« មេរៀនទី ២ ៖ យើងត្រូវតែមានភាពសក្តិសមដើម្បីចូលព្រះវិហារបរិសុទ្ធ » បានទទួលអំណោយទានពិសិដ្ឋមកពីស្ថានលើ ៖ សៀវភៅសិក្សារបស់គ្រូបង្រៀនសិក្ខាសាលាស្តីពីការរៀបចំខ្លួនទៅព្រះវិហារបរិសុទ្ធ ( ២០០៣ ) ទំព័រ ទី ៦–១១

« មេរៀនទី ២ » បានទទួលអំណោយទានពិសិដ្ឋមកពីស្ថានលើ ទំព័រ ៦–១១

មេរៀនទី ២

យើងត្រូវតែមានភាពសក្តិសមដើម្បីចូលព្រះវិហារបរិសុទ្ធ

គោលបំណង

« វាជាបំណងប្រាថ្នាដ៏ជ្រាលជ្រៅបំផុតចេញពីដួងចិត្តរបស់ខ្ញុំ ដើម្បីឲ្យសមាជិកគ្រប់រូបនៃសាសនាចក្រមានភាពសក្តិសមនៃព្រះវិហារបរិសុទ្ធ ។ ខ្ញុំសង្ឃឹមថា សមាជិកពេញវ័យគ្រប់រូបនឹងមានភាពសក្តិសម—ហើយកាន់—ប័ណ្ណចូលព្រះវិហារបរិសុទ្ធដែលមានសុពលភាព » ( ប្រធាន ហាវើដ ដបុលយូ ហឹនធើរ ) ។

ដើម្បីជួយសមាជិកថ្នាក់ឲ្យយល់ថា ពួកគេត្រូវតែមានភាពសក្តិសម ដើម្បីចូលព្រះវិហារបរិសុទ្ធ ។

ការរៀបចំខ្លួន

មែនហើយ ពីមុនការបង្រៀនមេរៀននេះ សូមអញ្ជើញប៊ីស្សព ឬ ប្រធានសាខា ថ្លែងប្រាប់ដំណឹងអំពីដំណើរការនៃការទទួលបានប័ណ្ណចូលព្រះវិហារបរិសុទ្ធ ។ សម្ភារដែលបានផ្តល់ជាយោបល់សម្រាប់បទបង្ហាញនេះ គឺត្រូវបានផ្តល់ឲ្យនៅទំព័រទី ១០–១១ នៅក្នុងវគ្គ « ដំណើរការនៃការទទួលបានប័ណ្ណចូលព្រះវិហារបរិសុទ្ធគឺជាពរជ័យ » ។ បើសិនជាប៊ីស្សពមិនទំនេរ អ្នកអាចសូមឲ្យទីប្រឹក្សាគាត់ម្នាក់មកថ្លែងជំនួសក៏បាន ។
សូមសរសេរការដកស្រង់ខាងក្រោមនេះនៅលើក្តារខៀន ឬនៅលើប័ណ្ណប្រកាសមួយ ៖ « ខ្ញុំអញ្ជើញឲ្យសមាជិកទាំងអស់នៃសាសនាចក្រ ឲ្យរស់នៅកាន់តែយកចិត្តទុកដាក់ចំពោះជីវិត និងគំរូរបស់ព្រះអម្ចាស់យេស៊ូវគ្រីស្ទ » ( ប្រធាន ហាវើដ ដបុលយូ ហឹនធើរ នៅក្នុងរបាយការណ៍សន្និសីទ ខែ តុលា ឆ្នាំ ១៩៩៤ ទំព័រទី ៧ ឬ Ensign ខែ វិច្ឆិកា ឆ្នាំ ១៩៩៤ ទំព័រ ៨ ) ។

ការរៀបចំមេរៀន

អញ្ជើញនរណាម្នាក់ឲ្យអធិស្ឋានបើក ។

សូមសួរសមាជិកថ្នាក់ថា តើពួកគេមានសំណួរឬទេ ។ សូមចំណាយពេលតាមសេចក្តីត្រូវការដើម្បីឆ្លើយសំណួរឲ្យបានក្បោះក្បាយ ឲ្យអស់ពីសមត្ថភាពរបស់អ្នក ហើយតាមការណែនាំពីព្រះវិញ្ញាណរបស់ព្រះអម្ចាស់ ។ សូមចងចាំថា ទិដ្ឋភាពមួយចំនួននៃកិច្ចការព្រះវិហារបរិសុទ្ធ មិនត្រូវយកមកពិភាក្សានៅខាងក្រៅព្រះវិហារបរិសុទ្ធទេ ។

សូមពន្យល់ប្រាប់ថា អ្នកដែលចូលព្រះវិហារបរិសុទ្ធ ត្រូវតែបង្ហាញសេចក្តីជំនឿដល់ព្រះវរបិតាសួគ៌ និងព្រះយេស៊ូវគ្រីស្ទដោយការរស់នៅតាមដំណឹងល្អ និងកាន់បញ្ញាត្តិទាំងឡាយ ។ ពួកគេត្រូវតែស្អាតស្អំខាងសីលធម៌ ថ្វាយដង្វាយមួយភាគដប់ឲ្យបានពេញលេញ គោរពតាមពាក្យគតិបណ្ឌិត រក្សាថ្ងៃឈប់សម្រាកឲ្យបរិសុទ្ធ ហើយព្យាយាមរស់នៅដោយសុចរិតតាមគ្រប់វិធីទាំងអស់ ។ ពួកគេត្រូវតែបានសម្ភាសន៍ដោយប៊ីស្សព ឬប្រធានសាខា និងប្រធានស្តេក ឬប្រធានបេសកកម្ម ហើយបញ្ជាក់ថា មានភាពសក្តិសមនឹងទទួលបានប័ណ្ណចូលព្រះវិហារបរិសុទ្ធ ។ មេរៀននេះនឹងរំឭកឡើងវិញនូវគោលការណ៍ទាំងឡាយនៃដំណឹងល្អ និងព្រះបញ្ញាត្តិមួយចំនួនដែលសមាជិកថ្នាក់ត្រូវតែរស់នៅតាម ដើម្បីចូលព្រះវិហារបរិសុទ្ធដោយភាពសក្តិសម ។

ភាពស្អាតស្អំខាងសីលធម៌

សូមពន្យល់ថា ព្រះអម្ចាស់ និងព្យាការីរបស់ទ្រង់ បានបង្រៀនដដែលៗពីសារៈសំខាន់ដ៏មហិមានៃភាពស្អាតស្អំខាងសីលធម៌ ។ ប្រធាន ហ្គរដុន ប៊ី ហ៊ិងគ្លី បានបង្រៀនថា ៖ « យើងជឿលើសេចក្តីបរិសុទ្ធមុនពេលរៀបការ និងភក្តីភាពយ៉ាងពេញលេញក្រោយពេលរៀបការ ។ វាគឺតែប៉ុណ្ណឹង ។ នោះគឺជាមាគ៌ាឆ្ពោះទៅរកសុភមង្គលនៃការរស់នៅ ។ នោះគឺជាមាគ៌ាឆ្ពោះទៅរកការពេញចិត្ត ។ វានាំមកនូវសេចក្តីសុខសាន្តមកដល់ដួងចិត្ត និងភាពសុខសាន្តនៅក្នុងផ្ទះ » ( នៅក្នុងរបាយការណ៍សន្និសីទ ខែ តុលា ឆ្នាំ ១៩៩៦ ទំព័រ ៦៨ ឬ Ensign ខែ វិច្ឆកា ឆ្នាំ ១៩៩៦ ទំព័រ ៤៩ ) ។

សូមអានរួមគ្នានូវបទគម្ពីរទាំងឡាយដូចខាងក្រោម ៖

គោលលទ្ធិ និងសេចក្តីសញ្ញា ៤២:២២–២៤ ( ព្រះអម្ចាស់ទ្រង់បានបញ្ជាឲ្យយើងស្រឡាញ់ប្តីប្រពន្ធខ្លួន ហើយមិនឲ្យស្វែងរកអ្នកណាទៀតឡើយ ទ្រង់បានបញ្ជាមិនឲ្យយើងប្រព្រឹត្តអំពើកំផិតទេ ) ។

គោលលទ្ធិ និងសេចក្តីសញ្ញា ១២១:៤៥ ( ព្រះអម្ចាស់បញ្ជាយើង « ឲ្យគុណធម៌តុបតែងគំនិត [ យើង ] ដោយឥតឈប់ឈរ » ) ។

ធីម៉ូថេទី ១ ១៤:១២ ( យើងត្រូវធ្វើជាគំរូដោយសេចក្តីបរិសុទ្ធ ) ។

នីហ្វៃទី ១ ១១០:២១ ( គ្មានអ្វីដែលមិនស្អាតអាចអាស្រ័យនៅជាមួយនឹងព្រះបានឡើយ ) ។

មាត្រានៃសេចក្តីជំនឿ ១:១៣ ( យើងជឿលើបរិសុទ្ធភាព និង គុណធម៌ ) ។

ហេតុអ្វីព្រះអម្ចាស់ទ្រង់សង្កត់ធ្ងន់លើភាពស្អាតស្អំខាងសីលធម៌ខ្លាំងម៉្លេះ ?
តើអ្វីខ្លះទៅជាលទ្ធផលនៃភាពអសីលធម៌ដែលយើងមើលឃើញនៅជុំវិញខ្លួនយើងក្នុងពិភពលោកនេះ ? តើអ្វីខ្លះជាពរជ័យនៃការរស់នៅដោយភាពស្អាតស្អំខាងសីលធម៌ ?

សូមដឹកនាំសមាជិកថ្នាក់ឲ្យចាប់អារម្មណ៍ចំពោះពាក្យដកស្រង់ដែលអ្នកបានសរសេរនៅលើក្តាខៀន ឬនៅលើប័ណ្ណប្រកាស ( សូមមើលវគ្គ « ការរៀបចំ » នៅក្នុងមេរៀននេះ ) ។

តើការប្រឹក្សានេះអាចជួយកូនចៅយើងដើម្បីទប់ទល់នឹងការល្បួងនៅលើលោកិយ ហើយរស់នៅដោយភាពស្អាតស្អំខាងសីលធម៌ដោយរបៀបណាខ្លះ ?

ដង្វាយមួយភាគក្នុងដប់

សូមអញ្ជើញសមាជិកក្នុងថ្នាក់ម្នាក់ឲ្យអាន គោលលទ្ធិ និង សេចក្ដីសញ្ញា ១១៩:៤ ។

សូមពន្យល់ថា គណៈប្រធានទីមួយបានផ្តល់នូវការពន្យល់ដូចខាងក្រោមនេះអំពីដង្វាយមួយភាគដប់ដោយសមរម្យថា ៖ « សេចក្តីថ្លែងដ៏សាមញ្ញបំផុតដែលយើងដឹងគឺជាសេចក្តីថ្លែងរបស់ព្រះអម្ចាស់ផ្ទាល់ដែលថា សមាជិកនៃសាសនាចក្រគួរតែ ‹ ថ្វាយមួយភាគក្នុងដប់នូវរាល់ផលកម្រៃទាំងអស់របស់ពួកគេប្រចាំឆ្នាំ › ដែលត្រូវបានយល់ថាជាប្រាក់ចំណូល » ( សារលិខិតពីគណៈប្រធានទីមួយ ថ្ងៃទី ១៩ ខែ មីនា ឆ្នាំ ១៩៧០ ) ។ មូលនិធិដង្វាយមួយភាគក្នុងដប់គឺយកទៅប្រើប្រាស់សម្រាប់កសាងសាលាប្រជុំ និងព្រះវិហារបរិសុទ្ធទាំងឡាយ សម្រាប់ទ្រទ្រង់កិច្ចការផ្សព្វផ្សាយសាសនា និងជួយស្ថាបនានគរព្រះនៅលើផែនដី ។

សូមចែកចាយនូវសេចក្ដីថ្លែងការណ៍ដូចខាងក្រោមនេះដោយប្រធាន ជេមស៍ អ៊ី ហ្វោស្ត ៖

« ដង្វាយមួយភាគក្នុងដប់គឺជាគោលការណ៍មួយដែលជាមូលដ្ឋានគ្រឹះ ដើម្បីសុភមង្គល និងសុខុមាលភាពផ្ទាល់ខ្លួនរបស់សមាជិកសាសនាចក្រទូទាំងពិភពលោក ទាំងអ្នកមាន និងអ្នកក្រ ។ ដង្វាយមួយភាគក្នុងដប់ជាគោលការណ៍មួយនៃការបូជា និងជាកូនសោដើម្បីបើកបង្អួចស្ថានសួគ៌ ។… សមាជិកនៃសាសនាចក្រដែលមិនថ្វាយដង្វាយមួយភាគក្នុងដប់មិនបាត់បង់សមាជិកភាពរបស់ពួកគេទេ គ្រាន់តែបាត់បង់ពរជ័យតែប៉ុណ្ណោះ » ( នៅក្នុងរបាយការណ៍សន្និសីទ ខែ តុលា ឆ្នាំ ១៩៩៨ ទំព័រទី ៧៣–៧៤ ឬ Ensign ខែ វិច្ឆិកា ឆ្នាំ ១៩៩៨ ទំព័រ ៥៨–៥៩ ) ។

សូមពិនិត្យសារឡើងវិញជាមួយសមាជិកថ្នាក់នូវបទគម្ពីរដូចខាងក្រោម ៖

លេវីវិន័យ ២៧:៣០ ( ដង្វាយមួយភាគក្នុងដប់គឺជារបស់ព្រះអម្ចាស់ គឺជារបស់បរិសុទ្ធរបស់ព្រះអម្ចាស់ ) ។

ម៉ាឡាគី ៣:៨–១១ ( យើងកោងយករបស់ព្រះកាលដែលយើងមិនព្រមថ្វាយដង្វាយមួយភាគក្នុងដប់ ព្រះទ្រង់នឹងប្រទានពរដ៏ហូរហៀរដល់អស់អ្នកណាដែលថ្វាយដង្វាយមួយភាគក្នុងដប់ ) ។

តើពរជ័យអ្វីខ្លះ ដែលអ្នកបានទទួល ដោយសារតែអ្នកបានថ្វាយដង្វាយមួយភាគក្នុងដប់ ?
ហេតុអ្វីយើងកោងយករបស់ព្រះកាលដែលយើងមិនថ្វាយដង្វាយមួយភាគក្នុងដប់នោះ ? ( សូមមើល គ. និង ស. ១០៤:១៤ ) ។

សូមពន្យល់ថា ជារៀងរាល់ឆ្នាំសមាជិកម្នាក់ៗត្រូវបានស្នើសុំឲ្យជួបប៊ីស្សព ឬប្រធានសាខារបស់ខ្លួនក្នុងការផ្ទៀងផ្ទាត់ដង្វាយមួយភាគក្នុងដប់ ដើម្បីប្រកាសប្រាប់គាត់ថា ពួកគាត់ថ្វាយដង្វាយមួយភាគក្នុងដប់ពេញលេញឬអត់ ។ ការជួបនេះគឺជាឱកាសសំខាន់មួយសម្រាប់ឲ្យសមាជិកវាយតម្លៃថា តើពួកគេកំពុងតែបំពេញតាមបញ្ញាត្តិដ៏សំខាន់នេះបានល្អយ៉ាងណា ។

ពាក្យសម្តីនៃប្រាជ្ញាវាងវៃ

សូមពន្យល់ប្រាប់ថា មុននឹងយើងទៅព្រះវិហារបរិសុទ្ធ ព្រះអម្ចាស់រំពឹងថា យើងបានរួចផុតពីទង្វើទាំងឡាយដែលធ្វើឲ្យជីវិតយើងមិនស្អាតស្អំ និងគ្មានសុខភាពល្អ ទាំងខាងវិញ្ញាណ និងសាច់ឈាម ។

សូមអានផ្នែកមួយចំនួន ឬទាំងអស់នៃបទគម្ពីរដូចខាងក្រោម ៖

កូរិនថូសទី ១ ១៣:១៦–១៧ ( រូបកាយរបស់យើងគឺជាព្រះវិហារបរិសុទ្ធនៃព្រះ ហើយមិនគួរត្រូវបានបង្ខូចឡើយ ) ។

គោលលទ្ធិ និង សេចក្តីសញ្ញា ៨៩ ( វិវរណៈនេះត្រូវបានស្គាល់ថាជាពាក្យសម្តីនៃប្រាជ្ញាវាងវៃ ។ ខ ១–៩ ពិភាក្សាអំពីអ្វីទាំងឡាយដែលយើងមិនគួរទទួលទានចូលក្នុងខ្លួនយើង, ខ ១០–១៧ ពិភាក្សានូវអ្វីទាំងឡាយដែលល្អសម្រាប់រាងកាយយើង ខ ១៨–២១ ពិពណ៌នាអំពីសេចក្តីសន្យាទាំងឡាយរបស់ព្រះអម្ចាស់ចំពោះអស់អ្នកណាដែលកាន់តាមបញ្ញាត្តិទ្រង់ ) ។

តើមានអ្វីខ្លះនៅក្នុងពិភពលោកសព្វថ្ងៃនេះដែលបណ្តាលឲ្យយើងរំលងបញ្ញាត្តិទាំងឡាយដែលបានប្រទានដល់យើងនៅក្នុងពាក្យសម្តីនៃប្រាជ្ញាវាងវៃ ?
តើយើងអាចជួយខ្លួនយើង និងកូនចៅយើងដើម្បីឲ្យកាន់តាមក្រឹត្យវិន័យរបស់ព្រះអម្ចាស់ស្តីពីច្បាប់សុខភាពល្អដោយរបៀបណា ?

សូមអញ្ជើញសមាជិកក្នុងថ្នាក់ម្នាក់ឲ្យអាន គោលលទ្ធិ និង សេចក្ដីសញ្ញា ២៩:៣៤ ។

តើអ្នកគិតថាការគោរពប្រតិបត្តិតាមពាក្យសម្តីនៃប្រាជ្ញាវាងវៃអាចផ្តល់ពរដល់យើងទាំងខាងវិញ្ញាណ និងខាងសាច់ឈាមតាមរបៀបណាខ្លះ ?
តើអ្វីទៅជា « ផលថ្លៃវិសេសនៃចំណេះវិជ្ជា » ( គ. និង ស. ៨៩:១៩ ) ដែលយើងអាចទទួលបានមកពីការកាន់តាមបញ្ញាត្តិទាំងឡាយនោះ ?

សូមចែកចាយនូវសេចក្ដីថ្លែងការណ៍ដូចខាងក្រោមនេះដោយប្រធាន ប៊យដ៍ ឃេ ផាកកឺ ៖

« អ្វីដែលអ្នករៀនខាងវិញ្ញាណវាអាស្រ័យទៅលើរបៀបដែលអ្នកប្រព្រឹត្តចំពោះរូបកាយរបស់អ្នកក្នុងកម្រិតណាមួយ ។ នោះហើយបានជាពាក្យសម្តីនៃប្រាជ្ញាវាងវៃសំខាន់ខ្លាំងណាស់ ។

សារធាតុញៀនដែលត្រូវបានហាមឃាត់ដែលបានបើកសម្តែងដោយវិវរណៈនោះមានដូចជា—តែ, កាហ្វេ, ស្រា, ថ្នាំជក់—ចូលមករំខាន ហើយធ្វើឲ្យទំនាក់ទំនងខាងវិញ្ញាណចុះខ្សោយដូចគ្រឿងញាណផ្សេងទៀតដែរ ។

ចូរកុំព្រងើយកន្តើយចំពោះពាក្យសម្តីនៃប្រាជ្ញាវាងវៃ ដ្បិតវាអាចធ្វើឲ្យអ្នកបាត់បង់នូវ ‹ ផលថ្លៃវិសេសនៃចំណេះវិជ្ជា គឺជាសម្បតិ្តដែលលាក់ទុក › ដែលបានសន្យាចំពោះអ្នកណាដែលបានរក្សាបញ្ញាត្តិ ។ ហើយសុខភាពល្អគឺជាពរជ័យបន្ថែមទៀត » ( នៅក្នុងរបាយការណ៍សន្និសីទខែ តុលា ឆ្នាំ ១៩៩៤ ទំព័រ ៧៨ ឬ Ensign ខែ វិច្ឆិកា ឆ្នាំ ១៩៩៤ ទំព័រ ៦១ ) ។

ថ្ងៃឈប់សម្រាក

សូមអានជាមួយគ្នានូវ និក្ខមនំ ២០:៨-១១ ។

សូមពន្យល់ថា ប្រជារាស្ត្ររបស់ព្រះអម្ចាស់ត្រូវបានបញ្ជារហូតមកឲ្យរក្សាថ្ងៃឈប់សម្រាកឲ្យបរិសុទ្ធ ។ ព្រះអម្ចាស់បានសន្យានូវពរជ័យដ៏ធំធេងចំពោះអស់អ្នកណាដែលធ្វើដូច្នោះ ។

សូមឲ្យសមាជិកក្នុងថ្នាក់អាន គោលលទ្ធិ និង សេចក្ដីសញ្ញា ៥៩:៩–១៣

តើមូលហេតុចម្បងអ្វីដែលព្រះបានប្រទានដល់មនុស្សដើម្បីរក្សាថ្ងៃឈប់សម្រាកឲ្យបរិសុទ្ធ ?
តើ គោលលទ្ធិ និងសេចក្តីសញ្ញា ៥៩:៩–១៣ អាចដឹកនាំការគោរពប្រតិបត្តិរបស់យើងអំពីថ្ងៃឈប់សម្រាកដោយមធ្យោបាយណាខ្លះ ?
តើពរជ័យអ្វីខ្លះដែលត្រូវបានសន្យាដល់អ្នកទាំងឡាយដែលរក្សាថ្ងៃឈប់សម្រាកបានត្រឹមត្រូវ ?

ជាផ្នែកមួយនៃការពិភាក្សានេះ សូមចែកចាយគោលការណ៍ខាងក្រោមនេះ ដែលបង្រៀនដោយ អែលឌើរ ជេមស៍ អ៊ី ហ្វោស្ត ៖

« ហេតុអ្វីបានជាព្រះសុំឲ្យយើងគោរពដល់ថ្ងៃឈប់សម្រាក ? មូលហេតុដែលខ្ញុំគិតដល់មានយ៉ាងហោចណាស់បីយ៉ាង ។ ទីមួយ ត្រូវតែមានទំនាក់ទំនងជាមួយនឹងតម្រូវការខាងរាងកាយសម្រាប់សម្រាក និងធ្វើឲ្យមានភាពស្រស់ស្រាយជាថ្មី ។ …

ហេតុផលទីពីរតាមគំនិតរបស់ខ្ញុំគឺសំខាន់ជាងនោះខ្លាំងណាស់ ។ វាត្រូវតែមានទំនាក់ទំនងនឹងសេចក្តីត្រូវការសម្រាប់ការកែប្រែជាថ្មី និងការពង្រឹងនៃសុខភាពខាងវិញ្ញាណរបស់យើង ។ …

ហេតុផលទីបីអាចសំខាន់ជាងគេបំផុតក្នុងចំណោមហេតុផលទាំងបី ។ វាទាក់ទងជាមួយនឹងការគោរពប្រតិបត្តិតាមព្រះបញ្ញាត្តិទាំងឡាយដែលជាការបង្ហាញនូវសេចក្តីស្រឡាញ់របស់យើងចំពោះព្រះ ។ មានពរហើយចំពោះអ្នកណាដែលមិនត្រូវការហេតុផលអ្វីក្រៅតែពីសេចក្តីស្រឡាញ់របស់ពួកគេចំពោះព្រះអង្គសង្គ្រោះដើម្បីគោរពព្រះបញ្ញត្តិទ្រង់ » ( នៅក្នុងរបាយការណ៍សន្និសីទ ខែ តុលា ឆ្នាំ ១៩៩១ ទំព័រ ៤៦–៤៧ ឬ Ensign ខែ វិច្ឆិកា ឆ្នាំ ១៩៩១ ទំព័រ ៣៥ ) ។

តើមានពរជ័យអ្វីខ្លះដែលកើតមានក្នុងជីវិតរបស់អ្នក ដោយសារអ្នកបានរក្សាថ្ងៃឈប់សម្រាកឲ្យបានបរិសុទ្ធ ?

សូមសមាជិកថ្នាក់ឲ្យធ្វើការតាំងចិត្តដើម្បីរស់នៅតាមព្រះបញ្ញាតិ្តទាំងឡាយដែលបានពិភាក្សាថ្ងៃនេះ ៖ ភាពស្អាតស្អំខាងសីលធម៌ ដង្វាយមួយភាគក្នុងដប់ ពាក្យសម្តីនៃប្រាជ្ញាវាងវៃ និងការគោរពថ្ងៃឈប់សម្រាក ។ ហើយពួកគេនឹងត្រៀមខ្លួនបានកាន់តែប្រសើរដើម្បីចូលទៅព្រះវិហារបរិសុទ្ធ ហើយទទួលពរជ័យពីព្រះអម្ចាស់កាន់តែច្រើនថែមទៀត ។

ដំណើរការនៃការទទួលបានប័ណ្ណចូលព្រះវិហារបរិសុទ្ធគឺជាពរជ័យមួយ

សូមពន្យល់ថា ពីមុនសមាជិកអាចទៅព្រះវិហារបរិសុទ្ធបាន ពួកគេម្នាក់ៗត្រូវតែមានភាពសក្តិសម ដើម្បីទទួលបានប័ណ្ណចូលព្រះវិហារបរិសុទ្ធ ។ ដូចដែលបានពន្យល់នៅក្នុងសេចក្តីថ្លែងការណ៍ខាងក្រោម ដំណើរការនៃការទទួលបានប័ណ្ណនេះអាចផ្តល់ពរដល់ជីវិតនៃមនុស្សម្នាក់ៗ ៖

« ប៊ីស្សពមានតួនាទីសួរសំណួរទាំងឡាយអំពីភាពសក្តិសមផ្ទាល់ខ្លួនរបស់យើង ។ ការសម្ភាសន៍នេះ មានសារៈសំខាន់ណាស់ចំពោះអ្នកក្នុងនាមជាសមាជិកសាសនាចក្រ ដ្បិតវាគឺជាឱកាសមួយ ដើម្បីស្រាវជ្រាវពីរបៀបរស់នៅរបស់អ្នកជាមួយអ្នកបម្រើដែលបានតែងតាំងរបស់ព្រះអម្ចាស់។ បើមានអ្វីដែលមិនសមរម្យនៅក្នុងជីវិតរបស់អ្នក នោះប៊ីស្សពអាចជួយអ្នកដោះស្រាយវាបាន ។ តាមដំណើរការនេះ ពេលអ្នកពិភាក្សាជាមួយនិងចៅក្រមនៃអ៊ីស្រាអែល អ្នកអាចប្រកាស ឬអាចត្រូវបានជួយដើម្បីស្ថាបនាភាពសក្តិសមរបស់អ្នកដើម្បីចូលព្រះវិហារបរិសុទ្ធដោយមានការអនុញ្ញាត្តពីព្រះអម្ចាស់ » ( ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រ ៣ ) ។

សូមពន្យល់ថា ប៊ីស្សព ឬប្រធានសាខា និងប្រធានស្តេក ឬប្រធានបេសកកម្ម សម្ភាសន៍សមាជិកទាំងឡាយណាដែលចង់បានប័ណ្ណចូលព្រះវិហារបរិសុទ្ធមួយជាលើកដំបូង ហើយនិងអ្នកទាំងឡាយណាដែលកំពុងគ្រោងរៀបការនៅក្នុងព្រះវិហារបរិសុទ្ធ ។ ទីប្រឹក្សានៅក្នុងគណៈប៊ីស្សព និងប្រធានស្តេក អាចសម្ភាសន៍អ្នកទាំងឡាយណាដែលចង់បន្តសុពលភាពនៃប័ណ្ណចូលព្រះវិហារបរិសុទ្ធរបស់ពួកគេ ។

នៅពេលនេះ សូមឲ្យប៊ីស្សព ឬ ប្រធានសាខា ឬទីប្រឹក្សារបស់គាត់ម្នាក់នៅក្នុងគណៈប៊ីស្សព ធ្វើបទបង្ហាញអំពីប័ណ្ណចូលព្រះវិហារបរិសុទ្ធ ។ គាត់មិនគួរអានសំណួរសម្ភាសពិតដល់ក្រុមទេ ប៉ុន្តែគាត់អាចបង្ហាញនូវគំនិតនានានូវអ្វីដែលសមាជិកថ្នាក់អាចរំពឹងដល់នៅពេលដែលពួកគេទៅសម្ភាសន៍យកប័ណ្ណចូលព្រះវិហារបរិសុទ្ធ ។ ប្រយោគខាងក្រោមអាចត្រូវបានប្រើជាសេចក្តីណែនាំមួយបាន ៖

សមាជិកដែលចង់បានប័ណ្ណចូលព្រះវិហារបរិសុទ្ធមួយគួរតែមានទីបន្ទាល់ពីព្រះវបិតាសួគ៌ ព្រះអម្ចាស់យេស៊ូវគ្រីស្ទ និងព្រះវិញ្ញាណបរិសុទ្ធ ។ ពួកគេគួរគាំទ្រដល់ព្យាការីរបស់ព្រះអម្ចាស់ អ្នកមានសិទ្ធិអំណាចទូទៅផ្សេងៗទៀត និងអ្នកដឹកនាំរបស់សាសនាចក្រនៅតាមមូលដ្ឋានទាំងឡាយ ។ ពួកគេមិនគួររួមគំនិត ឬមានទំនាក់ទំនងជាមួយក្រុម ឬបុគ្គលដែលបានក្បត់សាសនាចក្រ ឬការបង្រៀន ឬការអនុវត្តទាំងឡាយណាដែលផ្ទុយពីដំណឹងល្អឡើយ ។

អ្នកទាំងឡាយណាដែលចង់បានប័ណ្ណ គប្បីចូលរួមការប្រជុំសាក្រាម៉ង់ ដោយការប្រជុំបព្វជិតភាព និងការប្រជុំផ្សេងៗទៀតរបស់សាសនាចក្រដោយស្មោះត្រង់ ។ ពួកគេគួរតែបំពេញការហៅបម្រើរបស់ពួកគេប្រកបដោយសតិសម្បជញ្ញៈដែលត្រូវបានផ្តល់ឲ្យតាមរយៈសិទ្ធិអំណាចបព្វជិតភាព ។ ពួកគេគួរតែព្យាយាមដើម្បីគោរពតាមនូវរាល់ព្រះបញ្ញាត្តិរបស់ព្រះអម្ចាស់ ដោយរួមទាំងការថ្វាយដង្វាយមួយភាគក្នុងដប់ពេញលេញ មានភាពទៀងត្រង់នៅក្នុងការនិយាយស្តី និងការប្រព្រឹត្ត និងការតមដោយមិនទទួលទានតែ កាហ្វេ គ្រឿងស្រវឹង ថ្នាំជក់ រួមទាំងសារធាតុដែលបង្កហានិភ័យនិងញៀនគ្រប់ប្រភេទ ។

ពួកគេគួរតែរស់នៅដោយភាពបរិសុទ្ធ និងគុណធម៌ ហើយគួរតែគោរពតាមច្បាប់ព្រហ្មចារីយភាព ដែលហាមឃាត់មិនឲ្យមានទំនាក់ទំនងខាងផ្លូវភេទជាមួយអ្នកណាផ្សេងទៀតឡើយក្រៅតែពីជាមួយស្វាមីភរិយាដែលពួកគេបានរៀបការពេញច្បាប់ប៉ុណ្ណោះ ។ ពួកគេគួរតែប្រព្រឹត្តឲ្យត្រូវជាមួយគោលការណ៍ទាំងឡាយនៃដំណឹងល្អ ក្នុងទំនាក់ទំនងជាមួយនិងសមាជិកក្រុមគ្រួសារ ទាំងខាងវិញ្ញាណ និងខាងសាច់ឈាម ។ ពួកគេ មិនត្រូវធ្វើបាបអ្នកដទៃ ទាំងខាងវិញ្ញាណ រាងកាយ ផ្លូវចិត្ត ឬផ្លូវអារម្មណ៍ឡើយ ។

ពួកគេត្រូវតែសារភាពនូវអំពើបាបរបស់ពួកគេដោយស្ម័គ្រចិត្ត ហើយលះបង់អំពើបាបនោះចោល ។ អំពើបាបធ្ងន់ធ្ងរ ដូចជា ការរំលងខាងសីលធម៌ ការរំលោភបំពានលើសមាជិកគ្រួសារ ការមានទំនាក់ទំនងជាមួយក្រុម ឬការអនុវត្តទាំងឡាយណាដែលក្បត់សាសនា ឬការប្រព្រឹត្តខុសពីច្បាប់ដែនដីដ៏ធ្ងន់ធ្ងរ ត្រូវតែសារភាពនៅចំពោះប៊ីស្សព ឬប្រធានសាខាឲ្យបានអស់មុននឹងសម្ភាសទទួលប័ណ្ណចូលព្រះវិហារបរិសុទ្ធ ។ ប្រសិនបើសតិសម្បជញ្ញៈរបស់មនុស្សម្នាក់ដែលជាពន្លឺនៃព្រះគ្រីស្ទដែលបានប្រទានឲ្យដល់មនុស្សទាំងអស់ លើកជាសំណួរនៅក្នុងចិត្តរបស់អ្នកនោះថា តើមានអ្វីមួយដែលគួរតែពិភាក្សាជាមួយប៊ីស្សព ឬប្រធានសាខា នោះគួរតែលើកបញ្ហានោះមកពិភាក្សា ។

អ្នកណាដែលបានឆ្លងកាត់ការលែងលះ នោះត្រូវឲ្យមានការបញ្ជាក់ពីប៊ីស្សព ឬប្រធានសាខា និងប្រធានស្តេក ឬប្រធានបេសកកម្ម ពីមុនទទួលបានប័ណ្ណចូលព្រះវិហារបរិសុទ្ធ ។ ពួកគេត្រូវតែប្រកាន់ខ្ជាប់តាមការព្រមព្រៀងនៃការលះលែងគ្នាដែលរួមទាំងការបង់ប្រាក់ចិញ្ចឹមកូនឲ្យទាន់ពេល ។

សមាជិកដែលចង់បានប័ណ្ណចូលព្រះវិហារបរិសុទ្ធ ត្រូវតែបានសម្ភាសដោយសមាជិកម្នាក់នៃគណៈប្រធានស្តេក ឬដោយប្រធានបេសកកម្ម បន្ទាប់ពីបានទទួលការសម្ភាសដោយសមាជិកម្នាក់មកពីគណៈប្រធានប៊ីស្សព ឬប្រធានសាខា ។ អ្នកខ្លះអាចនឹងឆ្ងល់ថាហេតុអ្វីចាំបាច់ត្រូវធ្វើបែបនេះ ។ ពេលយើងចង់បានប័ណ្ណចូលព្រះវិហារបរិសុទ្ធគឺយើងកំពុងតែស្វែងរកការអនុញ្ញាតពីព្រះអម្ចាស់ដើម្បីចូលទៅក្នុងព្រះវិហារបរិសុទ្ធ ។ យើងមានឯកសិទ្ធិនៃការបញ្ជាក់ភាពសក្តិសមរបស់យើងនៅពីមុខសាក្សីពីរនាក់ដែលជាអ្នកបម្រើនៃព្រះអម្ចាស់ដ៏មានសិទ្ធិអំណាច ។ វាជាពរជ័យចំពោះពួកយើងដើម្បីអះអាងនៅចំពោះមុខអ្នកបម្រើនៃព្រះអម្ចាស់នូវភាពសក្តិសមរបស់យើង ដើម្បីចូលទៅក្នុងព្រះវិហារបរិសុទ្ធ ។

សេចក្ដីបញ្ចប់

ដើម្បីបញ្ជាក់នូវសារៈសំខាន់អំពីភាពសក្តិសមដើម្បីចូលព្រះវិហារបរិសុទ្ធ និងកាន់ប័ណ្ណចូលព្រះវិហារបរិសុទ្ធដែលមានសុពលភាព សូមរំឭកសារឡើងវិញនូវសេចក្តីថ្លែងដោយប្រធាន ហាវើដ ដបុលយូ ហឹនធើរ ដូចខាងក្រោម ៖

« ខ្ញុំ…សូមអញ្ជើញសមាជិកនៃសាសនាចក្រ ឲ្យសាងសង់ព្រះវិហារនៃព្រះអម្ចាស់ដែលជានិមិត្តរូបដ៏អស្ចារ្យនៃសមាជិកភាពរបស់ពួកគេ និងភាពពិសេសដ៏អស្ចារ្យនៃសេចក្តីសញ្ញាដ៏ពិសិដ្ឋរបស់ពួកគេ ។ វាជាបំណងប្រាថ្នាដ៏ជ្រាលជ្រៅបំផុតចេញពីដួងចិត្តរបស់ខ្ញុំ ដើម្បីឲ្យសមាជិកគ្រប់រូបនៃសាសនាចក្រមានភាពសក្តិសមសម្រាប់ព្រះវិហារបរិសុទ្ធ ។ ខ្ញុំសង្ឃឹមថាសមាជិកពេញវ័យគ្រប់រូបនឹងមានភាពសក្តិសម—ហើយកាន់—ប័ណ្ណចូលព្រះវិហារបរិសុទ្ធដែលមានសុពលភាព ទោះជាព្រះវិហារបរិសុទ្ធមានចម្ងាយឆ្ងាយមិនអាចទៅដល់ជាញឹកញាប់ក្តី » ( បានដកស្រង់មកពី ជេ អ៊ិម ថត « ប្រធាន ហាវើដ ដបុលយូ ហឹនធើរ » Ensign ខែ កក្កដា ឆ្នាំ ១៩៩៤ ទំព័រ ៥ ) ។

សូមថ្លែងទីបន្ទាល់អំពីពរជ័យដែលកើតមានក្នុងជីវិតអ្នកនៅពេលអ្នករស់នៅដោយសកិ្តសមដើម្បីចូលព្រះវិហារបរិសុទ្ធ ។

សូមឲ្យនរណាម្នាក់អធិស្ឋានបិទ ។