« មេរៀនទី ៦ ៖ ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ » បានទទួលអំណោយទានពិសិដ្ឋមកពីស្ថានលើ ៖ សៀវភៅសិក្សារបស់គ្រូបង្រៀនសិក្ខាសាលាស្តីពីការរៀបចំខ្លួនទៅព្រះវិហារបរិសុទ្ធ ( ឆ្នាំ ២០០៣ ) ទំព័រទី ២៦–៣០

« មេរៀនទី ៦ » បានទទួលអំណោយទានពិសិដ្ឋមកពីស្ថានលើ ទំព័រ ២៦–៣០

មេរៀនទី ៦

ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ

គោលបំណង

ដើម្បីរៀបចំសមាជិកថ្នាក់ឲ្យមានភាពសក្តិសមចូលក្នុងព្រះវិហារបរិសុទ្ធ ។

ការរៀបចំមេរៀន

អញ្ជើញនរណាម្នាក់ឲ្យអធិស្ឋានបើក ។

សូមសួរសមាជិកថ្នាក់ថា តើពួកគេមានសំណួរឬទេ ។ សូមចំណាយពេលតាមសេចក្តីត្រូវការដើម្បីឆ្លើយតបនូវគ្រប់សំណួរឲ្យបានក្បោះក្បាយតាមសមត្ថភាពរបស់អ្នក ហើយតាមការណែនាំពីព្រះវិញ្ញាណនៃព្រះអម្ចាស់ ។ សូមចាំថា ទិដ្ឋភាពមួយចំនួននៃកិច្ចការព្រះវិហារបរិសុទ្ធ មិនត្រូវយកមកពិភាក្សានៅខាងក្រៅព្រះវិហារបរិសុទ្ធទេ ។

សមាជិកម្នាក់ៗគប្បីត្រៀមខ្លួនសម្រាប់ព្រះវិហារបរិសុទ្ធ

សូមពន្យល់ប្រាប់ថា បុគ្គលម្នាក់ៗមានការទទួលខុសត្រូវរៀងៗខ្លួនចំពោះការធ្វើកិច្ចការទាំងនេះដែលនាំទៅរកពរជ័យដ៏ពេញលេញនៃព្រះវិហារបរិសុទ្ធ ។

សង្ខេបការពិភាក្សាត្រួសៗតាមគំនិតទាំងប្រាំខាងក្រោម ។ គំនិតនីមួយៗបង្ហាញពីរបៀបដែលយើងត្រូវរៀបចំខ្លួន ដើម្បីចូលទៅក្នុងព្រះវិហារបរិសុទ្ធ ។ អ្នកអាចសរសេរចម្លើយរបស់ពួកគេនៅលើក្ដារខៀន នៅពេលអ្នកពិភាក្សាគំនិតទាំងនោះ ។

១. មនុស្សម្នាក់ៗគួរតែមានភាពសក្តិសម ។

សូមឲ្យសមាជិកក្នុងថ្នាក់អាន គោលលទ្ធិ និង សេចក្ដីសញ្ញា ៩៧:១៥–១៧ ។

តើវគ្គបទគម្ពីរនេះបង្រៀនអ្នកអ្វីខ្លះ អំពីសារៈសំខាន់នៃការមានភាពសក្តិសមនៅពេលអ្នកចូលព្រះវិហារបរិសុទ្ធ ?

ប្រធាន ហាវើដ ដបុលយូ ហឹនធើរបានសូមឲ្យយើងគិត « អំពីអាកប្បកិរិយា និងឥរិយាបថដ៏សុចរិតដែលព្រះអម្ចាស់បានបង្ហាញដល់យើង នៅក្នុងការប្រឹក្សា ដែលទ្រង់បានប្រទានឲ្យពួកបរិសុទ្ធនៅខឺតឡង់ តាមរយៈព្យាការីយ៉ូសែប ស្ម៊ីធ នៅពេលពួកគេកំពុងតែរៀបចំសាងសង់ព្រះវិហារបរិសុទ្ធមួយ » ។

ការប្រឹក្សានេះ មានកត់ត្រានៅក្នុង គោលលទ្ធិ និងសេចក្ដីសញ្ញា ៨៨:១១៩ ។ សូមដល់សមាជិកថ្នាក់ឲ្យអានវគ្គបទគម្ពីរនេះ ។

សូមឲ្យសមាជិកថ្នាក់ពិចារណានូវសំណួរដែលប្រធាន ហឹនធើរបានសួរ ៖ « តើអាកប្បកិរិយា និងឥរិយាបថទាំងនេះបង្ហាញនូវអ្វីៗដែលយើងរាល់គ្នាប៉ងប្រាថ្នា ហើយខំស្វែងរកដោយពិតប្រាកដឬទេ ? ( « The Great Symbol of Our Membership » Ensign ខែ តុលា ១៩៩៤ ទំព័រ ២ ) ។

២. មនុស្សម្នាក់ៗគួរតែមានមានចិត្តទាបរាបសា ។

មនុស្សម្នាក់ៗគប្បីចូលព្រះវិហារបរិសុទ្ធដោយសេចក្តីរាបសា ដោយមានបំណងចង់ទទួលការបង្រៀនមកពីស្ថានលើ ។

ហេតុអ្វីបានជាសេចក្តីរាបសាមានសារៈសំខាន់ម៉្លេះ នៅពេលដែលយើង បម្រើនិងរៀននៅក្នុងព្រះវិហារបរិសុទ្ធ ?

សូមឲ្យសមាជិកថ្នាក់ម្នាក់ គោលលទ្ធិ និង សេចក្ដីសញ្ញា ១៣៦:៣២–៣៣ ។

តើវគ្គបទគម្ពីរនេះបង្រៀនអ្វីខ្លះ អំពីសារៈសំខាន់នៃសេចក្តីរាបសា ? តើអ្នកអាចយកសេចក្តីទូន្មាននេះមកអនុវត្តក្នុងការចូលព្រះវិហារបរិសុទ្ធលើកដំបូងដោយរបៀបណា ?

៣. មនុស្សម្នាក់ៗគួរយល់ដឹងថា ការទទួលពិធីបរិសុទ្ធ និងសេចក្តីសញ្ញាទាំងឡាយនៃព្រះវិហារបរិសុទ្ធ នោះជាការចាំបាច់ដើម្បីទទួលបានជីវិតអស់កល្បជានិច្ច ។

« ចូររៀបចំខ្លួន ចូររៀបចំអ្វីៗដែលត្រូវការគ្រប់មុខ ហើយចូរតាំងគេហដ្ឋានមួយឡើង គឺគេហដ្ឋាននៃការអធិស្ឋាន គេហដ្ឋាននៃការតមអាហារ គេហដ្ឋាននៃសេចក្តីជំនឿ គេហដ្ឋាននៃការរៀនសូត្រ គេហដ្ឋាននៃសិរីល្អ គេហដ្ឋាននៃរបៀបរៀបរយ គេហដ្ឋាននៃព្រះ » ( គោលលទ្ធិ និងសេចក្តីសញ្ញា ៨៨: ១១៩ ) ។

ប្រធាន ហារ៉ូល ប៊ី លី បានមានប្រសាសន៍ថា ៖ « ពិធីទាំងឡាយនៃព្រះវិហារបរិសុទ្ធត្រូវបានតែងតាំងឡើងដោយព្រះវរបិតាដ៏មានប្រាជ្ញាវាងវៃ ដែលទ្រង់បានបើកសម្តែងដល់យើងនៅថ្ងៃចុងក្រោយនេះ ទុកជាសេចក្តីណែនាំ និងការការពារអស់មួយជីវិតរបស់យើង ដើម្បីកុំឲ្យខ្ញុំ និងអ្នករាល់គ្នា ខានបានលើកតម្កើងនៅក្នុងនគរសេឡេស្ទាល ជាទីកន្លែងដែលព្រះ និងព្រះគ្រីស្ទទ្រង់គង់នៅ » ( « Enter a Holy Temple » Improvement Era ខែ មិថុនា ឆ្នាំ ១៩៦៧ ទំព័រ ១៤៤ ) ។

ប្រធាន យ៉ូសែប ហ៉្វីលឌីង ស៊្មីធ បានមានប្រសាសន៍ថា ៖ « ពរជ័យទាំងប៉ុន្មាននេះ ធានាដល់យើងតាមរយៈភាពស្មោះត្រង់ តាមរយៈមុត្តាដ៏មានតម្លៃមហិមាដែលព្រះអម្ចាស់បានប្រទានដល់យើង ដ្បិត ការណ៍ទាំងនោះហើយដែលព្រះពរដ៏ធំបំផុត ដែលយើងអាចបានទទួលនៅក្នុងជីវិតនេះ ។ វាជារឿងគួរឲ្យអស្ចារ្យណាស់ដែលបានក្លាយជាសមាជិកនៃសាសនាចក្រ ប៉ុន្តែអ្នកមិនអាចទទួលការលើកតម្កើងបានឡើយ ទាល់តែអ្នកបានធ្វើសេចក្តីសញ្ញានៅក្នុងដំណាក់នៃព្រះជាមុនសិន យើងទទួលយកកូនសោ និងសិទ្ធិអំណាចដែលបានប្រទានឲ្យនៅទីនោះ ហើយដែលពុំអាចប្រទានឲ្យនៅទីណាផ្សេងទៀតនៅលើផែនដីនេះជាដាច់ខាត » ( Doctrines of Salvation ប្រមូលផ្តុំដោយ ប៊្រូស អ័រ ម៉ាក់ខន់ឃី ភាគទី ៣ [ ឆ្នាំ ១៩៥៤–៥៦ ] ២:២៥៣ ) ។

៤. សមាជិកម្នាក់ៗគួរតែយល់ដឹងអំពីសារៈសំខាន់នៃការស្លៀកសម្លៀកបំពាក់ព្រះវិហារបរិសុទ្ធ ។

សូមពន្យល់ថា អស់អ្នកដែលបានចូលរួមនៅក្នុងពិធីព្រះវិហារបរិសុទ្ធ គឺមានឯកសិទ្ធិដើម្បីស្លៀកសម្លៀកបំពាក់ព្រះវិហារបរិសុទ្ធនៃបព្វជិតភាពដ៏បរិសុទ្ធ ។ នៅក្នុងសេចក្តីថ្លែងការណ៍មួយទៅដល់សាសនាចក្រ គណៈប្រធានទីមួយបានមានប្រសាសន៍ថា ៖

« សមាជិកសាសនាចក្រណា ដែលត្រូវបានស្លៀកសម្លៀកបំពាក់បរិសុទ្ធនៅក្នុងព្រះវិហារបរិសុទ្ធ គឺត្រូវបានចុះសេចក្តីសញ្ញាថា ត្រូវស្លៀកពាក់វាអស់មួយជីវិតរបស់ពួកគេ ។ នេះត្រូវបានបកស្រាយថា ត្រូវស្លៀកពាក់ទាំងយប់ទាំងថ្ងៃ ។ …

គោលការណ៍គ្រឹះគឺគួរតែស្លៀកសម្លៀកបំពាក់បរិសុទ្ធ ហើយមិនត្រូវស្វែងរកឱកាសដើម្បីដោះវាចេញនោះទេ ។ … នៅពេលសម្លៀកបំពាក់បរិសុទ្ធត្រូវដោះចេញ…វាគួរតែត្រូវបានពាក់វិញឲ្យបានឆាប់ ។

គោលការណ៍នៃភាពរមទម្យ និងការរក្សារាងកាយឲ្យបានជិតសមរម្យ គឺមាននៅក្នុងសេចក្តីសញ្ញា និងគួរតែធ្វើការសម្រេចចិត្តក្នុងការជ្រើសរើសប្រភេទសម្លៀកបំពាក់មកពាក់ ។ សមាជិកសាសនាចក្រដែលបានទទួលអំណោយទានពិសិដ្ឋពាក់ សម្លៀកបំពាក់បរិសុទ្ធ ទុកជាការរំឮកដល់សេចក្តីសញ្ញាដ៏ពិសិដ្ឋដែលពួកគេបានចុះជាមួយនឹងព្រះអម្ចាស់ និងទុកជាការការពារប្រឆាំងនឹងការល្បួង និងអំពើអាក្រក់ ។ របៀបដែលយើងស្លៀកពាក់ គឺជាការបង្ហាញឲ្យឃើញពីការប្តេជ្ញាក្នុងចិត្តដើម្បីដើរតាមព្រះអង្គសង្គ្រោះ » ( សារលិខិតគណៈប្រធានទីមួយ ចុះថ្ងៃទី ១០ ខែ តុលា ឆ្នាំ ១៩៨៨ ) ។

៥. សមាជិកម្នាក់ៗគួរត្រៀមខ្លួនសម្រាប់ការថ្វាយបង្គំផ្ទាល់ខ្លួនដ៏ពិសិដ្ឋ ។

នៅក្នុងព្រះវិហារបរិសុទ្ធ ពីមុនធ្វើពិធី អំឡុងពេលធ្វើពិធី និងក្រោយពេលធ្វើពិធីនានា មាននូវឱកាសជាច្រើនសម្រាប់ឲ្យសមាជិកម្នាក់ៗធ្វើការតាំងសមាធិ និងខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ យើងម្នាក់ៗបានជួបនឹងសំណួរដែលត្រូវការចម្លើយ បន្ទុកដែលត្រូវការសម្រាល បញ្ហាដែលត្រូវការដំណោះស្រាយ ។ សមាជិកជាច្រើនបានមាននូវការស្ញើចសរសើរដល់ព្រះវិហារបរិសុទ្ធថា ជាកន្លែងមួយដើម្បីគេចចេញពីលោកិយ ហើយធ្វើការទាក់ទងជាមួយនិងព្រះវរបិតាសួគ៌ ។ សមាជិកជាច្រើនបានទទួលចម្លើយ សេចក្តីសុខសាន្ត និងសេចក្តីអំណរក្នុងព្រះវិហារបរិសុទ្ធ ?

ប្រធាន អ៊ែសរ៉ា ថាហ្វ ប៊ែនសឹន បានមានប្រសាសន៍ថា ៖ « ព្រះវិហារបរិសុទ្ធគឺជាទីកន្លែងនៃការទទួលវិវរណៈផ្ទាល់ខ្លួន ។ នៅពេលណាដែលខ្ញុំមានបញ្ហាធ្ងន់ធ្ងរ ឬ ក៏ទុក្ខលំបាកអ្វីមួយ នោះខ្ញុំបានទៅឯដំណាក់នៃព្រះអម្ចាស់ដោយអធិស្ឋាននៅក្នុងចិត្តសម្រាប់ចម្លើយ ។ ចម្លើយទាំងនេះមានមកក្នុងរបៀបដ៏ច្បាស់ និងមិនខុសឡើយ » ( « What I Hope You Will Teach Your Children about the Temple » Ensign ខែ សីហា ឆ្នាំ ១៩៨៥ ទំព័រទី ៨ ) ។

សូមពន្យល់ប្រាប់ថា នៅក្នុងព្រះវិហារបរិសុទ្ធ យើងអាចបញ្ជូនឈ្មោះនៃអ្នកទាំងឡាយដែលមានសេចក្តីត្រូវការពិសេសៗ ដើម្បីឲ្យអ្នកដែលចូលព្រះវិហារបរិសុទ្ធអាចប្រមូលផ្តុំនូវសេចក្តីជំនឿ និងការអធិស្ឋានរបស់ពួកគេជំនួសអ្នកទាំងអស់នោះ ។

ការរៀបចំពិសេសសម្រាប់ការទៅព្រះវិហារបរិសុទ្ធលើកដំបូង

ព័ត៌មានដូចតទៅនេះនឹងជួយដល់សមាជិកម្នាក់ៗក្នុងការធ្វើនូវការរៀបចំទាំងអស់ដែលចាំបាច់សម្រាប់ការទៅព្រះវិហារបរិសុទ្ធលើកដំបូង និងធ្វើឲ្យប្រាកដថា ការទៅនោះគឺប្រកបដោយការលើកតម្កើង ។ សូមពិភាក្សាជាមួយសមាជិកថ្នាក់នូវព័ត៌មានដែលទាក់ទងទៅនឹងកាលៈទេសៈរបស់ពួកគេ ។

ប័ណ្ណចូលព្រះវិហារបរិសុទ្ធ ។ ការទទួលបានប័ណ្ណចូលព្រះវិហារបរិសុទ្ធ ។ នៅពេលអ្នកទៅព្រះវិហារបរិសុទ្ធ សូមប្រាកដថា អ្នកយកប័ណ្ណចូលព្រះវិហារបរិសុទ្ធមកជាមួយ ពីព្រោះមានតែប័ណ្ណដែលមានសុពលភាពទាំងនោះទេដែលអាចអនុញ្ញាតឲ្យចូលបាន ។ នៅពេលអ្នករស់នៅដោយភាពសក្តិសម នោះប័ណ្ណនេះនឹងអនុញ្ញាតឲ្យអ្នកចូលព្រះវិហារបរិសុទ្ធណាមួយនៃសាសានាចក្រតាមតែបំណងចិត្តអ្នកអំឡុងពេលពីរឆ្នាំបន្ទាប់ ។ ដើម្បីបន្តសុពលភាពប័ណ្ណចូលព្រះវិហារបរិសុទ្ធរបស់អ្នក អ្នកត្រូវតែបានទទួលការសម្ភាសន៍ដោយសមាជិកមួយរូបនៃគណៈប៊ីស្សព ឬប្រធានសាខា និង ដោយសមាជិកមួយរូបនៃគណៈប្រធានស្ដេក ឬគណៈប្រធានបេសកកម្ម ។
ការរៀបចំផែនការ និងកាលវិភាគសម្រាប់ទៅ ។ ពីមុនអ្នកទៅព្រះវិហារបរិសុទ្ធដើម្បីទទួលអំណោយទានពិសិដ្ឋ ឬពិធីផ្សារភ្ជាប់ សូមទាក់ទងទៅខាងព្រះវិហារបរិសុទ្ធដើម្បីធ្វើការណាត់ពេលវេលា ។ សូមស្វែងយល់ពេលវេលាដែលអ្នកត្រូវទៅដល់ព្រះវិហារបរិសុទ្ធ តើអ្នកគួរតែស្នាក់នៅទីនោះយូរប៉ុណ្ណា ហើយតើមានអ្វីខ្លះដែលអ្នកគួរយកទៅជាមួយ ។ សូមជំនួយផ្នែកបកប្រែភាសា ប្រសិនបើចាំបាច់ ។
ផែនការធ្វើដំណើរ ។ ប្រសិនបើអ្នករស់នៅឆ្ងាយពីព្រះវិហារបរិសុទ្ធ អ្នកគួរតែពិចារណានូវចំណុចដូចខាងក្រោម ៖
- សូមធ្វើការៀបចំមធ្យោបាយធ្វើដំណើរ កន្លែងស្នាក់នៅ និងកន្លែងទទួលទានអាហារឲ្យបានរួចរាល់ជាមុន ។ វាអាចជាការល្អដល់អ្នកដើម្បីធ្វើដំណើរជាក្រុមប្រសិនបើអាច ។
- ប្រសិនបើចាំបាច់ សូមធ្វើការរៀបចំដើម្បីប្តូរយករូបិយប័ណ្ណនៃប្រទេសដែលព្រះវិហារបរិសុទ្ធតាំងនៅ ។
- សូមយកប្រាក់គ្រប់គ្រាន់សម្រាប់ការចំណាយទាំងអស់ ។ អ្នកអាចត្រូវការទិញសម្លៀកបំពាក់បរិសុទ្ធបន្ថែម ជួលសម្លៀកបំពាក់ព្រះវិហារបរិសុទ្ធ និងចំណាយសម្រាប់ការស្នាក់នៅ និងការធ្វើដំណើរ ។ ( សូមចាំថា នៅក្នុងព្រះវិហារបរិសុទ្ធជាច្រើន មិនមានសម្លៀកបំពាក់ព្រះវិហារបរិសុទ្ធសម្រាប់ជួលទេ ។ គណៈប្រធានទីមួយលើកទឹកចិត្តដល់សមាជិកទាំងអស់ឲ្យទិញសម្លៀកបំពាក់ព្រះវិហារបរិសុទ្ធផ្ទាល់របស់ពួកគេ ) ។
ការស្លៀកពាក់ ។ សូមត្រៀមស្លៀកពាក់ដូចដែលអ្នកនឹងទៅការប្រជុំទាំងឡាយនៅព្រះវិហារនាថ្ងៃអាទិត្យ ។ ស្រ្តីមិនគួរស្លៀកខោចូលទៅព្រះវិហារបរិសុទ្ធទេ ។
អ្នកជូនដំណើរ ។ សម្រាប់អ្នកទាំងឡាយណាដែលនឹងទៅព្រះវិហារបរិសុទ្ធជាលើកដំបូង អាចមានអ្នកជូនដំណើរមកជាមួយពួកគេ ។ អ្នកជូនដំណើរនេះអាចជាសាច់ញាតិ ឬមិត្តភក្តិភេទដូចគ្នាម្នាក់ដែលធ្លាប់បានមកព្រះវិហារបរិសុទ្ធពីមុន ឬក៏អ្នកធ្វើការនៅព្រះវិហារបរិសុទ្ធម្នាក់អាចជួយបាន ។ អ្នកធ្វើការនៅព្រះវិហារបរិសុទ្ធនឹងផ្តល់នូវការណែនាំយ៉ាងរាក់ទាក់នៅគ្រប់ពេលទាំងអស់ ។
កិច្ចការផ្សារភ្ជាប់ ។ ប្រសិនបើអ្នកមានផែនការដើម្បីធ្វើកិច្ចការផ្សារភ្ជាប់សម្រាប់ជីដូនជីតាដែលបានស្លាប់ទៅ នោះអ្នកគួរយកនូវកំណត់ត្រាក្រុមគ្រួសារមកព្រះវិហារបរិសុទ្ធជាមួយអ្នក ។ ប្រសិនបើអ្នក និងគ្រួសារត្រូវធ្វើពិធីផ្សារភ្ជាប់ និងគ្នា ឬប្រសិនបើអ្នកនឹងត្រូវផ្សារភ្ជាប់ជាមួយកូនៗ អ្នកត្រូវមានកំណត់ហេតុក្រុមគ្រួសារផ្ទាល់របស់អ្នកមកជាមួយ ។ ប្រសិនបើអ្នកនឹងត្រូវរៀបការនៅព្រះវិហារបរិសុទ្ធ នោះអ្នកនឹងត្រូវតែគោរពតាមនូវរាល់ច្បាប់ស៊ីវិលទាំងឡាយក្នុងមូលដ្ឋាន ហើយយកនូវសំបុត្រអាពាហ៍ពិពាហ៍មកជាមួយផង ។ សូមអានដោយយកចិត្តទុកដាក់នូវ Member’s Guide to Temple and Family History Work ( ៣៤៦៩៧ ) សម្រាប់ព័ត៌មានបន្ថែមស្តីពីរបៀបធ្វើពិធីបរិសុទ្ធក្នុងព្រះវិហារបរិសុទ្ធទាំងឡាយសម្រាប់ទាំងអ្នកនៅរស់ និងមរណជន ។ អ្នកក៏អាចទាក់ទងទៅអ្នកកត់ត្រានៅព្រះវិហារបរិសុទ្ធថាអ្នកមានផែនការដើម្បីទៅព្រះវិហារផងដែរ ។
ការថែទាំកូន ។ ប្រសិនបើមានកូននឹងមកព្រះវិហារបរិសុទ្ធដើម្បីចូលរួមពិធីផ្សារភ្ជាប់ ពួកគេនឹងត្រូវបានថែទាំនៅក្នុងមជ្ឈមណ្ឌលយុវវ័យព្រះវិហារបរិសុទ្ធរហូតដល់ពេលដែលពួកគេត្រូវចូលរួមជាមួយអ្នកនៅក្នុងបន្ទប់ផ្សារភ្ជាប់ ។ សម្លៀកបំពាក់ពណ៌សសម្រាប់ពិធីនឹងត្រូវផ្តល់ដល់កូនក្មេង ។ បន្ទាប់ពីពិធីផ្សារភ្ជាប់ត្រូវបានបញ្ចប់ ពួកគេនឹងត្រឡប់ទៅមជ្ឈមណ្ឌលវិញដើម្បីរង់ចាំអ្នក ។ ការមើលថែរក្សាកុមារមិនមានផ្តល់ឲ្យនៅក្នុងព្រះវិហារបរិសុទ្ធចំពោះកូនៗដែលមិនចូលរួមក្នុងពិធីផ្សារភ្ជាប់ទេ ។
សម្លៀកបំពាក់បរិសុទ្ធ អ្នកនឹងត្រូវទិញសម្លៀកបំពាក់បរិសុទ្ធមួយ ឬពីរកំប្លេរពីមុនអ្នកចូលព្រះវិហារបរិសុទ្ធ ។ សូមកុំស្លៀកពាក់វាពីមុនទៅព្រះវិហារបរិសុទ្ធឡើយ ។ បន្ទាប់ពីការទទួលអំណោយទានពិសិដ្ឋរបស់អ្នក ហើយពេលអ្នកប្រាកដថា អ្នកបានស្គាល់នូវទំហំ និងប្រភេទក្រណាត់ដែលអ្នកចង់បាននោះ អ្នកអាចធ្វើការបញ្ជាទិញសម្លៀកបំពាក់បរិសុទ្ធបន្ថែមទៀត ។ សមាជិកមួយចំនួនចូលចិត្តបោកសម្លៀកបំពាក់បរិសុទ្ធពីដំបូងរបស់ពួកគេដើម្បីធ្វើឲ្យប្រាកដថា វាសមល្មមស្រួលពាក់ពីមុននឹងទិញថែមទៀត ។ សម្លៀកបំពាក់បរិសុទ្ធគឺ ត្រូវបានផលិតដោយសាសនាចក្រ ហើយអាចរកទិញបានតាមរយៈមជ្ឈមណ្ឌលចែកចាយទាំងឡាយរបស់សាសនាចក្រ ។

« ពិធីទាំងឡាយនៃព្រះវិហារបរិសុទ្ធគឺត្រូវបានចាត់តាំងឡើងដោយព្រះវរបិតាសួគ៌ដ៏ឈ្លាសវៃ…ដែលអាចឲ្យអ្នក និងខ្ញុំមិនធ្លាក់ចុះចំពោះសេចក្តីសប្បុរសនៃការលើកតម្កើងដ៏អស់កល្បនៅក្នុងនគរសេឡេស្ទាល » ( ប្រធាន ហារ៉ូល ប៊ី លី ) ។
សម្លៀកបំពាក់ព្រះវិហារបរិសុទ្ធ ។ គណៈប្រធានទីមួយលើកទឹកចិត្តដល់សមាជិកឲ្យទិញសម្លៀកបំពាក់ព្រះវិហារបរិសុទ្ធផ្ទាល់របស់ពួកគេ ។ នៅតាមព្រះវិហារបរិសុទ្ធមួយចំនួន យើងអាចជួលសម្លៀកបំពាក់ព្រះវិហារបរិសុទ្ធនៅក្នុងតម្លៃទាប ប៉ុន្តែវាប្រសើរជាងសម្រាប់សមាជិកដើម្បីមាន និងថែទាំសម្លៀកបំពាក់ព្រះវិហារបរិសុទ្ធដោយខ្លួនពួកគេផ្ទាល់ ។ ប៊ីស្សព ឬប្រធានសាខាអាចផ្តល់ព័ត៌មានអំពីទីកន្លែងដែលអាចរកទិញសម្លៀកបំពាក់នេះបាន ។

បងប្អូនស្រីអាចស្លៀករ៉ូបអាពាហ៍ពិពាហ៍សម្រាប់ការរៀបអាពាហ៍ពិពាហ៍នៅព្រះវិហារបរិសុទ្ធរបស់ពួកគេ ប៉ុន្តែរូបនោះត្រូវតែមានពណ៌ស មានដៃវែង ក្រណាត់ និងម៉ូតសមរម្យ ហើយមិនមានកន្ទុយវែង និងគ្មានប៉ាក់តុបតែងច្រើនពេកទេ ។

សេចក្ដីបញ្ចប់

សូមចែកចាយទីបន្ទាល់របស់អ្នកអំពីភាពពិសិដ្ឋនៃកិច្ចការព្រះវិហារបរិសុទ្ធ ។ សូមបញ្ជាក់ពីភាពរីករាយរបស់អ្នកនៅពេលឃើញសមាជិកថ្នាក់រៀបចំដើម្បីចូលក្នុងព្រះវិហារបរិសុទ្ធ ។

សូមឲ្យនរណាម្នាក់អធិស្ឋានបិទ ។

ប្រសិនបើអាច បន្ទាប់ពីបញ្ចប់ថ្នាក់នេះ អ្នកចូលរួម និងគ្រូបង្រៀនគួរតែចូលរួមក្នុងព្រះវិហារបរិសុទ្ធរួមគ្នា ។