« មេរៀនទី ៣ ៖ កិច្ចការព្រះវិហារបរិសុទ្ធនាំមកនូវពរជ័យដ៏ធំធេងមកក្នុងជីវិតរបស់យើង » បានទទួលអំណោយទានពិសិដ្ឋមកពីស្ថានលើ ៖ សៀវភៅសិក្សារបស់គ្រូបង្រៀនសិក្ខាសាលាស្តីពីការរៀបចំខ្លួនទៅព្រះវិហារបរិសុទ្ធ ( ឆ្នាំ ២០០៣ ) ទំព័រទី ១២–១៥

« មេរៀនទី ៣ » បានទទួលអំណោយទានពិសិដ្ឋមកពីស្ថានលើ ទំព័រ ១២–១៥

មេរៀនទី ៣

កិច្ចការព្រះវិហារបរិសុទ្ធនាំមកនូវពរជ័យដ៏ធំធេងមកក្នុងជីវិតរបស់យើង

គោលបំណង

« ហើយទូលបង្គំទាំងអស់គ្នា សូមដល់ព្រះអង្គ ឱព្រះវរបិតាដ៏បរិសុទ្ធអើយ សូមឲ្យពួកអ្នកបម្រើទ្រង់អាចបានចេញពីដំណាក់នេះទៅប្រដាប់ដោយព្រះចេស្តារបស់ទ្រង់ ហើយសូមឲ្យព្រះនាមរបស់ទ្រង់អាចបាននៅក្នុងពួកយើង ហើយសូមឲ្យសិរីល្អរបស់ទ្រង់នៅជុំវិញពួកទូលបង្គំវិញ » ( គ. និង ស. ១០៩:២២ ) ។

ដើម្បីជួយដល់សមាជិកនៅក្នុងថ្នាក់ឲ្យយល់ថា អ្នកដែលចូលរួមក្នុងព្រះវិហារបរិសុទ្ធដោយសក្តិសមនឹងទទួលពរជ័យដ៏ធំធេងពីព្រះអម្ចាស់ ។

ការរៀបចំខ្លួន

សូមធ្វើការរំឭកបទគម្ពីរទាំងឡាយដែលប្រើប្រាស់ក្នុងមេរៀននេះឡើងវិញដោយប្រុងប្រយ័ត្នដើម្បីអ្នកនឹងត្រូវបានរៀបចំដឹកនាំការពិភាក្សានៅក្នុងថ្នាក់អំពីបទគម្ពីរទាំងនោះ ។
អ្នកអាចរៀបចំសមាជិកក្នុងថ្នាក់ឲ្យច្រៀងទំនុកតម្កើងមួយបទអំពីកិច្ចការព្រះវិហារបរិសុទ្ធដូចជា « យើងស្រឡាញ់ដំណាក់ទ្រង់ » ( ទំនុកតម្កើង លេខ ១៤៥ ) ឬ អំពីលក្ខណៈនៃសេចក្តីពិតដ៏អស់ក្បលជានិច្ច ដូចជា « ការពិតនោះជាអ្វី ? » ( ទំនុកតម្កើង លេខ ១៧០ ) ។
ប្រសិនបើ Family Home Evening Video Supplement 2 ( ៥៣២៧៧ ) មាន អ្នកអាចបង្ហាញវីដេអូមួយដែលមានរយៈពេលប្រាំមួយនាទីក្រោមចំណងជើងថា « Temples Are for Eternal Covenants » ។

ការរៀបចំមេរៀន

អញ្ជើញនរណាម្នាក់ឲ្យអធិស្ឋានបើក ។

សូមសួរសមាជិកថ្នាក់ថា តើពួកគេមានសំណួរឬទេ ។ សូមចំណាយពេលតាមសេចក្តីត្រូវការដើម្បីឆ្លើយសំណួរឲ្យបានក្បោះក្បាយ ឲ្យអស់ពីសមត្ថភាពរបស់អ្នក ហើយតាមការណែនាំពីព្រះវិញ្ញាណរបស់ព្រះអម្ចាស់ ។ សូមចងចាំថា ទិដ្ឋភាពមួយចំនួននៃកិច្ចការព្រះវិហារបរិសុទ្ធ មិនត្រូវយកមកពិភាក្សានៅខាងក្រៅព្រះវិហារបរិសុទ្ធទេ ។

កិច្ចការព្រះវិហារបរិសុទ្ធមានតាំងពីជំនាន់ដើមមកម៉្លេះ

អ្នកអាចចាប់ផ្តើមដោយច្រៀងរួមគ្នានូវទំនុកតម្កើងអំពីកិច្ចការព្រះវិហារបរិសុទ្ធ ឬ អំពីលក្ខណៈនៃសេចក្តីពិតដ៏អស់កល្បជានិច្ច ។

សូមពន្យល់ថា ព្រះអម្ចាស់តែងតែត្រាស់បង្គាប់រាស្ត្រទ្រង់ឲ្យកសាងព្រះវិហារបរិសុទ្ធ ។ ទ្រង់បានបើកសម្តែងកិច្ចការទាំងអស់ដែលត្រូវធ្វើនៅក្នុងព្រះវិហារបរិសុទ្ធ ។

តើព្រះវិហារបរិសុទ្ធ ឬ រោងឧបោសថណាខ្លះដែលត្រូវបានលើកឡើងនៅក្នុងព្រះគម្ពីរ ?

សូមអញ្ជើញសមាជិកថ្នាក់ឲ្យពិនិត្យមើលនូវលិបិក្រមនៃព្រះគម្ពីរ ដើម្បីរកមើលនូវបទគម្ពីរយោងដែលទាក់ទងនឹងព្រះវិហារបរិសុទ្ធ និងរោងឧបោសថទាំងឡាយ ។ អ្នកអាចសរសេរចម្លើយទាំងឡាយរបស់សមាជិកក្នុងថ្នាក់នៅលើក្តារខៀន ។ អ្នកក៏អាចឲ្យសមាជិកថ្នាក់ពិនិត្យមើលឡើងវិញនូវបទគម្ពីរទាំងឡាយដូចខាងក្រោម ៖

រោងឧបោសថរបស់ម៉ូសេ ៖ និក្ខមនំ ៤០:១–២,៣៤–៣៨

ព្រះវិហារបរិសុទ្ធរបស់ហ្លួងសាឡូម៉ូន ៖ របាក្សត្រទី ២៣:១–២; របាក្សត្រទី ២ ២៥:១

ព្រះវិហារបរិសុទ្ធរបស់ស្តេចហេរ៉ូឌ ៖ ម៉ាថាយ ២១:១២–១៥

ព្រះវិហារបរិសុទ្ធរបស់នៃនីហ្វៃ ៖ នីហ្វៃទី ២ ៥:១៦; ម៉ូសាយ ១:១៨; នីហ្វៃទី ៣ ១១:១

សូមពន្យល់ថា ដោយសារតែការក្បត់សាសនា នោះគ្រប់ព្រះវិហារបរិសុទ្ធទាំងអស់នេះយូរៗទៅបានបាត់បង់នូវគោលបំណងដ៏ពិតប្រាកដ ហើយត្រូវបានបំផ្លាញចោលទៅ ។ កិច្ចការព្រះវិហារបរិសុទ្ធដ៏ពេញលេញនោះត្រូវបានស្តារឡើងវិញនៅជំនាន់របស់យើងតាមរយៈព្យាការី យ៉ូសែប ស៊្មីធ ដោយផ្តល់នាំពរជ័យដ៏ធំធេងក្នុងជីវិតរបស់យើង ។

អែលឌើរ ប៊្រូស អ័រ ម៉ាក់ខន់ឃី បានមានប្រសាសន៍ថា ៖ « ការកសាង និងការប្រើប្រាស់ព្រះវិហារបរិសុទ្ធដ៏ត្រឹមត្រូវគឺជាភស្តុតាងដ៏អស្ចារ្យ និងដ៏ទេវភាពនៃកិច្ចការរបស់ព្រះអម្ចាស់ ។… នៅទីណាដែលមានព្រះវិហារបរិសុទ្ធ ដោយមានវិញ្ញាណនៃវិវណៈសណ្ឋិតមកលើអ្នកណាដែលធ្វើការនៅទីនោះ នឹងរកឃើញប្រជារាស្ត្ររបស់ព្រះអម្ចាស់នៅទីនោះដែរ រីឯនៅទីណាដែលគ្មានអ្វីទាំងនេះទេ នោះសាសនាចក្រ និងនគរ និងសេចក្តីពិតអំពីស្ថានសួគ៌ក៏គ្មានដែរ » ( Mormon Doctrine បោះពុម្ពលើកទី ២ [ ឆ្នាំ ១៩៦៦ ] ទំព័រ ៧៨១ ) ។

អស់អ្នកណាដែលចូលព្រះវិហារបរិសុទ្ធដោយសក្តិសម ត្រូវបានសន្យានូវពរជ័យដ៏ធំធេង

ព្រះវិហារបរិសុទ្ធ ឬដំណាក់នៃព្រះគឺជាកន្លែងដែលយើងទៅដើម្បីរៀបចំខ្លួនចំពោះការលើកតម្កើងនៅក្នុងនគរសេឡេស្ទាល ។ នៅទីនោះ យើងរៀនបន្ថែមទៀតអំពីព្រះវរបិតា និងព្រះយេស៊ូវគ្រីស្ទ ។ យើងចុះសេចក្តីសញ្ញាជាមួយពួកទ្រង់ ហើយពួកទ្រង់សន្យានឹងប្រទាននូវពរជ័យដ៏ពិសេសដល់យើងវិញ ។

នៅក្នុងគោលលទ្ធិ និងសេចក្តីសញ្ញា ព្រះអម្ចាស់ទ្រង់បានពិពណ៌នាអំពីពរជ័យខ្លះៗដែលនឹងកើតមានដល់អ្នកណាដែលចូលព្រះវិហារបរិសុទ្ធ ហើយរស់នៅដោយភាពសក្តិសមចំពោះសេចក្តីសញ្ញាទាំងឡាយដែលបានចុះនៅទីនោះ ។ ពរជ័យមួយចំនួននេះត្រូវបានពិពណ៌នានៅក្នុងកណ្ឌទី ១០៩ ជាបទអធិស្ឋានដែលបានផ្តល់ឲ្យនៅក្នុងការឧទ្ទិសឆ្លង ព្រះវិហារបរិសុទ្ធទីក្រុង ខឺតឡង់ ។ បទអធិស្ឋាននោះត្រូវបានផ្តល់ឲ្យដោយវិវរណៈតាមរយៈយ៉ូសែប ស្ម៊ីធ ។

ប្រធាន ហាវើធ ដបុលយូ ហឹនធើរ បានមានប្រសាសន៍ថា បទអធិស្ឋាននេះ « នៅតែឆ្លើយតបចំពោះយើងម្នាក់ៗ ចំពោះគ្រួសារយើង និងចំពោះយើងដែលជាមនុស្សម្នាក់ ដោយសារតែអំណាចបព្វជិតភាពដែលព្រះអម្ចាស់បានប្រទានមកពួកយើងដើម្បីប្រើប្រាស់នៅក្នុងព្រះវិហារបរិសុទ្ធដ៏បរិសុទ្ធរបស់ទ្រង់ » ( « The Great Symbol of Our Membership » Ensign ខែ តុលា ឆ្នាំ ១៩៩៤ ទំព័រ ៤ ) ។

បន្ទាប់មកប្រធាន ហឹនធើរ បានស្រង់នូវខគម្ពីរខ្លះៗមកពីកណ្ឌទី ១០៩ នោះ ។ សូមឲ្យសមាជិកថ្នាក់អាននូវខគម្ពីរទាំងនេះ ៖ គោលលទ្ធិ និង សេចក្ដីសញ្ញា ១០៩:១០–១២, ២២–២៣, ៥៩, ៦៧, ៧២, ៧៥ ។ សូមឲ្យពួកគេរកមើលពរជ័យដែលបានពោលដោយព្រះអម្ចាស់ ។

បន្ទាប់ពីអានរួច សូមឲ្យសមាជិកថ្នាក់ធ្វើបញ្ជីពរជ័យដែលពួកគេបានរកឃើញ ។ សូមសរសេរយោបល់ទាំងឡាយនៅលើក្តារខៀន ៖ ពរជ័យដែលបានពិពណ៌នាអាចរួមមានដូចខាងក្រោម ៖

សិរីល្អរបស់អម្ចាស់នឹងមកសណ្ឋិតលើរាស្ត្ររបស់ទ្រង់ ។
អ្នកបម្រើរបស់ព្រះអម្ចាស់នឹងចាកចេញពីព្រះវិហារបរិសុទ្ធប្រកបដោយព្រះចេស្តា ព្រះនាម និងសិរីល្អនៃព្រះអម្ចាស់ ហើយទេវតានឹងគ្រប់គ្រងលើពួកគេ ។
អ្នកបម្រើរបស់ព្រះអម្ចាស់នឹងយកសេចក្តីពិតអំពីដំណឹងល្អចេញពីព្រះវិហារបរិសុទ្ធទៅដល់ចុងផែនដី ។
ស្តេកនានានឹងត្រូវបានរៀបចំឡើងដើម្បីឲ្យរាស្ត្ររបស់ព្រះអម្ចាស់អាចបានប្រមូលផ្តុំគ្នា។
គ្រប់អស់សាសន៍អ៊ីស្រាអែលដែលបានខ្ចាត់ខ្ចាយទាំងប៉ុន្មាននោះនឹងបានដឹងអំពីសេចក្តីពិត ហើយមានចិត្តត្រេកអរ ។
ក្រុមគ្រួសារនៃពួកបរិសុទ្ធ និងអស់ទាំងអ្នកជំងឺ និងអ្នករងទុក្ខវេទនារបស់គេទាំងប៉ុន្មាននោះនឹងត្រូវបានចងចាំនៅចំពោះព្រះភក្ត្រព្រះអម្ចាស់ ។
នគររបស់ព្រះអម្ចាស់នឹងមានពាសពេញលើផែនដីទាំងមូល ។
នៅថ្ងៃណាមួយ អ្នកបម្រើរបស់ព្រះអម្ចាស់នឹងបានលើកឡើងទៅជួបទ្រង់ ហើយនៅជាមួយទ្រង់រហូតតទៅ ។

តើអ្នកមានគំនិតយ៉ាងណាដែរ នៅពេលអ្នកពិចារណាអំពីពរជ័យដ៏អស្ចារ្យដែលបានសន្យាដល់អស់អ្នកដែលចូលព្រះវិហារបរិសុទ្ធដោយសក្តិសម ហើយគោរពតាមសេចក្តីសញ្ញារបស់ខ្លួន ?

ប្រធាន ហាវើធ ដបុលយូ ហឹនធើរ បានមានប្រសាសន៍ថា ៖ « តើធ្លាប់ដែលមានប្រជាជនណាដែលមានសេចក្តីសន្យាដ៏គួរឲ្យរំភើប និងអស្ចារ្យដូច្នេះទេ ! គ្មានអ្វីដែលគួរឲ្យសង្ស័យទេដែលថា ព្រះអម្ចាស់មានព្រះទ័យចង់ឲ្យពួកអ្នកដើរតាមទ្រង់តម្រង់ខ្លួនឆ្ពោះទៅរកគំរូរបស់ទ្រង់ ហើយឆ្ពោះទៅរកព្រះវិហារបរិសុទ្ធរបស់ទ្រង់ ( Ensign ខែ តុលា ឆ្នាំ ១៩៩៤ ទំព័រ ៥ ) ។

ព្រះអម្ចាស់ក៏បានចុះសេចក្តីសន្យាជាច្រើនដែលទាក់ទងនឹងព្រះវិហារបរិសុទ្ធនៅក្នុង គោលលទ្ធិ និង សេចក្ដីសញ្ញា ៩៧ ។ សូមឲ្យសមាជិកក្នុងថ្នាក់អាន គោលលទ្ធិ និង សេចក្ដីសញ្ញា ៩៧:១៥–២១ ។

តើ ខទី ១៥–១៧ បង្រៀនអ្វីខ្លះអំពីអ្វីដែលរាស្ត្រនៃព្រះអម្ចាស់ត្រូវតែធ្វើដើម្បីមានគុណសម្បត្តិនឹងទទួលពរជ័យទាំងឡាយរបស់ព្រះអម្ចាស់នៅក្នុងព្រះវិហារបរិសុទ្ធរបស់ទ្រង់ ? ( ចូរមានចិត្តបរិសុទ្ធ ហើយមិនត្រូវបណ្តោយឲ្យវត្ថុមិនស្អាតណាចូលក្នុងព្រះវិហារបរិសុទ្ធឲ្យសោះ ) ។

សូមពន្យល់ប្រាប់ថា មនុស្សដែលមានចិត្តបរិសុទ្ធត្រូវបានហៅថាស៊ីយ៉ូន ។ ខទី ១៥–២១ បង្រៀនថា យើងអាចជួយស្ថាបនាស៊ីយ៉ូនដោយការចូលព្រះវិហារបរិសុទ្ធដោយសក្តិសម ហើយដោយខិតខំឲ្យមានចិត្តបរិសុទ្ធ ហើយមិនត្រូវបានបង្ខូចដោយសេចក្តីអាក្រក់ឡើយ ។

តើពរជ័យអ្វីខ្លះដែលត្រូវបានសន្យានៅក្នុងខគម្ពីរទាំងនេះដល់មនុស្សម្នាក់ដែលសក្តិសមនឹងហៅថា ស៊ីយ៉ូន ?

ចូរពន្យល់ប្រាប់ថា ទីក្រុងមួយដែលបានដាក់ឈ្មោះថា ស៊ីយ៉ូន មាននៅក្នុងជំនាន់បុរាណ ។ ទីក្រុងនេះត្រូវបានសាងសង់ឡើងដោយព្យាការីហេណុក និងប្រជាជនរបស់លោក ។ ទីក្រុងនោះត្រូវបានលើកឡើងទៅលើស្ថានសួគ៌ពីព្រោះមកពីសេចក្តីសុចរិតរបស់ប្រជាជន ( សូមមើល គ. និង ស. ៣៨:៤; ម៉ូសេ ៧:១៨–២១, ៦៩ ) ។

ស៊ីយ៉ូននឹងមាននៅជំនាន់ថ្ងៃចុងក្រោយនេះដែរ ។ នៅក្នុងមាត្រាសេចក្តីជំនឿ មាត្រាទីដប់ ព្រះអម្ចាស់បានសន្យាថា ទីក្រុមមួយដែលមានឈ្មោះថា ស៊ីយ៉ូននឹងត្រូវបានសង់ឡើងនៅលើទ្វីបអាមេរិក ។ សូមឲ្យសមាជិកថ្នាក់អានមាត្រានៃសេចក្ដីជំនឿនេះ ។ សូមពន្យល់ថា ប្រជាជនអ៊ីស្រាអែលដែលបានខ្ចាត់ខ្ចាយទាំងប៉ុន្មាននោះ និងប្រមូលគ្នានៅក្នុងទីក្រុងដ៏ធំនេះ ( សូមមើល គ. និង ស. ១០៣:១១–១៣ ) ។

សព្វថ្ងៃនេះសមាជិកនៃសាសនាចក្រត្រូវបានទូន្មានឲ្យមានភាពសក្តិសមដើម្បីចូលព្រះវិហារបរិសុទ្ធ ហើយឲ្យពួកគេស្ថាបនាទីក្រុងស៊ីយ៉ូនឡើងនៅទីណាក៏ដោយដែលពួកគេរស់នៅលើពិភពលោកនេះ ។ យើងត្រូវធ្វើឲ្យគេហដ្ឋានរបស់យើងដូចជាព្រះវិហារបរិសុទ្ធ—ជាកន្លែងនៃសេចក្តីបរិសុទ្ធ សេចក្តីស្រឡាញ់ និងវិវរណៈផ្ទាល់ខ្លួន ។

តើយើងអាចធ្វើអ្វីខ្លះដើម្បីឲ្យមានដួងចិត្តកាន់តែបរិសុទ្ធ ?
តើមានអ្វីខ្លះនៅលើលោកនេះដែលពេលខ្លះ វាធ្វើឲ្យយើងមានការលំបាកក្នុងបន្តមានដួងចិត្តបរិសុទ្ធ ?
តើមានអ្វីខ្លះដែលអ្នកអាចធ្វើដើម្បីជួយដល់គ្រួសារ សាខា ឬវួដរបស់អ្នកឲ្យក្លាយជាមានដួងចិត្តបរិសុទ្ធ ?

សូមពន្យល់ថា អស់អ្នកដែលធ្វើ ហើយកាន់តាមសេចក្តីសញ្ញានៃព្រះវិហារបរិសុទ្ធ ហើយខិតខំពុះពារអស់មួយជីវិតរបស់ពួកគេដើម្បីឲ្យមានដួងចិត្តបរិសុទ្ធ គឺពួកគេនោះហើយដែលអាចជួយស្ថាបនាស៊ីយ៉ូនឡើង ។

សេចក្ដីបញ្ចប់

សូមថ្លែងទីបន្ទាល់ថា អស់អ្នកដែលចូលព្រះវិហារបរិសុទ្ធដោយសេចក្តីបរិសុទ្ធ និងទទួលបានពរជ័យដ៏ធំធេងពីព្រះអម្ចាស់ រួមទាំងពរជ័យដោយបានក្លាយជាប្រជាជនស៊ីយ៉ូនផងដែរ ។ យើងត្រូវតែធ្វើអ្វីៗទាំងអស់តាមដែលអាចធ្វើបាន ដើម្បីមានភាពសក្តិសមនិងបានពរជ័យទាំងនេះ ហើយប្រែជាមានដួងចិត្តបរិសុទ្ធ ។

អ្នកក៏អាចចាក់បង្ហាញវីដេអូ « Temples Are for Eternal Covenants » ។

សូមអញ្ជើញនរណាម្នាក់ឲ្យអធិស្ឋានបិទ ។