Unsaon nako sa pagkaplag og paglaom?

Ang unang lakang sa pagpadayon mao ang pagpahigayon og matinud-anon nga pag-istoryahanay uban sa imong kapikas kabahin sa iyang paggamit og pornograpiya. Kini makatabang kanimo sa pagtino kon unsa ang imong sunod nga mga lakang. Ikonsiderar ang pagsugod pinaagi sa pag-ampo, ug awhaga ang imong kauban nga itug-an sa hingpit ang tanan nga kabahin sa iyang paggamit og pornograpiya. Kini nga pag-istoryahanay hayan malisod para nimo, apan hinumdomi nga mahimong lisod usab kini para sa imong kapikas. Ang mga pagbati nga sad-an ug kaguol mahimong sobra kalisod ngadto sa tawo nga nagpaambit sa iyang mga panglimbasog. Ang inyong pag-istoryahanay mahimong labing epektibo kon giniyahan sa lawom nga kaluoy ug mabinationg pagsabot.

Tingali ganahan ang imong kapikas nga isulat ang iyang pagtug-an sa dili pa kamo maghisgot aron sa pagseguro nga kompleto kini ug samtang magmabination usab sa imong mga emosyon. Pangutana og daghan ug awhaga ang pagtug-an kabahin sa:

Ang matang sa pornograpiya nga gigamit.
Unsa na ka dugay nga ang imong kapikas naggamitan og pornograpiya.
Unsa ka sagad nga naggamitan og pornograpiya ang imong kapikas.
Bisan unsang laing matang sa pagbudhi o pagluib sa pagsalig.

Hibaloi nga ang paghisgot og mga detalye sa binuhatan sa imong kapikas dili na kinahanglan o dili makatabang nimo. Ang imong tumong mao ang pagsabot kon unsa ang nanghitabo. Ang maayo nga mga hunahuna makatabang kanimo sa pagsagubang sa imong mga emosyon. Hinuon, komon lang ang paglimbasog sa dili maayong dagan sa panghunahuna, sama sa:

Paghimo og hinanali nga konklusyon.
Sobrang paghunahuna sa labing dakong kadaot nga posibleng mahitabo.
Paghunahuna nga walay laing sangpotanan gawas sa kadaogan ug kapildihan.
Sobra ka taphaw nga pag-analisar sa sitwasyon o pagkompara sa imong sitwasyon ngadto sa uban sa paagi nga dili tukma.

Kini nga kinaiya ug mga hunahuna talagsa ra kaayo nga mogiya nimo ngadto sa bisan unsang maayo nga mga desisyon. Hatagi og panahon ang paghinay-hinay, tinguhaa ang pagsabot sa imong mga emosyon ug sa pamatasan sa imong kapikas, ug hatagi ang imong kaugalingon og panahon ug lugar nga makapahungaw sa imong emosyon aron makahimo og mga desisyon.

Sulayi ang paglikay sa paghisgot og malisod nga mga isyu kon taas ang kainit sa ulo ug emosyon. Tingali makita nimo nga makatabang ang pag-apil sa usa ka sinaligan nga higala o sakop sa pamilya, lider sa Simbahan, o propesyonal sa kahimsog sa pangisip aron makatabang sa paghusay atol sa lisod nga mga pag-istoryahanay.

Dugang nga mga Ideya

Sulayi ang pagsulat sa uban nimong mga hunahuna ug mga pagbati. Ang pagsulat o paghimo og journal kasagaran usa ka maayong paagi sa pagproseso sa imong mga kasinatian.

Ikonsiderar kon unsaon nimo sa pagdiskarte ang imong kapikas kabahin sa paghisgot sa iyang paggamit og pornograpiya. Unsaon nimo pagbuhat niini sa paagi nga makatabang nimo ug sa imong asawa aron makabaton og bukas, matinud-anon nga pag-istoryahanay? Unsa nga klase sa mga pangutana ang imong ipangutana aron mahibalo unsa ang kinahanglan nimong mahibaloan?

Timbang-timbanga ang imong sosyal nga mga pakigrelasyon, ug pagpaduol sa mga tawo nga nagpalig-on nimo. Ang kasaligan nga mga sakop sa pamilya ug mga higala makatabang nimo sa pagsagubang sa imong mga gihunahuna ug mga emosyon.

Pangita og dugang pa nga mga kapanguhaan, impormasyon, ug koneksyon ngadto sa uban pinaagi sa Spouse and Family Support nga programa sa Simbahan.