Fesili o le Kosi o le Maatulimanu

Ata

tamaiti aoga o loo suesue

Faatonuga mo Faiaoga

O lenei Aafiaga o le Siitia le Aoaoina e mo tamaiti aoga o le inisitituti o loo aveina le kosi o le Maatulimanu. O lenei aafiaga e aoao ai e aofia ai se seti o fesili ia e avea o se soa taua i faitauga atofaina ma le auai i le vasega. O tali a tamaiti aoga e le tatau ona uumi, ae e tatau ona fai ma sui o taumafaiga silisili a tamaiti aoga. Faatasi ai ma lau fesoasoani, e valaauliaina tamaiti aoga e tusi, iloiloina, toe faatulaga, ma auina mai tali i nei fesili i le kosi atoa. E ui lava o loo uunaia tamaiti aoga e tusi a latou tali i fafo atu o le vasega, e mafai ona e filifili e faaalu sina taimi o le vasega i nei taumafaiga.

E ui e tele faamatalaga i le taitaia ma le toe tulitataoina e tatau ona toefaatulagaina i polokalama taitasi, o nei laasaga o le a fesoasoani ia te oe ma au tamaiti aoga ina ia maua se aafiaga manuia.

Saunia: Ae lei amataina le kosi, seti se aso e toe iloilo ai ma se aso mulimuli mo tamaiti aoga e auina mai ai a latou tali i fesili taitasi. O nisi faiaoga atonu e mananao e iloilo pe auina mai tali uma i se aso se tasi e lata i le faaiuga o le kuata; o nisi atonu e filifili e iloilo ma auina mai tali e faa-tasi faavaitaimi i le kosi atoa. Ia mautinoa ua e aoaoina atu uma mea e manaomia o le kosi ae lei tofia tamaiti aoga e tali i fesili e fesootai i lena anomea.
Faatulaga ni faamoemoega manino:I le amataga o le kosi, tuu atu i tamaiti aoga se kopi o le Aafiaga o le Siitia le Aoaoina. Faaalu ni nai minute e faamatala manino ai le faamoemoega ma mea o loo faamoemoe i ai mo lenei aafiaga, e aofia ai aso e iloilo ai mea e manaomia o le kosi ma auina mai ai tali.
Toe tulitatao:I le kosi atoa, ia uunai pea lava pea ma fesoasoani i tamaiti aoga uma lava ao latou galulue e faauma le Aafiaga o le Siitia le Aoaoina i aso e faagata ai.
Toe iloilo: Mo aso ua e faatulagaina mo le toe iloiloina, valaaulia ma faamanatu i tamaiti aoga e aumai a latou tali i le vasega. O le faamoemoega o le iloiloga e fesoasoani i tamaiti aoga e faavasega a latou tali ma faasoa mai mea na latou aoaoina. E mafai ona aoga mo tamaiti aoga le iloiloina o le galuega a le tasi ma le isi i paga po o vaega laiti. E mafai ona e faia le iloiloga ia sili atu le anoa ao e valaaulia tamaiti aoga e faamatala, faasoa, ma molimau i mea na latou aoaoina (tagai Aoaoina Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 10). E tatau ona e faaaluina le 10 i le 15 minute i fesili taitasi i le taimi o le iloiloga. E uunaia tamaiti aoga e toe iloilo a latou tali e pei ona manaomia ae lei auina mai a latou tali faaiu.
Auina atu:I le faaiuga o le kosi, e auina atu e tamaiti aoga a latou tali ia te oe. E faamaea e tamaiti aoga le Aafiaga o le Siitia le Aoaoina pe a latou faia se taumafaiga talafeagai, e pei ona fuafuaina e le faiaoga, ia tusia, toe iloilo, ma auina mai a latou tali i fesili uma lava o le kosi. Faamaumau i latou ua auina mai a latou tali i le tusi o togi o le WISE.

Faamatalaga: Ia mautinoa o na tamaiti aoga e i ai manaoga faapitoa, le atoatoa, po o tulaga tau le soifua maloloina ua i ai fetuunaiga latou te manaomia ina ia auai ai i lenei faavasegaga i se tulaga tutusa ma a latou tupulaga. O nisi o fetuunaiga atonu e aofia ai le saunia o pepa e tusi faamatatetele po o vaega faalogologo o mea manaomia, e faatagaina ai tamaiti aoga e faauma tali i le fesoasoani atu i ai o isi, faatagaina o i latou e auina mai tali i le faatalanoaina nai lo tali tusitusia, po o le faatagaina o i latou e faalau a latou tali i se failautusi po o se laau pue leo. Alu i le lds.org/topics/disability e sue ai faamatalaga lautele e faatatau i le fesoasoani atu i tagata e i ai tulaga le atoatoa.

Faatonuga mo Tamaiti Aoga

O lenei Aafiaga o le Siitia le Aoaoina e aofia ai se seti o fesili ia e avea o se soa taua i lau faaauai i le vasega ma le suesueina o faitauga atofaina. O le galue i tali i nei fesili i le kosi atoa o le a fesoasoani ia te oe e faaloloto ai lou malamalama ma le faaaogaina o le talalelei ao e toe mafaufau ma faasoa atu mea na e aoaoina. Faauma laasaga nei mo fesili taitasi:

Tusi se tali faatulagaina mo fesili taitasi e faaaoga ai au lava upu. Ia lagolagoina au tali e mau ma upu a perofeta. Ia mautinoa o au tali e talafeagai e faasoa atu.
Iloilo au tali i le aumaia lea i le vasega i le aso (po o aso) e tuuina atu e lou faiaoga.
Toe Faatulaga au tali e faalagolago i le iloiloga, pe a manaomia.
Auina Mai au tali faaiu mo fesili uma i le aso(po o aso) e tuuina atu e lou faiaoga.

O au tali e tatau ona faaumaina i fafo atu o le vasega sei vagana ua toe faatonuina. Afai e i ai sou manaoga faapitoa, le atoatoa, po o tulaga tau le soifua maloloina, talanoa i lou faiaoga ina ia mafai ona ia faia ni fetuunaiga e fesoasoani ai ia te oe e faauma lenei aafiaga. E manao lau faiaoga ia faamanuiaina oe i lenei aafiaga ma ua naunau e fesoasoani ia te oe ina ia manuia.