“Ko e Hā ʻOku Fai ʻe he Taha Akó?,” EnglishConnect maʻá e Kau Faiakó (2023)
“Ko e Hā ʻOku Fai ʻe he Taha Akó?,” EnglishConnect maʻá e Kau Faiakó
Ko e Hā ʻOku Fai ʻe he Taha Akó?
ʻI hoʻo hoko ko e faiako EnglishConnect, ʻoku fiemaʻu ke mahino kiate koe ʻa e meʻa ʻe fai ʻe he kau akó kae lava ke ke tokoniʻi kinautolu ke nau lavameʻa. ʻE ola lelei taha e ako ʻa e kau akó ʻi he taimi te nau fakakakato ai ʻa e ngaahi ʻekitivitī ako fakatāutahá, kau ʻi he kulupu fepōtalanoaʻakí, pea fakatupulaki ha ʻulungaanga ʻo hono akoako fakaʻaho ʻa e lea faka-Pilitāniá. ʻOku vahevahe ʻa e lēsoni takitaha ʻi he EnglishConnect 1 maʻá e Kau Akó mo e EnglishConnect 2 maʻá e Kau Akó ki ha konga ʻe ua:“Personal Study” (Ako Fakatāutahá) mo e “Conversation Group” (Kulupu Fepōtalanoaʻakí). Toe vakaiʻi ʻa e “Talateu” ʻi he ngaahi tohi lēsoni ʻa e tokotaha ako EnglishConnect ke tokoni ke mahino kiate koe ʻa e aʻusia ʻa e tokotaha akó.
Fekumi ki he ʻIló ʻi he Ako pea ʻi he Tui
ʻOku tokoni e fakavaʻe ʻo e aʻusia EnglishConnect ki he kau akó ke nau “fekumi ki he ʻiló, ʻio, ʻi he ako pea ʻi he tui foki” (Tokāteline mo e Ngaahi Fuakava 88:118). ʻOku fakatefito ʻa e lēsoni kotoa pē ʻi he EnglishConnect ʻi ha tefitoʻi moʻoni ʻo e akó. Ko ha ngaahi tefitoʻi moʻoni fakalaumālie ʻeni ʻokú ne tokoniʻi kitautolu ke tau falala ki he ʻEikí ke fakatupulaki ʻetau malava ke ako mo faiakó. ʻE lava ke tokoni ʻa e ngaahi tefitoʻi moʻoni ʻo e akó ke mahino kiate kitautolu hotau tuʻunga malava moʻoní pea mo e malava ʻa e Fakamoʻuí ke tokoniʻi kitautolú. ʻOku kau ʻi he ngaahi tefitoʻi moʻoni ʻo e akó te tau ako mo fakahoko ʻi he aʻusia EnglishConnect ʻa e:
Ko e Fānau Koe ʻa e ʻOtuá
Ko e fānau au ʻa e ʻOtuá pea ʻoku ʻi ai hoku ivi malava mo ha taumuʻa taʻengata.
(Vakai, Loma 8:16–17; “Ko e Fāmilí: Ko ha Fanongonongo ki Māmani.”)
Ngāue ʻaki ʻa e Tui kia Sīsū Kalaisí
ʻE lava ke tokoniʻi au ʻe Sīsū Kalaisi ke u fai ʻa e meʻa kotoa pē ʻi heʻeku ngāue ʻaki ʻa e tui kiate Iá.
(Vakai, Filipai 4:13; ʻEta 12:27; Molonai 7:33.)
Fatongia ʻAki
ʻOku ou maʻu ʻa e mālohi ke filí, pea ʻoku ou fatongia ʻaki ʻeku akó.
(Vakai, 2 Nīfai 2:14, 16; Tokāteline mo e Ngaahi Fuakava 58:27–28.)
Feʻofaʻaki mo Feakoʻiʻaki
Te u lava ʻo ako mei he Laumālié ʻi heʻeku ʻofa, faiako, mo ako mo e niʻihi kehé.
(Vakai, Sione 13:34–35; Sione 14:26–27; Tokāteline mo e Ngaahi Fuakava 84:106; 88:77, 122–23.)
Vivili Atu ki Muʻa
ʻI he tokoni ʻa e ʻOtuá, te u lava ʻo vilitaki atu ki muʻa neongo ʻeku fehangahangai mo e ngaahi faingataʻá.
(Vakai, 2 Nīfai 31:20; 32:9; Tokāteline mo e Ngaahi Fuakava 50:41–42.)
Fealēleaʻaki mo e ʻEikí
ʻOku tupulaki ʻeku akó ʻi heʻeku fealeaʻaki fakaʻaho mo e ʻOtuá fekauʻaki mo ʻeku ngaahi feingá.
(Vakai, Lea Fakatātā 3:5–6; Mātiu 7:7–8; ʻAlamā 37:37.)
Ako Fakatāutahá
Kimuʻa pea ʻalu ʻa e kau akó ki he kulupu fepōtalanoaʻakí, te nau fakakakato ʻa e konga “Personal Study” (Ako Fakatāutahá) ʻi he tohi lēsoni ʻa e tokotaha akó. ʻI he konga ko ʻení, ʻoku ako ai ʻe he kau akó ha tefitoʻi moʻoni ʻo e akó, ako maʻuloto ʻa e ngaahi foʻi leá, mo akoako fakaʻaongaʻi ʻa e ngaahi sīpinga ʻo e sētesí.
Ko hono ako maʻuloto ʻo e ngaahi foʻi leá mo e ngaahi sīpinga akoakó ko ha ongo ʻekitivitī ia ʻoku lelei taha hono fakahokó ʻi he ako fakatāutahá. ʻOku lava heni ke ako maʻuloto ʻe he kau akó ʻa e ngaahi leá ʻi he taimi ʻoku lelei taha kia nautolú.
Kulupu Fepōtalanoaʻakí
ʻI he kulupu fepōtalanoaʻakí, ʻe fakakakato ʻe he kau akó ʻa e ngaahi ʻekitivitī “Conversation Group” (Kulupu Fepōtalanoaʻaki) ʻi he tohi lēsoni ʻa e taha akó. ʻI he ngāue fakakulupu iiki pe fakahoá, ʻoku aleaʻi ai ʻe he kau akó ha tefitoʻi moʻoni ʻo e akó, toe vakaiʻi ʻa e ngaahi foʻi leá mo e ngaahi sīpinga ʻo e sētesí, pea akoako e ngaahi fepōtalanoaʻakí. ʻOku teuteuʻi ʻe he ʻekitivitī takitaha ʻa e kau akó ki he ʻekitivitī hokó. ʻI he fakaʻosinga ʻo e kulupu fepōtalanoaʻaki takitaha, ʻe fakafuofuaʻi ʻe he kau akó ʻenau fakalakalaká mo fokotuʻu ha ngaahi taumuʻa ki he akoako fakaʻahó.
Akoako Fakaʻahó
Ke ako lelei taha ʻa e lea faka-Pilitāniá, ʻoku fiemaʻu ke fakatupulaki ʻe he kau akó ha ʻulungaanga ʻo e akoako fakaʻahó. Ke fokotuʻu ʻa e tōʻonga moʻui ko ʻení, ʻe fiemaʻu ke kumi ʻe he kau akó ha ngaahi founga ke fakahūhū atu ai ʻa e lea faka-Pilitāniá ʻi heʻenau ngaahi ngāue fakaʻahó. Hangē ko ʻení, ʻi he taimi ʻoku nau fanongo mūsika aí, te nau lava ʻo fanongo ʻi he lea faka-Pilitāniá. ʻE lava foki ke fakahoko ʻe he kau akó ha ngaahi fepōtalanoaʻaki faingofua ʻi he lea faka-Pilitāniá ʻi ʻapi, ngāué, pe ʻi he lotú. (Vakai ki ha ngaahi fakakaukau kehe ʻi he konga “Ngaahi Fokotuʻu ki he Akó” ʻi he ngaahi tohi lēsoni ʻa e tokotaha ako EnglishConnect.) Ko e kī ki he akoako fakaʻahó ko hono tokoniʻi ʻa e kau akó ke kumi ha ngaahi founga ke fakaʻaongaʻi ai e lea faka-Pilitāniá ʻi heʻenau ngāue angamahení.
Ke kau ʻi he akoako fakaʻaho ʻa e kau akó, te nau lava ʻo fakakakato ʻa e konga “Personal Study” (Ako Fakatāutahá) ʻi he tohi lēsoni ʻa e taha akó. Te nau lava foki ʻo fakakakato ʻa e ngaahi ʻekitivitī ʻo e lēsoní mo e ngaahi siví ʻi he ʻinitanetí ʻi he englishconnect.org/learner/resources pea ʻi he Tohi Ngāue EnglishConnect 1 mo e Tohi Ngāue EnglishConnect 2.