« មេរៀនទី ៧ ៖ ការបន្តមានអំណរចំពោះពរជ័យនៃការចូលរួមព្រះវិហារបរិសុទ្ធ » បានទទួលអំណោយទានពិសិដ្ឋមកពីស្ថានលើ ៖ សៀវភៅសិក្សារបស់គ្រូបង្រៀនសិក្ខាសាលាស្តីពីការរៀបចំខ្លួនទៅព្រះវិហារបរិសុទ្ធ ( ឆ្នាំ ២០០៣ ) ទំព័រ ៣១–៣៥

« មេរៀនទី ៧ » បានទទួលអំណោយទានពិសិដ្ឋមកពីស្ថានលើ ទំពរ័ ៣១–៣៥

មេរៀនទី ៧

ការបន្តមានអំណរចំពោះពរជ័យនៃការចូលរួមព្រះវិហារបរិសុទ្ធ

គោលបំណង

ដើម្បីធ្វើការតាមដានមើលពីការទៅព្រះវិហារបរិសុទ្ធលើកដំបូងរបស់សមាជិក និងជួយពួកគេដើម្បីរីករាយចំពោះព្រះវិហារបរិសុទ្ធអស់មួយជីវិតរបស់ពួកគេ ។

ការរៀបចំខ្លួន

សូមរៀបចំដើម្បីធ្វើឲ្យមេរៀននេះជាពេលវេលានៃការចែករំលែក ។ សមាជិកថ្នាក់ភាគច្រើននឹងចង់ពិភាក្សាពីការទៅព្រះវិហារបរិសុទ្ធលើកដំបូងរបស់ពួកគេ ។
សូមចាត់ឲ្យសមាជិកថ្នាក់ម្នាក់ក្នុងថ្នាក់ត្រៀមអាន គោលលទ្ធិ និង សេចក្ដីសញ្ញា ១១០:១–១០ ហើយធ្វើការចែកចាយអារម្មណ៍របស់គាត់អំពីខគម្ពីរទាំងនោះ ។
សូមចាត់ឲ្យសមាជិកថ្នាក់ម្នាក់សង្ខេបព័ត៌មានអំពី អេលីយ៉ាដែលបានបង្ហាញនៅក្នុង ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រ ២៣–២៤ ។
សូមរៀបចំដើម្បីឆ្លើយនូវសំណួរទាំងឡាយដែលអាចបានលើកឡើងអំឡុងការទៅព្រះវិហារបរិសុទ្ធលើកដំបូង ប៉ុន្តែសូមកុំពិភាក្សានូវសំណួរ ឬព័ត៌មានទាំងឡាយណាដែលត្រូវបានរក្សាសម្រាប់តែការពិភាក្សានៅក្នុងព្រះវិហារបរិសុទ្ធប៉ុណ្ណោះ ។ ប្រសិនបើមានសំណួរបែបនោះកើតឡើង សូមលើកទឹកចិត្តដល់បុគ្គលម្នាក់ៗឲ្យដាក់ផែនការដើម្បីទៅព្រះវិហារបរិសុទ្ធបន្ថែមទៀត ។

ការរៀបចំមេរៀន

សូមអញ្ជើញនរណាម្នាក់ឲ្យអធិស្ឋានបើក ។

សូមសួរសមាជិកថ្នាក់ប្រសិនបើពួកគេមានសំណួរឬទេ ។ សូមចំណាយពេលតាមសេចក្តីត្រូវការដើម្បីឆ្លើយតបនូវគ្រប់សំណួរឲ្យបានក្បោះក្បាយតាមសមត្ថភាពរបស់អ្នក ហើយតាមការណែនាំពីព្រះវិញ្ញាណនៃព្រះអម្ចាស់ ។ សូមចាំថា ទិដ្ឋភាពមួយចំនួននៃកិច្ចការព្រះវិហារបរិសុទ្ធ មិនត្រូវយកមកពិភាក្សានៅខាងក្រៅព្រះវិហារបរិសុទ្ធទេ ។

ការរក្សានូវសេចក្តីស្រឡាញ់សម្រាប់ការបម្រើក្នុងព្រះវិហារបរិសុទ្ធ

តើអ្នកមានអារម្មណ៍យ៉ាងណានៅពេលអ្នកនៅក្នុងព្រះវិហារបរិសុទ្ធ ?

សូមពន្យល់ថា ការមប្រើក្នុងព្រះវិហារបរិសុទ្ធនឹងនាំមកនូវពរជ័យជានិច្ចដល់ជីវិតនៃអ្នកទាំងឡាយណាដែលទៅព្រះវិហារបរិសុទ្ធញឹកញាប់ ។ សូមប្រាប់សមាជិកថ្នាក់ថា បទពិសោធន៍របស់ពួកគេនៅក្នុងព្រះវិហារបរិសុទ្ធនៅថ្មីៗក្នុងគំនិតនៅឡើយ ពួកគេគប្បីកត់ទុកអំពីអារម្មណ៍ទាំងនោះនៅក្នុងសៀវភៅកំណត់ហេតុប្រចាំថ្ងៃរបស់ពួកគេ ។ សូមរំឭកថា ទោះបីជាពួកគេអាចកត់ត្រានូវអារម្មណ៍របស់ខ្លួនក៏ដោយ ពួកគេមិនគួរសរសេរពីកិច្ចការលម្អិតមួយចំនួនដែលមិនត្រូវយកមកពិភាក្សានៅក្រៅព្រះវិហារបរិសុទ្ធបានឡើយ ។

តើអ្នកអាចធ្វើអ្វីខ្លះដើម្បីការរក្សានូវសេចក្តីស្រឡាញ់សម្រាប់ការបម្រើក្នុងព្រះវិហារបរិសុទ្ធអស់មួយជីវិតអ្នក ?

សូមសរសេរនូវគំនិតរបស់សមាជិកថ្នាក់នៅលើក្តារខៀន ៖ អ្នកក៏អាចចែកចាយគំនិតមួយចំនួនដូចខាងក្រោមផងដែរ ៖

១. ពិចារណាអំពីបទពិសោធន៍ក្នុងព្រះវិហារបរិសុទ្ធរាល់ថ្ងៃ ។

សូមពន្យល់ប្រាប់ថា សមាជិកខ្លះមានឱកាសទៅព្រះវិហារបរិសុទ្ធច្រើនជាងអ្នកដទៃទៀត ។ ប៉ុន្តែកាលណាយើងធ្លាប់បានទៅព្រះវិហារបរិសុទ្ធ និងមានអារម្មណ៍ពីព្រះវិញ្ញាណបរិសុទ្ធនៅទីនោះហើយ យើងគប្បីចំណាយពេលដើម្បីពិចារណាអំពីពិធីបរិសុទ្ធនានាក្នុងព្រះវិហារបរិសុទ្ធ ហើយសញ្ជឹងគិតអំពីសេចក្តីសញ្ញាទាំងឡាយដែលយើងបានធ្វើ ។ ការធ្វើបែបនេះនឹងលើកទឹកចិត្តយើងជារៀងរាល់ថ្ងៃឲ្យគិត ហើយប្រព្រឹត្តតាមផ្លូវដែលសុចរិតកាន់តែខ្លាំងឡើង ។

យើងនឹងពុំអាចចាំអ្វីៗទាំងអស់នៅក្នុងព្រះវិហារបរិសុទ្ធបានឡើយ ប៉ុន្តែយើងគួរតែព្យាយាមចងចាំឲ្យបានកាន់តែច្រើនឡើងរាល់ពេលយើងទៅម្តងៗ ។ យើងគួរសិក្សាផងដែរនូវព្រះគម្ពីរ និងប្រសាសន៍នៃពួកព្យាការីអំពីព្រះវិហារបរិសុទ្ធ ។ ពាក្យពេចន៍មួយចំនួនត្រូវបានយកមកថ្លែងក្នុងវគ្គសិក្សានេះ ។

អ្នកអាចចាត់ឲ្យសមាជិកថ្នាក់ម្នាក់សង្ខេបព័ត៌មានអំពីសេចក្តីថ្លែងដូចខាងក្រោម ដែលមាននៅទំព័រ ១០ នៅក្នុង ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ៖

« ពិធីនៃព្រះវិហារបរិសុទ្ធមិនអាចយល់បានពេញលេញដោយការទៅចូលរួមជាលើកដំបូងនោះទេ ។ វានឹងគ្រាន់តែយល់បានខ្លះៗប៉ុណ្ណោះ ។ សូមត្រឡប់ទៅវិញម្តងហើយម្តងទៀត ។ ត្រឡប់ទៅដើម្បីរៀន ។ អ្វីៗដែលធ្វើឲ្យអ្នកមានចម្ងល់ ឬធ្វើឲ្យអ្នកមិនយល់ អ្វីៗដែលជាអាថ៌កំបាំងនោះនឹងបង្ហាញឲ្យអ្នកបានដឹង ។ …

« កាលណាអ្នកមានឱកាសចូលរួមពិធីអំណោយទានពិសិដ្ឋនៅក្នុងព្រះវិហារបរិសុទ្ធ ឬទៅធ្វើជាសាក្សីនៃការផ្សារភ្ជាប់ណាមួយ សូមពិចារណាអំពីអត្ថន័យដ៏ជ្រាលជ្រៅនៃអ្វីៗដែលសម្តែងនៅខាងមុខអ្នក ។ ហើយនៅថ្ងៃក្រោយមក សូមរំពឹងគិតអំពីអ្វីទាំងនោះនៅក្នុងចិត្តអ្នក ។ សូមរំឭកឡើងវិញដោយស្ងៀមស្ងាត់ និងដោយការអធិស្ឋាន នោះអ្នកនឹងឃើញថា ចំណេះដឹងរបស់អ្នកនឹងកើនឡើង ។

បទពិសោធន៍មួយដ៏មានតម្លៃអស្ចារ្យនៅក្នុងព្រះវិហារបរិសុទ្ធនោះគឺថា វាបង្ហាញនូវការយល់ដឹងដ៏ធំទូលំទូលាយពីគោលបំណងនៃព្រះដែលទាក់ទងទៅនឹងផែនដីនេះ ។ កាលណាយើងធ្លាប់បានទៅព្រះវិហារបរិសុទ្ធ ( ហើយយើងអាចត្រឡប់ទៅ និងរំឭកនូវសេចក្តីចងចាំរបស់យើង ) នោះព្រឹត្តិការណ៍ទាំងឡាយនៃជីវិតហាក់ដូចជាសមនឹងអ្វីៗដែលបានរៀបចំទុក ។ យើងអាចមើលឃើញតាមរយៈទស្សនវិស័យថា យើងកំពុងនៅទីណា ហើយយើងអាចដឹងយ៉ាងលឿននៅពេលយើងកំពុងតែដើរខុសផ្លូវ » ។

២. សូមចាំថា ចំណុចដ៏សំខាន់នៃការថ្វាយបង្គំទាំងអស់នៅក្នុងព្រះវិហារបរិសុទ្ធគឺព្រះអង្គសង្គ្រោះព្រះយេស៊ូវគ្រីស្ទ ។

បទគម្ពីរបង្រៀនយើងថា មូលហេតុដ៏សំខាន់មួយនៃការសាងសង់ព្រះវិហារបរិសុទ្ធគឺ « ប្រយោជន៍ឲ្យកូនមនុស្សអាចមានកន្លែងមួយដើម្បីសម្តែងអង្គទ្រង់ដល់រាស្ត្ររបស់ទ្រង់ » ( គ. និង ស. ១០៩:៥ ) ។ និមិត្តរូប និងក្បួនរីតិ៍ទាំងឡាយនៃព្រះវិហារបរិសុទ្ធ ជួយយើងឲ្យផ្តោតចិត្តទៅលើព្រះអង្គសង្រ្គោះ ។

សូមពន្យល់ថា ព្រះអង្គសង្គ្រោះពិតជាបានសម្តែងព្រះកាយទ្រង់នៅក្នុងព្រះវិហារបរិសុទ្ធខឺតឡង់មែន ។ ព្រះយេស៊ូវគ្រីស្ទបានបង្ហាញព្រះកាយទ្រង់ចំពោះមុខយ៉ូសែប ស្ម៊ីធ និង អូលីវើរ ខៅឌើរី ដើម្បីទទួលការថ្វាយព្រះវិហារបរិសុទ្ធជាដំណាក់របស់ទ្រង់។ ការមកជួបនេះ មានកត់ត្រានៅក្នុង គោលលទ្ធិ និងសេចក្ដីសញ្ញា ១១០:១–១០ ។ សូមចាត់ឲ្យសមាជិកថ្នាក់អាន និងផ្តល់យោបល់ចំពោះវគ្គបទគម្ពីរនេះ ។

តើពរជ័យអ្វីខ្លះ ដែលព្រះអម្ចាស់សន្យាចំពោះអ្នកទាំងឡាយ ដែលសាងសង់ និងចូលរួមក្នុងព្រះវិហារបរិសុទ្ធ ?

នៅក្នុងព្រះវិហារបរិសុទ្ធ នោះក្រុមគ្រួសារត្រូវបានផ្សារភ្ជាប់គ្នាសម្រាប់ភាពអស់កល្បជានិច្ច

សូមឲ្យសមាជិកថ្នាក់អានគម្ពីរ ម៉ាឡាគី ៤:៥–៦ ។

សូមចាត់ឲ្យសមាជិកថ្នាក់ម្នាក់សង្ខេបព័ត៌មានអំពី អេលីយ៉ាដែលមាននៅក្នុង ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រ ២៣–២៤ ។

សូមពន្យល់ថា អេលីយ៉ាបានត្រឡប់មក ហើយសាងឡើងវិញនូវកូនសោបព្វជិតភាពដែលអនុញ្ញាតឲ្យក្រុមគ្រួសារទាំងឡាយអាចបានផ្សារភ្ជាប់ជាមួយគ្នានៅក្នុងព្រះវិហារបរិសុទ្ធសម្រាប់ភាពអស់កល្បជានិច្ច ។

សូមឲ្យសមាជិកក្នុងថ្នាក់រំឭកឡើងវិញនូវ គោលលទ្ធិ និង សេចក្ដីសញ្ញា ១១០:១៣–១៦ ។ បន្ទាប់មកសូមចាត់ឲ្យសមាជិកថ្នាក់ម្នាក់អានសេចក្តីថ្លែងដូចខាងក្រោម ដែលមាននៅទំព័រ ២៨ នៅក្នុង ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ៖

« ចាប់តាំងពីថ្ងៃនោះមកគឺថ្ងៃទី ៣ ខែ មេសា ឆ្នាំ ១៨៣៦ ចិត្តនៃកូនចៅនឹងបានបង្វែរមករកពួកឪពុករបស់ពួកគេវិញ ។ ហេតុដូច្នេះហើយពិធីបរិសុទ្ធទាំងឡាយពុំមែនគ្រាន់តែជាការសាកល្បងនោះទេ ប៉ុន្តែវាជាអចិន្តៃ្រយ៍ ។ អំណាចនៃការផ្សារភ្ជាប់បាននៅជាមួយយើង ។ គ្មានសិទ្ធិអំណាចណាដែលអាចមានតម្លៃស្មើនិងអំណាចនេះនោះទេ ។ អំណាចនោះផ្តល់នូវខ្លឹមសារ និងភាពអចិន្ត្រៃយ៍ដ៏នៅអស់កល្បជានិច្ចចំពោះពិធីបរិសុទ្ធទាំងអស់ដែលបានធ្វើឡើងដោយសិទ្ធិអំណាចដ៏ត្រឹមត្រូវសម្រាប់ទាំងមនុស្សរស់ និងមនុស្សស្លាប់ផងដែរ ។

ព្រះអង្គសង្គ្រោះបានអធិប្បាយអំពីអំណាចផ្សារភ្ជាប់ កាលទ្រង់មានបន្ទូលជាមួយនឹងពេត្រុសជាសាវកទ្រង់ដូចបានកត់ទុកនៅក្នុង ម៉ាថាយ ១៦:១៩ ។ សូមដល់សមាជិកថ្នាក់ឲ្យអានខគម្ពីរនេះ ។

សូមពន្យល់ថា កូនសោដដែលនេះត្រូវបានកាន់នៅសព្វថ្ងៃនេះដោយព្យាការី និងប្រធាននៃសាសនាចក្រ ។ « អំណាចនៃការផ្សារភ្ជាប់ដ៏ពិសិដ្ឋនោះ មាននៅក្នុងសាសនាចក្រនាពេលបច្ចុប្បន្ននេះ ។ គ្មានអ្វីដែលអ្នកទាំងឡាយណាដែលដឹងពីសារៈសំខាន់នៃសិទ្ធិអំណាចនេះគិតថា ពិសិដ្ឋជាងនោះទេ ។ គ្មានអ្វីមានការការពារយ៉ាងដិតដល់ជាងនេះទេ ។ មានបុរសពីរបីនាក់ប៉ុណ្ណោះដែលកាន់អំណាចនៃការផ្សារភ្ជាប់នេះនៅលើផែនដី—នៅក្នុងព្រះវិហារបរិសុទ្ធនីមួយៗគឺជាបងប្អូនប្រុសដែលបានប្រគល់ឲ្យនូវអំណាចនៃការផ្សារភ្ជាប់ ។ គ្មាននរណាម្នាក់អាចបានទទួលវាឡើយលើកលែងតែមកពីព្យាការី អ្នកមើលឆុត និងអ្នកទទួលវិវរណៈ និងប្រធានសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ឬពីអ្នកទាំងឡាយដែលគាត់បានទទួលការផ្ទេរសិទ្ធិឲ្យដើម្បីផ្តល់វាឲ្យទៅអ្នកដទៃទៀត » ( ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រ ២៤, ២៦ ) ។

សូមពន្យល់ថា ពិធីបរិសុទ្ធផ្សារភ្ជាប់មានរួមទាំងការផ្សារភ្ជាប់នៃស្វាមី និងភរិយាជាមួយគ្នា និងការផ្សារភ្ជាប់នៃឪពុកម្តាយជាមួយកូន ។ នៅពេលដែលឪពុកម្តាយត្រូវបានផ្សារភ្ជាប់នៅក្នុងព្រះវិហារបរិសុទ្ធ នោះកូនដែលបានកើតមកដល់ពួកគេគឺត្រូវបានកើតនៅក្នុងសេចក្តីសញ្ញានៃការផ្សារភ្ជាប់របស់ឪពុកម្តាយរបស់ពួកគេ ហើយមិនត្រូវការធ្វើការផ្សារភ្ជាប់ទៅឪពុកម្តាយរបស់ពួកគេទៀតទេ ។

តើអ្នកគិតថា ការបានផ្សារភ្ជាប់ជាមួយគ្នានៅក្នុងព្រះវិហារបរិសុទ្ធ អាចជះឥទ្ធិពលលើគំនិតប្រចាំថ្ងៃ និងសកម្មភាពនានានៃគ្រួសារមួយយ៉ាងដូចម្តេច ?
តើអ្នកគិតថា មានពរជ័យអ្វីខ្លះនឹងកើតឡើងចំពោះគ្រួសារមួយដោយសារតែការផ្សារភ្ជាប់នៅព្រះវិហារបរិសុទ្ធ ?

ប្រធាន ហ្គរដុន ប៊ី ហ៊ិងគ្លី បានមានប្រសាសន៍ថា ៖ « តើមានបុរសម្នាក់ដែលស្រឡាញ់ស្រ្តីម្នាក់ដោយស្មោះពិត ឬក៏មានស្រ្តីម្នាក់ដែលស្រឡាញ់បុរសម្នាក់ដោយស្មោះណាដែលមិនបានអធិស្ឋានសុំឲ្យទំនាក់ទំនងរបស់ពួកគេអាចនឹងបន្តហួសពីសេចក្តីស្លាប់ដែរឬទេ ? តើធ្លាប់មានកូនដែលត្រូវបានបញ្ចុះដោយឪពុកម្តាយ ដែលមិនចង់រស់នៅយូរអង្វែង ដោយអះអាងថា មនុស្សជាទីស្រឡាញ់របស់ពួកគាត់ នឹងនៅជាមួយពួកគាត់ម្តងទៀត ក្នុងពិភពខាងមុខឬទេ ? តើមាននរណាម្នាក់ដែលជឿទៅលើជីវិតអស់កល្បជានិច្ច ហើយសង្ស័យថា ព្រះនៃសា្ថនសួគ៌នឹងប្រទានឲ្យបុត្រាបុត្រីរបស់ទ្រង់ នូវអំណោយទានជីវិតដ៏មានតម្លៃ បំផុតគឺជាសេចកី្តស្រឡាញ់ដែលរកឃើញអត្ថន័យដ៏សំខាន់បំផុត បង្ហាញនៅក្នុងទំនាក់ទំនងជាក្រុមគ្រួសារឬអ្វី ? ទេ ហេតុផលទាមទារថា ទំនាក់ទំនងក្រុមគ្រួសារ នឹងនៅតែបន្តពីសេចក្តីសា្លប់ ។ ចិត្តមនុស្សរង់ចាំកិច្ចការទាំងនោះ ហើយព្រះនៃសា្ថនសួគ៌ បានបើកសម្តែងផ្លូវ ដោយហេតុនេះវា ប្រហែលជាអាចនឹងផុតភ័យ ។ ពិធីបរិសុទ្ធដ៏ពិសិដ្ឋទាំងឡាយនៃព្រះដំណាក់របស់ព្រះអម្ចាស់ បានផ្តល់ឲ្យសម្រាប់កិច្ចការនេះ » ( « ហេតុអ្វីត្រូវមានព្រះវិហារបរិសុទ្ធទាំងនេះ ? » ព្រះវិហារបរិសុទ្ធនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ [ ឆ្នាំ ១៩៨៨ ] ទំព័រ ៤ ) ។

ព្រះវិហារបរិសុទ្ធផ្តល់ដល់យើងនូវឱកាសដើម្បីនឹងបម្រើដល់អ្នកដែលបានស្លាប់ទៅហើយ

សូមឲ្យសមាជិកថ្នាក់អាន អូបាឌា ១:២១ ។

ព្យាការី យ៉ូសែប ស៊្មីធ បានពន្យល់ប្រាប់នូវរបៀបដែលសមាជិកនៃសាសនាចក្រអាចក្លាយទៅជាអ្នកសង្គ្រោះនៅលើភ្នំស៊ីយ៉ូនថា ៖

« ប៉ុន្តែតើពួក [ បរិសុទ្ធ ] អាចក្លាយជាអ្នកសង្គ្រោះនៅលើភ្នំស៊ីយ៉ូនយ៉ាងដូចម្តេច ? តាមរយៈការសាងសង់ព្រះវិហារបរិសុទ្ធរបស់ពួកគេ សាងសង់អាងទឹកសម្រាប់ធ្វើពិធីបុណ្យជ្រមុជទឹក ហើយទៅទទួលយកនូវគ្រប់ពិធីបរិសុទ្ធទាំងឡាយ ពិធីបុណ្យជ្រមុជទឹក ពិធីបញ្ជាក់ ពិធីលាងជម្រះ ពិធីចាក់ប្រេងតាំង ពិធីតែងតាំង និងអំណាចនៃការផ្សារភ្ជាប់លើក្បាលរបស់ពួកគេ ជំនួសដូនតាដែលបានស្លាប់ទៅហើយ និងប្រោសលោះពួកគាត់ដើម្បីឲ្យពួកគាត់អាចបានចេញមកនៅក្នុងដំណើររស់ឡើងវិញលើកទីមួយ ហើយអាចបានលើកតម្កើងឡើងនៃសិរីល្អជាមួយនឹងពួកគេនេះ ហើយជាច្រវាក់ដែលចងចិត្តឪពុកទៅនឹងកូនចៅ ហើយកូនចៅទៅនឹងឪពុក ដែលបំពេញនូវបេសកកម្មរបស់លោកអេលីយ៉ា » ( ប្រវត្តិសាសនាចក្រ ៦:១៨៤ ) ។

សូមពន្យល់ថា ជាផ្នែកនៃផែនការនៃសេចក្តីសង្គ្រោះ ព្រះវរបិតាសួគ៌របស់យើងបានរៀបចំនូវមធ្យោបាយមួយសម្រាប់អ្នកទាំងឡាយដែលបានស្លាប់ដោយមិនបានទទួលពិធីបរិសុទ្ធទាំងឡាយនៃដំណឹងល្អ ដើម្បីទទួលនូវពិធីបរិសុទ្ធទាំងនោះ ។ មនុស្សនៅក្នុងពិភពវិញ្ញាណនឹងមានឱកាសស្ដាប់ឮដំណឹងល្អ ។ ពួកគេអាចទទួលយកដំណឹងល្អនៅទីនោះ ប៉ុន្តែពួកគេមិនអាចទទួលពិធីបរិសុទ្ធទាំងឡាយនៃដំណឹងល្អសម្រាប់ពួកគេបានទេ ។ ព្រះអម្ចាស់បានបញ្ជាយើងឲ្យធ្វើពិធីបរិសុទ្ធទាំងនេះសម្រាប់ពួកគេនៅក្នុងព្រះវិហារបរិសុទ្ធ ។ យើងគប្បីធ្វើនូវកិច្ចប្រឹងប្រែងពិសេសដើម្បីធ្វើនូវកិច្ចការពង្សប្រវត្តិ ដូច្នេះយើងអាចទទួលនូវពិធីបរិសុទ្ធទាំងឡាយជំនួសជីដូនជីតារបស់យើង ។

ពិធីបរិសុទ្ធទាំងឡាយសម្រាប់អ្នកស្លាប់ដែលបានធ្វើនៅក្នុងព្រះវិហារបរិសុទ្ធរួមមាន ពិធីបុណ្យជ្រមុជទឹក ពិធីបញ្ជាក់ ការតែងតាំងនៃបព្វជិតភាព ពិធីអំណោយទានពិសិដ្ឋ និងពិធីផ្សារភ្ជាប់ស្វាមីជាមួយភរិយា និងឪពុកម្តាយជាមួយកូន ។

យើងគួរតែត្រឡប់ទៅព្រះវិហារបរិសុទ្ធឲ្យបានញឹកញាប់តាមកាលៈទេសៈអនុញ្ញាត ដូច្នេះដើម្បីឲ្យយើងអាចបម្រើអ្នកទាំងនោះដែលបានស្លាប់ តាមរយៈការធ្វើពិធីបរិសុទ្ធទាំងឡាយជំនួសពួកគេ ។ យើងនឹងផ្តល់ពរដល់ជីវិតនៃអស់អ្នកដែលយើងបម្រើ ហើយផ្តល់ពរដល់ ជីវិតយើងផងដែរ ។ ព័ត៌មានស្តីអំពីរបៀបធ្វើកិច្ចការពង្សប្រវត្តិ និងធ្វើពិធីបរិសុទ្ធទាំងឡាយសម្រាប់ជីដូនជីតារបស់យើងគឺត្រូវបានផ្តល់ឲ្យនៅក្នុង A Member’s Guide to Temple and Family History Work ( ៣៤៦៩៧ ) ។

ប្រធាន ថូម៉ាស អេស ម៉នសុន បានមានប្រសាសន៍ថា ៖

« អំណរគុណមួយចំពោះអំណោយទានពិសិដ្ឋនៃព្រះវិហារបរិសុទ្ធ និងពិធីបរិសុទ្ធនៃការផ្សារភ្ជាប់នឹងបណ្តាលឲ្យសមាជិកក្រុមគ្រួសាររបស់យើងខិតកាន់តែជិតស្និទនឹងគ្នា ហើយសមាជិកម្នាក់ៗនឹងមានសេចក្តីប្រាថ្នាចង់ឲ្យជីដូនជីតាយើងដែលបានលាចាកលោកនេះទៅហើយឲ្យមានពរជ័យទាំងនេះដូចយើងដែរ ។ …

កិច្ចការជំនួសដែលបានធ្វើឡើងក្នុងព្រះវិហារបរិសុទ្ធរបស់យើងនេះគឺត្រូវធ្វើឡើងដោយស្មារតីនៃភក្តីភាព និងការលះបង់ដែលជាលក្ខណៈនៃជីវិតលោកចៅហ្វាយ ។ កាលណាយើងនឹកចាំដល់ទ្រង់ នោះវាកាន់តែស្រួលឡើងក្នុងការឲ្យយើងទាំងអស់គ្នាអនុវត្តតាមតួនាទីរៀងៗខ្លួននៅក្នុងការងារដ៏សំខាន់នេះ ។ នៅរាល់ពេលដែលយើងសម្លឹងមើលដំណាក់ដ៏បរិសុទ្ធនេះ សូមឲ្យយើងរាល់គ្នារងចាំដើម្បីមើលឱកាសដ៏អស់កល្បជានិច្ចដែលយើងរកឃើញនៅក្នុងទីនោះចុះ មិនគ្រាន់តែសម្រាប់រូបយើងនោះទេ តែសម្រាប់ជីដូនជីតាដែលបានស្លាប់ទៅរបស់យើងផងដែរ » ( Pathways to Perfection [ ឆ្នាំ ១៩៧៣ ] ទំព័រ ២០៦–២០៧ ) ។

សេចក្ដីបញ្ចប់

សូមបញ្ជាក់ប្រាប់ថា ការទៅព្រះវិហារបរិសុទ្ធ អនុញ្ញាតឲ្យយើងបម្រើអ្នកដទៃ ហើយបន្តទទួលបាននូវចំណេះដឹងខាងវិញ្ញាណបានកាន់តែច្រើនឡើង ។ សូមចែកចាយសេចក្តីថ្លែងការណ៍ខាងក្រោមនេះ ៖

« គ្មានកិច្ចការណាដែលផ្តល់កិច្ចការពារចំពោះសាសនាចក្រនេះជាងកិច្ចការព្រះវិហារបរិសុទ្ធ និងការស្រាវជ្រាវពង្សាវតាដែលគាំទ្រដល់កិច្ចការព្រះវិហារបរិសុទ្ធនោះទេ ។ គ្មានកិច្ចការណាដែលមានការសម្អាតខាងវិញ្ញាណខ្លាំងជាងកិច្ចការនេះទេ ។ គ្មានកិច្ចការណាដែលយើងធ្វើ អាចផ្តល់អំណាចដល់យើងជាងកិច្ចការនេះទេ ។ គ្មានកិច្ចការណាដែលតម្រូវឲ្យមានបទដ្ឋាននៃសុចរិតភាពខ្ពស់ជាងកិច្ចការនេះឡើយ ។ …

ប្រសិនជាយើងព្រមទទួលយកវិវរណៈអំពីពិធីបរិសុទ្ធនៃព្រះវិហារបរិសុទ្ធ បើសិនជាយើងព្រមចូលទៅក្នុងសេចក្តីសញ្ញារបស់យើងដោយគ្មានការស្ទាក់ស្ទើរ ឬអារម្មណ៍ខមាទោស នោះព្រះអម្ចាស់នឹងការពារយើង ។ យើងនឹងទទួលបាននូវការបំផុសគំនិតគ្រប់គ្រាន់សម្រាប់ការប្រឈមមុខទាំងឡាយនៃជីវិត ។ …

ដូច្នេះ ចូរទៅព្រះវិហារបរិសុទ្ធ—ចូរទៅ ហើយទទួលយកនូវពរជ័យទាំងឡាយរបស់អ្នក ។ វាគឺជាកិច្ចការដ៏ពិសិដ្ឋ » ( ការរៀបចំខ្លួនដើម្បីចូលក្នុងព្រះវិហារបរិសុទ្ធដ៏ពិសិដ្ឋ ទំព័រទី ៣៧ ) ។

សូមបញ្ចប់មេរៀនដោយចែកចាយទីបន្ទាល់ ។ សូមលើកទឹកចិត្តដល់សមាជិកនៅក្នុងថ្នាក់ឲ្យវិលទៅព្រះវិហារបរិសុទ្ធឲ្យបានញឹកញាប់ ដើម្បីឲ្យគេអាចបានបង្រៀនដោយព្រះវិញ្ញាណនៃព្រះអម្ចាស់ ។

អ្នកអាចប្រាប់ដល់សមាជិកនៅក្នុងថ្នាក់ថា ពួកគេអាចរកទិញវីដេអូ Mountain of the Lord ( ៥៣៣០០ ) នៅតាមមជ្ឈមណ្ឌលចែកចាយទាំងឡាយ ហើយចាក់មើលនៅផ្ទះ ។ វីដេអូដែលមានរយៈពេល ៧៣ នាទីនេះ ប្រាប់ពីសាច់រឿងនៃការសាងសង់ព្រះវិហារបរិសុទ្ធសលត៍ លេក ។

សូមអញ្ជើញនរណាម្នាក់ឲ្យអធិស្ឋានបិទ ។