ երկու թեմաներում ինչն է ընդհանուր և ինչը՝ տարբեր։ Դա կարող է արվել նույն պատմության երկու հերոսների վերաբերյալ (օրինակ՝ Լաման և Նեփի) կամ երկու թեմաների վերաբերյալ (օրինակ՝ Զատիկ և հաղորդություն):

Կիսվեք գաղափարներով

Ուսանողներին տվեք սուրբգրային հատվածների շարքի պատճենված էջը և խնդրեք վերևում գրել իրենց անունը: Տվեք նրանց մեկից երկու րոպե՝ կարդալու հատվածների շարքը և գրելու այն գաղափարը, որն իրենք սովորեցին իրենց ուսումնասիրությունից:

Օրինակները կարող են ներառել հետևյալը. ուսանողները կարող են նշել ծանոթագրությունները, կիսվել մարգարեական մեջբերումներով, ընդգծել կարևոր արտահայտությունները, շրջանի մեջ առնել որոշակի բառեր, գրել սկզբունքներ և լուսանցքներում կիսվել իրենց վկայությամբ և այլ գաղափարներով։

Ժամանակն ավարտվելուց հետո նրանք պետք է իրենց թուղթը փոխանցեն մեկ այլ ուսանողի, որպեսզի նա գրի մեկ այլ գաղափար։ Մի քանի ուսանողի թուղթը փոխանցելուց հետո այն պետք է վերադարձվի սկզբնական ուսանողին։ Տարբերակ. սուրբգրային հատվածների շարքի փոխարեն յուրաքանչյուր թուղթ պարունակում է կիրառման մասին մի հարց, որը վերաբերում է շարքին։ Մի քանի ուսանող կարող է պատասխանել հարցերին՝ օգտագործելով սուրբ գրությունները և կիսվել թեմայի վերաբերյալ իր վկայություններով:

Ընտրեք մեջբերում պատահականության սկզբունքով

Գլխարկի կամ պայուսակի մեջ տեղադրեք մի քանի մեջբերում, որոնք ուսուցանում են դասում պռկա ճշմարտությունը։ Պատրաստակամ ուսանողներին առաջարկեք գլխարկից հանել մի մեջբերում և կիսվել, թե ինչպես է այն առնչվում այն ​​ճշմարտությանը, որը իրենք սովորում են, և ինչ նշանակություն ունի այն իրենց համար: Ժամանակ տվեք նրանց, որպեսզի կարդան և պատրաստվեն կիսվելու: Տարբերակ. երբ ուսանողները կիսվեն, նրանք կարող են փոխանակվել մեջբերումներով և գտնել նոր զուգընկերներ, որոնց հետ կկիսվեն իրենց նոր մեջբերումով:

Սուրբ գրությունների փակագծեր

Ընտրեք սուրբ գրությունների 16 հղում և յուրաքանչյուր հղում գրեք առանձին տողի վրա՝ սյունակով։ Այնուհետև ընդհանուր ցանկից երկու հղում դրվում են փակագծերի մեջ։ Առաջարկեք ուսանողներին զույգերով կամ փոքր խմբերով կարդալ այդ երկու հղման հատվածները և որոշել, թե որ հղումն է առավել կարևոր այսօր դեռահասի համար: Նրանց ընտրած հատվածը անցնում է հաջորդ փակագիծ և հղումների նոր զույգ կազմում: Ուսանողները շարունակում են քննարկել սուրբգրային հատվածների յուրաքանչյուր զույգ, մինչև պարզեն, թե որն է սուրբգրային այն հատվածը, որն իրենց կարծիքով առավել կարևոր է։ Ապա քննարկում են, թե ինչու է այդ հատվածն առավել կարևոր։ Ուսանողները կարող են կիսվել այդ հատվածներով դասարանի հետ։

Ուսումնական վարժություններ՝ ուսանողների ընտրությամբ

Կազմեք վեց ուսումնական վարժությունից բաղկացած ցանկ: Երբ ուսանողները նշեն սուրբգրային հատվածների շարքի ճշմարտությունը, առաջարկեք նրանց պատահական եղանակով ընտրել, թե որ վարժությունը պետք է կատարեն (զառերով վարժություն, քարտ քաշելու վարժություն, թերթիկ ընտրելու վարժություն, պատահական թվերի գեներատոր):

Օրինակները կարող են ներառել.

1. Կիսվեք Հիսուսի կյանքից մի պատմությունով, որտեղ Նա ուսուցանում է կամ ցույց է տալիս ճշմարտությունը:

2. Գտեք վարդապետության ​​սերտման հատված կամ սուրբգրային այլ հատված ճշմարտության մասին:

3. Գտեք սուրբգրային պատմության օրինակ մի մարդու մասին, որը ապրել է ճշմարտությամբ:

4. Գտեք Եկեղեցու ղեկավարի ուղերձ, որն ուսուցանում է ճշմարտություն:

5. Կիսվեք մի մարդու անձնական փորձառությամբ, որը օրհնվել է ճշմարտության միջոցով:

6. Ընտրեք ձեր սեփական օրինակը մի բանի, որ մենք կարող ենք անել՝ ճշմարտությամբ ապրելու համար: Գտեք սուրբ գրության մի հատված, որն ուսուցանում է այն օրինակը, որով դուք կիսվել եք։

Ուսումնասիրության հոսքագիծ

Դասարանում յուրաքանչյուր դասասեղանի կամ աթոռի վրա դրեք մի քարտ, որը պարունակում է հրահանգներ, օրինակ՝ «կարդացեք սուրբգրային հատվածը կամ մեջբերումը» կամ «պատասխանեք դասի հարցին»: Ուսանողները կարող են փոխել իրենց նստարանները և հետևել յուրաքանչյուր նստարանին դրված քարտի հրահանգներին:

Թեմաների գծապատկեր

Առաջարկեք ուսանողներին ստեղծել նմանատիպ գծապատկեր, որի կենտրոնական շրջանակում տեղադրված է թավագիր ճշմարտություն կամ թեմա: Այնուհետև ուսանողները գծեր են քաշում դեպի կողքերից նկարվող շրջանակներ և դրանց մեջ գրում համապատասխան սուրբ գրությունները, ճշմարտությունները կամ հիմնական թեմայի տարրերը: Օրինակ՝ ուսանողները կարող են գրել Բենիամին թագավորի «Հավատացեք Աստծուն» հրավերը կենտրոնական շրջանակում՝ «Մոսիա 4․9–10» հղումով: Այնուհետև նրանք կարող են արտաքին շրջանակներում գրել, թե Աստծո վերաբերյալ ինչին է մեզ հրավիրում հավատալ Բենիամին թագավորը։

Դադար՝ տեսանյութը նայելիս

Օգտագործեք տեսանյութ, որը ցույց է տալիս կամ ուսուցանում է ավետարանի որևէ սկզբունքի մասին: Դադար վերցրեք ցուցադրման տարբեր պահերի, որպեսզի հետաքրքրություն առաջացնեք կամ ուսանողներին օգնեք վերլուծել այն, ինչ դիտում են: Ուսանողներին կարող եք տալ հետևյալ հարցերը.

• «Եթե դուք լինեիք այդ իրավիճակում, ի՞նչ մտքեր կամ ապրումներ կամ ինչ հարցեր կունենայիք»:

• «Այսօր ձեր ուսումնասիրած ո՞ր սուրբ գրությունները կարող են օգնել այս իրավիճակում»:

• «Այսօր ձեր ուսումնասիրած ո՞ր ճշմարտությունը կցանկանայիք, որ այս մարդը հասկանար»:

• «Ինչպե՞ս եք տեսնում ձեզ այս պատմության մեջ այսօր»:

3. Կիսվել իրենց սովորածով

Դասերի ժամանակ ուսանողներին առաջարկեք կիսվել իրենց մտքերով և գաղափարներով։ Երբ ուսանողները բացատրում են, կիսվում և վկայում դասընկերոջը, փոքր խմբին կամ դասարանին, նրանք հաճախ Սուրբ Հոգու կողմից առաջնորդվում են դեպի ավելի խոր վկայություն հենց այն բաների մասին, որ իրենք արտահայտում են: Սուրբ Հոգու զորությամբ նրանց խոսքերը և արտահայտությունները նաև կարող են զգալի ազդեցություն ունենալ իրենց լսող մարդկանց սրտերի ու մտքերի վրա։ Որքան էլ դա կարևոր է, կիսվելը կարող է դժվար լինել ուսանողների համար մի շարք պատճառներով: Հիշեք՝ դուք պետք է ապահովեք այն պայմանը, որ ուսանողները առանց որևէ վերապահման կարողանան հրաժարվել կիսվելուց, եթե իրենց հարմար չէ կիսվել։ Հետևյալ գաղափարները կարող են օգնել ուսանողներին կիսվել իրենց սովորածով:

Վերլուծեք հատվածը

2.7 Analyzing a Passage

Seminary students seek to understand the doctrine taught in the scripture mastery passage found in Moroni 7:41, by engaging in an in-depth study together in class.

Նշեք սուրբգրային հատվածը մի մեծ թղթի կենտրոնում (որպես այլընտրանք՝ կարող եք այն ցուցադրել գրատախտակին): Համոզվեք, որ այն բավականաչափ մեծ է, որպեսզի յուրաքանչյուր ուսանող տեսնի: Ուսանողները կարող են մի քանի րոպե տրամադրել՝ այդ սուրբգրային հատվածի վերաբերյալ որքան հնարավոր է շատ հարցեր տալու համար։ Այնուհետև նրանց որոշակի ժամանակ տվեք՝ որոնում կատարելու Gospel Library հավելվածում և հարցերին պատասխանելու համար։ Որպես այլընտրանք՝ սուրբ գրությունը կարող եք տպվել թղթի վրա, և ուսանողները կարող են կատարել նույն վարժությունը անհատապես:

Գաղափարների գրատախտակ

Ուսանողները կարող են նշումների կպչուն թղթերի կամ թերթիկների վրա գրել իրենց գաղափարները ավետարանի ճշմարտությունը կիրառելու եղանակների վերաբերյալ և այդ թղթերը փակցնել գրատախտակին: Օրինակ՝ կարող եք առաջարկել ուսանողներին գրել իրենց գաղափարները ավետարանի սկզբունքը կիրառելու եղանակների վերաբերյալ: Գաղափարների գրատախտակի վրա կարող է տեղադրվել նաև թեմային վերաբերող որևէ բանի մեծ պատկեր: Օրինակ՝ եթե ուսումնասիրում եք կենաց ծառը, ուսանողները կարող են գրել պտուղներ ուտելու եղանակները և տեղադրել թղթերը գրատախտակին պատկերված ծառի ճյուղերի վրա: Ժամանակ տրամադրեք ուսանողներին ծանոթանալու ուրիշների գրածներին:

Իմացեք ձեր լսարանը

Հանձնարարեք ուսանողներին ընտրել մարդկանց թիրախային խումբ կամ լսարան և կիսվել իրենց սովորածով այնպես, որ այդ լսարանը հասկանա: Ուսանողները կարող են կատարել այս վարժությունը զուգընկերոջ հետ կամ փոքր խմբով: Արդյունավետ կլինի ուսանողներին մի քանի տարբերակ տրամադրել և հնարավորություն տալ ընտրելու, թե որ թիրախային լսարանին են ցանկանում ուսուցանել: Ահա մի քանի թիրախային լսարան, որոնցից նրանք կարող են ընտրել․

• Այլ հավատքի դավանող ընկեր ձեր միսիայում:

• Տարրական դասարանների երեխաներ։

• Դպրոցի ընկեր։

• Ձեր ընտանիքի անդամ։

Շարունակեք զրույցը

Դասարանում քննարկում ծավալելուց առաջ այս վարժությունը կօգնի խրախուսել ուսանողներին ուշադիր լսել միմյանց: Քննարկումից առաջ ուսանողներին կարող եք տալ հետևյալ գաղափարները։ Դա կօգնի նրանց ուշադիր լսել միմյանց և վարել բովանդակալից քննարկում, որին կմասնակցեն բազմաթիվ ուսանողներ: Կարող եք ցուցադրել գաղափարները կամ ուսանողներին տրամադրել այս գաղափարներով աշխատաթերթ։

Ավելացրեք ասվածին. կիսվեք, թե ինչն է ձեզ դուր գալիս դասընկերոջ ասածի մեջ, ապա ավելացրեք ձեր սեփական մտքերը:

• «Դա ինձ հիշեցնում է …»

• «Ես համաձայն եմ, որովհետև …»

• «Ճիշտ է։ Մեկ այլ օրինակ է, երբ …»

• «Շատ լավ միտք է …»

Ամփոփեք ասվածը. վերաձևակերպեք ձեր դասընկերոջ ասածը, իսկ հետո մեկնաբանեք այն:

• «Ձեր խոսքերից ես հասկացա, որ …»

• «Այսինքն, եթե ես ձեզ ճիշտ եմ հասկանում …»

• «Ինձ դուր եկավ, որ դուք ասացիք …»

Տեղեկացեք. մյուս ուսանողին հարցեր տվեք իր ասածի վերաբերյալ:

• «Կարո՞ղ եք ավելի շատ բան պատմել ինձ այդ մասին»:

• «Ես վստահ չեմ, որ հասկանում եմ …»

• «Ես հասկանում եմ ձեր տեսակետը, բայց ինչ կասեք …»

• «Մտածե՞լ եք այն մասին, որ …»

Փոխանցեք թերթիկը

Կազմեք թերթիկ՝ մի շարք հրահանգներով, որոնք կարող են ներառել սուրբ գրություններ կամ մեջբերումներ՝ կարդալու համար և հարցեր՝ պատասխանելու համար: Համոզվեք, որ թերթիկի վրա բավարար տեղ կա, որպեսզի ուսանողները գրեն իրենց պատասխանները: Յուրաքանչյուր ուսանողի տվեք մեկական թերթիկ և խնդրեք, որ իրենց անունը գրեն թղթի վերևում։ Ուսանողները պատասխանում են առաջին հարցին. Այնուհետև նրանք ծալում են թուղթը, որպեսզի ծածկեն իրենց պատասխանը: Ապա թերթիկը փոխանցում են մեկ այլ ուսանողի, որը պատասխանում է հաջորդ հարցին կամ հուշմանը: Յուրաքանչյուր ուսանող ծալում է թուղթը, որպեսզի ծածկի իր պատասխանը և այն փոխանցում է մեկ այլ ուսանողի: Փոխանցումների վերջում թերթերը վերադարձվում են սկզբնական ուսանողին, որը կարդում է այն, ինչ գրել են իր դասընկերները:

Պատրաստվեք կիսվել

Կիսվեք կարևոր հարցով, որին կցանկանայիք, որ ուսանողները պատասխանեն: Համոզվեք, որ այդ հարցով կիսվում եք ուսանողների պատասխանից մի քանի րոպե առաջ։ Օրինակ՝ կարող եք ասել. «ես կցանկանայի, որ մի քանի րոպե անց ձեզանից ոմանք կիսվեն իրենց մտքերով ______________-ի մասին: Մտածեք, թե ինչով կցանկանայիք կիսվել, մինչ մենք ուսումնասիրում ենք հետևյալ հատվածը»: Ուսանողներին կարող եք առաջարկել սկզբից կիսվել զուգընկերոջ կամ փոքր խմբի հետ:

Հարցում անցկացրեք դասարանում

Ձեր ուսանողների շրջանում հարցում անցկացրեք՝ նրանց փոքրիկ թերթիկ տրամադրելով: Ուսանողները կարող են անանուն պատասխանել, այնուհետև իրենց թերթիկները դնել տուփի կամ գլխարկի մեջ: Հավաքեք նրանց մտքերը սկզբունքի, հարցի կամ որոշման մասին, որ մարդը կարող է կայացնել սցենարում: Որպես այլընտրանք՝ եթե ուսանողներն ունեն սմարթֆոն, կարող եք օգտագործել հարցումների հավելված, որն անվճար է և հեշտ օգտագործման համար: Ուսանողներին տվեք առաջադրանքը և հարցման հղումը․ նրանք կարող են պատասխանել հարցին իրենց հեռախոսներով: Դուք կարող եք տեսնել պատասխանները և դրանք ցուցադրել դասարանում: Կան հարցումների բազմաթիվ անվճար հավելվածներ, որոնք կարող են հեշտացնել հարցման գործընթացը:

Խթանող արտահայտություններ

Օգտագործեք խթանող արտահայտություններ՝ ձեր ուսանողներին սովորեցնելու կիսվել և քննարկում ծավալել դասարանում:

Սա օգտակար գործիք է այն դասարանների համար, որոնք ակտիվ չեն կամ չեն կողմնորոշվում, թե ինչպես և ինչով կիսվել: Ցուցադրեք ստորև բերված արտահայտությունները, որպեսզի օգնեք ուսանողներին պատկերացնել, թե ինչով իրենք կարող են կիսվել: Հանձնարարեք նրանց ուսումնասիրել սուրբգրային հատվածների շարքը և պատրաստվել կիսվելու՝ օգտագործելով մեկ կամ մի քանի խթանող արտահայտություն: Ղեկավարեք քննարկումը կամ խնդրեք ուսանողներից մեկին ղեկավարել այն:

• Իմ սիրելի հատվածը…

• Շատ խորաթափանց արտահայտություն էր…

• Սրանից կարող ենք քաղել հետևյալ դասը…

• Ես գտա մի սկզբունք…

• Ինձ համար հետաքրքիր/շփոթեցնող բառ էր…

• Այստեղից դեռահասը պետք է իմանա հետևյալը…

• Այստեղից ես գիտեմ, որ ճշմարիտ է հետևյալը…

• Այստեղից ես վստահ չեմ հետևյալում…

• Այստեղից ես սովորեցի, որ պետք է անեմ հետևյաը…

• Այստեղից ես Փրկչի մասին սովորեցի հետևյաը…

Մասնակցության քարտեր

Բաժանեք քարտեր, որոնք ուսանողները կարող են բարձրացնել՝ որպես ձեր տված հարցերի տեսողական պատասխաններ: Ուսանողները կարող են բարձրացնել քարտերը՝ ցուցադրելու համար իրենց պատասխանները կամ այն ժամանակ, երբ պատրաստ են կիսվել իրենց մտքերով կամ քննարկել դրանք: Օրինակ՝

• Կանաչը՝ ճիշտ է, կարմիրը՝ սխալ է

• «Դեռ մտածում եմ»՝ քարտի մի կողը, «Պատրաստ եմ կիսվելու»՝ մյուս կողմը

• Քարտեր՝ թվերով կամ տառերով, որոնք ներկայացնում են գրատախտակին գրված տարբերակները: Բոլոր ուսանողները պատասխանելու համար ցուցադրում են թվեր կամ տառեր, որպեսզի դուք կարողանաք տեսնել իրենց պատասխանները և ընտրեք ուսանողների՝ բանավոր պատասխանելու համար:

• Քարտ՝ մի քանի պատասխանով տարբեր կողմերում (տես ստորև բերված օրինակը): Երբ ուսանողներին առաջարկում եք պատասխանել, վերևի միջտեղինն իրենց դիրքորոշումն է: Այնուհետև դուք կամ ուսանողը կարող եք դիմել ուսանողներին՝ կախված նրանց դիրքորոշումից:

Սցենարի սկիզբ

Տրամադրեք ուսանողներին անավարտ սցենար և առաջարկեք նրանց ավելացնել մանրամասներ, որպեսզի այն լինի ավելի համապատասխան և կյանքին առնչվող: Օրինակ՝ դուք կարող եք ասել հետևյալը․ «Եկեք ստեղծենք մի սցենար՝ Ջուլիա անունով, ձեր տարիքին մի աղջկա մասին, որը բախվում է կյանքի դժվարություններին: Ի՞նչ դժվարություններ դրանք կարող են լինել»։ Երբ ուսանողները կիսվեն, օգնեք նրանց առաջարկել մանրամասներ, որպեսզի Ջուլիան կամ ձեր ընտրած մեկ այլ անունով աղջիկը նմանվի իրական մարդու: Կարող եք նաև ավելացնել կարևոր մանրամասներ, որոնք ազդում են քննարկման վրա, օրինակ՝ Ջուլիայի գլխավոր հարցը:

Որպես այլընտրանք՝ կարող եք ուսանողներին հանձնարարել ստեղծել իրենց սեփական սցենարները և գրել դրանք թղթի վրա: Կարող եք իրար հետ փոխանակել այս սցենարները և առաջարկել ուսանողներին պատասխանել դրանց՝ օգտագործելով իրենց սովորածը:

Սցենարի տեքստային շղթա

Ստեղծեք սցենար, որը սկսվում է մեկ տեքստային ուղերձով, բայց ուսանողներին մի հայտնեք այն հանգամանքները, որոնց հիման վրա գրվել է այդ տեքստային ուղերձը: Կարող եք յուրաքանչյուր ուսանողի տրամադրել ստորև բերվածի նման դատարկ տեքստային ձևանմուշ և առաջարկել նրանց ստեղծել երկխոսություն տեքստային շղթայի համար:

Արագ ճանաչել դասընկերոջը

Օգնեք ուսանողներին իրենց համար հարմարավետ եղանակով կիսվել միմյանց հետ տեղեկություններով, որոնք կօգնեն նրանց ճանաչել իրենց դասընկերներին: Այս վարժությունը կօգնի ուսանողներին ճանաչել միմյանց, ինչպես նաև կիսվել սուրբ գրությունների մասին տեղեկություններով: Բաժանեք ուսանողներին զույգերի՝ իրար դիմաց նստած զույգերի երկու շարք կազմելով: Այնուհետև առաջարկեք ուսանողներին նշել սուրբ գրության հանձնարարված հատվածը և պատասխանել այդ հատվածի վերաբերյալ ձեր պատրաստած հարցին: Դեմ դիմաց նստած յուրաքանչյուր զույգի առաջարկեք պատասխանել ձեր պատրաստած ընկերական հարցին, որը կարող է օգնել նրանց ավելի լավ ճանաչել միմյանց: Առաջարկեք ուսանողներին փոխել զուգընկերներին և կրկնել գործընթացը մի քանի անգամ՝ օգտագործելով տարբեր հարցեր և սուրբ գրությունների հատվածներ: Որպեսզի ուսանողները աշխատեն բոլոր դասընկերների հետ, անկյունային աթոռներից մեկի վրա նստած ուսանողը չի փոխում իր տեղը:

Կպչուն թղթերով գրատախտակ

Գրատախտակին մի քանի հարց տեղադրեք, որպեսզի ուսանողները պատասխանեն, կամ սուրբգրային հատվածներ, որոնց մասին նրանք կարող են կիսվել իրենց մտքերով: Յուրաքանչյուր ուսանող գրում է իր անունը կպչուն նշում(ներ)ի վրա և դնում այն ​​հարց(երի) կամ հատված(ների) կողքին, որոնց ինքը պատրաստ է պատասխանել կամ որոնք պատրաստ է մեկնաբանել:

Տարբերակներ. կպչուն թղթերի գույները կարող են ցույց տալ, թե ինչով են ուզում ուսանողները կիսվել, օրինակ՝ գաղափարով, հարցով, խաչաձև հղումով և այլն:

Լուսանկարեք

Առաջարկեք ուսանողներին ընտրել մի առարկա դասարանում կամ մի նկար իրենց հեռախոսում, որը կարող է օգտագործվել սկզբունքը կամ վարդապետությունն ուսուցանելու համար: Առաջարկեք նրանց կիսվել, թե ինչպես կարող են ուսուցանել որևէ մեկին իրենց սովորածը՝ օգտագործելով այդ առարկան կամ նկարը:

Գրեք՝ կիսվելուց առաջ

Ուսանողներին ժամանակ տվեք՝ իրենց ուսումնական օրագրերում կարևոր հարցերի պատասխանները գրելու համար, նախքան կառաջարկեք նրանց բարձրաձայն պատասխանել:

4. Ստեղծել սովորածի պատկերավոր ներկայացում

Դասերում ուսանողներին հաճախ առաջարկվում է որևէ բան անել՝ ցույց տալու, թե ինչ են իրենք սովորել: Դրա համար կարող է պահանջվել ստեղծագործական հմտությունների օգտագործում: Հետևյալ հմտությունները ներկայացնում են դա անելու մի քանի եղանակ:

Աքրոստիկոս

Օգտագործեք անվան, վայրի կամ վարդապետության տառերը՝ ակրոստիքոս ստեղծելու համար՝ դասարանում ուսանողների սովորածի հիման վրա։ Օրինակ, ուսանողը հետևյալ կերպ կարող է գրել ակրոստիքոս՝ օգտագործելով հավատ բառը․

Հ - Հետևենք Հիսուս Քրիստոսի օրինակին:

Ա - Աշխատենք գործել Սուրբ Հոգու հուշումներով:

Վ - Վստահենք Աստծո մարգարեներին։

Ա - Աղոթքներում ներառենք մեր հարցերը կամ մտահոգությունները:

Տ - Տիրոջ խոստացված օրհնությունները ստանալու հույս ունենանք։

Հավելվածի ստեղծում

Ուսանողները թղթի վրա մշակում են իրենց սեփական հավելվածը: Հավելվածը կարող է ցուցադրել իրենց ուսումնասիրած սուրբ գրություններում ուսուցանվող ճշմարտությունը և ներառել վարժություններ, նկարներ, սուրբ գրությունների հատվածներ կամ մեջբերումներ, որոնք կարող են օգնել մարդուն կիրառել այն իր կյանքում:

Խիազմ

Խիազմը խոսքի մի ձև է, որտեղ նախադասության, պարբերության կամ գրվածքի երկրորդ կեսը հայելային շարադասություն է, որը հակառակ դասավորությամբ կրկնում է առաջին կեսը: Գլխավոր ուղերձը գտնվում է մեջտեղի մասում (որպես օրինակ՝ տես Ալմա 36): Առաջարկեք ուսանողներին իրենց ուսումնասիրածի հիման վրա ստեղծել խիազմ: Ուսանողները կարող են մեջտեղում դնել թավագիր ճշմարտություն և տողեր ավելացնել դրա վերևում և ներքևում՝ առնչվող սուրբ գրություններով կամ մարգարեական խոսքերով։ Դա կարող է ունենալ այսպիսի տեսք․

Ա – ինչ են մտածում ուսանողները այս ճշմարտության մասին կամ այն փորձառությունների մասին, որ իրենք ունեցել են դրա հետ կապված

Բ – ինչ են ուսանողները հասկանում այս ճշմարտության վերաբերյալ

Գ – ավետարանի ճշմարտություն կամ սկզբունք

Գ – ավետարանի ճշմարտություն կամ սկզբունք

Բ – լրացուցիչ հասկացողություն այս ճշմարտության վերաբերյալ

Ա – լրացուցիչ փորձառություններ, որ ուսանողները ունեցել են այս ճշմարտության հետ կապված, և ինչ են իրենք մտածում այդ մասին

Կոմիքսների ուսումնասիրություն

Ուսանողներին տվեք կոմիքսների ​​գրքի դատարկ ձևանմուշ կամ խնդրեք նրանց ստեղծել այդպիսի ձևանմուշ թղթի վրա: Ուսանողները կարդում են սուրբգրային հատվածների շարքը և ստեղծում կոմիքս, որը պատկերում է տվյալ շարքի սյուժետային գիծը: Հանձնարարեք նրանց օգտագործել վերջին վանդակը՝ կիսվելու համար, թե որն է իրենց կարծիքով ամենակարևոր ճշմարտությունը, որ կարելի է սովորել այս պատմությունից: Նրանք կարող են իրենց կոմիքսներով կիսվել դասարանի հետ: Որպես այլընտրանք՝ նրանք կարող են օգտագործել այս վարժությունը ճշմարտության կամ սկզբունքի ժամանակակից կիրառումը ցուցադրելու համար:

Ստեղծեք դասի պլան

Ստեղծեք պլան, որը ուսանողները կարող են օգտագործել՝ պատրաստելու համար հակիրճ դաս, ելույթ, ուղերձ կամ սուրբ գրության հատվածով կիսվելու որևէ եղանակ: Կարող եք պլանի դատարկ ձևանմուշ տրամադրել, որտեղ ուսանողները կգրեն իրենց բացահայտումները: Կարող եք հանձնարարել ուսանողներին յուրաքանչյուր վանդակում ներառել տարբեր տեղեկություններ: Օրինակ՝ ուսանողները կարող են առաջին վանդակում գրել վերնագիրը, հաջորդ վանդակում ամփոփել կարևոր հատվածները, երեք երկար վանդակներում՝ օրինակներ կամ անձնական պատմություններ և վերջին վանդակում՝ վկայությունը:

Ստեղծեք բրոշյուր

Յուրաքանչյուր ուսանողի տվեք մի թուղթ և առաջարկեք ծալել այն՝ բաժանելով երեք մասի: Ուսանողները կարող են ստեղծել տիտղոսաթերթ, որը պարունակում է իրենց նշած սկզբունքը կամ վարդապետությունը: Ուսանողները կարող են ստեղծել բրոշյուրի մյուս էջերը՝ ենթագրերով և իրենց սովորածի մանրամասներով: Կարող եք առաջարկել նրանց բրոշյուրի հետևի մասում տեղ թողնել՝ դասի ընթացքում իրենց կազմած նպատակները կամ պլանները գրելու համար:

Գունավորված խմբեր

Տպեք սուրբգրային հատվածների շարքի պատճենված էջը և տրամադրեք գունավոր մատիտներ՝ սուրբ գրությունները նշելու համար: Կարող եք նշել տարբեր խմբեր, օրինակ՝ «Խոստացված օրհնություններ», «Հավատքով գործեր» կամ «Պատվիրաններ»: Յուրաքանչյուր խմբիկարող է տրվել որոշակի գույն: Առաջարկեք ուսանողներին ուսումնասիրել հատվածները և գտնել խմբերը՝ նշելով դրանք տարբեր գույներով։ Առաջարկեք ուսանողներին կիսվել այս վարժությունում իրենց նշածով և սովորածով:

Կազմեք ծրագիր

Կարող եք օգտագործել գրաֆիկական օրգանայզեր՝ օգնելու ուսանողներին գնահատել իրենց ծրագրերը: Ուսանողները պետք է պատասխանեն գրաֆիկի յուրաքանչյուր հատվածի հարցերին:

Սխեմա

Ուսանողները կարող են ստեղծել սխեմատիկ պատկեր, որը ցույց է տալիս դասի տարբեր որոշումների կամ հասկացությունների փոխհարաբերությունները: Օրինակ՝ կարող է օգտագործվել հետևյալ գծապատկերը՝ ցույց տալու համար, թե դեպի ուր կարող է առաջնորդել հավատքն առ Հիսուս Քրիստոս։

Պատրաստեք ձեռքով

Ուսանողներին տվեք նյութեր (օրինակ՝ աղյուսներ կամ մոդելավորման կավ), որոնք կարող են օգտագործել՝ ստեղծելու մի բան, որը ներկայացնում է այն, ինչ իրենք ուսումնասիրեցին։ Օրինակ՝ ուսանողները կարող են օգտագործել աղյուսներ՝ կառուցելու այն պաշտպանական շինությունների խորհրդանշական մոդելը, որոնք Զորավար Մորոնին հրահանգեց կառուցել իր ժողովրդին (տես Ալմա 48․7–9)։ Ուսանողները կարող են յուրաքանչյուր աղյուսի վրա գրել մի եղանակ, որով մենք կարող ենք հոգևոր առումով պատրաստվել՝ դիմակայելու սատանայի հարձակումներին:

Նկարների կոլաժ

Իրենց հեռախոսներում կամ Gospel Library հավելվածում ուսանողները կարող են գտնել նկարներ, որոնք վերաբերում են ճշմարտությանը: Նրանք կարող են թվային կոլաժ ստեղծել և կիսվել դրանով դասարանում:

Իմանալ – հետաքրքրվել – սովորել

Ուսանողները թուղթը բաժանում են երեք սյունակի: Առաջին սյունակում գրում են այն, ինչ արդեն գիտեն թեմայի վերաբերյալ։ Հաջորդում գրում են այն, ինչ ուզում են իմանալ։ Երրորդ սյունակը լրացվում է դասի ընթացքում և դրանից հետո՝ այն բաներով, որ ուսանողները սովորում են: Ուսանողներին կարող եք առաջարկել նշել, թե ինչն օգնեց իրենց սովորել կամ ինչն ազդեց իրենց զգացմունքների վրա դասի ընթացքում:

Նամակներ ապագայի համար

Ուսանողները կարող են նամակ գրել իրենց, որը պետք է բացել և կարդալ որոշակի ժամանակ (միսիա ծառայելիս, ամուսնանալիս, առաջնեկին ունենալիս)։ Մեկ այլ տարբերակ կարող է լինել այն, որ ուսանողները նամակ գրեն իրենց ընտանիքի անդամներին՝ ապագայում նամակը բացելու համար: Կամ նրանք կարող են նամակ գրել ապագա ուսանողներին, որ կգան սեմինարիա՝ նկարագրելով թե ինչ են իրենք սովորել և ինչ են զգացել:

Մեմ ստեղծեք

Յուրաքանչյուր ուսանող իր ուսումնասիրության ընթացքում բացահայտում է սկզբունքը և ստեղծում մի հիշվող արտահայտություն, որը նկարագրում է այդ սկզբունքը: Խնդրեք նրանց նաև նկարել մի նկար, որը նկարագրում է սկզբունքը: Համոզվեք, որ դրանք ներառում են սուրբ գրության հղումը: Այնուհետև ուսանողները կարող են կիսվել իրենց մեմերով և բացատրել դրանք: Կարող եք ցուցադրել որոշ օրինակներ Երիտասարդներին զորացնելու համար ամսագրի վերջին համարից։

Կազմեք «գնալ և անել» ծրագիր

Ուսանողները կարող են կազմել արդյունավետ, արդար գործողություններ կատարելու ծրագիր՝ հիմնվելով այն բաների վրա, որոնք սովորում և զգում են դասի ընթացքում: Դա անելու համար կարող եք նրանց հնարավորություն տալ որոշելու, թե ինչ կցանկանային անել, և նշելու կոնկրետ քայլեր, թե ինչպես պետք է իրականացնեն իրենց ծրագրերը: Դա կարող է ներառել խոչընդոտների բացահայտումը, որոնց իրենք կարող են բախվել, ինչպես նաև որոշակի քայլերի մշակում՝ այդ խոչընդոտները հաղթահարելու համար: Երբ ուսանողները ստեղծում են իրենց ծրագրերը, խրախուսեք նրանց բաժանել դրանք փոքր քայլերի: Փոքր փոփոխություններ կատարելն այն բաներում, որոնք նրանք անում են ամեն օր, կօգնի նրանց ավելի շատ հաջողել իրենց անելիքներում:

Կազմեք «որոշումների ծառ» ծրագիր

Ուսանողները կարող են օգտագործել որոշումների ծառը՝ կիրառելու համար ավետարանի սկզբունքը․ դա կարող են անել՝ գրելով տարբեր որոշումների դրական և բացասական կողմերը: Նրանք կարող են սկսել ավետարանի սկզբունքի վերաբերյալ մեկ հարցից և, դրական ու բացասական կողմերը գրելուց հետո գնահատել այդ որոշումը կայացնելու իրենց ընտրությունը: Ծրագրի յուրաքանչյուր հարցի և որոշման համար ստեղծեք առանձին ծառեր:

Օրինակ՝ կազմեք սուրբ գրություններն ուսումնասիրելու ծրագիր:

Հարցեր․

1. Ես ե՞րբ պետք է ուսումնասիրեմ իմ սուրբ գրությունները: (Ստեղծեք որոշումների մեկ ծառ։)

2. Որտե՞ղ ես պետք է ուսումնասիրեմ իմ սուրբ գրությունները: (Ստեղծեք որոշումների մեկ այլ ծառ։)

3. Որքա՞ն ժամանակ պետք է հատկացնեմ՝ իմ սուրբ գրությունները ուսումնասիրելու համար։ (Ստեղծեք որոշումների երրորդ ծառը։)

Գործընթացի վերջում այս երեք որոշումները միասին կազմում են մի ծրագիր կամ նպատակ՝ այն իրականացնելու որոշակի քայլերով:

Օրհներգի խոսքերի նոր հատված

Ուսանողները կարող են ընտրել օրհներգ՝ դասում ուսումնասիրված ճշմարտության մասին: Առաջարկեք նրանց ստեղծել օրհներգի խոսքերի նոր հատված՝ իրենց ուսումնասիրածի հիման վրա: Դասարանը կարող է ընտրել մի քանի նոր հատված՝ ցուցադրելու և երգելու համար:

Ուսուցում՝ նախագծի հիման վրա

Ուսանողները կարող են ստեղծել մի քանի դասից բաղկացած նախագիծ, որին նրանք բովանդակություն կավելացնեն հաջորդ դասերի/շաբաթների ընթացքում: Դա կարող է լինել բանաստեղծություն, օրհներգ, տեսանյութ, գեղարվեստական ​​նախագիծ կամ ստեղծագործության այլ տեսակ, որը նրանք կստեղծեն հետագա դասերի ընթացքում:

Վերաշարադրել պատմության ավարտը

Առաջարկեք ուսանողներին վերաշարադրել սուրբգրային պատմության կամ ձեր պատմած պատմության ավարտը՝ պատկերացնելով, որ հերոսը ավելի լավ/այլ որոշումներ է կայացնում:

Բաղադրատոմսեր

Ուսանողները պատրաստում են բաղադրատոմսեր՝ իրենց սովորածի հիման վրա: Կարող եք սկսել՝ ցուցադրելով նրանց բաղադրատոմսի օրինակ, որը ներառում է բաղադրիչներ, չափաբաժիններ և հրահանգներ: Այնուհետև օգնեք ուսանողներին կազմել բաղադրատոմս՝ օգտվելով այդ օրինակից և օգտագործելով այն, ինչ սովորում են։ Նրանք կարող են վերնագրել իրենց բաղադրատոմսը հետևյալ կերպ․ «Ինչպես լինել արդյունավետ միսիոներ» կամ «Սուրբ գրություններն ավելի արդյունավետ ուսումնասիրելու եղանակներ»։ Այնուհետև կարող են ներառել այն տարրերը, որոնք իրենց կարծիքով կարևոր են՝ օգտագործելով սուրբ գրություններն ու մեջբերումները: Օրինակ՝ Վարդապետություն և Ուխտեր 76 բաժնում ուսանողները կարող են գրել սելեստիալ մարդ դառնալու բաղադրիչները, դրանց չափաբաժինները և հրահանգները: Խրախուսեք նրանց ստեղծարար լինել իրենց բաղադրատոմսերը ստեղծելիս: Նրանք կարող են նկարել մի նկար, որը ներկայացնում է բաղադրատոմսի վերջնական արդյունքը:

Դերախաղ

Ուսանողները դերախաղով ներկայացնում են սցենարը Դա անելու բազմաթիվ տարբերակներ կան: Կարող եք պատրաստակամ ուսանողներին առաջարկել գալ սենյակի առջև մաս՝ սցենարը խաղալու համար: Ուսանողները կարող են դերախաղ ներկայացնել նաև զույգերով կամ փոքր խմբերով: Կամ դուք կարող եք խաղալ մի մարդու դեր, որը հարցեր ունի, և խնդրել ամբողջ դասարանին պատասխանել ձեր հարցերին կամ մտահոգություններին:

Կարճ տեսանյութ

Առաջարկեք ուսանողներին կազմել կարճ տեսանյութ: Նրանք կարող են ստեղծել սցենար և որոշել, թե ինչպես մոդելավորել դասից սովորած որևէ բան: Հնարավորության դեպքում ուսանողները կարող են ստեղծել տեսանյութը և կիսվել դրանով դասարանում:

Սոցիալական ցանցերի գրառում

Առաջարկեք ուսանողներին ստեղծել սոցիալական ցանցերի գրառում՝ կիսվելով իրենց անձնական համոզմունքներով կամ փորձառությամբ՝ կապված են դասարանում քննարկված սկզբունքների հետ: Դա կարող է լինել մի բան, որ իրենք հրապարակում են առցանց, կամ որևէ բան, որ ստեղծում են իրենց ուսումնական օրագրերում: Կամ ուսանողները կարող են պատկերացնել, որ մեկը հրապարակել է հարց՝ կապված դասարանում իրենց ուսումնասիրածի հետ, և ստեղծել պատասխան՝ օգտագործելով իրենց ստացած գիտելիքները: Կամ ուսանողները կարող են ուսումնասիրել Եկեղեցու ղեկավարի սոցիալական մեդիայի վերջին գրառումը և գրառման վերաբերյալ գրել արձագանք կամ խրախուսական գրառում: Ծանոթանալու համար հոդվածին, որն օգնում է ուսանողներին բովանդակալից գրառումներ կատարել սոցիալական ցանցերում, տես «Social Media: Power to Change Lives» հոդվածը Երիտասարդներին զորացնելու համարգրքույկում, ապրիլ 2022։

Տեսողական ցուցադրություն

Ուսանողներին բաժանեք խմբերի, որպեսզի դասարանի համար ստեղծեն պաստառներ կամ պատի ցուցասարքեր՝ օգտագործելով սուրբ գրություններ, մեջբերումներ և ուսումնասիրության այլ աղբյուրներ։ Նրանց պաստառները կամ ցուցասարքերը կարող են ներառել սուրբգրային կարևոր հատվածներ, հարցեր, որոնց սուրբգրային պատմությունը կարող է տալ պատասխաններ, հավերժական ճշմարտություններ, նկարներ և այլն: Ուսանողները կարող են շրջել դասարանում և տեսնել այլ խմբերի աշխատանքները:

Հոդված գրեք Եկեղեցու ամսագրի համար

Ուսանողները կարող են պատկերացնել, որ հոդված են գրում Երիտասարդներին զորացնելու համար, Ընկեր կամ Լիահոնա ամսագրերում, որտեղ կիսվում են իրենց ուսումնասիրածով և իրենց մտքերով, թե ինչպես դա կարող է օգնել երիտասարդներին ամբողջ աշխարհում: Որպես օրինակ՝ կարող եք ցուցադրել մի հոդված այդ ամսագրերից: Խրախուսեք ուսանողներին ավելացնել նկարներ, գծապատկերներ և ինֆոգրաֆիկա: