Walay Butang nga Imposible

*Ang Istorya ni Kacie

Siyam ka bulan human ko naminyo sa akong bana, nadiskobre nako nga naadik siya sa pornograpiya. Dili lang kay nalambigit siya niini samtang nag-date pa mi ug nagkauyab, apan ang iyang mga kinaiya nakaepekto sa among bag-o ug linghod pa nga kaminyoon. Walay mga pulong nga igong ikapadayag sa kasuko, kasakit, ug pagluib nga akong gibati sa dihang nahibaloan nako kini. Labaw sa tanan, gibati nako nga nailad ko sa pagpakigminyo niya. Tungod kay gikasal kami sa templo, gibati nako nga nagaid ko sa mahangtorong kaminyoon ngadto sa tawo nga wala nako mailhi ug seguradong dili nako masaligan.

Ang akong bishop misugyot sa Addiction Recovery Program [Programa aron Maulian gikan sa Pagkaadik] nga gituyo alang ra gayod sa adiksyon sa pornograpiya, ug nagkasabot mi nga moapil. Ang programa gi-organisar isip usa ka panagtigom nga grupo, ug sa una makauulaw kaayo ang pagtambong, labi na gayod nga nadiskobre nako nga ang laing babaye sa grupo usa sa akong katrabaho. Kini nga mga pagbati hinay-hinay nga nawala sa paglabay sa panahon samtang nasuod ko sa ubang mga miyembro kinsa nag-atubang og susama nga mga panlimbasog.

Sa wala madugay human ko misugod sa pagpaatiman, usa ka babaye sa grupo mibira nako ug kusganong misugyot nga magpa-anular sa dili pa moabot ang akong unang tuig nga anibersaryo. Iyang gipaambit nako nga ang iyang bana kadaghan mibalik-balik sa iyang pagkaadik, bisan human makadawat og tabang, ug kon unsa ang iyang gibati nga dili na makabiya niya tungod kay duna na siyay upat ka anak nga giatiman. Iya kong giawhag nga magpa-anular aron akong malikayan ang pagpanganak ug ang diborsiyo. Gipamalandong nako pag-ayo ang iyang mga pulong ug hilabihang naguol sa misunod nga semana. Human sa usa ka panag-istoryahanay sa akong stake president ug daghang pag-ampo ug pamalandong, gibati nako nga mouyon sa pag-atiman sa among kaminyoon hangtod asa kutob nga moayuda ang akong bana. Bisan tuod og nasuko ko niya, akong nakita bisan gamay lang nga andam siyang mag-usab.

Misamot kagrabe ang sitwasyon sa wala pa kini miuswag. Ang pinakalisod nga hitabo nga akong nahinumdoman mao kadtong hapit na ang among unang tuig nga anibersaryo dihang ang akong bana nangutana nako kon ako pa ba siyang gihigugma ug mitubag ko nga sa pagkatinuod wala ko kahibalo. Ang misunod nga mga bulan milabay nga adunay mga panahon sa sobrang kasakit ug kaguol diin ako gihasol sa bati nga mga damgo ug kamingaw. Sa makadaghan mihangyo ko sa akong Langitnong Amahan sa paghatag kanako og kusog nga makapadayon.

Sa paglabay sa panahon ug ang mga hitabo nag-anam og kamaayo, nakahimo ko sa pagtutok sa pipila ka bililhong mga kamatuoran nga akong nakat-onan, nga nakatabang sa akong pagkaulian:

Usa ka tumo-tumo ang istorya nga ang mga tawo madani sa pornograpiya kon sila mobati og kakulangan sa sekswal nga paagi. Gibati nako ang labihang kabug-at sa pagtuo nga akong gitulod ang akong bana ngadto sa pornograpiya tungod kay nagkulang ko kaniya sa ubang paagi. Sa pagkatinuod, kadaghanan sa mga tawo nga aduna niini nga mga pagkaadik nagsugod na niini sa daghang mga tuig, sa daghang higayon sukad sa pagkabata. Pagkaadik kadto nga nagsugod sa taas nga panahon sa wala pa ako mahimamat sa akong bana, ug ang iyang pagpili sa pag-apil niini dili gayod akong sayop.
Importante gayod kaayo nga ang parehong magkapares mangita og tabang. Samtang dili ko direkta nga responsable sa binuhatan sa akong bana, ang akong kinaiya seguradong may kalabotan kon giunsa namo sa pagsagubang ang among problema nga nag-uban mi. Nakadiskobre ko ug dako kaayo ang kausaban sa akong kaugalingon pinaagi niini nga proseso nga kanunay na hinuon kong maghunahuna kon mas daghan pa ko og nakuhang kaayohan gikan niini nga terapiya kay sa akong bana.
Makatabang ang kanunay nga pagmatngon, ilabi na kon moundang sa terapiya. Ang akong bana ug ako mitakda og daghang istrikto nga mga lagda kabahin sa paggamit sa media, nga among gipalugakan sa paglabay sa panahon dihang gibati na namo nga luwas ug tukma na ang paggamit niini.
Gikinahanglan ang tibuok kasingkasing nga pagkugi aron makapadayon hangtod maulian. Ang pagkamasinabtanon sa mga obserbasyon sa mga tawo bahin kanako nakatabang nako sa paghimo og mga kausaban nga akong gikinahanglan aron mahimong mas maayo ang akong kaminyoon.
Nagkihanglan og daghang panahon ang pagpaayo. Bisan kon ang mga sitwasyon medyo klaro na, akong nabatyagan nga duna gihapon koy gitago nga lawom nga kayugot ngadto sa akong bana. Masuko ko kon ang uban modayeg sa akong bana, maghunahuna nga, “Kon nakaila pa lang sila niya, dili gyod sila makasulti nianang mabination nga mga butang bahin kaniya.” Aron sa pagpakigbatok niini nga mga pagbati, naghimo ko og journal sa pasalamat lapas sa usa ka bulan ug misulat og usa ka butang matag gabii nga nagpadayag sa akong pasalamat alang sa akong bana. Usahay mibati ko nga halos imposible kaayo ang pagmugna og bisan usa lang ka ideya niini nga journal. Karon, ikalipay nako ang pagdayeg nga madawat sa akong bana, ug wala nay igong mga pahina nga kasulatan sa usa ka notebook aron isulat ang tanang mga butang nga akong gidayeg mahitungod kaniya.

Dili nako posibling mahulagway ang matag lakang nga akong gihimo sa tibuok niini nga proseso, apan makasulti ko nga walay imposible pinaagi ni Jesukristo. Mihangyo ko niya nga ipahiuli ang akong kaminyoon sa kanhing kahimtang niini, apan Iya hinuon kining gipauswag ngadto sa kahimtang nga labaw pa ka maayo. Nagkaduol ko ngadto Kaniya pinaagi sa pagtan-aw sa akong kapikas sama sa Iyang pagtan-aw ug pinaagi sa pagtanyag og kapasayloan samtang miila nga kitang tanan mga makililimos sa atubangan sa Ginoo.

Karon ang akong bana ug ako lima na ka tuig nga naminyo ug dunay usa ka maanyag nga anak nga babaye. Among naangkon ang maayo kaayo nga kaminyoon ug usa ka talagsaon, puno sa panalangin nga kinabuhi. Wala na ako magpuyo sa kahadlok. Wala na ako magtan-aw sa akong bana ug may pagbati nga kasilag ug kayugot. Pinaagi lamang sa Manluluwas nga kining matang sa pagkaayo mahimong posible. Iyang giayo ang akong mga samad pinaagi sa Iyang grasya.

*Ang ngalan giusab.

Kini nga istorya gikuha gikan gayod sa Addiction Recovery Program [Programa aron Maulian gikan sa Pagkaadik] nga website.