Magtinabangay sa Pagsagubang Niini

*Ang Istorya ni Candice

Nakahibalo ko sa pagkaadik sa akong bana sa pornograpiya sa wala pa kami magminyo, apan wala gayod ko makasabot sa mahimong bug-at nga epekto niini sa matag aspeto sa among panag-uban.

Kon ang pagkaadik sa pornograpiya masagolan og pagkabuang sa dula sa computer ug pagkawalay trabaho, mao kana ang resipe sa pagka dili malipayon. Atol sa ikaduhang tuig sa among kaminyoon, miabot ko sa pinakagrabe nga punto sa depresyon. Akong gigahin ang kadaghanan sa akong mga adlaw sa paglingkod sa rocking chair sa kwarto sa akong bag-ong natawo nga anak nga lalaki, magtabyog kaniya ug magtutok sa bintana samtang naghilak. Nakahukom ko nga panahon na aron taposon kini nga pagka dili malipayon. Mihimo ko og mga plano sa pagdiborsiyo. Andam na ko nga magpadayon niini, apan gibati nako nga kinahanglan kong makigsulti usa sa bishop.

Pipila ka adlaw ang milabay, ang akong bana misulti kanako nga adunay konseho sa Simbahan sa pagdisiplina para niya ug mahimo kong motambong kon ganahan ko, apan dili ko kinahanglan nga moadto. Ang akong kasingkasing nahugno. Dili ingon niini ang gilaoman nga mahangtorong kaminyoon, o nga akong gidamgo panahon niadtong tanang mga leksyon sa Young Women nga nagtudlo sa mahangtorong kaminyoon. Nakahukom ko nga akong sultihan ang bishop niadtong gabhioana sa akong desisyon nga makigdiborsiyo.

Dihang gitawag ko sa bishop sa iyang opisina, iya kong gitan-aw diretso sa akong mga mata ug gisultihan ko nga nahimo ni Satanas ang tanan gawas sa pagpukan sa akong pamilya, apan posible pa nga luwason kini. Miingon siya nga aduna pay paglaom alang sa akong pamilya.

Mipauli ko nga determinado nga dili tugotan si Satanas nga modaog. Nakigbugno ko niya sa makausa kaniadto didto sa premortal nga kahimtang, ug karon makigbugno ko niya sa tanan nga naa nako dinhi sa kalibotan. Gibasa nako ang matag pakigpulong sa kinatibuk-ang komperensiya kabahin sa kapasayloan, sa Pag-ula sa Manluluwas, pamilya, paglaom, ug pagbuntog sa mga hagit. Gitun-an nako ang matag kasulatan kabahin sa kapasayloan. Wala ko masayod kon ako ba gayod nga mapasaylo ang tanang kasakit ug kasagmuyo, apan sinsero akong nag-ampo nga makapasaylo sa akong bana.

Usa ka buntag, miluhod ko ug misaad sa Langitnong Amahan nga kon Iya kong tabangan, dili na ko maghunahuna sa pagdiborsiyo. Walo na ka tuig ang milabay sukad niadtong adlawa. Ang pagkaadik anaa lang gihapon, usahay maminosan ug usahay mapun-an, apan naningkamot gihapon kaming duha sa among kaminyoon.

Gisultian ko sa akong bishop sa makadaghan nga wala ko mag-inusara ug nga ang pornograpiya usa ka dakong problema sa Simbahan, apan wala koy nahibaloan nga si bisan kinsang tawo kinsang bana naadik sa pornograpiya. Dihang gihatagan ko sa bishop sa impormasyon kabahin sa Addiction Recovery Program [Programa aron Maulian gikan sa Pagkaadik], nakabantay ko nga duna silay usa ka miting sa grupo nga para lang sa mga babaye kinsang mga bana mga adik sa pornograpiya.

Diha-diha dayon gibati nako nga mao kini ang angay nakong tambongan. Akong gisultihan ang akong bana nga mahimo siyang mokuyog kon ganahan siya, apan moadto gyod ko.

Nagkauban ra gihapon mi, siya ngadto sa miting sa kalalakin-an ug ako ngadto sa kababayen-an. Ang mga miting sa ARP nakapahigmata nako nga adunay ubang kababayen-an nga nagsagubang sa samang mga problema nga akong giatubang. Nagsugod ko sa pag-atubang sa mga pagbati nga akong gitago. Nakat-on ko unsaon nga malipay, bisan unsa pa ang mga gipanghimo sa akong bana. Ang iyang mga lihok dili kinahanglang mokontrolar sa akong mga emosyon, mga lihok, mga pagbati, o kaugalingong bili. Nakat-on ko sa paghigugma, pagpasaylo, paggunit og maayo ngadto sa Manluluwas, ug nahimong independente sa mga impluwensya sa gawas. Ang akong bana nakahimo sa maayong pagsugod nga iyang gikinahanglan ug nagpadayon sa pagtambong og mga miting aron maulian.

Isip usa ka kapikas, makahimo ko sa paghigugma ug pagsuporta sa akong bana, apan dili ko makasulbad sa pagkaadik para niya. Mao kana ang dalan nga kinahanglan iyang baktason. Apan anaa ko para niya, mag-abiba gikan sa mga daplin kutob kanus-a kini matapos. Naningkamot mi sa pagpadako sa among mga anak sa usa ka malipayon nga panimalay, parehong naningkamot sa paghigalaay ug paghigugmaay sa usag usa. Ang akong bana usa ka talagsaong amahan ngadto sa among mga anak, ug dako kaayo ang ilang pagmahal kaniya. Ako siyang labing suod nga higala.

Mapasalamaton ko nga ang ARP, mapinanggaong mga lider sa priesthood, ug ang atong Manluluwas, labaw sa tanan, nagtudlo kanako unsaon sa paghigugma ug pagpasaylo. Bisan tuod ang akong bana nanglimbasog gihapon sa iyang pagkaadik, tungod sa ebanghelyo ni Jesukristo, mahimo kong magpahiyom kada adlaw.

*Ang ngalan giusab.

Kini nga istorya gikuha gikan gayod sa Addiction Recovery Program [Programa aron Maulian gikan sa Pagkaadik] nga website.