Api Talaaga mo le Suesueina o le Kosi

Ia tausia se api talaaga mo le suesueina o le kosi lea e te tusia ai mai lea taimi i lea taimi mea na e aoaoina, le ala na e faaaogaina ai, ma le ala na faateleina ai lou faatuatua ia Iesu Keriso. O lenei mea o le a faatagaina oe e toe mafaufau ai ma iloaina le tele o faamanuiaga na e maua mai le Atua. E mafai foi ona avea le api talaaga o se punaoa o musumusuga ma le malosiaga. O le a e lipoti atu i lou faiaoga i le taufaaiuiuga o le kosi faapea na e tausia soo se api talaaga mo le suesueina o le kosi ma le ala na faamalosia ai lou faatuatua ia Iesu Keriso e lou aafiaga.

Na aoao mai Elder Richard G. Scott (1928–2015) o le Korama a Aposetolo e Toasefululua:

“Tusi i se mea e malupuipuia, ia mea taua ua e aoaoina mai le Agaga. O le a e iloaina a o e tusia musumusuga taua, e masani ona tele isi musumusuga e oo mai. Ma le isi foi, o le malamalama na e mauaina o le a tumau pea i lou olaga atoa” (Richard G. Scott, “Ina Ia Maua le Malamalama ma le Malosi ia Faaaogaina Ai ma le Poto,” Liahona, Aok 2002, 32). 12).

Na saunoa foi Peresitene Henry B. Eyring o le Au Peresitene Sili i le taua o le tusia o uunaiga faaleagaga:

“Sa ou tuai i le fale mai se tofiga faale-Ekalesia. …

“… O le taimi lava na ou oo ai i le faitotoa, na ou faalogoina i lou mafaufau … ‘Ou te le o tuuina atu nei aafiaga mo oe lava ia. Tusi i lalo.’

“… Ma a o ou faia, sa ou malamalama i le savali sa ou faalogoina i lo’u mafaufau. Sa tatau ona ou tusia mo la’u fanau e faitau ai, i se aso i le lumanai, le auala na ou vaaia ai le aao o le Atua sa faamanuiaina ai lo matou aiga. …

“Sa ou tusia ni nai laina i aso taitasi mo le tele o tausaga. … Ae ou te lei tusia se mea, ou te mafaufau lava i le fesili lenei: ‘Pe na ou vaaia le aao o le Atua o aapa mai e pa’i mai ia i maua po o le ma fanau po o le matou aiga i le aso?’ “A o faaauau pea ona ou faia lenei mea, sa amata ona tupu se mea. …

“E sili atu i le na o le lotofaafetai na amata ona tupu ae i lou loto. Sa faatupulaia le molimau. Sa amata ona ou mautinoa atili e faafofogaina e lo tatou Tama Faalelagi tatalo ma tali mai i ai. Sa tele atu lou lotofaafetai ona o le faamaluluina ma le faaleleia e oo mai ona o le Togiola a le Faaola o Iesu Keriso. Ma sa atili ai ona ou mautinoa e mafai e le Agaga Paia ona faamanatu maia mea uma ia i tatou—e oo lava i mea tatou te lei matauina pe gauai atu i ai pe a tutupu” (Henry B. Eyring, “E! Ia Manatua, Ia Manatua Lava,” Ensign po o le Liahona, Nov. 2007, 66–67).

Mo nisi faamatalaga, tagai foi i le 1 Nifae 1:1–3; 6:3–6; Alema 37:8–9; 3 Nifae 23:6–13; Mose 6:5, 45-46.