O Le Aiga e Faavavau (Mataupu Faalelotu 200)

Fesili

1. Aisea e totonugalemu ai le aiga i le fuafuaga o le fiafia a le Tama Faalelagi?

   O lau tali e tatau ona aofia ai:

   • Se faamatalaga o faamoemoega autu o le fuafuaga o le faaolataga.

   • Se faamatalaga pe faapefea e aiga amiotonu ona fesoasoani e faataunuu na faamoemoega i le faavavau atoa.

   • Se faamatalaga pe aisea e taua ai ia te oe ma lou alualu i luma e faavavau le aoaoga faavae o le aiga.

   • Se faamatalaga pe faapefea e lou malamalama i le matafaioi autu o le aiga i le fuafuaga o le faaolataga ona aafia ai faaiuga e te faia i lenei olaga.

2. O a tulaga faatonuina a le Alii mo faaipoipoga?

   O lau tali e tatau ona aofia ai se faamatalaga o:

   • O matafaioi ma tiutetauave paia a taitoalua ma matua.

   • O le matafaioi a le Faaola i le faaipoipoga ma le aiga.

   • O tulafono o loo puleaina le ola mama ma le faamaoni i le faaipoipoga ma le natura e faavavau o na tulafono.

   • O auala e mafai ona e faaaogaina ai nei mataupu faavae e saunia ai pe faaleleia ai lau faaipoipoga ma le aiga.

3. Na faapefea e le “O Le Aiga: O se Folafolaga i le Lalolagi” (Ensign po o le Liahona, Nov. 2010, 129) ona uunaia lou olaga i le lelei i le taimi o lenei kosi?

   E mafai ona e fausia pe fesootai manatu mai au tali muamua pe tusi e uiga i se autu fou. O lau tali e tatau ona aofia ai:

   • Se faamatalaga o se mataupu po o se aoaoga faavae faapitoa mai le folafolaga i le aiga, ma se isi faamatalaga e faaaoga ai mau po o upu a perofeta o aso e gata ai.

   • O se faataitaiga pe faapefea e le mulimuli i le fautuaga a perofeta ona fesoasoani ia te oe ia malamalama atili ai i le mataupu po o le aoaoga faavae ua e filifilia.

   • O faataitaiga o faamanuiaga ua e maua po o ua maua foi e isi i le faalogo i le fautuaga i le folafolaga i le aiga.

   • O se faamatalaga o mea o le a e faia ina ia ola atili ai i le mataupu po o le aoaoga faavae ua e filifilia.

Manatu Autu o Aoaoga Faavae

O le faamatalaga lenei na tuufaatasia e faaaoga ai manatu autu i totonu o lesona mo lenei kosi. O numera o loo puipuia o loo mulimuli mai i upusii e faaalia ai le numera o le lesona i le O Le Aiga e Faavavau Tusi Lesona a le Faiaoga (2015) e mafai ona maua ai le faamatalaga. Faatusatusa lau tali i le faamatalaga o loo i lalo. Afai e i ai se manatu autu o le aoaoga faavae mai i lenei iloiloga e te lei taua i lau tali, mafaufau e toe faatulaga lau tali ae lei auina mai. E te le manaomia le kopiina o lenei faamatalaga upu i le upu i lau tali; tau lava o le mautinoa ua e malamalama i nei aoaoga faavae ma faasoa mai lena malamalamaaga. Ona o le fesili 3 e manaomia ai se tali e sili atu le patino, e leai ni manatu autu mo lena fesili.

1. Aisea e totonugalemu ai le aiga i le fuafuaga o le fiafia a le Tama Faalelagi?

   O faamoemoega autu o le fuafuaga o le faaolataga:

   • “O le fuafuaga a le Tama Faalelagi ua saunia ai se auala mo i tatou ia avea ai faapei o o tatou Matua Faalelagi” (3).

   • “Na foafoaina le lalolagi e fesoasoani ia aumaia ai le tino ola pea ma le ola e faavavau o le tagata” (4).

   Le ala e fesoasoani ai aiga amiotonu e faataunuu na faamoemoega i le faavavau atoa:

   • “O le aiga e totonugalemu i le fuafuaga a le Atua mo le muai olaga, olaga faitino, ma le ola e faavavau” (6).

   • “Ona o le Pau, ua mafai ai ona fanauina e Atamu ma Eva ni fanau, ma ua mafai ai ona alualu i luma a la fanau i le ola e faavavau” (4).

   • “Faatasi ai ma se tino faaletino, ua tatou aafia i tulaga o le faaletino lena e mafai ona saunia i tatou mo le faavavau” (5).

   • “Pe a tatou ulu atu i le feagaiga fou ma tumau faavavau o le faaipoipoga, e mafai ona faaeaina i tatou i le tikeri aupito sili ona maualuga i le malo selesitila” (15).

2. O a tulaga faatonuina a le Alii mo le faaipoipoga?

   O matafaioi ma tiutetauave paia o taitoalua ma matua:

   • “O le tane ma le ava ua i ai se tiutetauave paia e alofa ma tausi e le tasi le isi” (“O Le Aiga: O Se Folafolaga i le Lalolagi,” 129).

   • “Pe a fanauina e se tane ma se ava se tamaitiiti i le lalolagi, ua la faataunuuina se vaega o le fuafuaga o le fiafia a le Tama Faalelagi” (17).

   • “Ua poloaiina matua e aoao a latou fanau ia alolofa ma feauaunaa’i, ia tausia poloaiga a le Atua ma avea ma tagatanuu usiusitai i tulafono” (22).

   O le matafaioi a le Faaola i le faaipoipoga ma le aiga:

   • “O le Togiola a Iesu Keriso e mafai ai e i tatou taitoatasi ona iu lava ina maua uma faamanuiaga ua folafolaina mai e le Tama oi le Lagi” (24).

   • “A o fausia e aiga o latou faavae i luga o Iesu Keriso, o le a le maua e Satani le mana e faaumatia ai i latou” (19).

   O tulafono o loo puleaina le ola mama ma le faamaoni i le faaipoipoga ma le natura e faavavau o na tulafono:

   • “O le faaipoipoga i le va o se alii ma se tamaitai ua faauuina e le Atua” (“O le Aiga: O se Folafolaga i le Lalolagi,” 129).

   • “Ua poloai mai le Atua, o mana paia o le foafoaina o fanau, ua na o le va lava o le alii ma le tamaitai, o le alii ma le tamaitai ua faaipoipoina faaletulafono o se tane ma se ava, e tatau ona faaaogaina ai” (“O le Aiga: O se Folafolaga i le Lalolagi,” 129) (16).

   • “O suiga i tulafono faalemalo e le, e moni e le mafai, ona suia ai le tulafono o amioga mama ua faavaeina e le Atua. Ua faamoemoeina i tatou e le Atua ia faatumauina ma tausia Ana poloaiga e tusa lava po o a manatu eseese po o aga masani a le lalolagi” (upusii i le Gospel Topics, “Same-Sex Marriage,” lds.org/topics) (7).