Fekumi ki ha Tokoni

Makehe mei he falala ki he ʻEikí, ʻe lava ke tokoni e fekumi ki ha tokoni mei he niʻihi kehé ʻi he taimi ʻokú ke aʻusia ai ha ngaahi pole faingataʻá.

Naʻe vahevahe ʻe ha tangata ʻe taha ʻene faingataʻaʻia he sio ki he kamata mo e hokohoko atu ke maʻunimā hono uaifí ʻe ha foʻiʻakau faitoʻo mei he toketaá. Naʻe fakataumuʻa kotoa ʻene tokangá ki he meʻa ne fakahoko ʻe hono uaifí pea mo e meʻa te ne lava ʻo fakahoko ke taʻofi iá—naʻe puleʻi kotoa ʻe he meʻá ni ʻene moʻuí. ʻI he taimi naʻe mavahe ai hono uaifí mei he fāmilí, naʻá ne ongoʻi mā, fakameʻapangoʻia mo manavasiʻi he ʻikai mahino ki ha toe taha ʻa e meʻa naʻá ne fouá pea he ʻikai ke ne toe lava ʻo hoko atu. ʻI heʻene ʻiloʻi naʻá ne fie maʻu tokoni maʻaná, naʻá ne kau atu ki ha kulupu tokoni maʻá e kau mēmipa ʻo e fāmilí mo e kaungāmeʻa ʻo kinautolu ʻoku maʻunimaá. Naʻá ne ako ke kumi tokoni mei he niʻihi kehé.

ʻOku ongoʻi manavasiʻi pe tuʻu laveangofua ha kakai tokolahi ʻi he taimi ʻoku nau vahevahe ai honau ngaahi faingataʻaʻiá. Neongo ia, ka ʻoku lelei pea mahuʻinga ke kole tokoni. Kuo talaʻofa ʻe he ʻEikí, “He ko au ko [e ʻEiki] ko ho ʻOtuá te u puke ho nima toʻomataʻú, ʻo pehē kiate koe, ʻOua ʻe manavahē, te u [tokoniʻi] koe” (ʻĪsaia 41:13).