1828–1829

Martin Harris El Kahsrwel Joseph

Lutlut in luhlahlfongi Leum

Sie lwen ah, ke Joseph ac Emma muhta Pennsylvania ah, kawuck se pahngpahng Martin Harris tuhkuh in muhtwacta yoruhltahl. Oasr imac na luhlahp se Lal fin acn New York. El etuh tari orekma lal Joseph ke kol plet ah. El kahsrwel Joseph met, ac ingena el ke etuh lah oasr ma el kuh in oruh in kahsruh.

Mwet Luhlahlfongi, 1:49

Joseph ac Emma tuh kuloh kac. Mwet puhkantwen tuh nuhnkuh muh Joseph el kikiacp. Arlac wo in asr kawuck se oacna Martin Harris suc luhlahlfongi muh kol plet ah pwacye.

Mwet Luhlahlfongi, 1:49

Ke Joseph el lweng ah, Martin el sihmihs ma el fahk ah. Martin el puhla engan in kahsruh Leum ke orekma yohk se inge.

Mwet Luhlahlfongi, 1:50

Muhtwacn kiacl Martin ac, Lucy, el tiacna engan. El tiacna luhlahlfongi muh kol plet ah oasr yohruhl Joseph. El nuhnkuh muh Joseph el orek insucf nuh sel Martin. El ke Martin lan fohlohklac nuh New York ac tiac sulpac kahsrwel Joseph.

Mwet Luhlahlfongi, 1:49–50

Tuhsruhk Martin el srackna weluhl Joseph orekma. El nuhnkuh muh fin Lucy el kuh in riti ma eltahl orekma kac inge, elac kuh in luhlahlfongi pac. El siyuck sel Joseph fin el kuh in uslah sra ma eltahl luhngaslah ah nuh New York in sang muhtwacn kiacl ah in liye. Joseph el fahk lah elac pruhe ac siyuck sin God.

Mwet Luhlahlfongi, 1:50–51

God el fahk nuh sel Joseph in tiac lwelah Martin elan uslah sra puk inge. Martin el siyuck Joseph lan sulpac pruhe. Joseph el pruhe ac eis top sac pacna. Tuhsruhk Martin el arlac ke sang muhtwacn kiacl ah in liye sra puk ac, ac Joseph el ke kahsruh kawuck se lal inge. Joseph el pruhe pacl se ahktolu. Pacl se inge God el fahk nuh sel Joseph lah el kuh in sulaclah ma elac oruh.

Mwet Luhlahlfongi, 1:51

Joseph el fahk nuh sel Martin muh el kuh in us sra puk ac nuh New York, tuhsruhk el kuh in sang nuh sin kuhtuh mwet in sucu ac muhkwena. Ac el enenuh in fohlohkuhnma sra puk inge ke wik luo. Martin el insese ac som us sra puk ac.

Mwer Luhlahlfongi, 1:51

Ke Martin el som ah, oasr tuhlihk se tuh isuslac nuh sel Joseph ac Emma. Tuhsruhktuh tuhlihk sac misac, ac Emma el maswack. Emma ac Joseph tuh arulacna suhpwacrlac.

Mwet Luhlahlfongi, 1:51–52

Joseph el fosrngahkihn sel Emma. El oacyacpac fosrngahkihn sel Martin. Wik luolac somlah, ac Martin el sonna fohlohk. Emma el fosrngah pac.

Mwet Luhlahlfongi, 1:52

Emma el fahk nuh sel Joseph elan som nuh New York in sokol Martin. Joseph el ohsun nuh sel Martin ke lohm sin pahpah ninac kiacl ah. Ke Joseph el siyuck ke sra puk ac, Martin el arulacna suhpwacr. El muh sra puk ac tuhlac. El suk yen nuhkwewa tuhsruhk tiac kuh in konwacltahlwack.

Mwet Luhlahlfongi, 1:52–53

Joseph el arulacna suhpwacr ac sahngeng. El etuh lah el tahfonglac in lwelah Martin lan uslah sra puk ac. El fohlohklac nuh lohm ah ac fahk nuh sel Emma ma sikyak ah. Lupufacn Moroni el tuhkuh ac fohlohkuhnlah kol plet ah. El fahk muh Joseph el fin puhsisacl ac auliyak, el kuh in sulpac eis plet ah ac sulpac lweng.

Olweacng ac Wuhlweacng 3:5–11; 10:1–3; Mwet Luhlahlfongi, 1:53–54

Ke wik puhs, Joseph el nuhnkuh ke tahfonglah el oraclah. El pruhe ac siyuck ke nuhnak muhnahs. God el tuh nuhnak muhnahs nuh sel. El fahk nuh sel Joseph muh sra puk ac pihsrwapwasrlah sin mwet ma srihke in tulokihnyac orekma luhn God. Tuhsruhktuh wacngihn mwet kuh in tulokihn orekma luhn God uh. Oasr placn luhn God in ahkfahsryena orekma Lal uh.

Olweacng ac Wuhlweacng 3:1–10 ; Mwet Luhlahlfongi,1:54–55

Moroni el fohlohkuhnwacng plet ah nuh sel Joseph. God el fahk nuh sel Joseph ac Martin muh eltahl fin puhsisacl ac Luhlahlfongwel, eltahl kuh in sulpacna kahsruh orekma Lal ke inkacnek puhs. Eltahl kuh in kahsruh use Puk luhn Mormon nuh fin facluh. Puk se inge kuh in kahsruh mwet yen nuhkwewa auliyak ac luhlahlfongi ke Jisus Kraist.

Olweacng ac Wuhlweacng 3:16–20 ; 5:21–35; Mwet Luhlahlfongi1:56–57