“Sa unsang paagi ako labing makasuporta sa akong kapikas?” Tabang alang sa mga Kapikas (2021)

“Sa unsang paagi ako labing makasuporta sa akong kapikas?” Tabang alang sa mga Kapikas

Sa unsang paagi ako labing makasuporta sa akong kapikas?

Importante nga ang imong kapikas adunay tinguha sa pag-usab sa iyang naandan nga buhat kalabot sa pornograpiya ug nga siya andam nga mangayo og tabang. Dili nimo mapugos o makontrolar ang usa ka kapikas kinsa dili andam nga mag-usab. Kinahanglan andam ka kon unsaon nimo pagsanong kon ang imong kapikas dili andam nga mag-usab. Mahimong malisod kaayo kini nga panahon sa paghimo og mga desisyon, pagtakda og mga utlanan, ug pagdesider kon unsa ang labing maayo para kaninyo. Pagbasa pa og dugang diha sa manwal nga Suporta nga Giya: Tabang alang sa mga Kapikas ug sa Pamilya sa mga Nagpaayo.¹

Mas labing masuportahan nimo ang imong kapikas kon ug sa panahon nga andam ka sa emosyonal nga paagi sa pagbuhat sa ingon ug sa panahon nga gibati nimo nga ikaw adunay kaugalingong tigsuporta nga grupo nga motabang nimo sa tibuok nga proseso. Ang mosunod nga mga impormasyon mahimong makatabang.

Ideterminar kon kanus-a ug kon unsaon nimo sa pagtabang. Tingali adunay mga panahon nga dili nimo bation ang emosyonal nga kalig-on sa pagtanyag og suporta, ug normal kana. Ang pagbati nga obligado ka sa pagtabang kanunay dili makatabang nimo o sa imong kapikas. Labi nang tinuod kini kon nanglimbasog ka sa mga pagbati sa pagluib o pagka insikyur. Kon dili ka andam nga motabang sa imong kapikas, mahimong awhagon nimo siya sa paghunahuna og tigsuporta nga tawo kinsa sama og sekso sa imong kapikas.
Tabangi ang imong kapikas nga makasabot kon unsay kahulogan sa pagka adunay tulubagon. Bisan unsa pa kadako ang imong tinguha nga motabang, ang imong kapikas maoy reponsable sa pag-usab sa iyang kinaiya. Usa sa labing importante nga aspeto sa pagsuporta sa imong kapikas mao ang pagtabang kaniya nga moabaga sa responsibilidad sa pag-usab. Samtang ang imong kapikas magkat-on sa pagdawat og responsibilidad alang sa kalamboan, siya mobati og dugang tulubagon alang sa kalamposan ug kapakyasan. Makatabang usab para nimo ug sa imong kapikas ang paghisgot kon unsa ang kahulogan sa mga tulubagon sa inyong kaminyoon ug unsaon ninyo nga kanunay kamong maghibaloay bahin niini.
Paghisgot og plano alang sa kausaban. Tingali makatabang para ninyo ang paghisgot sa plano sa imong kapikas alang sa pag-usab sa iyang kinaiya. Tingali mangutana ka og sama sa “Unsa ang mga detalye sa imong plano?” ug “Unsa ang gusto nimo nga akong buhaton aron sa pagsuporta nimo?” Kinahanglan usab nimong ikonsiderar kon ikaw aduna bay emosyonal nga kalig-on sa paghatag niini nga tabang.
Tabangi ang imong kapikas nga mahibalo nga wala siya mag-inusara. Kadtong nakigbisog sa paggamit og pornograpiya tingali mobati og kaulaw ug pag-inusara, o kaha nagtuo sila nga sila ra ang aduna niini nga problema. Tabangi ang imong kapikas sa pagsabot nga daghang mga tawo ang nakigbisog sa paggamit og pornograpiya ug sa pagpangita og paagi nga maayo ug magpadayon. Daghan ang nakakaplag og kahupayan sa pagtambong og usa ka tigsuporta nga grupo, ug nga kana mahimong makatabang usab sa imong kapikas. (Tan-awa sa addictionrecovery.ChurchofJesusChrist.org alang sa impormasyon kabahin sa mga tigsuporta nga grupo sa Simbahan.)
Paminaw nga may pagsabot. Kini nagpasabot sa paghatag sa tanang pagtagad ngadto sa imong kapikas ug sa pagpaminaw aron makasabot kay sa mohusga. Tingali bation nimo nga aron makahatag og suporta, kinahanglang mohatag ka og tambag o mohimo og aksyon. Apan mas labaw kang makapadayag sa imong suporta pinaagi lamang sa pagpaminaw. Pagkat-on pa og dugang diha sa artikulo nga “Pagpalambo sa Empatiya [Empathy] aron Mangalagad.”² Ipasabot og klaro kon kinahanglan kang magpalayo o mohunong og kadiyot gikan sa malisod nga pakig-istoryahanay.
Tabangi ang imong kapikas sa pagsabot sa kalainan tali sa pagbati nga sad-an ug kaulaw. Daghang mga tawo kinsa nakigbisog sa pornograpiya mobati og kaulaw sa ilang kinaiya. Naglakip kini sa pagbati nga dili takos sa gugma ug pasaylo gikan sa Dios ug sa uban. Ang imong kapikas tingali nanginahanglan og tabang sa pagbuntog niini nga mga pagbati. Mahimong pilion nimo ang paghatag sa imong kapikas og kasegurohan nga siya gihigugma ug bililhon ngadto sa Dios ug kon giunsa nimo sa pagpaningkamot nga makasabot sa iyang mga paningkamot nga mabalik ang pagsalig.
Paghimo og tukma nga mga utlanan. Ang utlanan mao ang kinutoban sa pihong mga binuhatan diin dili nimo tugotan ang imong kapikas nga molapas niana nga walay mga silot. Ang tumong sa pagbutang og utlanan mao ang pagpanalipod sa imong kaugalingon gikan sa emosyonal nga kadaot. Ang mga utlanan wala himoa aron mausab ang kinaiya sa imong kapikas, bisan tuod tingali mahimo kanang ikaduha nga epekto. Ang pagtakda og mga utlanan mahimong makapausab sa dagan sa inyong relasyon, apan maskin mosangpot man kini sa pagkabungkag o paglambo sa inyong kaminyoon, ang mga utlanan makapanalipod kanimo ug makatabang kanimo sa paghinumdom sa imong bili. Ipadayon ang pagpatuman sa imong mga utlanan human kini maestablisar. Kon magpatuman sa mga utlanan, hinumdomi nga dili magmasuk-anon. Ang katuyoan sa mga utlanan dili ang pagsilot sa imong kapikas apan hinuon usa ka paagi sa pagpanalipod kanimo ug sa imong mga emosyon.