Pangita og Suporta

Agig dugang sa pagsalig ngadto sa Ginoo, ang pagpangita og suporta gikan sa uban makatabang samtang ikaw nagsinati og malisod nga mga hagit.

Usa ka tawo mipakigbahin sa iyang panlimbasog samtang nagsud-ong sa iyang asawa nga nagsugod ug nagpadayon sa pagkaadik sa gireseta nga tambal. Ang tanan niyang kusog gidirekta ngadto sa unsay iyang gibuhat ug sa unsay iyang mahimo aron sa pagpahunong kaniya—mikuha kini sa tanang panahon sa iyang kinabuhi. Dihang ang iyang asawa mibiya sa pamilya, gibati niya ang kaulaw, paglimod, ug kahadlok nga walay laing tawo nga makasabot sa iyang gisinati nga kalisod ug nga siya dili makapadayon. Sa dihang nakaamgo siya nga nagkinahanglan siya og tabang alang sa iyang kaugalingon, mitambong siya og usa ka suporta nga grupo alang sa mga miyembro sa pamilya ug mga higala niadtong adunay pagkaadik. Nakat-on siya sa pagpangayo og suporta gikan sa uban.

Daghang mga tawo ang mobati og kahadlok o kadaling masakitan kon makigbahin sa ilang mga panglimbasog. Hinoon, maayo ra ug importante ang paghangyo og tabang. Ang Ginoo misaad, “Kay ako, ang Ginoo nga imong Dios, maoy naglig-on kanimo; ako ang nagsulti kanimo, ‘Ayaw kahadlok, kay tabangan ko ikaw’” (Isaias 41:13).