1828–1829

E Vukei Josefa o Matini Erisi

Vulica na vakararavi vua na Turaga

Dua na siga, ni rau vakaitikotiko voli mai Penisilivenia o Josefa kei Ema, a lako mai e dua na itokani na yacana o Matini Erisi me mai sikovi rau. E taukena o Matini e dua na iteitei levu mai Niu Ioka. E kila o koya na cakacaka nei Josefa kei na peleti koula. Sa vukei Josefa oti o koya, ia oqo sa via kila kevaka e so tale na ka e rawa ni cakava me veivuke kina.

Yalododonu, 1:49

E rau vakavinavinaka o Josefa kei Ema. E levu era nanuma ni lasu tiko o Josefa. E vinaka me dua na itokani me vakataki Matini ka vakabauta ni dina na peleti koula.

Yalododonu, 1:49

Ni vakadewataka tiko o Josefa na peleti, a vola o Matini na ka e tukuna. A marautaka o Matini me veivuke ena cakacaka cecere oqo ni Turaga.

Yalododonu, 1:50

A sega ni marau na wati Matini, o Lusi. E sega ni vakabauta ni tiko dina vei Josefa na peleti koula. E nanuma ni sa lawakitaki Matini tiko o Josefa. E vinakata me lesu tale mai o Matini ki Niu Ioka ka muduka na nona vukei Josefa.

Yalododonu, 1:49–50

Ia a cakacaka vata tiko ga kei Josefa o Matini. E nanuma ni kevaka me wilika o Lusi na ka eratou cakava tiko, ena vakabauta talega o koya. A tarogi Josefa kevaka ke rawa ni kauta na draunipepa rau a vakadewataka ki Niu Ioka me lai vakaraitaka vei watina. E kaya o Josefa mena masulaka ka kerea vua na Kalou.

Yalododonu, 1:50–51

A tukuna mai vua na Turaga me kakua ni kauta o Matini na tabana eso oqori. A kerei Josefa o Matini me masu tale. A masu o Josefa ka ciqoma tale na isau vataga. Ia a vinakata dina o Matini me vakaraitaka vei watina na tabana eso, ka vinakata o Josefa me vukei nona itokani. A masu o Josefa ena ikatolu ni gauna. Ena gauna oqo a tukuna vei Josefa na Kalou ni rawa ni vakatulewataka na ka me cakava.

Yalododonu, 1:51

A tukuna o Josefa vei Matini ni rawa ni kauta na draunipepa ki Niu Ioka, ia e rawa ni vakaraitaka ga vei ira eso na lewe ni matavuvale. Ka gadreva me kauta lesu mai na draunipepa ena loma ni rua na macawa. A vakadonuya o Matini ka biubiu vata kei na tabana eso.

Yalododonu, 1:51

Ni sa yali o Matini, a sucu e dua na gonelailai vei Josefa kei Ema. Ia a mate na gonelailai, qai tauvimate o Ema. E rarawa vakalevu o Ema kei Josefa.

Yalododonu, 1:51–52

E leqataki Ema o Josefa. E leqataki Matini talega. Sa oti na rua na macawa, ka sa sega ni lesu mai o Martin. E lomaleqa tale ga o Ema.

Yalododonu, 1:52

A tukuna o Ema vei Josefa me lako ki Niu Ioka me laki vakasaqarai Matini. A sotavi Matini o Josefa ena vale nei nona itubutubu. Ni tarogi Matini o Josefa me baleta na tabana, a rarawa sara vakalevu o Matini. E kaya ni sa yali na draunipepa. A rai yani kina veivanua kecega ia a sega ni kunei ira rawa.

Yalododonu, 1:52–53

A rarawa sara vakalevu o Josefa ka rere. E kila ni cala o koya me vakatarai Matini me taura na tabana. A lesu tale i vale ka tukuna vei Ema na ka a yaco. A lako mai na agilosi o Moronai ka kauta lesu na peleti koula. E kaya o koya kevaka e yalomalumalumu o Josefa ka veivutuni, ena rawa ni taura lesu na peleti ka vakadewataka tale.

Vunau kei na Veiyalayalati 3:5–11; 10:1–3; Yalododonu, 1:53–54

Ena vuqa na macawa, a vakasamataka o Josefa na ka e cakava cala. A masu o koya ka kere veivosoti. A vosoti koya na Kalou. A tukuna vei Josefa nira a butakoca na tabana o ira na tamata era tovolea tiko mera tarova na cakacaka ni Kalou. Ia e sega ni dua e rawa ni tarova na cakacaka ni Kalou. E tiko na ituvatuva ni Kalou me toso tikoga kina na Nona cakacaka.

Vunau kei na Veiyalayalati 3:1–10; Yalododonu, 1:54–55

A solia lesu o Moronai na peleti vei Josefa. A kaya na Kalou vei Josefa kei Matini ni kevaka me rau yalomalumalumu ka nuitaki Koya, sa rawa me rau veivuke tikoga ena Nona cakacaka ena vuqa na sala. E rawa ni ra veivuke ena nodra kauta mai na iVola i Momani ki vuravura. Na ivola oqo ena vukei ira na tamata ena veivanua kecega me ra veivutuni ka vakabauti Jisu Karisito.

Vunau kei na Veiyalayalati 3:16–20; 5:21–35; Yalododonu, 1:56–57