ko ha ongo fefine ʻokú na fāʻofua

Te u lava fēfē nai ʻo tokangaʻi ʻeku ngaahi fiemaʻú?

ʻI hoʻo fehangahangai mo hono fakaʻaongaʻi ho malí ʻa e ponokalafí, ʻoku mahuʻinga ke ke tokanga ki hoʻo moʻui lelei fakaesinó, fakaeʻatamaí, fakasōsialé mo e fakalaumālié. ʻE tokoni ʻeni ke ke mateuteu lelei ange ai ke fehangahangai mo e ngaahi ongo taʻeʻamanekina mo faʻa faingataʻa ʻokú ke fepaki mo iá.

Moʻui Lelei Fakaesinó

ʻI he taimi faingataʻa peheé, ʻoku angamaheni ʻaki pē ke te ongoʻi lōmekina, hohaʻa, pe loto mafasia. ʻOku mahuʻinga ki hoʻo lelei fakalūkufuá ʻa hoʻo taimi-tēpile mohé, maʻu meʻatokoni fakatupu moʻui leleí mo e tōʻonga fakamālohisinó. ʻE lava ke hoko ʻa e kau mataotao ʻi he moʻui leleí, kau mataotao fakafaitoʻo tukufakaholo mo ʻikai tukufakaholó, ko ha maʻuʻanga tokoni lelei ʻo e fakamatalá mo e tokoní. ʻOku poupouʻi ʻe ha kau mataotao moʻui lelei fakaeʻatamai tokolahi ʻenau kau mahakí ke fakahaaʻi ha faʻahinga palopalema fakaemoʻui lelei pē ʻoku nau maʻu ki ha toketā fakafaitoʻo pea fakahoko ha sivi fakafaitoʻo kakato. ʻE lava ke tokoni ha toketā fakafaitoʻo ke ʻiloʻi e ngaahi tuʻunga fakaesino ʻoku totonu ke ke fakahāʻí.

Moʻui Lelei Fakaeʻatamaí

ʻOku tokoni hoʻo moʻui lelei fakaeʻatamaí ki he anga hoʻo fakakaukaú, vakai ki he māmaní, mo ongoʻi e ngaahi ongo fakaelotó. ʻI hoʻo fekumi ke mahino e founga ʻoku tākiekina ai koe ʻe he ngaahi moʻoniʻi meʻa fakaeʻatamaí, ʻe ala tokoni ke ke kumi faleʻi mei he fāmilí, ngaahi kaungāmeʻá, mo e ngaahi kautaha tokoni ki he moʻui lelei fakaeʻatamaí. ʻOku kau ʻi he ngaahi tuʻunga fakaeʻatamai te ke ala tokanga ki aí ʻa e:

• Ngaahi palopalema moʻui lelei fakaeʻatamai hangē ko e loto-hohaʻá, loto-mafasiá, pe moʻui fakafalalá.

• Ngaahi aʻusia faingataʻa ʻi he kei siʻí hangē ko e ngaohikovia fakasekisuale pe fakaesinó.

• Ko hoʻo ongoʻi mahuʻingaʻia mo loto falala pē kiate koé.

• Ko e ngaahi tōʻonga mo e ʻulungaanga hoʻo mātuʻá, tautautefito ki he tōʻonga fakasekisualé.

• Ko hoʻo ngaahi aʻusia fakasekisuale ʻi he kuohilí.

Moʻui Lelei Fakasōsialé

ʻOku kau ʻi hoʻo moʻui lelei fakasōsialé ʻa e ngaahi moʻoniʻi meʻa hangē ko ho ngaahi vā fetuʻutaki fakafāmilí, ngaahi kaungāmeʻá, ngaahi tui fakasōsialé, mo e ʻātakai fakafonuá. ʻE lava ke tokoni atu ho ʻātakai fakasōsialé kiate koe. ʻE lava ke tokoni atu e kau mēmipa ʻo e fāmilí, ngaahi kaungāmeʻá mo e ngaahi kulupu fakasōsiale poupou leleí ke ke fakakaukauʻi e ngaahi meʻa ke ke fili mei aí mo ʻoatu ha fakamatala fekauʻaki mo e ngaahi tōʻonga moʻui lelei mo ʻikai moʻui leleí. Te ke lava ʻo maʻu ha fiemālie ʻi hoʻo tuku ha taimi ke ke feohi ai mo e niʻihi kehé mo fekumi ki he ngaahi meʻa ʻokú ke manako aí mo e ngaahi fetuʻutakí.

Moʻui Lelei Fakalaumālié

ʻE ala uesia ʻe he ngaahi aʻusia faingataʻá hoʻo tuí mo ʻai ke ke ongoʻi puputuʻu, mamahi, taʻelata, pe liʻekina ʻe he ʻOtuá. Mahalo ʻe fie maʻu ha taimi ke ke vakaiʻi mo ngāueʻi ai hoʻo ngaahi fakakaukau mo e ongo fakalaumālié. ʻOku kau ʻa e lotu fakatāutahá mo e fakalaulaulotó, ako folofolá, maʻulotú, tokoni ki he niʻihi kehé mo e talanoa mo e kau taki ʻo e Siasí ʻi he ngaahi meʻa ʻe niʻihi ʻe lava ʻo tokoni atu ke ke vakaiʻi ai hoʻo tuí mo fakatupulaki ha mahino lahi ange ki he ʻOtuá mo ʻEne ʻofa kiate koé. ʻI hoʻo feinga ke fakamālohia ho vā fetuʻutaki mo e Tamai Hēvaní mo Sīsū Kalaisí, te ke lava ʻo maʻu ha fakahā pau ki ho tūkungá.

Ngaahi Fakakaukau Lahi Ange

Feinga ke vahevahe hoʻo ngaahi ongó mo e Tamai Hēvaní ʻi he lotu. Ko e hā ha ngaahi founga kehe te ke ala fakamālohia ai ho vā fetuʻutaki mo Kinauá?

Fakakaukau ke talanoa ki he kakai ʻi hoʻo kulupu fakasōsialé ʻa ia te nau hoko ko ha kau fakafanongo lelei pea te nau lava ʻo tokoniʻi fakaeloto koe.

Vakavakaiʻi e ngaahi aʻusia kovi ʻo e kuohilí te nau ala taʻofi koe mei hono vahevahe hoʻo ngaahi fiemaʻú he taimí ni. Ko e sīpinga ʻe tahá ko hoʻo tui ʻoku mahuʻinga ange hono maluʻi e tuʻunga malu fakataautaha ho malí ʻi he ongoʻi e poupouʻi e ongo fakaelotó. Te ke fakafōtunga fēfē nai ʻi hoʻo ʻilo ʻoku lelei pe ʻikai lelei kiate koe ke ke vahevahe [ho tūkungá]?