« មេរៀនទី ៤ ៖ ការទទួលពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ » បានទទួលអំណោយទានពិសិដ្ឋមកពីស្ថានលើ ៖ សៀវភៅសិក្សារបស់គ្រូបង្រៀនសិក្ខាសាលាស្តីពីការរៀបចំខ្លួនទៅព្រះវិហារបរិសុទ្ធ ( ឆ្នាំ ២០០៣ ) ទំព័រ ១៦–២០

« មេរៀនទី ៤ » បានទទួលអំណោយទានពិសិដ្ឋមកពីស្ថានលើ ទំព័រ ១៦–២០

មេរៀនទី ៤

ការទទួលពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ

គោលបំណង

ដើម្បីជួយសមាជិកនៅក្នុងថ្នាក់យល់អំពីសារៈសំខាន់នៃពិធីបរិសុទ្ធ និងសេចក្តីសញ្ញាទាំងឡាយក្នុងព្រះវិហារបរិសុទ្ធ ។

ការរៀបចំខ្លួន

ប្រសិនបើមាននៅក្នុងតំបន់របស់អ្នក អ្នកអាចរៀបចំបញ្ចាំងវីដេអូ Together Forever ( ៥៣៤១១ ) ។ វីដែអូនោះមានរយៈពេលប្រហែងជា ២៧ នាទី ។
អ្នកអាចរៀបចំឲ្យសមាជិកថ្នាក់ច្រៀងបទ « ឲ្យខ្ញុំកាន់តែវិសុទ្ធ » ( ទំនុកតម្កើង លេខ. ៧១ ) ។

ការរៀបចំមេរៀន

អញ្ជើញនរណាម្នាក់ឲ្យអធិស្ឋានបើក ។

សូមសួរសមាជិកថ្នាក់ថា តើពួកគេមានសំណួរឬទេ ។ សូមចំណាយពេលតាមសេចក្តីត្រូវការដើម្បីឆ្លើយសំណួរឲ្យបានក្បោះក្បាយ ឲ្យអស់ពីសមត្ថភាពរបស់អ្នក ហើយតាមការណែនាំពីព្រះវិញ្ញាណរបស់ព្រះអម្ចាស់ ។ សូមចងចាំថា ទិដ្ឋភាពមួយចំនួននៃកិច្ចការព្រះវិហារបរិសុទ្ធ មិនត្រូវយកមកពិភាក្សានៅខាងក្រៅព្រះវិហារបរិសុទ្ធទេ ។

នៅក្នុងព្រះវិហារបរិសុទ្ធ យើងទទួលពិធីបរិសុទ្ធទាំងឡាយ និងចុះសេចក្តីសញ្ញា

សូមពន្យល់ប្រាប់ថា នៅក្នុងព្រះវិហារបរិសុទ្ធយើងទទួលពិធីបរិសុទ្ធទាំងឡាយដែលនឹងធ្វើឲ្យយើងអាចត្រឡប់ទៅវត្តមានរបស់ព្រះវិញបាន ។ យើងក៏ចុះសេចក្តីសញ្ញាដើម្បីរស់នៅតាមច្បាប់ទាំងឡាយនៃដំណឹងល្អដែរ ។ ចំណុចខាងក្រោមនឹងផ្តល់នូវព័ត៌មានជាទូទៅអំពីពិធីបរិសុទ្ធ និងសេចក្តីសញ្ញាទាំងឡាយ និងអំពីពិធីបរិសុទ្ធ និងសេចក្តីសញ្ញានៃព្រះវិហារបរិសុទ្ធដោយជាក់លាក់ ។

ពិធីបរិសុទ្ធ

សូមពន្យល់ថា ពិធីបរិសុទ្ធគឺជាពិធីដ៏ពិសិដ្ឋមួយដែលមានន័យ ហើយមានឥទ្ធិពលខាងវិញ្ញាណ ។

សូមឲ្យសមាជិកថ្នាក់ប្រាប់ឈ្មោះពិធីបរិសុទ្ធមួយចំនួននៅក្នុងសាសនាចក្រ ។ ( ពួកគេប្រហែលជាប្រាប់ពី ពិធីដាក់ឈ្មោះ និងប្រសិទ្ធពរដល់ទារក, ពិធីបុណ្យជ្រមុជទឹក, ពិធីបញ្ជាក់, ពិធីសាក្រាម៉ង់, ពិធីតែងតាំងបព្វជិតភាព និងពិធីបរិសុទ្ធព្រះវិហារបរិសុទ្ធទាំងឡាយ ) ។

សូមពន្យល់ថា ពិធីបរិសុទ្ធទាំងឡាយដែលធ្វើឡើងដោយអំណាចនៃបព្វជិតភាព សុទ្ធតែជាការចាំបាច់ចំពោះការលើកតម្កើងរបស់យើង ។ តាមរយៈពិធីបរិសុទ្ធទាំងអស់នេះហើយ ដែលយើងទទួលព្រះចេស្តានៃព្រះនៅក្នុងជីវិតរបស់យើង ។

សូមឲ្យសមាជិកក្នុងថ្នាក់អាន គោលលទ្ធិ និង សេចក្ដីសញ្ញា ៨៤:១៩–២១ ។

តើអ្វីខ្លះដែលចាំបាច់ដើម្បីឲ្យព្រះចេស្ដានៃភាពជាព្រះបានបើកសម្ដែងឡើងនៅក្នុងជីវិតរបស់យើង ? ( ពិធីបរិសុទ្ធទាំងឡាយនៃបព្វជិតភាពមិលគីស្សាដែក ។ « បព្វជិតភាពដែលធំជាងគេ » ដែលបានអធិប្បាយដល់នៅក្នុងខគម្ពីរទាំងនេះគឺបព្វជិតភាពមិលគីស្សាដែក ) ។

សូមឲ្យសមាជិកថ្នាក់បើកទៅទំព័រ ២៩ នៅក្នុង ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ។ សូមឲ្យសមាជិកថ្នាក់ម្នាក់អានសេចក្ដីថ្លែងការណ៍ខាងក្រោមឮៗ ៖

« តើពិធីបរិសុទ្ធមានសារៈសំខាន់យ៉ាងណាខ្លះចំពោះយើងក្នុងនាមជាសមាជិកនៃសាសនាចក្រ ?

« តើអ្នកអាចមានភាពសប្បាយរីករាយ អាចត្រូវបានប្រោសលោះ អាចត្រូវបានលើកតម្កើងដោយគ្មានពិធីបរិសុទ្ធទាំងនោះបានដែរឬទេ ? ចម្លើយ ៖ ពិធីបរិសុទ្ធទាំងនោះគឺវាហួសពីការគ្រាន់តែជាយោបល់ល្អ ឬ ដែលគួរឲ្យប្រាថ្នា ឬ ចាំបាច់ទៅទៀត ។ វាច្រើនជាងអ្វីដែលចាំបាច់បំផុត ឬ សំខាន់បំផុត ។ ពិធីបរិសុទ្ធទាំងនោះគឺ សំខាន់ខ្លាំងបំផុត ចំពោះយើងម្នាក់ៗ » ។

សេចក្តីសញ្ញា

សូមគូសបញ្ជាក់ថា សេចក្តីសញ្ញាគឺជាកិច្ចព្រមព្រៀងដ៏ពិសិដ្ឋមួយរវាងព្រះ និងមនុស្សម្នាក់ ឬមនុស្សមួយក្រុម ។ ព្រះបានដាក់លក្ខខណ្ឌយ៉ាងជាក់លាក់ ហើយទ្រង់សន្យាថានឹងផ្តល់ពរជ័យដល់យើងនៅពេលយើងគោរពតាមលក្ខខណ្ឌទាំងនោះ ។ នៅពេលយើងជ្រើសរើសមិនគោរពតាមសេចក្តីសញ្ញា យើងនឹងមិនអាចទទួលនូវពរជ័យបានទេ ហើយក្នុងករណីខ្លះ យើងថែមទាំងទទួលរងនូវការឈឺចាប់នៃការដាក់ពិន័យជាលទ្ធផលមួយនៃការមិនគោរពប្រតិបត្តិរបស់យើង ។ គ្រប់ពិធីបរិសុទ្ធសម្រាប់ការសង្រ្គោះនៃបព្វជិតភាពទាំងអស់គឺតែងតែមាននូវសេចក្តីសញ្ញាភ្ជាប់មកជាមួយ ។

តើសេចក្តីសញ្ញាណាខ្លះដែលអ្នកបានធ្វើជាមួយនិងព្រះអម្ចាស់នៅក្នុងជីវិតរហូតមកដល់ពេលនេះ ? ( សមាជិកថ្នាក់ប្រហែលជាលើកឡើងអំពីសេចក្តីសញ្ញានៃពិធីបុណ្យជ្រមុជទឹក ដែលត្រូវបានបន្តនៅរាល់ពេលដែលយើងទទួលទានពិធីសាក្រាម៉ង់ម្តងៗ ) ។
តើយើងចុះសេចក្ដីសញ្ញាអ្វីខ្លះ នៅពេលយើងទទួលពិធីបុណ្យជ្រមុជទឹក ? ( សូមមើល ម៉ូសាយ ១៨:៨–១០; គ. និង ស. ២០:៣៧ ) ។

សូមសង្កត់ធ្ងន់ថា កាលណាយើងចុះសេចក្តីសញ្ញាជាមួយព្រះ នោះយើងនឹងសម្តែងនូវសេចក្តីប៉ងប្រាថ្នារបស់យើងដើម្បីបម្រើព្រះ ហើយសុខចិត្តគោរពតាមអ្វីៗទាំងអស់ដែលបានស្នើដល់យើង ។ ព្រះសន្យាដល់យើងវិញនូវពរជ័យដ៏វិសេសវិសាលជាច្រើន ។ យើងត្រូវតែចុះ ហើយកាន់តាមសេចក្តីសញ្ញាទាំងឡាយដើម្បីឲ្យបានរីកចម្រើនឆ្ពោះទៅកាន់ជីវិតអស់កល្បជានិច្ច ។

ពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ

សូមពន្យល់ថា ពិធីបរិសុទ្ធនៃព្រះវិហារបរិសុទ្ធរួមមានទាំងអំណោយទានពិសិដ្ឋ និងការផ្សារភ្ជាប់ ( អាពាហ៍ពិពាហ៍ក្នុងព្រះវិហារបរិសុទ្ធ និង ពិធីផ្សារភ្ជាប់នៃឪពុកម្តាយជាមួយកូនចៅ ) សម្រាប់ទាំងមនុស្សនៅរស់ និងមនុស្សស្លាប់ ។ ពិធីបុណ្យជ្រមុជទឹកសម្រាប់មរណៈជនគឺត្រូវធ្វើឡើងនៅក្នុងព្រះវិហារបរិសុទ្ធ ដូចជាពិធីបរិសុទ្ធទាំងឡាយនៃបព្វជិតភាពដែរ ។ នៅក្នុងពិធីបរិសុទ្ធព្រះវិហារបរិសុទ្ធ យើងចុះសេចក្តីសញ្ញាដ៏ឱឡារិកចំពោះខ្លួនយើង ចំពោះព្រះ និងដើម្បីជួយស្ថាបនានគររបស់ទ្រង់នៅលើផែនដី ។

អែលឌើរ ជែមស៍ អ៊ី ហ្វោស៍ បានមានប្រសាសន៍អំពីសេចក្តីសញ្ញាទាំងឡាយដែលយើងធ្វើឡើងនៅក្នុងពិធីអំណោយទានពិសិដ្ឋ ៖

« ពិធីបរិសុទ្ធនៃអំណោយទានពិសិដ្ឋ មានរួមនូវកាតព្វកិច្ចទាំងឡាយនៃបុគ្គលម្នាក់ ដូចជាសេចក្តីសញ្ញា និងការសន្យាដើម្បីគោរពតាមក្រឹត្យវិន័យនៃគុណធម៌ និងច្បាប់ព្រហ្មចារីភាពដ៏តឹងរឹង មានសេចក្ដីសប្បុរស ចិត្តមេត្តា អត់ឱន ហើយបរិសុទ្ធ ដើម្បីលះបង់ទាំងទេពកោសល្យ និងសម្ភារដើម្បីផ្សាយសេចក្ដីពិត និងការលើកស្ទួយដល់ប្រជាជាតិ ដើម្បីបន្តលះបង់ចំពោះបុព្វហេតុនៃសេចក្ដីពិត ហើយស្វែងរកគ្រប់មធ្យោបាយដើម្បីចូលរួមចំណែកនៅក្នុងការរៀបចំខ្លួនដ៏ធំ ដើម្បីឲ្យផែនដីអាចរៀបចំខ្លួនជាស្រេចក្នុងការទទួលស្តេចរបស់ខ្លួន—ជាព្រះអម្ចាស់ ព្រះយេស៊ូវគ្រីស្ទ » ។ ដោយទទួលយកនូវសេចក្តីសញ្ញា និងកាតព្វកិច្ចនីមួយៗ នោះនឹងបានទទួលនូវពរជ័យដែលបានសន្យាទុក ដោយអាស្រ័យទៅលើការគោរពលក្ខខណ្ឌដ៏ស្មោះត្រង់ » ( The House of the Lord បោះពុម្ពសារឡើងវិញ [ ឆ្នាំ ១៩៧៦ ] ទំព័រ ៨៤ ) ។

អ្នកអាចរំឭកឡើងវិញនូវសេចក្តីសញ្ញាទាំងឡាយដែលទើបតែបានពិពណ៌នាដោយការសរសេរនូវសេចក្តីសញ្ញាទាំងនោះនៅលើក្តារខៀន ។ ចូរសង្កត់ធ្ងន់ថា យើងចុះសេចក្តីសញ្ញាទាំងឡាយដើម្បីបានជាសុចរិត និងបរិសុទ្ធ ហើយយើងក៏ចុះសេចក្តីសញ្ញាដើម្បីផុ្តល់នូវអ្វីៗទាំងអស់ដែលយើងមានដើម្បីស្ថាបនានគររបស់ព្រះអម្ចាស់ ។ សូមអានសេចក្តីថ្លែងការណ៍ខាងក្រោមនេះ ៖

« យើងទាំងអស់គ្នាជារាស្ត្រនៃសេចក្តីសញ្ញា ។ យើងចុះសេចក្តីសញ្ញាថានឹងប្រគល់របស់ទាំងឡាយដែលយើងមានដូចជា ពេលវេលា និងប្រាក់កាស និងទេពកោសល្យ—អ្វីៗដែលជារបស់យើង និងអ្វីៗដែលយើងមាន—ដើម្បីសេចក្តីត្រូវការនៃនគរព្រះនៅលើផែនដី » ( ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រ ៣៥ ) ។

តើយើងអាចប្រគល់នូវ « អ្វីៗដែលជារបស់យើង និងអ្វីៗដែលយើងមាន » ដល់នគរព្រះយ៉ាងដូចម្តេច ?
ពេលខ្លះ តើមានអ្វីខ្លះដែលរារាំងសមាជិកមិនឲ្យប្រគល់អស់ទាំងអ្វីៗដែលពួកគេមានដល់នគរព្រះ ?

អ្នកអាចចែកចាយទីបន្ទាល់របស់អ្នកអំពីពរជ័យទាំងឡាយដែលបានកើតមានក្នុងជីវិតអ្នក ដោយសារតែអ្នកបានចុះ និងកាន់តាមសេចក្តីសញ្ញាព្រះវិហារបរិសុទ្ធ ។ ឬ អ្នកអាចសូមឲ្យនរណាម្នាក់ផ្សេងទៀតដែលបានទទួលអំណោយទានពិសិដ្ឋរួចហើយឲ្យចែកចាយទីបន្ទាល់របស់ពួកគាត់ ។

យើងត្រូវតែស្មោះត្រង់ចំពោះសេចក្តីសញ្ញាដែលយើងចុះនៅក្នុងព្រះវិហារបរិសុទ្ធ

សូមពន្យល់ប្រាប់ថាព្រះអម្ចាស់បានមានបន្ទូលថា ៖ « ឯអស់អ្នកណាដែលគេប្រគល់ទុកជាច្រើនឲ្យ នោះគេនឹងទារជាច្រើនពីអ្នកនោះវិញ » ( លូកា ១២:៤៨ ) ។

តើអ្នកគិតថា ខគម្ពីរនេះអនុវត្តចំពោះសេចក្តីសញ្ញាទាំងឡាយដែលយើងធ្វើនៅក្នុងព្រះវិហារបរិសុទ្ធតាមរបៀបណា ?

សូមពន្យល់ថា ព្រះអម្ចាស់បានប្រទានពិធីបរិសុទ្ធ និង សេចក្ដីសញ្ញានៅក្នុងព្រះវិហារបរិសុទ្ធ ដើម្បីឲ្យកូនចៅទ្រង់អាចយល់ពីគោលបំណងនៃជីវិតនេះ ហើយរៀបចំខ្លួនសម្រាប់ឱកាសដ៏រុងរឿងនៃជីវិតដ៏អស់កល្បជានិច្ច ។ កាលណាយើងទទួលពរជ័យទាំងឡាយនេះ យើងទទួលខុសត្រូវដើម្បីរស់នៅឲ្យបានសក្តិសមដើម្បីបង្កើតឱកាស និងចំណេះដឹងរបស់យើង ។ សូមគូសបញ្ជាក់ថា យើងត្រូវតែស្មោះត្រង់ចំពោះសេចក្តីសញ្ញាដែលបានចុះនៅក្នុងព្រះវិហារបរិសុទ្ធ ។

ហេតុអ្វីបានជាវាសំខាន់ ដែលត្រូវតែស្មោះត្រង់ចំពោះសេចក្តីសញ្ញាដែលយើងចុះនៅក្នុងព្រះវិហារបរិសុទ្ធ ?

សូមអញ្ជើញសមាជិកក្នុងថ្នាក់អាន គោលលទ្ធិ និង សេចក្ដីសញ្ញា ៨២:១០ ។

ប្រធាន យ៉ូសែប ហ្វីលឌីង ស្ម៊ីធ បានមានប្រសាសន៍ថា ៖ « ខ្ញុំសូមប្រាប់ដល់អ្នករាល់គ្នាថា ព្រះអម្ចាស់គោរពសន្យាលើកលែងតែអ្នករក្សាសេចក្តីសញ្ញារបស់យើងប៉ុណ្ណោះ ។ ព្រះអម្ចាស់មិនដែលក្បត់សេចក្តីសញ្ញារបស់ទ្រង់ឡើយ ។ កាលណាទ្រង់ចុះសេចក្តីសញ្ញាជាមួយនឹងយើង នោះទ្រង់នឹងមិនក្បត់ឡើយ ។ បើសិនជាសេចក្តីសញ្ញានោះត្រូវបានក្បត់ នោះគឺយើងជាអ្នកក្បត់សេចក្តីសញ្ញានោះ ។ បើសិនជាសេចក្តីសញ្ញានោះត្រូវបានក្បត់ នោះទ្រង់គ្មានកាតព្វកិច្ចអ្វីដែលត្រូវប្រទានពរឲ្យយើងទេ ហើយយើងនឹងមិនទទួលបានពរអ្វីសោះឡើយ » ( Doctrines of Salvation ចងក្រងដោយ ប៊្រូស អ័រ ម៉ាក់ខន់ឃី ភាគទី ៣ [ ១៩៥៤–១៩៥៦ ] ២:២៥៦–៥៧ ) ។

ភាពស្មោះត្រង់ចំពោះសេចក្តីសញ្ញារបស់យើងនឹងនាំមកនូវសន្តិភាព និងសុវត្ថិភាព

សូមពន្យល់ថា ព្រះវិហារបរិសុទ្ធគឺជាទីកន្លែងមួយនៃភាពសុខសាន្ត និងជាទីស្ងប់ស្ងាត់មួយនៅក្នុងពិភពលោកដ៏ជ្រួលច្របល់នេះ ។ នៅពេលយើងចូលព្រះវិហារបរិសុទ្ធជាទៀងទាត់ ហើយមានចិត្តស្មោះត្រង់ចំពោះសេចក្តីសញ្ញារបស់យើង នោះយើងនឹងរកឃើញនូវសេចក្តីសុខសាន្ត សុវត្ថិភាព និងការដឹកនាំនៅក្នុងជីវិតរបស់យើង ។

អែលឌើរ នែល អេ ម៉ាក់ស្វែល បានមានប្រសាសន៍ថា « ប្រសិនបើយើងរក្សាសេចក្តីសញ្ញារបស់យើង នោះសេចក្តីសញ្ញានឹងរក្សាយើងទុកឲ្យបានគង់វង្សខាងវិញ្ញាណ » ( នៅក្នុងរបាយការណ៍សន្និសីទ ខែ មេសា ឆ្នាំ ១៩៨៧ ទំព័រ ៨៧ ឬ Ensign ខែ ឧសភា ឆ្នាំ ១៩៨៧ ទំព័រ ៧១ ) ។

តើសេចក្តីសញ្ញាដែលអ្នកបានចុះមកទល់ពេលនេះបានជួយរក្សាអ្នកឲ្យបានគង់វង្សខាងវិញ្ញាណដោយរបៀបណា ?

សូមបង្ហាញប្រាប់ថា នៅក្នុងព្រះវិហារបរិសុទ្ធ យើងចុះសេចក្តីសញ្ញាដើម្បីរស់នៅដោយសក្តិសមដើម្បីយើងអាចត្រឡប់ទៅកាន់ទីវត្តមានរបស់ព្រះវរបិតាសួគ៌ និងព្រះអម្ចាស់យេស៊ូវគ្រីស្ទ ។ ពេលខ្លះ ដោយស្ថិតនៅក្នុងកណ្តាលឧបសគ្គជាច្រើនប្រចាំថ្ងៃ យើងអាចមានឆ្ងល់ថា តើយើងអាចរស់នៅដោយរបៀបណា ។

សូមឲ្យសមាជិកថ្នាក់អាន នីហ្វៃទី ១ ១៧:៣, ១៣ ។

តើខគម្ពីរទាំងនេះ បង្រៀនអ្នកអ្វីខ្លះអំពីរបៀបដែលព្រះអម្ចាស់នឹងជួយនៅពេលដែលយើងព្យាយាមត្រឡប់ទៅកាន់ទ្រង់វិញ ? តើអ្នកធ្លាប់បានឃើញខគម្ពីរទាំងនេះត្រូវបានបំពេញក្នុងជីវិតរបស់អ្នកដូចម្ដេច ?

អែលឌើរ ប៊យដ៏ ឃេ ផាកកឺ បានមានប្រសាសន៍ថា ៖ « កាលណាអ្នកមកឯព្រះវិហារបរិសុទ្ធ ហើយទទួលយកអំណោយទានពិសិដ្ឋរបស់អ្នក ហើយលុតជង្គង់ចុះនៅឯទីអាសនា ហើយផ្សារភ្ជាប់ នោះអ្នកអាចរស់នៅជាជីវិតធម្មតា ហើយធ្វើជាព្រលឹងធម្មតា—ដោយពុះពារលើការល្បួង ចាញ់ល្បួង ហើយប្រែចិត្ត ហើយចាញ់ល្បួងទៀត ហើយប្រែចិត្តម្តងទៀត ប៉ុន្តែប្តេជ្ញាចិត្តជានិច្ចថា ដើម្បីរក្សាសេចក្តីសញ្ញារបស់អ្នក ។… លុះបន្ទាប់មកគ្រានោះនឹងមកដល់ ជាពេលដែលអ្នកនឹងទទួលនូវការប្រសិទ្ធពរថា ៖ ‹ ប្រពៃហើយបាវល្អស្មោះត្រង់អើយ ៖ ឯងមានចិត្តស្មោះនឹងត្រួតរបស់បន្តិចនេះ ដូច្នោះយើងនឹងតាំងឲ្យឯងត្រួតលើរបស់ជាច្រើនទៀត ចូរឲ្យឯងប្រកបដោយសេចក្តីអំណររបស់ចៅហ្វាយឯងចុះ › ( ម៉ាថាយ ២៥:២១ ) » ( Let Not Your Heart Be Troubled [ ឆ្នាំ ១៩៩១ ] ទំព័រ ២៥៧ ) ។

ប្រធាន ហាវើដ ដបុលយូ ហឹនធើរ បានអញ្ជើញសមាជិកសាសនាចក្រឲ្យទៅព្រះវិហារបរិសុទ្ធឲ្យបានញឹកញាប់ « សម្រាប់ពរជ័យផ្ទាល់ខ្លួននៃការថ្វាយបង្គុំក្នុងព្រះវិហារបរិសុទ្ធសម្រាប់ភាពបរិសុទ្ធ និងសុវត្ថិភាពដែលមាននៅក្នុងជញ្ជាំងដែលបានញែកចេញ និងឧទ្ទិសជាបរិសុទ្ធនោះ ។ ព្រះវិហារបរិសុទ្ធជាទីដែលមានសោភ័ណ្ឌភាពស្រស់ស្អាត ជាទីនៃវិវរណៈ វាជាទីដែលមានសេចក្តីសុខសាន្ត ។ វាជាព្រះដំណាក់របស់ព្រះអម្ចាស់ ។ វាជាទីបរិសុទ្ធចំពោះព្រះអម្ចាស់ ។ ព្រះវិហារបរិសុទ្ធគួរជាទីបរិសុទ្ធដល់យើងគ្រប់គ្នា » ( បានដកស្រង់ពី ជេ អិមថត « ប្រធាន ហាវើដ ដបុលយូ ហឹនធើរ » Ensign ខែ កក្កដា ឆ្នាំ ១៩៩៤ ទំព័រ ៥ ) ។

សេចក្ដីបញ្ចប់

សូមឲ្យសមាជិកថ្នាក់ចែកចាយនូវអារម្មណ៍របស់ពួកគេអំពីពរជ័យដែលបានមកពីការទទួលពិធីបរិសុទ្ធទាំងឡាយនៃព្រះវិហារបរិសុទ្ធ និងការចុះសេចក្តីសញ្ញានានាជាមួយព្រះវបិតាសួគ៌ ។

ប្រសិនបើមានពេលគ្រប់គ្រាន់ ហើយវីដេអូ Together Forever មាននៅក្នុងតំបន់របស់អ្នក អ្នកអាចបង្ហាញវីដេអូនោះ ។

អ្នកអាចចង់ឲ្យសមាជិកថ្នាក់ច្រៀងបទ « ឲ្យខ្ញុំកាន់តែវិសុទ្ធ » ។ សូមថ្លែងទីបន្ទាល់អំពីពរជ័យដែលបានមកពីការទទួលពិធីបរិសុទ្ធទាំងឡាយនៃព្រះវិហារបរិសុទ្ធ និងឯកសិទ្ធិនៃការចុះសេចក្តីសញ្ញានានាជាមួយព្រះវបិតាសួគ៌ ។

សូមអញ្ជើញនរណាម្នាក់ឲ្យអធិស្ឋានបិទ ។