សំណួរវគ្គសិក្សាជម្រើសទូទៅ

សេចក្តីណែនាំសម្រាប់គ្រូបង្រៀន

បទពិសោធន៍នៃការលើកកម្ពស់ដល់ការរៀនសូត្រនេះ អាចប្រើប្រាស់ជាមួយវគ្គសិក្សាថ្នាក់វិទ្យាស្ថានដែលមិនមែនជាវគ្គសិក្សាមូលដ្ឋានគ្រឹះបាន ។ វាមាននូវសំណួរទាំងឡាយដែលជាដៃគូដ៏សំខាន់ចំពោះការចូលរួមចំណែកនៅក្នុងថ្នាក់ និង អំណានដែលបានដាក់ឲ្យអាន ។ ការអញ្ជើញ និង ការជួយសិស្សឲ្យសិក្សា អនុវត្ដ កត់ត្រា ហើយចែកចាយគោលការណ៍ និង គោលលទ្ធិ អាចជួយពួកគេឲ្យពង្រឹងទីបន្ទាល់ ព្រមទាំងមានការប្រែចិត្តជឿកាន់តែខ្លាំងឡើង ។

យោងទៅតាមការណែនាំរបស់អ្នក នោះសិស្សឆ្លើយសំណួរចំនួនបីក្នុងចំណោមសំណួរទាំងប្រាំពីរនៅលើក្រដាសណែនាំរបស់សិស្ស ។ ចម្លើយរបស់សិស្សគួរតែបានមកពីអ្វីដែលពួកគេបានសិក្សា ហើយអនុវត្តអំឡុងពេលវគ្គសិក្សានេះ ។ ខណៈពេលដែលសេចក្តីលម្អិតមួយចំនួននៅក្នុងការបង្រៀនអំពីបទពិសោធន៍នៃការលើកកម្ពស់ដល់ការរៀនសូត្រ អាចតម្រូវឲ្យមានការកែសម្រួលដោយផ្អែកទៅលើសិស្សទាំងអស់ក្នុងថ្នាក់ ឬសិស្សម្នាក់ៗ នោះជំហានទាំងឡាយខាងក្រោមនេះនឹងជួយអ្នក ព្រមទាំងសិស្សរបស់អ្នកឲ្យមានបទពិសោធន៍ដ៏ជោគជ័យ ៖

រៀបចំ ៖ មុនពេលចាប់ផ្ដើមវគ្គសិក្សា សូមត្រួតពិនិត្យសំណួរ ហើយដាក់ផែនការមួយសម្រាប់ការបង្រៀនអំពីការលើកកម្ពស់ដល់ការរៀនសូត្រ ។ ការរៀបចំរបស់អ្នកអាចរួមមានរបៀបណែនាំសំណួរទាំងឡាយដល់សិស្សទាំងអស់ក្នុងថ្នាក់ ហើយពន្យល់អំពីការរំពឹងទុកនានាដែលទាក់ទងនឹងបទពិសោធន៍នៃការលើកកម្ពស់ដល់ការរៀនសូត្រមានដូចជា កាលបរិច្ឆេទសម្រាប់ការត្រួតពិនិត្យ និងការបញ្ជូនចម្លើយរបស់សិស្ស ប្រវែងចម្លើយដែលចង់បាន និងទម្រង់នៃចម្លើយជាដើម ។ អ្នកត្រូវបានផ្ដល់អនុសាសន៍ឲ្យត្រួតពិនិត្យចម្លើយនីមួយៗនៃចម្លើយទាំងបីរបស់សិស្ស ទៅតាមកាលបរិច្ឆេទខុសៗគ្នាទាំងបីពេលរបស់អ្នកពេញមួយវគ្គសិក្សា ។
ដាក់ការរំពឹងទុកច្បាស់លាស់ ៖ នៅពេលចាប់ផ្ដើមវគ្គសិក្សា សូមចែកសំណៅសំណួរដល់សិស្សម្នាក់ៗដែលមាននៅលើក្រដាសណែនាំរបស់សិស្ស ។ ការធ្វើដូចនេះនឹងអនុញ្ញាតឲ្យសិស្សមានពេលគ្រប់គ្រាន់ដើម្បីសិក្សា អនុវត្ត ហើយកត់ត្រាចម្លើយរបស់ខ្លួនចំពោះសំណួរទាំងឡាយពេញមួយឆមាស ។ សូមជួយពួកគេឲ្យយល់អំពីគោលបំណងនៃបទពិសោធន៍នៃការលើកកម្ពស់ដល់ការរៀនសូត្រ ។ សូមប្រាប់ឲ្យបានច្បាស់អំពីការរំពឹងទុករបស់អ្នកលើចម្លើយរបស់ពួកគេរួមមាន កាលបរិច្ឆេទសម្រាប់ការត្រួតពិនិត្យ និងការបញ្ជូនចម្លើយទាំងនោះ ។
តាមដាន ៖ សូមបន្តលើកទឹកចិត្ត ហើយជួយសិស្សទាំងអស់ពេញមួយវគ្គសិក្សានៅពេលពួកគេខិតខំឆ្លើយសំណួរអំពីបទពិសោធន៍នៃការលើកកម្ពស់ការរៀនសូត្រ ។ សូមស្វែងរករបៀបភ្ជាប់សំណួរទាំងឡាយទៅនឹងកម្មវិធីសិក្សា ឬដាក់បញ្ចូលសំណួរទាំងនោះទៅក្នុងសកម្មភាពនានាក្នុងថ្នាក់ ។ អ្នកអាចឲ្យសិស្សឆ្លើយសំណួរនៅក្នុងថ្នាក់ ពេលចេញទៅផ្ទះវិញ ឬទាំងពីរក៏បាន ។
ពិនិត្យឡើងវិញ និង កែសម្រួល ៖ ចំពោះថ្ងៃដែលអ្នកបានដាក់កាលវិភាគថានឹងត្រួតពិនិត្យ នោះសូមអញ្ជើញ ហើយរំឭកសិស្សឲ្យយកចម្លើយនៃសំណួរដែលបានចាត់តាំងនោះមកកាន់ថ្នាក់រៀន ។ សូមអញ្ជើញពួកគេឲ្យពន្យល់ ចែកចាយ ហើយថ្លែងទីបន្ទាល់អំពីអ្វីដែលពួកគេបានរៀន និងអនុវត្តនៅក្នុងចម្លើយរបស់ពួកគេចេញពីវគ្គសិក្សានេះ ។ សិស្សអាចទទួលបានអត្ថប្រយោជន៍តាមរយៈ ការត្រួតពិនិត្យកិច្ចការរបស់គ្នាទៅវិញទៅមកដោយធ្វើការជាគូៗ ឬក្រុមតូចៗ ។ ប្រសិនបើចាំបាច់ អ្នកអាចអញ្ជើញសិស្សឲ្យកែសម្រួលចម្លើយរបស់ពួកគេឡើងវិញពីមុនបញ្ជូនឲ្យអ្នក ។
ការបញ្ជូនចម្លើយ ៖ សិស្សបញ្ចប់វគ្គបទពិសោធន៍នៃការលើកកម្ពស់ដល់ការរៀនសូត្រដោយ បញ្ជូនចម្លើយចំពោះសំណួរទាំងបីឲ្យស្របទៅតាមការរំពឹងទុករបស់អ្នក ។ ទោះជាអ្នកអាចផ្ដល់មតិកែលម្អទៅលើចម្លើយរបស់សិស្សអ្នកក្តី ក៏វាមិនចាំបាច់ត្រូវតែធ្វើដែរ ។ សូមកត់ត្រាព័ត៌មាននៅក្នុងសៀវភៅប្រតិបត្តិពិន្ទុ WISE សម្រាប់សិស្សដែលបានបញ្ជូនចម្លើយរបស់ខ្លួន ។

កំណត់ចំណាំ ៖ សូមប្រាកដថា សិស្សដែលមានតម្រូវការពិសេសដូចជា ពិការភាព ឬមានបញ្ហាផ្នែកសុខភាព ទទួលបានការសម្របសម្រួលដែលពួកគេត្រូវការដើម្បីបានរួមចំណែកនៅក្នុងការវាយតម្លៃនេះ ដោយផ្អែកលើមូលដ្ឋានស្មើភាពគ្នាដូចមិត្តភក្តិរបស់ពួកគេដែរ ។ ការសម្របសម្រួលមួយចំនួនអាចរួមទាំងការផ្តល់ឯកសារឲ្យដែលបោះពុម្ពជាអក្សរធំៗ ឬឯកសារជាសំឡេង ការអនុញ្ញាតឲ្យសិស្សឆ្លើយដោយមានជំនួយពីអ្នកដទៃ ដោយការអនុញ្ញាតឲ្យពួកគេឆ្លើយផ្ទាល់មាត់ជំនួសឲ្យការសរសេរ ឬការអនុញ្ញាតឲ្យពួកគេឆ្លើយដោយនិយាយហើយឲ្យសិស្សម្នាក់ទៀតសរសេរឲ្យ ឬដោយការថតជាសំឡេង ។ សូមចូលទៅកាន់គេហទំព័រ lds.org/topics/disability ដើម្បីស្វែងរកព័ត៌មានទូទៅក្នុងការជួយដល់បុគ្គលទាំងឡាយដែលពិការ ។

សេចក្តីណែនាំសម្រាប់សិស្ស

បទពិសោធន៍នៃការលើកកម្ពស់ដល់ការរៀនសូត្រនេះ មាននូវសំណួរទាំងឡាយដែលជាដៃគូមួយដ៏សំខាន់ចំពោះការចូលរួមចំណែកនៅក្នុងថ្នាក់របស់អ្នក និងការសិក្សាអំណានដែលបានដាក់ឲ្យអាន ។ ការខិតខំឆ្លើយសំណួរទាំងនេះពេញមួយវគ្គសិក្សានៅពេលអ្នកសិក្សា អនុវត្ដ កត់ត្រា ហើយចែកចាយគោលការណ៍ និងគោលលទ្ធិទាំងនេះ នឹងជួយអ្នកឲ្យពង្រឹងទីបន្ទាល់ ហើយធ្វើឲ្យអ្នកមានការប្រែចិត្តជឿកាន់តែខ្លាំងលើដំណឹងល្អនៃព្រះយេស៊ូវគ្រីស្ទ ។

សូមឆ្លើយសំណួរចំនួនបីក្នុងចំណោមសំណួរទាំងប្រាំពីរខាងក្រោម ដោយផ្អែកទៅលើគោលលទ្ធិ គោលការណ៍ និងព័ត៌មានដែលអ្នកបានសិក្សាអំឡុងពេលវគ្គសិក្សានេះ ។ ( គ្រូបង្រៀនរបស់អ្នកនឹងចាត់សំណួរជាក់លាក់ឲ្យអ្នក ) ។ សូមពិចារណាលើយោបល់នានាដែលមាននៅក្នុងផ្នែក « ចម្លើយ » ខាងក្រោមនេះ នៅពេលអ្នកពិចារណាអំពីចម្លើយរបស់អ្នក ។ សូមត្រៀមខ្លួនជាស្រេចដើម្បីចែកចាយអ្វីដែលអ្នកបានសិក្សា ហើយអនុវត្ត ដោយនាំយកចម្លើយរបស់អ្នកទៅកាន់ថ្នាក់រៀនតាមកាលបរិច្ឆេទសម្រាប់ការត្រួតពិនិត្យដែលគ្រូបង្រៀនរបស់អ្នកបានដាក់ឲ្យ ។

សំណួរ

តើអ្នកស្គាល់ព្រះវរបិតាគង់នៅស្ថានសួគ៌របស់អ្នកកាន់តែច្បាស់តាមរបៀបណា ?
តើអ្វីដែលបានជួយអ្នកឲ្យយល់ ហើយពឹងផ្អែកទៅលើព្រះយេស៊ូវគ្រីស្ទ និងដង្វាយធួនរបស់ទ្រង់កាន់តែខ្លាំង ?
តើទីបន្ទាល់របស់អ្នកអំពីការស្ដារឡើងវិញនៃដំណឹងល្អបានប្រែកាន់តែរឹងមាំតាមរបៀបណា ?
តើអ្វីដែលបានជួយអ្នកឲ្យកាន់តែសក្ដិសម ដើម្បីទទួលបានពរជ័យទាំងឡាយនៃព្រះវិហារបរិសុទ្ធ ?
តើសេចក្ដីពិតណាខ្លះនៅក្នុងវគ្គសិក្សានេះ ដែលបានផ្ដល់ពរដល់ជីវិតអ្នក ?
តើអ្នកពង្រឹងទីបន្ទាល់របស់អ្នកអំពី __________ ដោយរបៀបណា ? ( គ្រូបង្រៀននឹងផ្ដល់គោលការណ៍ ឬ គោលលទ្ធិសម្រាប់សំណួរនេះ ) ។
តើជីវិតរបស់អ្នកបានរីកចម្រើនយ៉ាងដូចម្តេចដែរ ដោយសារតែអ្នកបានបង្កើនការយល់ដឹងរបស់អ្នកអំពី__________? ( សូមជ្រើសរើសប្រធានបទខាងគោលលទ្ធិមួយខាងក្រោមនេះ ) ។
- ក្រុមព្រះ
- ផែនការនៃសេចក្ដីសង្គ្រោះ
- ដង្វាយធួនរបស់ព្រះយេស៊ូវគ្រីស្ទ
- ការស្ដារឡើងវិញ
- ព្យាការី និង វិវរណៈ
- បព្វជិតភាព និង កូនសោនៃបព្វជិតភាព
- ពិធីបរិសុទ្ធ និងសេចក្តីសញ្ញា
- អាពាហ៍ពិពាហ៍ និង គ្រួសារ
- ព្រះបញ្ញត្តិ

ចម្លើយ

សូមគិតដល់ការដាក់បញ្ចូលចំណុចខាងក្រោមនេះនៅក្នុងចម្លើយនីមួយៗ ៖

ស្វែងរកគោលលទ្ធិមួយ ដែលមានអត្ថន័យកាន់តែជ្រាលជ្រៅចំពោះអ្នកនៅពេលអ្នកចូលរៀនក្នុងវគ្គសិក្សានេះ ។
ពន្យល់គោលលទ្ធិ នោះដោយប្រើពាក្យពេចន៍របស់អ្នកផ្ទាល់ វគ្គបទគម្ពីរ ឬប្រសាសន៍របស់ព្យាការីដែលកំពុងរស់នៅ ។
ចែកចាយបទពិសោធន៍ ដែលថ្មីៗនេះអ្នកបានទទួលអារម្មណ៍ពីអំណាចនៃគោលលទ្ធិនោះនៅក្នុងជីវិតរបស់អ្នក ។
ចែកចាយ អំពីរបៀបដែលអ្នកបានប្រែចិត្តជឿកាន់តែខ្លាំងលើដំណឹងល្អរបស់ព្រះគ្រីស្ទ ។

កំណត់ចំណាំ ៖ ប្រសិនបើអ្នកមានតម្រូវការចាំបាច់ ដូចជា ពិការភាព ឬ មានបញ្ហាផ្នែកសុខភាព សូមពិភាក្សាជាមួយគ្រូរបស់អ្នក ដើម្បីគាត់អាចជួយសម្របសម្រួលឲ្យអ្នកសម្រេចបានបទពិសោធន៍នេះ ។