Vakai Fakalūkufua Maʻá e Ngaahi Hoa Malí

Kapau kuó ke ʻiloʻi kuo fuoloa ha mamata ponokalafi ho malí, ʻoku angamaheni ʻaki pē ke ke maʻu ha ngaahi ongo kehekehe. Mahalo te ke ongoʻi ʻita, puputuʻu, mole hoʻo falalá, fakasītuʻaʻi, ongoʻi hē pe ʻohovale. Mahalo he ʻikai te ke ʻilo e founga ke matuʻuaki aí, feituʻu ke tafoki ki aí pe meʻa hoko ʻoku totonu ke ke fakahokó.

ʻOku mahuʻinga ke ke ʻilo ʻoku faʻa ʻi ai ha ngaahi meʻa kehekehe ʻoku nau fakaʻaiʻai ʻa hono fakaʻaongaʻi ʻo e ponokalafí, pea ʻe malava pē ke faingataʻa ʻi he taimi ʻe niʻihi. Mahalo he ʻikai mahino kakato ki ho malí ʻa e ʻuhinga kuó ne fakaʻaongaʻi ai ʻa e ponokalafí. Kae kātaki, ʻoua muʻa naʻá ke tukuakiʻi koe.

ʻI hoʻo vilitaki atu ki muʻa ʻi he tuí, te ke lava ʻo maʻu ha fiemālie ʻi hoʻo ʻiloʻi ʻoku ʻikai ke ke tuenoá. Naʻe akonaki ʻa ʻEletā Tieta F. ʻUkitofa ʻo pehē: “He ʻikai te mou ongoʻi taʻelata, loto mamahi, mamahiʻia, pe lotosiʻi ai pē ʻo lauikuonga. Kuo fakahoko kiate kitautolu ʻa e talaʻofa moʻoni ʻa e ʻOtuá he ʻikai ngalo ʻiate Ia pe te Ne liʻaki ʻa kinautolu ʻoku tuku honau lotó kiate Iá. ʻAmanaki lelei pea tui ki he talaʻofa ko iá.”¹