Unsaon nako pag-atiman sa akong mga panginahanglan?

Samtang nagsagubang ka sa paggamit og pornograpiya sa imong bana, importante ang paghatag og pagtagad sa imong kaugalingong biyolohikal, sikolohikal, sosyal, ug espirituwal nga kahimsog. Makatabang kini nimo nga mahimong mas andam sa pag-atubang sa wala damha ug kasagaran mahagiton nga mga emosyon nga imong gipakigbisogan.

Biyolohikal nga Kahimsog

Sa ingon nianang kalisod nga panahon, normal lang ang pagbati sa sobrang kabug-at, kahingawa, o labihang kaluya. Ang imong naandan nga pamaagi sa pagkatulog, nutrisyon, ug naandan nga pamaagi sa pag-ehersisyo mahinungdanon alang sa imong kinatibuk-ang kahimtang sa panglawas. Ang mga batid sa panglawas, sa parehong tradisyonal o dili tradisyonal, mahimong maayo nga mga kapanguhaan sa impormasyon ug tabang. Daghang mga propesyonal sa kahimsog sa pangisip ang nag-awhag sa ilang mga pasyente sa pagpahibalo sa bisan unsang mga problema sa panglawas ngadto sa usa ka doktor sa pagpanambal ug mokuha og kompleto nga medical exam. Ang usa ka medikal nga doktor tingali makatabang sa pagtino sa biyolohikal nga mga hinungdan nga kinahanglan imong susihon.

Sikolohikal nga Kahimsog

Ang imong sikolohikal nga kahimsog makaapekto sa imong panghunahuna, panglantaw sa kalibotan, ug emosyonal nga pagbati. Sa pagtinguha nga makasabot kon sa unsang paagi nga ang sikolohikal nga mga hinungdan makaimpluwensiya kanimo, mahimong makatabang ang pagpangayo og tambag gikan sa pamilya, mga higala, ug mga tigsangkap sa kahimsog sa pangisip. Pipila sa sikolohikal nga mga impluwensya nga tingali imong ikonsiderar naglakip sa:

• Mga problema sa kahimsog sa pangisip sama sa kabalaka, depresyon, o sobrang pagdepende ngadto sa ubang tawo.

• Makalilisang nga mga kasinatian sa pagkabata sama sa sekswal o pisikal nga pag-abuso.

• Ang imong mga pagbati kabahin sa kaugalingong bili ug pagsalig sa kaugalingon.

• Ang mga kinaiya ug pamatasan sa imong mga ginikanan, ilabi na kabahin sa sekswalidad.

• Ang imong kanhing sekswal nga mga kasinatian.

Sosyal nga Kahimsog

Ang imong sosyal nga kahimsog naglakip sa mga butang nga sama sa imong relasyon sa pamilya, mga higala, sosyal nga mga tinuohan, ug kultural nga palibot. Ang imong sosyal nga palibot mahimong makatabang kaayo nimo. Ang mga sakop sa pamilya, mga higala, ug masuportahon nga sosyal nga mga grupo makatabang nimo sa paghunahuna og mga kapilian ug sa paghatag kanimo og impormasyon kabahin sa mga makahatag og kahimsog ug dili makahatag og kahimsog nga mga kinaiya. Makakaplag ka og kahupayan pinaagi sa paggahin og gamayng panahon alang sa imong kaugalingon aron makig-uban sa ubang mga tawo ug mogahin og panahon sa pag-usisa sa imong mga interes ug mga koneksyon.

Espirituwal nga Kahimsog

Ang malisod nga mga kasinatian tingali makapahuyang sa imong hugot nga pagtuo ug maoy hinungdan nga mobati ka og kalibog, kasakit, kamingaw, o mobati nga gibiyaan sa Dios. Mahimong mogahin og taas nga panahon ang pagtimbang-timbang ug pagsabot sa imong espirituwal nga mga hunahuna ug mga pagbati. Ang personal nga pag-ampo ug pagpamalandong, pagtuon sa kasulatan, pagtambong sa simbahan, pagserbisyo sa uban, ug pagpakigkonsulta sa mga lider sa Simbahan maoy pipila sa mga butang nga makatabang nimo sa pagtimbang-timbang sa imong mga gituohan ug sa pag ugmad og mas lawom nga pagsabot sa Dios ug sa Iyang gugma alang kanimo. Samtang ikaw magtinguha sa paglig-on sa imong relasyon ngadto sa Langitnong Amahan ug ni Jesukristo, makadawat ka og piho nga pagpadayag alang sa imong kaugalingong sitwasyon.

Dugang nga mga Ideya

Tinguhaa ang pagpaambit sa imong mga pagbati ngadto sa Langitnong Amahan pinaagi sa pag-ampo. Unsa pay ubang mga paagi nga tingali imong mapalig-on ang imong relasyon ngadto Kanila?

Ikonsiderar ang pagpakigsulti sa mga tawo sa imong sosyal nga grupo kinsa mahimong mabination nga mga tigpaminaw ug makahimo sa pagtanyag kanimo og emosyonal nga suporta.

Hunahunaa ang nangaging negatibo nga mga kasinatian nga tingali makapugong nimo sa pagpaambit sa imong mga panginahanglan karon. Usa ka pananglitan tingali mao ang pagtuo nga ang pagpanalipod sa pagka pribado sa imong kapikas mas importante kay sa pagbati nga gisuportahan sa emosyonal nga paagi. Unsaon kaha nimo pagkahibalo kon ang pagpaambit angay ba o dili angay nimo nga buhaton?