Fesili Filifilia Lautele o le Kosi

Faatonuga mo Faiaoga

O lenei Aafiaga o le Siitia le Aoaoina e mafai ona faaaoga i soo se kosi o le inisitituti e le o se kosi o le Maatulimanu. O loo aofia ai ni fesili ia o loo avea ma se soa taua i faitauga atofaina ma le auai a le vasega. O le valaaulia ma le fesoasoani i tamaiti aoga e aoao, faaaoga, faamaumau, ma faasoa atu mataupu ma aoaoga faavae o le a mafai ona fesoasoani ia i latou e faamalosia ai a latou molimau ma faalolotoina lo latou liua.

E tusa ai ma lau faatonuga, e tali mai tamaiti aoga i fesili e tolu mai fesili e fitu o loo maua i le pepa o faatonuga a tamaiti aoga. E tatau ona aumai moni lava tali a tamaiti aoga mai mea sa latou aoaoina ma faaaogaina i le taimi o le kosi. E ui o nisi o faamatalaga i le faafoeina o le Aafiaga o le Siitia le Aoaoina e ono manaomia ai le fetuunaiga e fuafua lea i le vasega po o tamaiti aoga taitasi, o nei laasaga e mafai ona fesoasoani ia te oe ma au tamaiti aoga ina ia maua se aafiaga manuia:

Saunia:Ao lei amataina le kosi, iloilo ia fesili ma fai se fuafuaga mo le faafoeina o le Aafiaga o le Siitia le Aoaoina. O lau sauniuniga e ono aofia ai ni auala e faailoa atu ai ia fesili i le vasega ma faamatala atu ai ia faamoemoega e faatatau i le Aafiaga o le Siitia le Aoaoina, e pei o aso mo le iloiloina ma le auina atu o tali a tamaiti aoga, le umi faamoemoeina o tali, ma le mamanu o tali. Ua fautuaina ina ia e iloiloina tali taitasi o tali e tolu a tamaiti aoga i aso eseese e tolu e te filifilia i le aluga o le kosi.
Faatulaga ia manino faamoemoega:I le amataga o le kosi, ia saunia se kopi mo tamaiti aoga taitasi o fesili o loo maua i le pepa o faatonuga a tamaiti aoga. O le a tuuina atu e lenei mea se taimi talafeagai mo tamaiti aoga e suesue ai, faaaoga, ma faamaumau a latou tali mo fesili i le aluga o le semesa. Fesoasoani atu ia i latou ina ia malamalama i le faamoemoega o le Aafiaga o le Siitia le Aoaoina. Ia faafesootai manino atu ou faamoemoega mo a latou tali, e aofia ai aso mo le iloiloina ma le auina mai.
Toe tulitatao:I le faagasologa o le kosi, ia uunaia pea lava pea ma fesoasoani i tamaiti aoga uma lava ao latou galulue e faamaea ia fesili o le Aafiaga o le Siitia le Aoaoina. Saili ni auala e fesootai ai fesili ma le mataupu aoaoina, pe tuufaatasi i gaoioiga a le vasega. Atonu e mafai ona e tuu atu i tamaiti aoga e galulue ia latou tali i le vasega, fafo atu o le vasega, po o mea uma e lua.
Iloilo ma faatulaga:Mo aso ua e faatulagaina mo se iloiloga, valaaulia ma faamanatu i tamaiti aoga e aumai a latou tali i [le] fesili ua atofaina atu i le vasega. Valaaulia i latou, ia latou tali, e faamatala, faasoa mai, ma molimau mai i mea na latou aoaoina ma faaaogaina mai le kosi. E mafai ona aoga mo tamaiti aoga le iloiloina o le galuega a le tasi ma le isi i paga po o vaega toalaiti. E mafai ona e valaaulia ia tamaiti aoga e toe iloilo a latou tali e pei ona manaomia ae lei auina mai.
Auina mai:E faamaea e tamaiti aoga le Aafiaga o le Siitia le Aoaoina e ala i le auina mai o tali mo fesili uma e tolu e tusa ai ma ou faamoemoega. E ui e taliaina ou manatu faaalia e faatatau i tali a tamaiti aoga, ae e le faamalosia. Faamaumau le faamatalaga i le Tusi o togi o le WISE mo i latou o e na auina mai a latou tali.

Faamatalaga: Ia mautinoa o na tamaiti aoga e i ai manaoga faapitoa, le atoatoa, po o tulaga tau le soifua maloloina ua i ai fetuunaiga latou te manaomia ina ia auai ai i lenei faavasegaga i se tulaga tutusa ma a latou tupulaga. O nisi o fetuunaiga atonu e aofia ai le saunia o pepa e tusi faamatatetele po o vaega faalogologo o mea manaomia, e faatagaina ai tamaiti aoga e faauma tali i le fesoasoani atu i ai o isi, faatagaina o i latou e auina mai tali i le faatalanoaina nai lo tali tusitusia, po o le faatagaina o i latou e faalau a latou tali i se failautusi po o se laau pue leo. Alu i le lds.org/topics/disability e sue ai faamatalaga lautele e faatatau i le fesoasoani atu i tagata e i ai tulaga le atoatoa.

Faatonuga mo Tamaiti Aoga

O loo aofia i le Aafiaga o le Siitia le Aoaoina ni fesili ia e avea o se soa taua i lou faaauai o le vasega ma le suesueina o faitauga atofaina. O le galue i tali i nei fesili i le kosi atoa ao e suesue, faaaoga, faamaumau, ma faasoa mai ia mataupu ma aoaoga faavae o le a fesoasoani ia te oe e faamalosia ai lau molimau ma faaloloto ai lou liua i le talalelei a Iesu Keriso.

O le faaaogaina o le aoaoga faavae, mataupu faavae, ma faamatalaga na e suesueina ma faaaogaina i le taimi o lenei kosi, ia tali i fesili e TOLU mai fesili e fitu nei. (E mafai ona atofaina atu e lou faiaoga ni fesili faapitoa.) Mafaufau i fautuaga o i le vaega o i lalo o “Tali” pe a fatuina sau tali. Ia saunia e faasoa atu mea sa e suesueina ma faaaogaina e ala i le aumaia o au tali i le vasega i aso e iloilo ai ua uma ona faatulagaina e lou faiaoga.

Fesili

Na faapefea ona e iloaina lelei lou Tama o i le Lagi?
O le a se mea na fesoasoani ia te oe ina ia sili atu lou malamalama ma le faalagolago atoatoa ia Iesu Keriso ma Lana Togiola?
Na faapefea ona faateleina lau molimau i le Toefuataiga o le talalelei?
O le a le mea na fesoasoani ia te oe ia sili atu ai le atoatoa ona agavaa mo faamanuiaga o le malumalu?
O fea upumoni mai lenei kosi ua faamanuiaina ai lou olaga?
Na faapefea ona e faamalosia lau molimau o le__________? (O le a saunia e le faiaoga le mataupu po o le aoaoga faavae mo lenei fesili.)
Na faapefea ona faaleleia lou olaga ona ua e faalolotoina lou malamalamaaga o le__________? (Filifili se TASI o autu faaleaoaoga faavae nei.)
- O Le Aiga Atua
- O Le Ata o le Faaolataga
- O Le Togiola a Iesu Keriso
- O Le Toefuataiga
- Perofeta ma Faaaliga
- Perisitua ma Ki o le Perisitua
- Sauniga ma Feagaiga
- Faaipoipoga ma le Aiga
- Poloaiga

Tali

Mafaufau e faaaofia mea nei i tali taitasi:

Faailoa se aoaoga faavae ua sili atu ona aoga ia te oe ao e auai i lenei kosi.
Faamatala le aoaoga faavae e faaaoga ai au lava upu, fuaitau o mau, po o upu a perofeta soifua.
Faasoa mai se aafiaga lea na e lagonaina ai talu ai nei le mana o le aoaoga faavae i lou olaga.
Faasoa atu le auala na faaloloto ai e lou aafiaga lou liua i le talalelei a Keriso.

Faamatalaga: Afai e i ai sou manaoga faapitoa, le atoatoa, po o tulaga tau le soifua maloloina, talanoa i lou faiaoga ina ia mafai ona ia faia ni fetuunaiga e fesoasoani ai ia te oe e faamaea lenei aafiaga.