O Iesu Keriso ma le Talalelei e Faavavau (Mataupu Faalelotu 250)

Iesu Keriso

Fesili

1. O a mea e mafai ona ou aoaoina mai le Faaola e uiga i le usiusitai i le finagalo o le Tama Faalelagi?

   O lau tali e tatau ona aofia ai:

   • O aoaoga ma faataitaiga mai le galuega e faavavau a le Faaola lea e faaalia ai Lona usiusitai i le Tama Faalelagi.

   • O le ala e fesootai ai le usiusitai o Iesu i le Tama Faalelagi i lou lava avea ma soo.

   • O le mafuaaga e taua ai ia te oe le faataitaiga a le Faaola o le usiusitai ma le ala e mafai ai ona Ia fesoasoani ia te oe e faia laasaga e te manaomia ona faamalosia ai lou avea ma soo.

   • O le ala e fesoasoani ai le faataitaiga a le Faaola ia te oe e usiusitai ai i le finagalo o le Tama Faalelagi.

2. Aisea ou te manaomia ai le Faaola?

   O lau tali e tatau ona aofia ai:

   • O faafitauli autu e tatau ona tatou faatoilalo ona o lo tatou tulaga pau.

   • O ala e fesoasoani ai matafaioi eseese a le Faaola i Lana galuega atoa e faavavau i fanau a le Tama Faalelagi ia faatoilalo ai nei faafitauli.

   • O mea tatou te manaomia e fai e talia ai ma valaaulia le fesoasoani a le Faaola.

   • Ia le itiiti ifo ma le tasi se auala na e lagona ai le fesoasoani mamana a le Faaola i lou olaga i le faatoilaloina o luitau ma faafitauli.

3. O a mea na ou aoaoina i lenei kosi e uiga ia Iesu Keriso ma le talalelei e faavavau ua faamanuiaina ai lou olaga?

   E mafai ona e fausia pe fesootai manatu mai au tali muamua pe tusi e uiga i se autu fou.

   • I se fuaiupu se tasi pe lua, tau mai le aoaoga faavae na e aoaoina.

   • Faamatala lenei aoaoga faavae e faaaoga ai faataitaiga mai mau ma upu a perofeta.

   • Faasoa mai pe na faapefea e aoaoga, faataitaiga, po o le Togiola a le Faaola ona faamanuiaina lou olaga.

   • Tusi lau molimau i mea na e aoaoina e uiga ia Iesu Keriso ma le talalelei e faavavau.

Manatu Autu o Aoaoga Faavae

O le faamatalaga lenei na tuufaatasia e faaaoga ai manatu autu i totonu o lesona mo lenei kosi. O numera o loo puipuia o loo mulimuli mai i se upusii e faaalia ai le numera o le lesona i le O Iesu Keriso ma le Talalelei e Faavavau Tusi Lesona a le Faiaoga (2015) e mafai ona maua ai le faamatalaga. Faatusatusa lau tali i le faamatalaga o loo i lalo. Afai e i ai se manatu autu o le aoaoga faavae mai i lenei iloiloga e te lei taua i lau tali, mafaufau e toe faatulaga lau tali ae lei auina mai. E te le manaomia le kopiina o lenei faamatalaga upu i le upu i lau tali; tau lava o le mautinoa ua e malamalama i nei aoaoga faavae ma faasoa mai lena malamalamaaga. Ona o le fesili 3 e manaomia ai se tali e sili atu le patino, e leai ni manatu autu mo lena fesili.

1. O a mea ua mafai ona ou aoao mai le Faaola e uiga i le usiusitai i le finagalo o le Tama?

   O aoaoga po o faataitaiga mai le galuega a le Faaola lea e faaalia ai Lona usiusitai i le Tama Faalelagi.

   • “Na filifilia Ieova mai lava i le amataga. O se tasi o mafuaaga na filifilia ai Ieova ona sa Ia saili e fai le finagalo o le Tama ma tuuina atu le mamalu atoa i le Tama” (2).

   • “E ui e leai se agasala, o [Iesu Keriso] na papatisoina ina ia faataunuu ai mea tonu uma” (8; “O Le Keriso Soifua: O Le Molimau a Aposetolo, O Le Ekalesia a Iesu Keriso o le Au Paia o Aso e Gata Ai,” Ensign po o le Liahona, Ape. 2000, 2).

   • “O le fuafuaga o le faaolataga na manaomia ai Iesu ina ia atoatoa le usiusitai ia mafai ai ona faia le Togiola” (9).

   • “Ou te le fai fua foi se mea; ae peitai faapei ona aoao mai e lou Tama ia te au … ; ou te faia pea lava o mea e lelei ia te ia” (Ioane 8:28–29).

   O le ala e fesootai ai le usiusitai o Iesu i le Tama i lou lava avea ma soo.

   • “E pei o le Faaola, tatou te faataunuuina le amiotonu pe a tatou taliaina sauniga ma feagaiga o le talalelei e faavavau” (8).

   • “O le avea ma soo o Iesu Keriso e manaomia ai le tatou usiusitai ma le ositaulaga. … O le avea ma soo e manaomia ai lo tatou naunau e tumau e lafoai mea uma ae mulimuli ia Iesu Keriso” (10).

   • “E mafai ona tatou maua le malosi e manumalo ai i faaosoosoga ma ia usiusitai a o tatou mulimuli i le faataitaiga a Iesu Keriso e saili e faia le finagalo o le Tama nai lo le faia o o tatou loto” (9).

2. Aisea ou te manaomia ai le Faaola?

   O faafitauli autu e tatau ona tatou faatoilalo ona o lo tatou tulaga pau:

   • “E oti faaleagaga tagata uma, e ala i le tuliesea mai i le afioaga o le Atua, ma e tatau ona oti i tatou uma i la le tino, o le oti lea o le tino faaletino (tagai Alema 42:6–9; MF&F 29:41–42)” (Faamaoni i le Faatuatua: O Se Tusitaiala o le Talalelei [2004], 15).

   • “I lo tatou tulaga pau, o le a tatou fetaia’i ma mea faafeagai ma faaosoosoga. Pe a tatou gauai atu i faaosoosoga, ua tatou faamamaoeseina i tatou lava mai le Atua (tagai Roma 3:23)” (Faamaoni i le Faatuatua: O Se Tusitaiala o le Talalelei, 15).

   O ala e fesoasoani ai matafaioi eseese a le Faaola i Lana galuega atoa i fanau a le Tama Faalelagi ia faatoilalo ai nei faafitauli:

   • “Na foafoaina e Ieova le lalolagi ina ia saunia ai se nofoaga e nonofo ai fanau a le Atua ma alualu ai i luma agai i le ola e faavavau” (4).

   • “I le avea ai ma le Alo e Toatasi o le Atua na Fanaua i la le tino, na mafai ai e Iesu Keriso ona faatino le taulaga Togiola, lea na manaomia ai o Ia e onosaia mea e sili atu nai lo le mafaia e se tagata faaletino, ma o lea na faataunuuina ai Lana matafaioi i le fuafuaga a le Tama” (7).

   • “Ona o le Togiola a Iesu Keriso, e mafai ona tatou maua le toafimalie ma le malosi e ala mai le Agaga Paia ina ia onosaia ai ‘tiga ma puapuaga ma faaosoosoga o ituaiga eseese uma’ (Alema 7:11)” (16).

   • “Ona o le Togiola ma le Toetu o Iesu Keriso, o e uma e fananau mai i le olaga faitino o le a toetutu” ma toe aumaia i le afioaga o le Atua ina ia faamasinoina (19).

   • “Ao i ai i le lalolagi o agaga, na faatulaga ai e Iesu le galuega o le faaolataga mo e ua maliliu” (18).

   • “O Iesu Keriso o lo tatou Fautua i le Tama” (24).

   • “O le a faamasinoina i tatou e le Faaola e tusa ai ma a tatou upu, mafaufauga, ma galuega, ma manaoga o o tatou loto” (26).

   O le mea tatou te manaomia e fai e talia ai ma valaaulia le fesoasoani a le Faaola.

   • “E mafai ona tatou faatoilalo Satani e ala i le faalagolago ia Iesu Keriso, lea na faia le Togiola, ma le tuuina atu ma ia faamaoni i a tatou molimau” (3).

   • “E ala i le filifili e tuu le Faaola i le totonugalemu o o tatou olaga a o tatou i ai i le lalolagi, o le a tatou maua ai faamanuiaga sili atu i le faavavau” (2).

   • “Afai tatou te fetagofi atu i le faamanatuga ma le agaga tatalo ma se agaga salamo, e mafai ona tatou maua le faamagaloina o agasala, e pei lava ona tatou faia ina ua tatou papatiso” (15).

   • “A o tatou taliaina Iesu Keriso ma faia ma tausia feagaiga e usiusitai i poloaiga a le Atua, e avea i tatou ma atalii ma afafine o Keriso na fanaua” (24).